OSEIA
1 Iet mahsen me Siohwa ketin mahsanihong Oseia* nein Peeri ni mwehin Usaia,+ Sodam,+ Ahas+ oh Esekaia,+ nanmwarkien Suda kan+ oh ni mwehin Seropoham+ nein Sohas,+ nanmwarkien Israel. 2 Ni ahnsou me Siohwa ketin tepida mahsanih sapwellime mahsen ong aramas ako sang Oseia, Siohwa ahpw ketin mahsanihong Oseia: “Kohla, pwoudikihda lih emen me pahn kin nenek* oh nainekihda seri kan sang ni eh kin nenek,* pwehki sang ni nenek* sahpwo sohla douluhl idawehn Siohwa.”+
3 Ih eri kohla oh pwoudikihda Komer nein Diplaim serepein, oh e liseianda oh naitikihong ih pwutak emen.
4 Siohwa eri ketin mahsanihong ih: “Kihong ede Sesreel,* pwe mwurin ahnsou kis I pahn kapwukoahki kadaudok en Sehu kan+ wiewiahn kakerehdi nta nan Sesreel, oh I pahn kamwomwala wehin Israel.+ 5 Rahno I pahn kauwehla kesik ketieu en Israel nan Wahun* Sesreel.”
6 Komer pwurehng liseianda oh naitikihada serepein men. Oh Koht ketin mahsanihong ih: “Kihong ede Lo-ruama,* pwe I sohla pahn kasalehda kadek kalahngan+ ong wehin Israel, pwehki I uhdahn pahn kasareirailla.+ 7 Ahpw I pahn kasalehda kadek kalahngan ong wehin Suda,+ oh I pahn kapitirailla, ngehi Siohwa me ar Koht;+ I sohte pahn kapitkinirailla kesik ketieu de kedlahs de mahwen de oahs kan de soundak oahs kan.”+
8 Mwurin Lo-ruama eh mweisang dihdi, e liseianda oh naitikihada pwutak emen. 9 Ih eri ketin mahsanih: “Kihong ede Lo-ammai,* pwehki kumwail kaidehn nei aramas oh I sohte pahn wiahla amwail Koht.
10 “Oh uwen tohtohn mehn Israel kan* pahn rasehng pihken oaroahr kan, me sohte kak sosohngdi de wadawadedi.+ Oh nan wasa me I ndaiong irail, ‘Kumwail kaidehn nei aramas,’+ I pahn ndaiong irail, ‘Kumwail me serien Koht ieias.’+ 11 Oh aramas en Suda oh Israel kan pahn kohpene ni minimin+ oh piladahng pein irail emen kaun oh kohieisang nan sahpwo, pwe e pahn wia rahn kesempwal ehu ong Sesreel.+
2 “Ndaiong riomw pwutak kan, ‘Nei aramas akan!’*+
Oh riomw serepein kan, ‘Kowe lih me ale kadek kalahngan!’*+
2 Kedipa omw nohno; kedipa ih,
Pwe kaidehn ih ei pwoud+ oh kaidehn ngehi eh pwoud.
3 De I pahn kakilisawihada oh wiahiong en duwehte rahn me e ipwidi,
Wiahiong en duwehla sapwtehn ehu,
Wiahiong en duwehla sahpw ehu me sohte pihl,
Oh kahrehiong en mehkihla eh men nimpil.
4 Oh I sohte pahn kasalehda kadek kalahngan ong nah seri kan,
Pwe irail seri kei me kohsang netiki paliwar.*
5 Pwe arail nohno kin netiki paliwere.*+
Ih me liseiankinirailda, wiadahr mwekid kanamenek,+ pwe e nda,
‘I pahn pwakihowei ei mwohnlimpoak kan,+
Irail me kihdo kenei pilawa oh nimei pihl,
Ei likou wunen sihpw oh ei likou linen, ei leh oh nimei wain.’
6 I pahn perehkihla omw ahl kehl tekatek ehu;
Oh I pahn kauwada dihd takai ehu pwehn kauhdi ih,
Pwe en sohte kak diar eh ahl akan.
7 E pahn pwakihowei eh mwohnlimpoak kan, ahpw e sohte pahn koanoairaildi;+
E pahn rapahkin irail, ahpw e sohte pahn diar irail.
8 E sohte pohnese me ngehi me kihong ih krein,*+ wain kapw oh leh,
Oh ngehi me kihong ih silper tohto
Oh kohl, me re doadoahngkihong Paal.+
9 ‘Kahrehda, I pahn pwurala oh kihsang ei krein ni ahnsoun dondol
Oh ei wain kapw ni ahnsoun rikpene,+
Oh I pahn waikasang ei likou wunen sihpw oh ei likou linen me pwaindi eh kilisou.
10 Eri I pahn kakilisawihada mwohn mesen eh mwohnlimpoak kan,
Oh sohte me pahn doarehla ih sang nan pehi.+
11 I pahn katokehdi eh peren koaros,
Eh kasarawi kan,+ eh maram pwul kan, eh sapad kan oh eh ahnsoun kasarawi kan koaros.
12 Oh I pahn kauwehla eh tuhkehn kreip kan oh eh tuhke pik kan, me e koasoiahki:
“Ih pweinei en mepwukat, me ei mwohnlimpoak kan kihong ie”;
I pahn wiahkihla mepwukat nanwel ehu,
Oh mahn lawalo en nansapw kan pahn kadallehla mepwukat.
13 I pahn kapwukoahki ih ahnsou kan me e wiahda meirong kan ong sansal en Paal kan,+
Ahnsou kan me e kapwatahkihda pein ih rihng kan oh mehn kapwat kan oh kin pwakihowei eh mwohnlimpoak kan,
Oh ngehi me e manokehla,’+ Siohwa me ketin mahmahsen.
14 ‘Eri I pahn kadeke ih,
I pahn kahluwalahng ih nan sapwtehn,
Oh I pahn koasoi pwehn sair eh mohngiong.
15 Mwurin mwo, I pahn kapwurehiong ih eh mwetin kreipo,+
Oh kihong ih Wahun* Akor+ nin duwen ewen kehl ong koapworopwor;
E pahn sapeng wasao duwehte ahnsou me e pwulopwul,
Duwehte rahn me e pedoisang nan sapwen Isip.+
16 Oh rahno ke pahn ekerkin ie Ei pwoud,
Ke sohla pahn ekerkin ie Ei soumas,’* Siohwa me ketin mahmahsen.
17 ‘I sohte pahn mweidohng ih en koasoia+ eden sansal en Paal kan,
Oh e sohla pahn tamataman adarail kan.+
18 Oh ong kamwahupen nei aramas akan, rahno I pahn wiahda inou lap ehu rehn mahn lawalo en nansapw akan,+
Oh rehn menpihr en pahnlahng kan oh mahn me kin kerep nanpwel;+
I pahn kesehsang sahpwo kesik ketieu oh kedlahs oh mahwen,+
Oh I pahn wiahiong irail en wendi* ni ar sohte perki mehkot.+
19 I pahn wiahkinuhkala ei pwoud kohkohlahte;
Oh I pahn inoukihda en kasalehiong uhk pwung oh pwung pahrek,
Limpoak loalopwoat oh kadek kalahngan.+
20 I pahn inoukihda me I pahn lelepek ong uhk,
Oh ke uhdahn pahn esehla Siohwa.’+
21 Siohwa ketin mahsanih, ‘Rahno I pahn sapeng,
I pahn sapeng nanleng,
Oh nanleng pahn sapeng sampah;+
22 Oh sampah pahn sapeng krein oh wain kapw oh leh;
23 I pahn kamwarak nei aramas akan* nin sampah duwehte werentuhke,+
Oh I pahn kasalehda kadek kalahngan ong ih me sohte ale kadek kalahngan;*
I pahn ndaiong irail kan me kaidehn nei aramas:* “Kumwail me nei aramas,”+
Oh re pahn nda: “Komwi me at Koht.”’”+
3 Siohwa eri ketin mahsanihong ie: “Pwurehng kohla, poakohng liho me emen ohl tohrohr kin poakohng oh me kin kamwahl,+ duwehte Siohwa eh ketin poakohng aramas en Israel kan+ ni ar sohpeiong koht teikan+ oh mwahuki meirongki keik reisin kan.”*
2 Eri I pwainkihda liho mwohni silper 15 oh ehu elep en sosohng en ohmer* en parli. 3 Ngehi eri ndaiong ih: “Ke pahn wiewiahte ahi erein rahn tohto. Ke sohte pahn netiki paliweromw,* oh ke sohte pahn wendi rehn emen ohl tohrohr oh I pahn wiahiong uhk soahngohte.”*
4 Met pwehki erein ahnsou reirei* aramas en Israel kan pahn koukousoan ni eh sohte nanmwarki men,+ lapalap men, meirong, uhr sarawi oh ihpod+ oh sansal en derapim kan.*+ 5 Mwurin mwo aramas en Israel kan pahn pwurodo oh rapahki Siohwa arail Koht+ oh Depit ar nanmwarki,+ oh re pahn kohdo wie rerrer ong Siohwa pwe ren alehdi sapwellime kupwuramwahu ni kaimwiseklahn rahn akan.+
4 Aramas en Israel kan, rong mahsen en Siohwa,
Pwe mie sapwellimen Siohwa repenpwung ong tohn sahpwo,+
Pwehki sohte mie mehlel de pil limpoak loalopwoat de pil loalokong duwen Koht nan sahpwo.+
2 Kahula likamw oh lokaia likamw+ oh kamaramas+
Oh pirap oh kamwahl+ tohtohla,
Oh wiewiahn kakerehdi nta kin kalapw wiawi.+
3 Ihme kahrehda sahpwo pahn mwahiei+
Oh tohn sahpwo koaros pahn luwetala;
Mahn lawalo en nansapw kan oh menpihr en pahnlahng kan,
Pil mwahmw en nansed akan, pahn mehla.
4 “Ahpw, sohte me pahn akamaiong de panawih aramas akan,+
Pwe omw aramas akan duwehte irail me kin akamaiong samworo men.+
5 Eri ke pahn dipekelekel ni rahn,
Oh soukohp men pahn iang uhk dipekelekel, duwehte ma e nipwong.
Oh I pahn kamwomwala omw nohno.
6 Nei aramas akan pahn mwomwla, pwehki sohla loalokong.
Pwehki ke soikala loalokong,+
I pil pahn soikuhkala pwe ken dehr papah nin duwen nei samworo men;
Oh pwehki ke manokelahr kosonned* en omw Koht,+
I pahn manokehla noumw seri kan.
7 Uwen ar tohtohla, iei pil uwen ar kin wia dihp ong ie.+
I pahn wekidala ar lingan ong ni kanamenek.*
8 Re* kin kamworourouihala pein irail* ni nei aramas akan ar kin dipada,
Oh re kin noahroke ar sapwung kan.
9 Dahme pahn wiawihong aramas akan oh dahme pahn wiawihong samworo kan pahn duwepenehte;
I pahn kapwukoahkin irail arail wiewia kan,
Oh I pahn wadohng pohrail imwilahn arail wiewia kan.+
10 Re pahn mwenge ahpw sohte medla.+
12 Nei aramas akan peki sawas rehn arail dikedik tuhke kan,
Re kin wia dahme neirail sokon* kin ndaiong irail;
Pwehki ineng en netiki paliwar* kasalongeirailla,
Oh sang ni ar netiki paliwar* re kahng uhpahiong arail Koht.
13 Re kin wia meirong pohn kadoken nahna kan,+
Oh re kin wiahda meirong kan en edinieida pohn dohl akan,
Pahn tuhke ohk* kan oh tuhke sdoraks kan* oh tuhke laud koaros,+
Pwehki ar mweteh kan me mwahu.
Ihme kahrehda noumwail serepein kan kin netiki paliwararail*
Oh en noumwail pwutak kan pwoud kan kin kamwahl.
14 I sohte pahn kapwukoahki noumwail serepein kan pwehki ar kin netiki paliwararail,*
Oh en noumwail pwutak kan pwoud kan pwehki ar kin kamwahl.
Pwe ohl akan kin iangada lihen netiki paliwararail kan
Oh wia meirong rehn lihen netiki paliwararail nan imwen kaudok kan;
Soangen aramas pwukat me sohte ahneki koahiek en wehwehki ire kan+ pahn mwomwla.
16 Pwe rasehng kou keptakai men, Israel keptakailahr.+
Ia duwe, Siohwa pahn ketin sinsile irail rasehng sihpw wol pwulopwul men nan mohs mahsahs ehu?*
17 Epraim kin kaudokiong dikedik kan.+
Eri mweidohng ih!
Oh eh kaun akan* kin perenki wia mwekid kanamenek kan.+
19 Kisiniengo pahn kidimkihpene ih* eh pehnpihr kan,
Oh re pahn namenengkihla arail meirong kan.”
5 “Kumwail samworo kan,+ rong met,
Aramas en Israel kan, rong kanahieng,
Kumwail tohn tehnpesen nanmwarki, rong,
Pwe kumwail pahn pakadeikda;
Pwehki kumwail wia lidip ehu nan Mispa
Oh uhk ehu me kohpeseng pohn Tapor.+
2 Oh irail me pwupwulasangehr dahme pwung* kin uhdahn iang pidada doadoahk en kamakamala,
Oh I pahn panawih irail koaros.
3 I ese Epraim,
Oh Israel sohte kak ruksang ie.
4 Arail wiewia kan kahrehda ar sohte kak pwurala rehn arail Koht,
Pwehki re kin mwekidki ineng en netiki paliwar;*+
Oh re sohte kin pohnese Siohwa.
5 Pohnmwahso en Israel kedipahda ih;*+
Israel oh Epraim dipekelekel nan ara sapwung,
Oh Suda iang ira dipekelekel.+
6 Re kahre neirail pelin sihpw kan oh neirail pelin kou kan oh kohla rapahki Siohwa,
Ahpw re sohte kak diarada ih.
E ketin dohlahsang irail.+
7 Re pangalahr Siohwa,+
Pwe re wialahr semen serihn mehn liki kan.
Nan erein sounpwong ehu re pahn kedendella* iangahki arail sohso kan.*
8 Peuk mehn pepeuk*+ ehu nan Kipea, sowi ehu nan Rama!+
Werki wer en mahwen nan Pedapen+—mwurin kowe, Pensamin!
9 Epraim, ke pahn wiahla mehkot kamasepwehk ehu ni rahnen kadeik.+
I kasansaledahr dahme uhdahn pahn wiawi nanpwungen keinek en Israel kan.
10 Lapalap kan en Suda duwehte irail me kin kamwakid pehs en sahpw.+
I pahn wudekihdi ei engieng pohrail rasehng pihl.
11 Epraim wie lokolok, ni pwung pahrek e mwutpene,
Pwe e koasoanehdi en idawehnla eh imwintihtio.+
12 Eri I duwehte kisin kariskahn* ong Epraim
Oh I duwehte mehkot mwoasoahngot ong aramas en Suda kan.
13 Ni Epraim eh kilangada eh soumwahu, oh Suda kilangada eh kens,
Epraim kohla Asiria+ oh kadarala meninkeder kan rehn nanmwarki lapalap men.
Ahpw e sohte kak kamwahwihkumwailla,
Oh e sohte kak kamwahwihala amwail kens.
14 Pwe I pahn duwehte laion pwulopwul men ong Epraim,
Oh duwehte laion kehlail men* ong aramas en Suda kan.
15 I pahn kohkohla oh pwurala nan ei wasa lao re lokolongki kalokepen diparail,
Ni ar mi nan apwal, re pahn rapahkin ie.”+
6 “Kohdo, oh kitail pwuralahng rehn Siohwa,
Pwe e ketin tehrkitailpeseng,+ ahpw e pahn ketin kamwahwihkitailla.
E ketin kauweikitailla, ahpw e pahn ketin kidimpene atail ohla kan.
2 E pahn ketin kakehleikitailda mwurin rahn riau.
Ni kesiluhwen rahn e pahn ketin kapwourkitailda,
Oh kitail pahn momour mwohn silangi.
3 Kitail pahn ese, kitail pahn ngoangki esehla Siohwa.
E uhdahn pahn ketido rehtail rasehng dakadahn ketipin nimenseng;
E pahn ketido rehtail rasehng keteu me mweremwer,
Rasehng ahnsoun keteu en mwuhr* me kin kalamwurih sampah.”
4 “Epraim, dahme I pahn wiahiong uhk?
Suda, dahme I pahn wiahiong uhk?
Pwe amwa limpoak loalopwoat rasehng depwek kan nimenseng,
Rasehng pwoaik me kin mwadang sohrala.
5 Ihme kahrehda I pahn lupukiraildi ni ei doadoahngki soukohp kan;+
I pahn kemehkinirailla mahsen en doauesei kan.+
Oh kadeik kan me kohdiong pohmw pahn lingaling rasehng marain ehu.+
6 Pwe I kin perenkihda limpoak loalopwoat,* a kaidehn meirong,
Oh loalokong me pid duwen Koht, a kaidehn meirong isihs kan me pwonte isihsla.+
7 Ahpw irail, duwehte aramas kei, me kauwehla inou lapo.+
Re pangiehla wasao.
9 Pwihnen samworo kan rasehng pwihnen aramas loallap kei me rukuruk awiawih aramas emen.
Re kin kamaramas pohn ahlo nan Sekem,+
Pwe arail wiewia kan me kanamenek.
10 I kilangehr soahng suwed ehu nan wehin Israel.
11 Oh Suda, ahnsoun rahk ehu koasoandier ong kowe,
Ahnsou me I pahn kapwurepene nei aramas me selidi kan.”+
7 “Ni ahnsou me I pahn kamwahwihala Israel,
En Epraim sapwung pil sansalda,+
Oh pil en Sameria suwed.+
Pwe re kin likamw;+
Lipirap akan wehdpeseng ihmw kan oh pwihnen aramas loallap kan kulih dipwisou kan liki.+
2 Ahpw re sohte kin medewe me I pahn tamataman ar suwed kan koaros.+
Met ar wiewia kan kapilirailpene;
Mepwukat mihte mwohn silangiet.
3 Re kin kaperenda nanmwarkio sang ar suwed,
Oh kaperenda ar lapalap akan sang ar widing.
4 Irail koaros kin kamwahl,
Lullul rasehng kisiniei nan mehn uhmw ehu me sounwia pilawa men saunda,
Me kin uhdihsang arih kisinieio mwurin eh kapalada pilawao lao e mpwospeseng.
5 Ni rahnen atail nanmwarkio, lapalap akan soumwahuda
—Re lingeringerda pwehki wain.+
Nanmwarkio kapalahr peho rehn sounkepit kan.
6 Pwe re kohkihdo mohngiong kan me lullul rasehng mehn uhmw ehu.*
Pwohng ehu pwon sounwia pilawa men kin memeir;
Nimenseng mehn uhmwo kin lulda rasehng mpwulen kisiniei ehu.
7 Irail koaros karakar rasehng mehn uhmw ehu,
Oh re kadallehla ar kaun akan.*
8 Epraim ehuong wehi kan.+
Epraim duwehte keik pwonopwon ehu me apalihte umwda.
9 Mehn keiru kan kihsangehr eh kehl,+ ahpw e sehse.
Oh e moangepwetalahr, ahpw e sehse.
10 Pohnmwahso en Israel kedipahda ih,+
Ahpw re sohte pwurodo rehn Siohwa arail Koht,+
De re pil sohte rapahki ih mendahki mepwukat koaros.
11 Epraim rasehng mwuroi pweipwei men, sohte ahneki lamalam mwahu.*+
Re likweriong Isip;+ re kolahr Asiria.+
12 Sohte lipilipil wasa me re kohla ie, I pahn kihpeseng ei uhko pohrail.
I pahn parukiraildi rasehng menpihr en pahnlahng kan.
I pahn panawih irail nin duwen kehkehlik me kohieng arail mwomwohdiso.+
13 Meid suwediong irail, pwe re tangasang ie!
Kamwomwala ong irail, pwe re dipadahr ong ie!
I onopadahr en kasaledekirailla,* ahpw re kinehsang ie likamw.+
14 Sang nan ar mohngiong re sohte likweriong ie peki sawas,+
Mendahki ar kin wie mwahmwahiei pohn ar peht kan.
Re kin leke kilirail kan pwehn peki krein oh wain kapw;
Re uhwongiehda.
15 Mendahki I kin panawih irail oh kakehlakahda pehrail kan,
Re kin uhwong ie, koasoakoasoane dahme suwed.
16 Re wekidalahr elen arail mour, ahpw kaidehn ong mehkot ileile;*
Re sohte likilik rasehng selin kesik ketieu ehu me sohte teng.+
Ar lapalap akan pahn mehkihla kedlahs pwehki ar lokaia uhwong kan.
Pwehki met re pahn wiahla mehn kepit ehu nan sapwen Isip.”+
8 “Kihong mehn pepeuk ehu* ni ewomwen!+
2 Re kin likweriong ie, ‘Maing at Koht, kiht Israel, esei komwi!’+
3 Israel soikalahr dahme mwahu.+
Mweidohng imwintihti men en pwakih ih.
4 Re idihadahr nanmwarki kan, ahpw kaidehn sang rehi.
Re idihadahr lapalap akan, ahpw I sohte pohnese irail.
5 Sameria, I soikalahr noumw koupwulo.+
I engieng kowahlap pahrail.+
Ia erein ar pahn sohte kak kamwakeleiraildahsang dihp wet?
6 Pwe met tepisang Israel.
Tohndoadoahk saman men me wiahda, oh met kaidehn Koht;
Koupwul en Sameria pahn kamweremwerdi.
Sohte kirikirihn krein ehu me kin kapwarehda krein mah;+
Dahme kin wosada sohte pahn kapwarehda pilawa amas.
Ma mie me kohda, mehn liki kan* pahn kadallehla.+
8 Imwintihtio pahn kadallehla Israel.+
Met re pahn mi nan wehi kan,+
Rasehng pwohl soh katepe ehu.
9 Pwe re kohdalahr Asiria,+ rasehng dongki lawalo men me wiewia pein ah.
Epraim pwain lih akan ren wia ar mwohnlimpoak.+
10 Mendahki mwohnlimpoak kan me re pwain kohsang wehi kan,
Met I pahn kihirailpene;
Re pahn tepida lokolok+ pwehki wisik toutou me kohsang nanmwarki oh lapalap akan.
11 Pwe Epraim katohtohwehlahr pei sarawi kan oh wiahda dihp.+
Re doadoahngki ar pei sarawi kan pwehn wiahda dihp.+
13 Re wiahda meirong kisakis kan ong ie, oh re kin tungoalehla uduko,
Ahpw Siohwa sohte kin ketin kupwurperenkin irail.+
Met e pahn ketin tamataman ar sapwung oh kalokehkin irail diparail kan.+
14 Israel manokelahr Sounwiepeo+ oh kauwadahr imwen kaudok kan,+
Oh Suda katohtohwehlahr kahnimw kehl kehlail kan.+
Ahpw I pahn kadarala kisiniei nan eh kahnimw kan,
Oh e pahn karongehla imwen doulik en ehuehu kahnimw ko.”+
9 “Israel, ke dehr perenda,+
Ke dehr perenda duwehte aramas ako.
Pwe sang ni omw kin netiki paliweromw,* ke salongalahsang omw Koht.+
Ke kin perenki pweinen netiki paliwar me ke kin alehdi ni wasahn kihsang kilin krein kan koaros.+
2 Ahpw wasahn kihsang kilin krein oh wasahn tiak kreip sohte pahn kamwenge irail,
Oh e pahn sohte nimarail wain kapw.+
3 Re sohte pahn usehlahte koukousoan nan sapwen Siohwa;+
Ahpw, Epraim pahn pwurala Isip,
Oh re pahn tungoale dahme samin nan Asiria.+
4 Re sohla pahn wudekihdi meirong en wain kan ong Siohwa;+
Arail meirong kan sohte pahn kaperenda ih.+
Re duwehte pilawa en mwahiei;
Irail koaros me tungoale met pahn kasaminehla pein irail.
Pwe kanarail pilawa ongete pein irail;
Met sohte pahn wisikdo nan tehnpesen Siohwa.
5 Dahme kumwail pahn wia ni rahnen mihting,*
Ni rahnen kasarawi en Siohwa?
6 Pwe kilang! re pahn anahne tang pwehki kamwomwala.+
Isip pahn kihirailpene,+ oh Mempis pahn sarepiraildi.+
Dihpw tekatek kan pahn ahnekihla ar soahng kesempwal en silper kan,
Oh tuhke tekatek kan pahn mihla nan ar impwal kan.
Neirail soukohp pahn wia me pweipwei men, oh aramas me kose me e kin koasoakoasoi sang Koht pahn sahliella;
Pwehki omw sapwung me tohto, kailok ong uhk me tohto.”
8 Sounsilasil+ en Epraim kin mihmi rehn ei Koht.+
Ahpw met elen nah soukohp kan koaros+ kin rasehng en sounpoar menpihr men lidip;
Mie kailok nan tehnpesen eh Koht.
9 Re uhdahn suwedla ni ar wiewia kan, duwehte ni rahnen Kipea.+
E pahn ketin tamataman ar sapwung oh kalokehkin irail diparail kan.+
10 “I diarada Israel duwehte ei diarada kreip kan nan sapwtehno.+
I kilangada samamwail mehn mahs ako duwehte ei kilangada tepin wahn pik nan tuhke pik ehu.
Ahpw re kolahng Paal en Pihor;+
Re inoukihong pein irail rehn soahng kanameneko,*+
Oh re kasautla duwehte koht me re kin poakohngo.
11 Lingan en Epraim pihrla rasehng menpihr men;
Sohla neitik, sohla liseian oh sohla ahpada.+
12 Mehnda ma irail apwalihada seri kan,
I pahn kihsang irail lao sohla me luhwehdi;+
Ei, meid suwediong irail ni ei sohpeisang irail!+
13 Epraim me poad nan mohs ehu duwehte Dair ong ie;+
Met Epraim pahn wahieido nah seri kan pwe ren kamakamala.”
14 Maing Siohwa, ketikihong irail dahme komw pahn ketikihong irail;
Komw ketin mweidohng neirail seri kan en iohla oh en sohla pilen arail dihdi kan.
15 “Ar suwed kan koaros mihmi nan Kilkal,+ oh pwehki met, wasao I kalahdekinirailla.
I pahn kasareirailla sang ni tehnpeseio pwehki ar wiewia suwed kan.+
I sohla pahn poakohng irail;+
Arail lapalap akan koaros me keptakai.
16 Epraim pahn paldi.+
Kalewarail kan pahn madada, oh re sohte pahn wa.
Mehnda ma re neitik, I pahn kemehla kadaudokarail kesempwal kan.”
17 Ei Koht pahn ketin soikirailla,
Pwe re sohte kin rong ih,+
Oh re pahn duwehla irail me rukurukseli nan wehi kan.+
10 “Israel iei tuhkehn kreip sakanakan ehu* me kin wa.+
Uwen tohtohlahn wah kan, ih uwen eh kin katohtohwehla eh pei sarawi kan;+
Uwen mwahu en wahn sapweo, ih uwen eh uhr sarawi kan+ eh kin linganla.
Mie emen me pahn kauwehla ar pei sarawi kan oh kauwehla ar uhr sarawi kan.
3 Met irail pahn nda, ‘Sohte atail nanmwarki,+ pwe kitail sohte lemmwiki Siohwa.
Oh dahme nanmwarki men kak wiahiong kitail?’
4 Re kin koasoia koasoi mwahl kan, wiahda kahula likamw kan+ oh wiahda inou lap kan;
Eri kadeik me pahn kohda rasehng dihpw suwed pwoisin kan nan uluhl en mwaht.+
5 Tohn Sameria kan pahn masepwehkada pwehki dikedik koupwul en Pedapen.+
Aramas akan pahn mwahieiki ih,
Oh pil samworo en koht en liki kan me kin perenki ih oh eh lingan pahn mwahieiki,
Pwe e pahn kalipilipasang irail.
6 E pahn wisikdohng Asiria nin duwen kisakis ehu ong nanmwarki lapalap men.+
Epraim pahn namenekla,
Oh Israel pahn namenekla pwehki kaweid me e idawehnlahr.+
8 Wasa ile kan en Pedapen,+ dipen Israel,+ pahn kamwomwmwomwla.+
Dihpw tekatek kan oh tuhke tekatek kan pahn keirda pohn arail pei sarawi kan.+
Aramas akan pahn ndaiong nahna kan, ‘Pwainkitedi!’
Oh ong dohl akan, ‘Pwupwudiong poht!’+
9 Israel, sangete rahnen Kipea, ke kin dipada.+
Wasao re sohte wekila.
Mahwen sohte kamwomwala douluhl aramas suwed kan* nan Kipea.
10 I pil pahn panawih irail ni ahnsou me I kupwurki.
Oh aramas akan pahn kohpene uhwong irail,
Ni ar sapwung riau ko eh pirapirdi rehrail.*
11 Epraim koupwul lih kaiahnda men me perenki kihsang kilin krein,
Eri I sohte kihdiong mehn wisik ehu pohn tepinwere kaselel.
Met I pahn wiahiong emen en dake* Epraim.+
Suda pahn deipwel; Seikop pahn kamwuterekihada ong ih.
12 Kamwarak werentuhkehn pwung oh dolung limpoak loalopwoat.
Dehkada amwail mwaht kan me saikinte deideida+
Nindoken eh mihmiehte ahnsoun rapahki Siohwa,+
Lao e ketido oh ketin kaweid kumwail ni pwung.+
13 Ahpw kumwail deipweliada me suwed,
Kumwail dolung sapwung,+
Oh kumwail kin tungoale wahn widing;
Pwe ke kin koapworopworki pein omw ahl,
Oh tohtohn noumw karis en sounpei kan.
14 Mwoarong ehu pahn kodohng noumw aramas akan,
Oh omw kahnimw kehl kehlail kan koaros pahn kamwomwmwomwla,+
Duwehte Salman eh kamwomwala imwen Arpel,
Ni rahnen mahwen ni ahnsou me nohno kan kamakamala ni lemei iangahki neirail seri kan.
15 Pedel, ih met me pahn wiawihong kumwail,+ pwehki amwail uhdahn suwed.
Nin sohrahn nanmwarkien Israel uhdahn pahn kasohrala.”*+
11 “Ni ahnsou me Israel wia kisin pwutak men, I kin poakohng ih,+
Oh I malipedohr nei pwutak+ sang Isip.
3 Ngehi me kaiahnehkihda Epraim alu+ oh I kolkin irail pehi kat;+
Ahpw re sohte pohnese me I kamwahwihiraillahr.
4 I doadoahngki kadek oh limpoak duwehte sahl*+ pwe I en kahreiraildo rehi;
Oh I pwekadahsang mehn wisiko ni tepinwararail kan,
Oh I wahdo mwenge ong emenemen ni kadek.
5 Re sohte pahn pwuralahng sapwen Isip, ahpw Asiria pahn wia ar nanmwarki,+
Pwehki re kahng pwurodo rehi.+
6 Oh kedlahs pwoat pahn pele eh kahnimw kan+
Oh kauwehla lepin tuhkehn katenge eh ewen kehl kan oh kadalleirailla pwehki ar pilahn mwersuwed kan.+
7 Nei aramas akan kin uhlahngete ren salelepek ong ie.+
Mendahki re eker irail ren pwuradahla powe,* sohte me uhda.
8 Epraim, ia duwen ei kak keseiukala?+
Israel, ia duwen ei kak panguhkala?
Ia duwen ei kak wiahiong uhk duwehte me I wiahiong Adma?
Ia duwen ei kak wiahiong uhk en duwehla Sepoiim?+
9 I sohte pahn kasalehda ei engieng kowahlap.
I sohte pahn pwurehng kamwomwala Epraim,+
Pwe ngehi Koht kaidehn aramas,
Me Sarawi me wie ketiket rehmwail;
Oh I sohte pahn kohdo uhwong uhk ni engieng.
10 Re pahn alu mwurin Siohwa, oh e pahn ketin wer rasehng laion men;+
Ni eh kin ketin wer, nah seri kan pahn kohdohsang palikapi wie rerrer.+
11 Re pahn rerrer duwehte menpihr men ni ar pedoisang nan Isip,
Duwehte mwuroi men ni ar pedoisang nan sapwen Asiria;+
Oh I pahn koasoaneiraildi nan imwarail kan,” Siohwa me ketin mahmahsen.+
12 Epraim kapilkiniepenehr likamw kan,
Oh kapilkipene aramas en Israel kan widing.+
12 “Epraim koapworopworkihla kisinieng.*
E kin pwakipwakih kisinieng en palimese rahn ehu pwon.
E kin katohtohwehla likamw kan oh tiahk lemei.
Re wiahda inou lap ehu rehn Asiria+ oh wahla leh Isip.+
2 Mie sapwellimen Siohwa repenpwung ong Suda;+
E pahn ketin kapwukoahki Seikop eh ahl akan,
Oh e pahn ketin dupukohng ih nin duwen eh wiewia kan.+
4 E usehlahte siaiong tohnleng men oh powehdi.
E sengiseng oh peki eh kupwuramwahu.”+
E* ketin diarada ih nan Pedel, oh wasao E ketin mahseniong kitail,+
5 Siohwa, Koht en kaunen karis en sounpei,+
Siohwa iei mware me aramas akan pahn tamataman.+
6 “Eri pwurodo rehn omw Koht,+
Kolokol limpoak loalopwoat oh pwung pahrek,+
Oh ahnsou koaros koapworopworki omw Koht.
7 Ahpw mie mehn tenek sapwung kan nan pehn sounnetinet;
E kin perenki widing.+
Oh nan ei doadoahk laud koaros, re sohte pahn diarada mehkot sapwung de dihp rehi.’
9 Ahpw ngehi me Siohwa omw Koht sangete nan sapwen Isip.+
I pahn pwurehng wiahiong uhk ken kousoan nan impwal kan
Duwehte ni rahn akan en ahnsou me kileldi.*
10 I mahseniong soukohp kan,+
I katohtowehla ar kaudiahl kan,
Oh I mahsanih karasaras kan ni ei doadoahngki soukohp kan.
11 Nan Kilead mie widing*+ oh sohte mehlel.
Nan Kilkal re meirongkihla kouwol kan,+
Oh ar pei sarawi kan duwehte koasoakoasoak en takai kan nan uluhl en mwaht.+
12 Seikop tangalahng nan sapwen* Aram;*+
Israel+ papah wasao pwehn alehdi eh pwoud,+
Oh e sinsile sihpw akan pwehn alehdi eh pwoud.+
13 Siohwa ketin wahdo Israel sang Isip ni eh ketin doadoahngki soukohp men,+
Oh e ketin sinsile ih ni eh ketin doadoahngki soukohp men.+
14 Epraim uhdahn kansensuwedihadahr Koht;+
E pwukoahkihte dipen kamaramas;*
Eh Kaun pahn ketin dupungkihong ih kanamenek me e wadohng Ih.”+
13 “Ni ahnsou me Epraim kin lokaia, aramas akan kin rerrer;
E kesempwal nan Israel.+
Ahpw e dipada pwehki e kaudokiong Paal+ oh mehla.
2 Met re kapatahiong diparail
Oh wiahkihda neirail silper sansal mete kan;+
Re kin koahiek en wiahda dikedik kan, doadoahk en me saman koaros.
Re kin ndaiong irail, ‘Aramas me kin wia meirong en metik koupwul kan.’+
3 Eri re pahn duwehla depwek en nimenseng kan,
Rasehng pwoaik me kin mwadang sohrala,
Rasehng kilin krein me melimel ehu ipirala sang nan wasahn kihsang kilin krein,
Oh rasehng ediniei me kohdahsang nan pwoahr en pohn ihmw.
4 Ahpw ngehi me Siohwa omw Koht sangete nan sapwen Isip;+
Sohte Koht emen me ke ese ahpw ngehite,
Oh sohte sounkomour+ likin ngehi.
5 I eseiukala nan sapwtehno,+ nan sahpw me sohte keteu.
6 Re medla pwehki wahnsahpw akan,+
Re medla oh ar mohngiong aklapalapala.
Eri re manokeiehla.+
7 I pahn duwehla laion pwulopwul men ong irail,+
Duwehla lepard men me rukurukseli ni keilen ahl.
8 I pahn kodohng irail rasehng pehr men me wah kan salongasangehr,
Oh I pahn tehrpeseng mwaremwarerail kan.
I pahn kadalleirailla wasao rasehng laion men;
Mahn lawalo men en nansapw pahn tehrirailpeseng.
9 Israel, met pahn kamwomwuhkala,
Pwehki ke uhwongiehda, omw sounsawaso.
10 Eri, ia omw nanmwarkio, pwe en doareiukala nan omw kahnimw kan koaros,+
Oh ia omw kaun akan,* me ke kin nda,
‘Kihong ie nanmwarki men oh lapalap akan’?+
12 Sapwung en Epraim koarukpene;
Dipeo nekinekla.
13 Medek en neitik pahn kodohng ih.
Ahpw ih seri pweipwei men;
Ni ahnsoun neitik e sohte pedoi.
Mehla, ia omw keikamedeken?+
Sousou, ia omw manaman en kemehla?+
I sohte pahn poakehla.
15 Mehnda ma e pahn keirda nanpwungen ahlek kan,
Kisinieng en palimese ehu pahn kohdo, kisinieng en Siohwa,
E pahn kohdo sang nan sapwtehn, pwehn kamadahda eh pwarer oh kakusala eh utuhnpihl.
Eh dipwisou kesempwal kan koaros pahn kulsang.+
16 Sameria pahn pwukoahkihdi dihp,+ pwe e uhwongadahr eh Kohto.+
Re pahn kamakamkihla kedlahs,+
Neirail seri kan pahn kamakamala ni lemei,
Oh neirail lih liseian kan pahn teipeseng.”
14 “Israel, pwurodo rehn Siohwa omw Koht,+
Pwe ke dipekelekelehr pwehki omw sapwung.
2 Kumwail pwurodo rehn Siohwa sang ni mahsen pwukat,
Patohwanohng ih, ‘Komw kupwur mahkikihong kiht at sapwung+ oh ketin ale dahme mwahu,
Oh se pahn patohwanda kaping en kilin ewet kan+ duwehte at pahn meirongki koupwul wol kan.*
3 Asiria sohte pahn kapitkitala.+
Se sohte pahn dake oahs kan,+
Oh se sohla pahn ndaiong doadoahk en peht kan, “Maing at Koht!”
Pwe komwi me kin ketin kasalehda kadek kalahngan ong me sepwoupwou kan.’+
4 I pahn kamwahwihala ar salelepek.+
5 I pahn duwehla pwoaik ong Israel;
E pahn masalpeseng duwehte kiepw
Oh pahn kadardihla kalewe kan duwehte tuhkehn Lepanon kan.
6 Eh kisin rah kan pahn kohpeseng,
Eh lingan pahn rasehng lingan en tuhke olip,
Oh eh pwohmwahu pahn rasehng pwohmwahu en Lepanon.
7 Re pahn pwurehng kousoan pahn mweteh.
Re pahn kakairada krein oh pahn masalpeseng rasehng tuhkehn kreip.+
Eh ndand* pahn duwehte wain en Lepanon.
8 Epraim pahn nda, ‘Dahme I pil pahn ehukihong dikedik kan?’+
I pahn sapeng oh sinsile ih.+
I pahn duwehte tuhke suniper losolos pwoat.
Ke pahn diar wahntuhke rehi.”
9 Ihs me loalokong? En wehwehki soahng pwukat.
Ihs me ahneki koahiek en wehwehki ire kan? En ese mepwukat.
Pwe ahl en Siohwa kan me pwung,+
Oh me pwung kan pahn keid nan ahl pwukat;
Ahpw me kin kauwehla kosonned kan pahn dipekelekel nan ahl pwukat.
Ahd kamwot ong Osaiah, me wehwehki “Poadoandoarla sang Iah; Iah Ketin Doarehla.”
De “netiki paliwar; tiahk samin.”
De “netiki paliwar; tiahk samin.”
De “netiki paliwar; tiahk samin.”
Wehwehki “Koht Pahn Ketin Kamwarak Werentuhke.”
De “Wasa Patapat Pah nan.”
Wehwehki “Sohte ale Kadek Kalahngan.”
Wehwehki “Kaidehn Nei Aramas.”
LI, “nein Israel pwutak kan.”
Kilang Os 1:9 ntp.
Kilang Os 1:6 ntp.
De “tiahk samin; nenek.”
LI, “kihsang eh kamwahl nanpwungen eh dihdi kan.”
De “tiahk samin; nenek.”
De “wia tiahk samin; nenek.”
Kilang KLL.
De “Wasa Patapat Pah nan.”
De “Ei Paal.”
De “mweidohng ren momour.”
Wehwehki “Koht Pahn Ketin Kamwarak Werentuhke.”
LI, “ih.”
Kilang Os 1:6 ntp.
Kilang Os 1:9 ntp.
Me iei, keik reisin kan me kadoadoahk ong kaudok likamw.
Ohmer ehu pahrekiong 220 L (200 dry qt). Kilang Ortk B14.
De “wia tiahk samin (nenek).”
De “I sohte pahn wendi rehmw.”
LI, “rahn tohto.”
De “en peneinei koht kan; dikedik kan.”
De “kaweid.”
De kakete, “Re wiliankihdi ei lingan ong ni kanamenek.”
Me iei, samworo kan.
Me iei, meirong kan me re kin meirongki ong diparail kan.
De “kin wia tiahk samin; kin netiki paliwararail kan.”
De “tiahk samin; nenek.”
LI, “kihsang mohngiong.”
De “nein sounkosetipw sokon.”
De “tiahk samin; nenek.”
De “tiahk samin; nenek.”
Soangen tuhke kalaimwun ehu, me ni lokaiahn wai e adaneki “oak.”
Tuhke pwoat me kin kapwarehda wahnrohs pwohmwahu.
De “tiahk samin; nenek.”
De “tiahk samin; nenek.”
De “tiahk samin; nenek.”
LI, “wasa maledek ehu?”
De “pihru wihd.”
De “kin wia tiahk samin; kin netiki paliwararail kan.”
LI, “mehn sansar kan.”
De “pahn koahkoahkehkihla ih.”
De “me uhwong kan.”
De “kin wia tiahk samin; kin netiki paliweromw.”
De “tiahk samin; nenek.”
LI, “mese.”
LI, “Eri sounpwong ehu pahn kadalleirailla.”
De “mohs kan.”
LI, “kod.” Kilang KLL.
Kisin mahn tikitik men me mwomwen lipahrourou me kin kang likou.
De “laion pwulopwul men me wunaun ni tepinwere.”
LI, “silangi.”
Keteu en mwuhr tepida mpen nanwerengen April. Kilang Ortk B15.
De “kadek kalahngan.”
De kakete, “Pwe arail mohngiong kan rasehng mehn uhmw ehu ni ar kohkihdo ar widing kan.”
LI, “sounkopwung kan.”
LI, “sohte mohngiong.”
LI, “pwainirailda sapahl.”
Me iei, kaidehn ong soangen kaudok me ile.
LI, “kod ehu.” Kilang KLL.
De “tehnpesen.”
De “mehn keiru kan.”
De “kaweido.”
De kakete, “Re pahn pwurala.”
De “tiahk samin; nenek.”
De “amwail kamadipw me koasoandi.”
De “koht kanameneko.”
De kakete, “me rah kan kohpeseng.”
De “widing; sohte mehlel.”
LI, “nennenla.”
LI, “nein me suwed pwutak kan.”
Me iei, ni ar wa kalokeparail rasehng mehn wisik ehu.
De “pirehiong sahl akan pohn.”
LI, “nennenla.”
Me iei, soukohp kan oh meteikan me pekederlahng kaweid Israel.
E sansal me sahl me pahpa oh nohno men kin doadoahngki pwehn padahkihong nah seri alu.
Me iei, ong soangen kaudok me ile.
LI, “karakaralahr.”
De “ieiang Koht kekeid.”
LI, “Epraim kin kangkang kisinieng.”
Me iei, Koht.
De kakete, “kasarawi ehu.”
De kakete soahng kan me pid akmanaman.
LI, “mwaht en.”
De “Siria.”
De “dipikihte nta.”
LI, “sounkopwung kan.”
LI, sheʼohl′. Kilang KLL.
LI, “pwainirailda sapahl.”
LI, “uhd patohwanda koupwul wol en kilin ewet kan.”
De “sang ni pein nsenei.”
LI, “kataman.”