AKKAI

1 Ni keriaun sounpar en Nanmwarki Darius, ni keweneun sounpwong, ni keieun rahn en sounpwongo, sang soukohp Akkai,*+ Siohwa ketin mahsanihong kepinahn Suda Serupapel+ nein Sealtiel, oh samworo lapalap Sosua nein Sehosadak:

2 “Iet me Siohwa kaunen karis en sounpei ketin mahsanih, ‘Aramas pwukat nda, “E saikinte lel ahnsou me tehnpesen Siohwa pahn kokouda.”’”*+

3 Siohwa eri ketin pwurehng mahsanihong soukohp Akkai:+ 4 “Ia duwe, met iei ahnsou me kumwail pahn mihmi nan imwamwail kan me wiawihkihda tuhke kaselel, mendahki tehnpas wet eh tehnlahr?+ 5 Iet me Siohwa kaunen karis en sounpei ketin mahsanih, ‘Medewe mwahu dahme kumwail wiewia. 6 Kumwail kamwarak werentuhke tohto, ahpw me malaulau me kumwail dolung.+ Kumwail mwenge, ahpw kumwail sohte medla. Kumwail nim, ahpw waino sohte itar. Kumwail likouda, ahpw sohte me karakarada. Emen me kin doadoahk kin kihdi pweinen eh doadoahk kan nan ehd ehu me diren pwoahr loale.’”

7 “Iet me Siohwa kaunen karis en sounpei ketin mahsanih, ‘Medewe mwahu dahme kumwail wiewia.’

8 “‘Kohdahla ni nahnao oh wahdo tuhke.+ Oh kauwada tehnpaso,+ pwe I en kupwurperenkihda met oh I en linganla,’+ Siohwa me ketin mahmahsen.”

9 “‘Kumwail kin kasikasik en dolung me tohto ahpw me malaulau me kumwail kin dolung; oh ni amwail kin wahlongodo met nan imwamwail, I kin peukala.+ Pwe ia kahrepe?’ Siohwa kaunen karis en sounpei me ketin mahmahsen. ‘Pwehki tehnpeseio tehnlahr, nindoken emenemen kumwail kohkohseli koadoakoadoahke pein imwe.+ 10 Eri nanleng kin koledi pwoaik, oh sampah kin koledi wahnsahpw en dehr keirda. 11 Oh I kahrehda en sohla keteu me kahpwalihala sampah, nahna kan, krein,* wain kapw, leh, soahng kan me kin wosada pohn pwehl, aramas akan oh pelinmen kan oh doadoahk en pehmwail kan koaros.’”

12 Serupapel+ nein Sealtiel+ oh samworo lapalap Sosua nein Sehosadak,+ oh aramas teiko koaros ahpw peikiong kapitien Siohwa ar Koht oh mahsen kan en soukohp Akkai, pwehki Siohwa ar Koht me ketin poaronehla ih; oh aramas ako ahpw tepida lemmwiki Siohwa.

13 Akkai, meninkeder en Siohwa ahpw lohkihong aramas ako rohng wet nin duwen eh pwukoa sang Siohwa: “‘I kin ieiang kumwail,’+ Siohwa me ketin mahmahsen.”

14 Siohwa eri ketin kamwakidada mohngiong*+ en Serupapel nein Sealtiel, kepinahn Suda,+ oh mohngiong* en samworo lapalap Sosua+ nein Sehosadak, oh mohngiong* en aramas teiko koaros; re ahpw kohdo oh tepida koadoahke tehnpesen Siohwa kaunen karis en sounpei, ar Koht.+ 15 Met wiawi ni 24 en keweneun sounpwong ni keriaun sounpar en Nanmwarki Darius.+

2 Ni keisuhwen sounpwong, ni 21 en sounpwongo, Siohwa ketin mahsen sang soukohp Akkai,+ mahsanih, 2 “Menlau peki rehn Serupapel+ nein Sealtiel, kepinahn Suda+ oh samworo lapalap Sosua+ nein Sehosadak,+ oh aramas teiko koaros: 3 ‘Ihs nanpwungamwail me kilangedi tehnpas* wet ni eh lingan mahso?+ Ia mwomwe rahnwet ong kumwail? E sou sohte duwehte mahso?’+

4 “Siohwa ketin mahsanih, ‘Ahpw met, ken kehlail Serupapel, oh samworo lapalap Sosua nein Sehosadak ken kehlail.’

“‘Oh kumwail aramas en sahpwet koaros, kehlail oh doadoahk,’+ Siohwa me ketin mahmahsen.

“‘Pwe I kin ieiang kumwail,’+ Siohwa kaunen karis en sounpei me ketin mahmahsen. 5 ‘Kumwail tamataman dahme I inoukihong kumwail ni amwail kohieidosang Isip,+ oh I kin kaukaweidkumwailte sang ni ei manaman.*+ Kumwail dehr masak.’”+

6 “Pwe iet me Siohwa kaunen karis en sounpei ketin mahsanih, ‘Mwurin ahnsou kis, I pahn pwurehng itikada nanleng oh sampah oh sehd oh sahpw madekeng.’+

7 “‘Oh I pahn itikada wehi koaros, oh soahng kesempwal kan en wehi koaros pahn kohlongodo;+ oh I pahn audehkihda tehnpas wet lingan,’+ Siohwa kaunen karis en sounpei me ketin mahmahsen.

8 “‘Ngehi me sapwellimanki silper oh kohl,’ Siohwa kaunen karis en sounpei me ketin mahmahsen.

9 “‘Lingan en tehnpas wet ni ahnsou kohkohdo pahn laudsang mehn mahso,’+ Siohwa kaunen karis en sounpei me ketin mahmahsen.

“‘Oh I pahn ketikihda popohl wasaht,’+ Siohwa kaunen karis en sounpei me ketin mahmahsen.”

10 Ni 24 en keduwaun sounpwongo, ni keriaun sounpar en mwehin Darius, Siohwa ketin mahsanihong soukohp Akkai:+ 11 “Iet me Siohwa kaunen karis en sounpei ketin mahsanih, ‘Menlau, kalelapak rehn samworo kan duwen kosonnedo:+ 12 “Ma ohl emen wa uduk sarawi ehu nan eh likou, oh eh likowo sairada pilawa de suhpw de wain de leh de soangen mwenge teikan, ia duwe, mwenge pwukat pahn sarawihla?”’”

Samworo ko ahpw sapengki: “Soh!”

13 Akkai eri idek: “Ma aramas emen saminla pwehki eh sairada paliwar mehla ehu oh uhd sairada ehu rehn mepwukat, ia duwe, mepwukat pahn saminla?”+

Samworo ko ahpw sapengki: “Re pahn saminla.”

14 Akkai eri nda: “Siohwa ketin mahsanih, ‘Ih mwomwen aramas pwukat met, oh ih mwomwen wehiet met mwohn silangi, oh ih duwen doadoahk en pehrail kan koaros met; mehkoaros me re meirongki wasao kin samin.’

15 “‘Ahpw met, menlau, kumwail medewe mwahu duwen met sang rahnwet kohla: Mwohn takai ehu eh koasoakda pohn takai nan tehnpas sarawi en Siohwa,+ 16 ia mwomwe ni ahnsowo? Ni ahnsou me aramas emen kohdo ni koasoakoasoak en kreino kasikasik en ale kopwou 20, mehte 10 me mie; oh ni aramas emen eh kohdo ni wasahn ale wain pwehn ale sah 50 sang nan deupen mehn tiak kreipo, mehte 20 me mie;+ 17 I kalokehkin kumwail—doadoahk en pehmwail kan koaros⁠—kisinieng karakar oh eniep+ oh keteu aihs takai, ahpw sohte emen rehmwail me sohpeiong ie,’ Siohwa me ketin mahmahsen.

18 “‘Menlau, kumwail medewe mwahu duwen met sang rahnwet kohla, sang ni 24 en keduwaun sounpwong, sang rahn me poahsoan en tehnpas sarawi en Siohwa kokouda;+ medewe mwahu duwen met: 19 Ia duwe, mie werentuhke nan imwen nahko?*+ Tuhkehn kreip, pik, pwohmakraneid oh tuhke olip saikinte wa. Ahpw sang rahnwet I pahn kadarewei kapai.’”+

20 Ni 24 en sounpwongo,+ Siohwa ketin mahsanihong Akkai keriapak: 21 “Ndaiong Serupapel, kepinahn Suda, ‘I pahn itikada nanleng oh sampah.+ 22 I pahn kamwomwala mwoalen wehi kan oh kamwomwala kehlail en tohnwehi kan;+ oh I pahn kamwomwala kuruma kan oh soundakeparail kan, oh oahs kan oh soundakeparail kan pahn pwupwudi, oh re pahn kemehkihla emenemen kedlahs.’”+

23 “‘Rahno,’ Siohwa kaunen karis en sounpei me ketin mahmahsen, ‘I pahn aleiuk, nei ladu Serupapel+ nein Sealtiel,’+ Siohwa kaunen karis en sounpei me ketin mahmahsen, ‘oh I pahn wiahiong uhk ken duwehla rihng en sidamp ehu, pwehki kowe me I piladahr,’ Siohwa kaunen karis en sounpei me ketin mahmahsen.”