A2
Mwomwen Kawehwehn Paipel Wet
Kawehwe en Sampah Kapw en Nting Sarawi kan en Kristian ni Lokaiahn Krihs (Madiu—Kaudiahl) wiawihda ni lokaiahn wai nan pahr 1950 (2018 ni lokaiahn Pohnpei), oh Paipel—Kawehwehn Sampah Kapw pwon wiawihda nan pahr 1961. Sangete ahnsowo, aramas tohtohie paiekidahr kawehwe pwung oh sansal en Paipel me kawehwehdier sang ni lokaia kan me Paipel tepin ntingdi ong ni lokaia daulih 210.
Ahpw erein sounpar limeisek, lokaia kan wekilahr. Pwihn en Kawehwehn Paipel en Sampah Kapw pohnese me mie anahn en wiahda kawehwehn Paipel ehu me pahn sair mohngiong en sounwadawad kan rahnpwukat. Pwehn kapwaiada met, irail kin tehk soahng pwukat erein arail kin kawehwe:
Kawehwehpen lepin lokaia kan me kadoadoahk nan Paipel. Karasepe, Pwuhk Sarawi ni Mahsen en Pohnpei kin doadoahngki lepin lokaia pwukat “pasurdiong nin lohpwuwo” pwehn kawehwehda mwomwen kamakamalahn Sises. Ahpw lepin lokaia pwukat “pasurdiong nin lohpwuwo” sohte pwungiong wehwehn lepin lokaiahn Krihs me kadoadoahko. Ihme kahrehda kawehwehn Paipel wet kasalehda me Sises kamakamala ni aramas ko ar “pasurdiong nin tuhke” de “langahda nin tuhke pwoat.”—Wiewia 2:23; 5:30.
Pwuhk Sarawi ni Mahsen en Pohnpei kin ekei pak kawehwehdi lepin lokaia ko neʹphesh oh psy·khe′ ong lepin lokaiao ‘ngehn.’ Ahpw lepin lokaiahn Ipru oh Krihs pwukat kin kak dokedoke (1) aramas, (2) mour me aramas emen ahneki, (3) menmour kan, (4) ineng de anahn en aramas emen, de ekei pak e kin dokedoke (5) aramas mehla men. Ahpw pwehki lepin lokaiao “ngehn” sohte pwungiong wehwehn lepin lokaiahn Ipru oh Krihs pwukat, nan kawehwe wet, lepin lokaia pwukat kin kawehwehdi nin duwen wehwehn ehuehu ire kan. (Karasepe, kilang Senesis 1:20; 2:7; Lipai 19:28; Lepin Padahk 16:26; Madiu 6:25.)
Lepin lokaiahn Ipru “sheʼohl′” oh lepin lokaiahn Krihs “haiʹdes” kin kadoadoahk nan Paipel pwehn kawehwehda duwen sousou en tohnsampah pwon. Ahpw ekei kawehwehn Paipel kin doadoahngki lepin lokaiao “ehl” pwehn kawehwehdi lepin lokaia pwukat. Ahpw met kakete kahrehiong aramas en ahneki madamadau sapwung me met dokedoke wasahn kalokolok nan kisiniei ehu. Ihme kahrehda nan Paipel wet, lepin lokaia ko “sheʼohl′” oh “haiʹdes” kawehwehdi ong “Sousou.” Lepin lokaia ko “sheʼohl′” oh “haiʹdes” kin sansalda nan nting tikitik kan me mi pah.—Melkahka 16:10; Wiewia 2:27.
Mehn Sawas Teikan en Kawehwe Wet:
Mie ekei nting tikitik kan me mi pah nan kawehwehn Paipel wet. Nting tikitik pwukat kin kalapw pwarada ni soangen mwohmw pwukat:
“De” Pil ehu ahl en nda lepin lokaia ehu (kan) sang ni kawehwehn lokaiahn Ipru, Aramaik, de Krihs me pahn kasalehda wehwe tehieu.—Senesis 1:2, nting tikitik kan me mi pah ong “sapwellimen Koht manaman”; Sosua 1:8, “ngihl tikitik.”
“De kakete” Pil ehu ahl en nda lepin lokaia ehu (kan) me pahn pwung ahpw ahneki ehu wehwe tohrohr.—Senesis 21:6, “iang ie kouruhr”; Sekaraia 14:21, “mehn Kenan.”
“LI, LA, LK” Kawehwehn ehuehu lepin lokaia sang ni lokaiahn Ipru, Aramaik, de Krihs de wehwehn lepin lokaia ehu (kan) ni lokaia me ireo tepin ntingdi.—Eksodus 32:9, “keptakai”; Taitus 2:14, “kasaledengkitailla.”
Wehwehn lepin lokaia kan oh ire kan me pidada mepwukat Wehwehn ahd kan (Senesis 3:17, “Adam”; Eksodus 15:23, “Marah”); oaritik kan me pid paun oh mehn sosohng (Senesis 6:15, “kiupid”); ahd ehu de lepin lokaia kan me kin kawehwehda pronoun ehu (Senesis 38:5, “E”); iren sawas kan nan Oaritik kan oh Kawehwehn Lepin Lokaia kan en Paipel.—Senesis 37:35, “Sousou”; Madiu 5:22, “Kiehna.”
Ni tepin pwuhket, pali me koasoia “Dahme Kitail Kak Sukuhlkihsang Mahsen en Koht?” kin audaudki ekei padahk mengei kan me dierek nan Paipel. Mwurinte pwuhken Kaudiahl, mie mehn sawas pwukat: “Pwuhk kan en Paipel,” “Irekidien Lepin Lokaia kan en Paipel,” oh “Kawehwehn Lepin Lokaia kan en Paipel.” Kawehwehn Lepin Lokaia kan kin sewese sounwadawad men en wehwehki ekei lepin lokaia kan nin duwen ar kin kadoadoahk nan Paipel. Oaritik A audaudki pali pwukat: “Ire Kesempwal kan ong Kawehwe Paipel,” “Mwomwen Kawehwehn Paipel Wet,” “Ia Duwen Paipel Eh Wiawihda ong Kitail,” “Mwaren Koht nan Palien Paipel ni Lokaiahn Ipru,” “Mwaren Koht nan Nting Sarawi kan en Kristian ni Lokaiahn Krihs,” “Soukohp kan oh Nanmwarki kan en Suda oh Israel,” oh “Soahng Kesempwal kan me Wiawi nan Mouren Sises nin Sampah.” Oaritik B audaudki map kan, kilel kan, oh ire teikan me kak sewese irail kan me kin pwerisekiong sukuhlki Paipel.
E kin mie “Audepe ni Oaralap” ong ehuehu pwuhk en Paipel kan, me kin kasalehda audepen ehuehu irelaud iangahki iretikitik kan me pidada audepe ko. Met pahn sewese sounwadawad men en kak ekis wehwehki audepen pwuhko pwon. Nanwerengen ehuehu tehn doaropwe, mie iren Paipel teikan (marginal reference) me kileldi me pahrekiong ekei iretikitik kan.