Duwen Pwuhk wet

Pwuhk wet pwuhk en poadoapoad mehlel kan. Poadoapoad pwukat kohsang nan pwuhk me keieu wadawad nan sampah, iei Paipel. Poadoapoad kan tapiada sang ansou me Koht tapin kapikada mehkan leldo nan rahn pwukat. Poadoapoad kan kin padahkiong kitail mehkan me Koht inoukihdiehr en wia ni ansou kohkohdo.

Nan pwuhk wet ke pahn kak en esehda dahme Paipel koasoaia. E kin padahkiong kitail duen aramas kan en mahs oh mehkan me re wia. E pil kasansalehda koapwoaropwoar kasehlel en mour soutuk nan paradais sampah me Koht ketikihong aramas kan.

Mie poadoapoad 116 nan pwuhk wet. Oh poadoapoad pwukat nene ong pali en oralap waluh. Mwohn ehu ehu pali en oralap waluh pwukat mie pali ehu me koasoaiahda dahme pali ko kin orapene. Poadoapoad ko kin pil pwarada ni ireirekdi pwung duen me wiawiehr mahs. Met pahn sewese uhk en sukuhliki iahd me mehpwukat wiawiehr, nin duen wiewia teikan en poadoapoad.

Poadoapoad pwukat kin pwarada ni lokaia mengei. Kumwail seri tohto kan pahn kak en wadek. Kumwail pahpa-nohno kan pahn pil diar me noumwail kisin seri kan pahn perenki en rong poadoapoad pwukat me emen pahn wadek ong irail pak tohto. Ke pahn diar me pwuhk wet audaudki soahng kan me kaperen ong me pwulopwul kan oh mah kan.

Iren Paipel kan kin pwarada ni imwin ehu ehu poapoapoad. E pahn mwahu ma ke pahn wadek iren Paipel pwukat wasa me poadoapoad ko kohsang ie.