Aramas Kan Kauwada Ehu Tower Kalaimwun

SOUNPAHR ngeder dower powe. Nain Noah pwutak kan nainekiehr seri tohto. Oh seri pwukat laudlahr oh pil naineki seri kan. Ansou sohte pwand tohtohlahr aramas nan sampah.

Emen aramas pwukat iei nain nain Noah ohl me adaneki Nimrod. Ih ohl suwed men me kin pwakihdi aramas oh mahn akan oh kameirailla. Nimrod pil wiahki pein ih nanmwahrki men pwen kaunda aramas kan koaros. Koht sohte mwahuki Nimrod.

Ansouo aramas koaros kin koasoaiki lokaia tehieu. Nimrod mwahuki aramas koaros en mihpene pwe ih en kak kaunirailda. Eri ke ese dahme e wia? E padahkiong aramas kan en kauwada ehu kahnihmw oh ehu ihmw ileile (tower) nan kahnihmwo. Ke kak kilang aramas nan kilelo wiewia prik.

Siohwa Koht sohte pwungki doadoahk en kaukauw me re wia. Koht mwahuki aramas akan en kohla kousoan wasa koaros nan sampah. Ahpw aramas akan inda: ‘Kumwail kohdo! Kitail kauwada ehu kahnihmw oh ehu ihmw ileile (tower) me kadoke pahn leldahla nanleng. Kitail ahpw pahn indand!’ Aramas kan mwahuki wahu en kohwong pein irail, kaidehn ong Koht.

Koht eri kahreong aramas kan en uhdi sang arail kauw ihmw ileile wet. Ke ese duen e wia met? Ansoutehkis aramas kan koaros tapiadahr lokaiahki soahngen lokaia tohrohr, kaidehn ehute. Irail me kaukauw ihmw ko sohlahr kak wehwehki emenemen. Ihme kahrehda arail kahnihmwo adaneki Papel, de Papilon, me wehwehki “Pingada.”

Aramas kan eri ahpw tapiadahr kohweisang Papel. Aramas kan me lokaiahki lokaia tehieu wiahki ehu oh kohla ekis wasa nan sampah pwen kousoanpene.