Keieu en Ahia

KE ESE dahme keieu Noah wia ansou me ih oh ah peneinei pidoi sang nan warihmwo? E wia ehu meirong de kisakis ong Koht. Ke kak kilang arail wia met nan kilel me mi pah. Noah wia kisakis wet ong Koht pwen kasansalehda ah kalahnganki Koht ah ketin doarehla ih oh ah peneinei sang nohlik lapalapo.

Ke lemeleme me Siohwa perenki kisakis wet? Ei, e perenki. Oh e inoukiong Noah me e sohlahr pahn kawehla sampah ki nohlik.

Mwuhri ekis sampah pwon madada, oh Noah oh ah peneinei pidoi sang nan warihmwo oh tapiada kousoan liki. Koht kapaiirailda oh padahki ong irail: ‘Kumwail en naineki seri tohto. Kumwail en tohtohla lao aramas pahn kousoanla nan sampah pwon.’

Ahpw mwuhri, ni en aramas pahn rong duen nohlik lapalap, re mwein pahn masapwehk me ehu nohlik duwehte mwo pil pahn pwurehng wiawi. Ihme kahrehda Koht ketikihda mehkot mehn katamanki ong aramas ah inou me e sohte pahn pwurehng kawekihla sampah nohlik. Ke ese dahme e ketikihda pwen katamanda met? Ahia mesen lahng.

Ke kak kilang ahia mesen lahng ni en ketipin kin pwarada mwehrin keteu. Ahia kin pwarada ni poh tohto. Mie me ke kilangehr? Ke kilang me mi nan kilel wet?

Iet me Koht mahsanih: ‘I sohlahr pahn kasohrala aramas oh mahn ki nohlik. I pwilikihdiehr ai ahia nan dapok. Oh ni ansou me ahia pahn pwarada, I pahn kilang oh tamataman ai inou.’

Eri ni ahmw pahn kilang ahia, dahme e kin kataman ong uhk? Ei, inou en Koht me e sohlahr pahn pwurehng kawehla sampah ki nohlik lapalap.