Nohlik Pahn Pwurehng Kauwehla Sampah?

MIE pak me ke kin rong aramas kin koasoia duwen imwin sampah?— Rahnwet aramas tohto kin koasoia duwen met. Ekei aramas kin medewe me sampah pahn ohla pwehki aramas akan pahn doadoahngki pakudang kehlail kan nan mahwen. Ke leme Koht pahn ketin kauwehla sampah kaselel wet iangahki lahng oh pil usu kan?—

Duwehte me kitail sukuhlkier, Paipel kin mahsanih duwen imwin sampah wet. E mahsanih: “Sampah wet— kin sosohrala.” (1 Sohn 2:17) Ke leme me imwin sampah wet kin wehwehki imwin paliweren sampah?— Soh, Paipel mahsanih me Koht ketin wiahda sampah wet pwe “aramas en kousoan ie” oh nsenamwahuki. (Aiseia 45:18) Melkahka 37:29 mahsanih: “Me pwung kan pahn koukousoan nan sahpwo [“sampah,” NW] oh re pahn sapwenikihla kohkohlahte.” Ihme kahrehda Paipel pil mahsanihki me sampah pahn mihmi kohkohlahte.​—Melkahka 104:5; Eklesiasdes 1:4.

Eri, ia wehwehn imwin sampah ma e sohte wehwehki imwin paliweren sampah?— Kita kak diar pasapeng ma kita kilang dahme wiawi ni mwehin Noha. Paipel mahsanih: ‘Sampah ohkihla pihl kawao, iei pilen Nohlik Lapalapo.’​—2 Piter 3:6.

Mie me pitla sang imwin sampah ni ahnsou me Nohliko wiawi ni mwehin Noha?— Paipel mahsanih me Koht “ketikihdiong pohn tohnsampah suwed ko Nohlik Lapalapo; ihte me e ketin komourala Noha, iei ih me lohkiseli duwen mour pwung pahn kupwur en Koht, oh pil iangahki aramas isimen.”​—2 Piter 2:5.

Eri, ia wehwehn sampah me ohlao? Paliweren sampah de aramas suwed akan?— Paipel mahsanih me “tohnsampah suwed ko.” Pil tehk me Noha wia sounkalohk men. Dahme ke leme me e kin kalohki duwe?— Noha kin padahkihong aramas akan duwen imwin sampah ni ahnsowo.

Ni ahnsou me Sises mahsanih duwen Nohlik lapalapo, e mahsanihong sapwellime tohnpadahk ko dahme aramas ako wiewia mwohnte imwio eh leledo. Iet me e mahsanihong irail: “Pwe nin duwen aramas ako ar pereperen kamakamadipw ni rahn ako mwohn nohlik lapalapo, ohl oh lih akan wiewia pwopwoud lao lel rahn me Noha pedolong nan warihmwo; re ahpw sasairki nohliko, e lao komwopwirailla koaruhsie.” Sises eri mahsanih me aramas akan pahn pil wia soahngohte mwohn sampah wet eh pahn imwisekla.​—Madiu 24:37-39.

Sapwellimen Sises mahsen kin kasalehda me kitail kak sukuhlki mehn kasukuhl kan sang dahme aramas ako wiewia mwohnte Nohliko. Ni atail wadek Irelaud 10 en pwuhk wet, ke tamataman dahme aramas ako wiewia?— Ekei ohl ako kin wia tiahk lemei oh lamaih me luwet akan. Sises pil mahsanih me pil me tohto sohte rong Noha ni Koht eh ketin kadarala pwehn kalohk ong irail.

Eri rahno leledo me Siohwa mahsanihong Noha me e pahn ketin kasorehkihla aramas suwed ako nohlik ehu. Nohliko pahn pwaindi sampah pwon iangahki nahna kan. Siohwa mahsanihong Noha en kauwada warihmw ehu. E duwehte lapalahn koakon ehu me ke kak kilang nan kilel en pali 238.

Koht mahsanihong Noha en kauwada lapalahn warihmw ehu me ih oh eh peneinei oh mahn tohto kak mi loale. Noha oh eh peneineio doadoahk laud. Irail pelehdi lapalahn tuhke kan, oh tepida kauwada warihmwo. Irail wia met erein sounpar tohto pwehki warihmwo uhdahn lapala.

Ke pil tamataman dahme Noha kin wia erein sounpar kan me e wie kokou warihmwo?— E wie kalokalohk oh padapadahkihong aramas akan duwen Nohliko. Mie me rong ih? Sohte me rong ih, ihte eh peneineio. Meteiko nohn kedirepwki arail wiewia soahng teikan. Ke taman dahme Sises mahsanih me irail wiewia?— Irail wie kedikedirepwiki arail mwengemwenge oh niminim oh wie pwopwoud. Irail sohte medewe me irail aramas suwed kei. Irail sohte kihong ahnsou en rong Noha. Eri kita pahn kilang dahme wiawi ong irail.

Mwurin Noha oh eh peneinei pedolong nan warihmwo, Siohwa ketin ritingedi wenihmwo. Aramas me mi likio saikinte kamehlele me Nohliko pahn wiawi. Eri, e wiahkintehieu keteudi! E sohte duwehte keteu me kin kalapw wiawi. Lapalahn keteu ieu mwo! E mwadang duwehla lapalahn pillap kan me katairong. Pihlo kauwehla lapalahn tuhke kan oh katapwure lapalahn takai kan duwehte kisin takai kei. Ahpw ia duwen aramas ako likin warihmwo?— Sises mahsanih: “Re ahpw sasairki nohliko, e lao komwopwirailla koaruhsie.” Aramas koaros likin warihmwo mehla. Dahme kahrehda?— Duwehte me Sises mahsanih, “re ahpw sasairki.” Irail sohte rong!​—Madiu 24:39; Senesis 6:5-7.

Eri taman me Sises mahsanih me dahme wiawi ong aramas ako kin wia mehn kasukuhl ong kitail. Dahme kitail kak sukuhlki?— Aramas ako sohrala kaidehn ihte pwehki irail suwed ahpw pil pwehki irail nohn kedirepwla oh sohte kihong ahnsou pwehn sukuhlki duwen Koht oh dahme e pahn ketin wia. Kitail sou anahne kanahieng pwe kitail en dehr duwehte irail?—

Ke leme me Koht pahn ketin pwurehng doadoahngki nohlik pwehn kauwehla sampah?— Soh, Koht ketin inoukihda me e sohte pahn ketin pwurehng wia met. E mahsanih: “Ahia pwoat me I padokadahng nan depwek kan. Ih me pahn wia kilel en ei inou ong sampah.” Siohwa mahsanih me ahiao pahn wia kilel ehu me “nohlik lapalap eh solahr pahn wiawi pwe en kauwehla soahng me momour kan koaros nin sampah.”​—Senesis 9:11-17.

Eri kitail kak kamehlele me Koht sohte pahn ketin pwurehng doadoahngki nohlik pwehn kauwehla sampah. Ahpw duwehte me kitail kilangehr, Paipel kin mahsanih duwen imwin sampah wet. Ni ahnsou me Koht pahn ketin kasorehla sampah wet, ihs me e pahn ketin kapitala?— Aramas akan me kin men wia soahng teikan oh sohte men sukuhlki duwen Koht? De irail akan me nohn kedirepwla oh sohte kin onop Paipel? Dahme ke leme?—

Kitail sou men iang irail kan me Koht pahn ketin kapitala?— E sou pahn kaperen ma atail peneinei kak duwehte en Noha peneinei pwe Koht en kak kapitala kitail koaros?— Pwe kitail en kak pitla sang imwin sampah wet, kitail anahne wehwehki ia duwen Koht eh pahn ketin kasorehla sampah wet oh wiahda sampah kapw ehu. Kita pahn kilang ia duwen eh pahn ketin wia met.

Paipel sapengla met nan Daniel irelaud 2 iretikitik 44. Iren Paipel wet kin koasoia duwen atail ahnsou ni eh mahsanih: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi [de koperment] ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”

Ke wehwehki ire wet?— Paipel mahsanih me koperment en Koht pahn kauwehla koperment kan koaros en sampah. Dahme kahrehda? Pwehki irail sohte kin peikiong Ih me Koht ketin pilada en wia Nanmwarki. Ihs menet?— Iei Sises Krais!

Siohwa Koht sapwellimanki pwuhng en pilada soangen koperment dah me pahn kaunda oh e ketin piladahr sapwellime Ohl Sises pwehn wia Nanmwarki. Kereniong Kaun me Koht ketin piladahr me iei Sises Krais pahn kauwehla koperment kan koaros en sampah wet. Nan Kaudiahl irelaud 19 iretikitik 11 lel 16, Paipel kawehwehda duwen Sises eh pahn ketin wia met duwehte nan kilel wet. Nan Paipel, sapwellimen Koht mahwen me pahn kasorehla koperment koaros en sampah kin adaneki Armakedon.

Koht mahsanih me sapwellime Wehio pahn kasorehla koperment en aramas koaros. Ahpw ia duwe, e ketin padahkihong kitail en wia met?— Soh, nan Paipel, Armakedon kin adaneki “mahwen me pahn wiawi ni Rahn Lapalap en Koht, Wasa Lapalahpie.” (Kaudiahl 16:14, 16) Ei, Armakedon iei sapwellimen Koht mahwen oh e pahn ketin doadoahngki Sises Krais en kahluwa tohnleng kan ong mahwen wet. Ia duwe, mahwen en Armakedon kerendohr? Kita pahn kilang ia duwen atail kak diar ma e kerendohr.