Mehn Kasukuhl Ehu ong Kitail me Pid Mehkot en Kawao

Siohwa sohte pahn mweidong aramas suwed akan en kauwehla Paradais. Ihte kompoakepahn Koht akan me pahn kousoan nan paradais. Dahme pahn wiaiong aramas suwed akan? Pwehn diarada pasepengpen met, kitail kak kousapahl poadoapoad en Noha. Noha memour sounpar kid kei samwalahro. Ih emen ohl mwahu me kin ahnsou koaros nantihong kapwaiada kupwuren Siohwa. Ahpw, aramas teikan nan sampah kin wia tiahk suwed. Ihme kahrehda, Siohwa padahkiong Noha me e pahn kasorehla aramas suwed pwukat ki nohlik ehu. E padahkiong Noha en kauwada warihmw pwe ih oh eh peneinei sohte pahn mehla ni ahnsou me nohlik wiawi.​—Senesis 6:9-18.

Noha oh eh peneinei kauwada warihmwo. Noha padahkiong aramas akan me nohlik pahn wiawi, ahpw re sohte rong ih. Re doula oh wiwiahte tiahk suwed. Ni ahnsou me kokou en warihmwo nek, Noha kahre mahn akan pwehn pedolong nan warihmwo, oh mwuri, ih oh eh peneinei pil pedolong nan warihmwo. Siohwa ahpw wiahda melimel laud ehu. Keteu mweremwerki rahn 40 oh pwong 40. Pihlo pwilipeseng sampah pwon.​—Senesis 7:7-12.

Aramas suwed koaros mehla, ahpw Noha oh eh peneinei mourla. Siohwa kapitirailsang nohlik oh re ahpw mih nan sampah ehu me aramas suwed akan solahr mi loale. (Senesis 7:22, 23) Paipel mahsanih me ehu ahnsou pahn kohdo me Siohwa pahn pwurehng kasorehla aramas akan me kin kahng wia dahme pwung. Aramas mwahu kan sohte pahn iang mwomwala. Re pahn mour kohkohlahte nan Paradais nin sampah.​—2 Piter 2:5, 6, 9.

Rahnwet, aramas tohto kin wia tiahk suwed. Sampah wet kin dirkihla kahpwal akan. Siohwa kin kalapw kadarala sapwellime Sounkadehde kan rehn aramas akan pwehn kaweidih irail, ahpw pali moron en irail sohte men rong mahsen en Siohwa. Re sohte men kawukihla arail wiewia kan. Re sohte men rong dahme Koht mahsanih duwen dahme pwung oh sapwung. Dahme pahn wiaiong soangen aramas pwukat? Irail pahn wiliakapwala ehu rahn? Aramas tohto sohte pahn wiliakapwala. Ni ahnsou keren, aramas suwed akan pahn kasohrala oh re sohte pahn pwurehng mourda.​—Melkahka 92:7.

Sampah sohte pahn ohla; e pahn wiahla paradais. Irail akan me pahn kompoakepahnki Koht pahn kak mour kohkohlahte nan Paradais nin sampah.​—Melkahka 37:29.