Meh Welimen Pitla

Noha, eh peneinei, oh mahn akan pedolong nan warihmwo. Siohwa ketin ritingedi wenihmwo, oh keteu pa tepida mweredi. E keteu laud kahrehda warihmwo peida. Kedekedeo, pihlo eri pwaindi sampah pwon. Likin warihmwo, aramas suwed ko koaros mehla. Ahpw Noha oh eh peneinei mi nan warihmwo oh pitila. Ke kak medewehla uwen arail peren pwehki ar peikiong Siohwa?

Mwurin keteu eh mweremwerki rahn 40 oh pwohng 40, e uhdi. Ekisekis pihlo kohkohdi. Mwuri, warihmwo ahpw serada pohn nahna ehu. Ahpw mihete pihl wasa koaros, eri Noha oh eh peneinei sohte kak pedoisang nan warihmwo ni ahnsowohte.

Ekisekis, pihlo madada. Noha oh eh peneinei mihmihki nan warihmwo daulih sounpar ehu. Mwuri, Siohwa mahsanihong irail me irail kak pedoisang nan warihmwo. Irail uhdahn kalahnganki Siohwa eh ketin kapitirailla, oh irail kasalehda met ni arail wiahda meirong ehu ong Siohwa.

Siohwa kupwurperenkihda meirong wet. E ketin inoukihda me e sohla pahn pwurehng kauwehkihla nohlik ehu soahng koaros nin sampah. Pwehn wia kilelepen inou wet, e ketin wiahda tepin ahia en pwarada nan wehwe. Mie pak me ke kilang ahia?

Mwuri, Siohwa mahsanihong Noha oh eh peneinei en nainekihda seri kan oh kadirehla sampah.