Nohlik Lapalap

LIKIN warihmwo aramas kan kin wia arail wiewia en ehu ehu rahn sohte wekila. Irail sohte kamehlele me nohlik ehu pahn kohda. Ele mwein re kin kouruhrki Noah laud sang mahs. Ahpw sohte werei irail uhdi sang arail kouruhr.

Wiahki tehieu pihl tapida pwupwedi. Pihl pwupwedihdo sang nanleng duwehte ahmw kin wudekihla pihl sang ehu pekid. Noah pwung! Ahpw pwandala ong aramas teikan en kak pidelong nan warihmwo. Siohwa ritingihdi oh katengediehr wanihmw en warihmwo.

Sohte pwand wasa karakarahk kan mihla pahn pihl. Pihl wasa koaros duwehla pillap kalaimwun. E sikendi tuhke kan oh katepweke takai kan oh ngihl en pihl akan me ngihl laud mehlel. Aramas kan ahpw masapwehkadahr. Irail eri doudahla pohn wasa ileile kan. Ansouwet re uhdahn poakehla, pwe ma re rongete me Noah padahkiong irail oh iang pidelong ong nan warihmwo ansou me wanihmwo kin langalangte! Ahpw met pwandalahr.

Pihlo tapida kohda oh kohkohda. Rahn 40 oh pwong 40 pihl kin wekidekdihdo sang nanleng. E tapiada kohda oh dihrda lela pohn nahna kan, oh pil nahna me keieu ileile mihla pahn pihl. Duwehte me Siohwa mahsanih, aramas oh mahn kan koaros me mi likin warimwo mehla. Ahpw irail kan me mi nan warihmwo kamourala.

Noah oh nah pwutak kan wiahdahr doadoahk mwahu kasehlel ni arail kauwada warihmwo. Pihlo eri dihrada oh pwekada warihmwo, oh warihmwo eri peipei pohn pihlo. Rahn ehu, ansoukis mwehrin keteu eri uhdi, ketipin ahpw pwarada oh dakada. Mwein met uhdahn lingan! Wasa koaros pihl. Oh ihte me luluhwe me emen kak kilang iei warihmwo peipei pohn pihlo.

Irail kodon kan mehlahr oh sohlahr mie. Re sohlahr mie pwehki irail kin wia mehkan me suwed ong aramas. Irail koaros mehlahr, iangahki arail nohno kan oh aramas suwed kan. Ahpw dahme wiawi ong arail pahpa kan?

Pahpa en kodon pwukat kaidehn uhdahn aramas duwehte kitail. Irail tohnleng kei me kohdihdo sampah pwen mour duwehte aramas. Ihme kahrehda ni ansou me Nohliko leledo, irail sohte mehla duwehte aramas teikan. Irail uhdi sang arail doadoahngki paliwar en aramas, oh pwurala nan lahng duwehte tohnleng. Ahpw sohlahr mweimwei ong irail en pwurehng iang kisehn pwihn tohnleng kan en Koht. Pwehki met irail pwukat wiahlahr tohnleng kan en Sehdan. Nan Paipel irail adaneki ngehn saut kan.

Koht eri tapiada kadarodo kisinieng, oh pihlo tapidahr pwurdi. Sounpwong limau mwuhri warihmwo tengala pohn kadoken nahna ehu. Rahn tohto mwuhri, irail kan me mi nan warihmwo kak kilang liki oh kilang kadoken nahna kan pwaradahr. Pihlo tapida pwurpwurdi oh pwurpwurdi.

Noah eri kadarala mahn tohntol men me adaneki rapen sang nan warihmwo. E pihrwei oh ekis mwuhri pwurohdo, pwehki sohte wasa me a kak sokdi oh kommoal. Noah kadarala mahn menet pak kei oh ansou koaros e kin pwurohdo oh kommoal pohn warihmwo.

Noah men kilang ma pihlo keriwei sangehr pohn sampah, ih eri mwuhri kadarala mwuroi men sang nan warihmwo. Ahpw mwuroio pwurohdo pwehki e sohte diar wasa me e pahn kommoaldi ie. Noah pil pwurehng kadarala kariapak, oh e wahdo tehn tuhke olip. Noah eseiehr me pihlo pwurediehr. Noah pil kadarala emen mwuroi kasilipak, oh e diarehr wasa me e kak kommoal.

Koht eri mahsanih ong Noah: ‘Pidoi sang nan warihmwen. Kahre sang ahmw peneinei pwon oh iangahki mahn akan koaros me mi rehmw.’ Irail mihmi nan warihmwo daulih sounpahr ehu. Ihme kitail kak medewela duen peren me irail ahniki ansou me irail pidoi sang nan warihmwo oh pwurehng mi liki mourala!