Seikop Kohieila Aran

KE ESE ihs ohl pwukat me Seikop koasokoasoiong? Mwehrin ah sapsapal rahn tohto, Seikop tuhong irail limwahn pwarer ehu. Irail kin apwahpwali neirail sihpw. Seikop eri idek: ‘Iawasa kumwail kohsang ie?’

Irail sapeng, ‘Aran.’

Seikop pil idek, ‘Kumwail ese Lapan?’

‘Ei,’ irail sapeng. ‘Kilang, ien nah serepein Resel kohkohdo iangahki nah sihpw kan.’ Ke kak kilang Resel kohkohdo ekis doh?

Ni ansou me Seikop kilangada Resel kahre nain rien ah nohno sihpw ko kohkohdo, ih eri kohla katapwure sang takaio pohn pwarero pwe sihpw ko en kak nim pihl. Seikop eri metik Resel oh padahkiong serepeino ihs ih. Serepeino uhdahn perenda oh kohieila ni ihmwarail padahkiong ah pahpa Lapan.

Lapan uhdahn perenkihda ahn Seikop kohdo oh mi rehrail. Oh ni en Seikop peki en pwoudki Resel, Lapan pil peren. Ahpw e indaiong Seikop en doadoahk ki serepeino, Resel, sounpahr isuh. Pwehki e mwahuki oh limpoak ong Resel laud, met kahrehda Seikop en wiahda met. Ahpw, ni ansou lelehr pwen pwoudkihda Resel, ke ese dahme wiawi?

Lapan kihong Seikop nah serepein laudo, Liah, ah kaidehn Resel. Mwuhri Seikop pil pwungkiehr pwen doadoahk ong Lapan pil ehu ansou me reireiki sounpahr isuh, Lapan ahpw mwuhri kihong ih Resel ah pwoud. Ansou pwuko Koht mweidong ohl kan en pwoudki tohto sang emen lih. Ahpw met, Paipel kasansalehda me ohl emen en pwoudki lih tehmen.