Seikop Ahniki Ehu Peneinei Laud

NNA, kilang duen laud en peneinei wet. Mie nain Seikop pwutak 12. Oh pil mie nah serepein kan. Ke ese eden seri ko? Kitail pahn sukuhliki ekei adarail.

Liah neitikihdi Rupen, Simion, Lipai oh Sudah. Ni en Resel kilang me sohte nah seri, e inenen insensuwed. Ih eri kihong nah lidu Pilhah pwe Seikop en pwoudki, oh Pilhah neitikiong Seikop pwutak riemen, Dan oh Napdali. Liah pil kihong nah lidu Silpah Seikop, oh Silpah neitikihdi Kad oh Aser. Mwuhri Liah pil neitikihdi pwutak riemen, Issakar oh Sepulun.

Ansoukis mwuhri Resel kakehr pein neitik. E neitikihdi pwutak emen me adaneki Sosep. Mwuhri kitail pahn sukuhliki ekis duen Sosep, pwehki e wiahla aramas kesempwal men. Iet irail pwutak 11 me ipw ong Seikop ni ansou me e mihmi rehn ahn Resel pahpa Lapan.

Seikop pil naineki serepein tohto, ahpw Paipel kihong kitail eden emente. Serepeino iei Dainah.

Ansou lelehr me Seikop kosonnediehr en mwesel sang rehn Lapan oh kohlahng sahpwen Kenaan. Ih eri kihpene ah peneinei laudo iangahki nah mahn tohto, sihpw oh kou, oh tapiada sapal reireio.

Mwehrin Seikop oh ah peneinei kan lelehr nan Kenaan, Resel neitikihdi emen pwutak. Ansou me e wia kaneitiki pwutak menet irail sapsapalte. Resel ahniki ansou apwal, oh e mehkihla ah kaneitiki pwutako. Ahpw pwutako kehlail. Seikop kihong eden pwutako Pensamin.

Kitail anahne en tamataman eden pwutak 12 ko nain Seikop pwehki wehin Israel pwon kin kohsang irail. Ni mehlel, kainok 12 en Israel kin ale adarail sang nain Seikop ohl 10 oh nain Sosep pwutak riemen. Aisek mourki sounpahr tohto mwehrin nah pwutak kan ipw ong ih, oh met uhdahn kahreong ih peren laud en kilang nain nah pwutak tohto. Ahpw kitail en kilang mahs dahme wiawiong nain nah emen serepein me adaneki Dainah.