Kompoakepahn Koht akan kin Wia Dahme Mwahu

Ni ahmw kin kompoakepahnki emen me ke kin wadek de wauneki, ke kin song en alasang ih. Paipel mahsanih, “Siohwa me mwahu oh pwung.” (Melkahka 25:8, NW) En wiahla kompoakepahn Koht, kitail anahne en wiahla aramas mwahu oh pwung. Paipel mahsanih: “Nan amwail wialahr sapwellimen Koht seri kompoak kei, kumwail song en kahlemengih Ih.” (Episos 5:1, 2) Iet ekei wiewia kan pwehn kahlemengih Ih:

Sewese meteikan. “Kitail en wia mwahu ong aramas koaros.”​—Kalesia 6:10.

En Pwerisek. “Aramas me kin epwehnki pirap, en tokedihsang eh pirap, oh en tapihada wia ehu soangen doadoahk me e kak momourki oh kak sewesehki me semwehmwe kan.”​—Episos 4:28.

Mwakelekel ni paliwar oh tiahk. “Eri, kitail kamwakeleikitailsang mehkoaros me kin kasaminehla paliwar oh pali ngehn, oh kitail song en sarawihla unsek, ni atail pahn kin momour nan atail lemmwiki kupwuren Koht.”​—2 Korint 7:1.

Kasalehong tohn ahmw peneinei limpoak oh wahu. “Eri, emenemen ohl pwopwoud . . . en poakohng eh werek duwehte eh kin poakohng pein ih, oh emenemen lih pwopwoud en wauneki eh pwoud. Seri kan, peikiong samamwail oh inamwail kan.”​—Episos 5:33–6:1.

Kasalehong aramas teikan limpoak. “Kitail en poakpene, pwehki limpoak kin kohsang rehn Koht.”​—1 Sohn 4:7.

Peikiong kosonned en sahpw. “Aramas koaros uhdahn pahn peikiong pwungen wehi [koperment] . . . Eri, kumwail kihong irail amwail daksis kan.”​—Rom 13:1, 7.