IRELAUD SILUH
Iren Sawas Riau Pwe Pwopwoud en Werei
1, 2. (a) Ia uwen werei pwopwoud ehu koasoandi en mihpene? (b) Ia duwen met eh kak pweida?
NI AHNSOU me Koht ketin kapatapene tepin ohl oh lih, sohte kasalepen me ira pahn mihpene ahnsou kiste. Adam oh Ihp pahn mihpene erein ara mour. (Senesis 2:24) Sapwellimen Koht koasoandi wahu ong pwopwoud iei kapatapatpenehn ohl emen oh lih emen. Ihte ma emen ira de ira koaros pahn wiahda dihp laud me pid wia nsenen pwopwoud me Paipel kin kihda kahrepen ara kak mweipeseng oh pwurehng pwopwoudida.—Madiu 5:32.
2 Ia duwe, aramas riemen kak mihpene ni peren ahnsou reirei? Ei. Paipel kin kasalehda iren sawas kesempwal riau ong met. Ma ohl pwopwoud oh lih pwopwoud pahn doadoahngki iren sawas pwukat, ira pahn diar peren oh kapai tohto. Mehnia iren sawas pwukat?
KEIEUN IREN SAWAS
3. Ia soangen limpoak siluh me pwopwoud ehu anahne kakairada?
3 Keieun iren sawas iei limpoak. Paipel kin kasalehda me mie soangsoangen limpoak kei. Ehu iei limpoak me ke ahneki ong emen me ke poakepoake me kin wiawi nanpwungen kompoakepah keren kan. (Sohn 11:3) Pil ehu iei limpoak nanpwungen peneinei. (Rom 12:10) Kesiluh iei limpoak nanpwungen ohl emen oh lih emen. (Lepin Padahk 5:15-20) Mehlel, pwopwoud ehu anahne kakairada koaros soangen limpoak pwukat. Ahpw pil mie kapahieun limpoak me kesempwal sang meteiko.
4. Ia kapahieun limpoak?
4 Lepin lokaia me doadoahk ong kapahieun limpoak nan Paipel me tepin ntingdi ni lokaiahn Krihk iei a·gaʹpe. Lepin lokaia wet pwarada nan 1 Sohn 4:8, me mahsanih: “Koht iei limpoak.” Ni mehlel, “kitail kin ahneki limpoak pwehki Koht eh tepin limpoak ong kitail.” (1 Sohn 4:19) Kristian men kin kakairada soangen limpoak wet ong Koht mahs oh mwuri aramas teikan. (Mark 12:29-31) Lepin lokaia a·gaʹpe pil kin doadoahk nan Episos 5:2, me mahsanih: “Nan amwail mour kumwail weweidki limpoak, duwehte Krais eh ketin limpoak ong kitail oh ketin meirongkihla pein ih pwehki kitail.” Sises mahsanih me soangen limpoak wet pahn wia kilelepen sapwellime tohnpadahk mehlel kan. E mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene [a·gaʹpe].” (Sohn 13:35) Pil tehk ia duwen 1 Korint 13:13 eh doadoahngki a·gaʹpe ni eh mahsanih: “Soahng siluh pwukat: pwoson, koapworopwor, oh limpoak, ih me pahn mihmihte. Ahpw me keieu kesempwal rehrail, iei limpoak [a·gaʹpe].”
5, 6. (a) Dahme kahrehda limpoak kesempwal sang pwoson oh koapworopwor? (b) Ia ekei kahrepe me limpoak pahn sewese pwopwoud ehu en werei?
5 Dahme kahrehda limpoak wet a·gaʹpe kesempwal sang pwoson oh koapworopwor? Pwehki e kin poahsoankihda ire mehlel de kaweid pwung me mi nan Mahsen en Koht. (Melkahka 119:105) Soangen limpoak wet iei pepehm en nsenohki wia dahme mwahu oh pwung me Koht ketin kupwurki ong meteikan ni soh roporop, mehnda ma aramaso warohng de soh. Soangen limpoak wet kak kahrehiong pwopwoud ehu en kin idawehn kaweid en Paipel wet: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr.” (Kolose 3:13) Pwopwoud limpoak ehu kin ahneki oh kakairada ara “limpoakpene [a·gaʹpe], pwe limpoak kin mahkohng soahng tohto.” (1 Piter 4:8) Tehk me limpoak kin mahkohng sapwung kan. E sohte kin kihsang sapwung kan pwehki aramas soh unsek sohte kak pitsang wiahda sapwung.—Melkahka 130:3, 4; Seims 3:2.
6 Ni ahnsou me pwopwoud ehu kin kakairada limpoak ong Koht oh limpoak ong emenemen, ara pwopwoud pahn werei oh peren pwehki “limpoak me poatopoat, sohte imwi.” (1 Korint 13:8) Limpoak “kin kapatapene oh oarepene mehkoaros pwe en wiahla ehu ni mehlel.” (Kolose 3:14) Ma ke pwopwoud, ia duwen kowe oh omw pwoud pahn kak kakairada soangen limpoak wet? Kumwa wadekpene Mahsen en Koht oh koasoiapene. Sukuhlki sapwellimen Sises mehn kahlemeng en limpoak oh alasang ih ni amwa madamadau oh mwekid. Patehng met, iang towehda mihting kan wasa me kasukuhl en Mahsen en Koht kin wiawi ie. Kapakapki sapwellimen Koht sawas pwe kumwa en kakairada soangen limpoak kesempwal wet me wia kisehn wahn sapwellimen Koht manaman.—Lepin Padahk 3:5, 6; Sohn 17:3; Kalesia 5:22; Ipru 10:24, 25.
KERIAUN IREN SAWAS
7. Dahme ohl oh lih pwopwoud anahne kasalehda nan ara pwopwoud?
7 Ma pwopwoud ehu uhdahn pahn kin limpoakpene, ira pahn wahupene. Wahu iei keriaun sawas ong pwopwoud nsenamwahu. Mahsen en Koht kin kaweid Kristian koaros iangahki ohl oh lih pwopwoud kan: “Kumwail wahupene nanpwungamwail.” (Rom 12:10) Wahnpoaron Piter ntingihedi: “Kumwail ohl pwopwoud kan pil duwehte, ni amwail pahn kin werekiong amwail pwoud kan, kumwail uhdahn pahn kin pohnese me iei irail me luwet, oh kumwail uhdahn pahn waunekin irail.” (1 Piter 3:7) Kaweid kohwong lih pwopwoud en “wauneki eh pwoud.” (Episos 5:33) Ma ke men wauneki emen, ke pahn kadek ong oh kesempwalki ih oh eh madamadau. Ke pahn pil onopada ken kapwaiada dahme e peki rehmw ma e konehng.
8-10. Ia ekei ahl me wahu pahn sewese miniminpene en pwopwoud ehu en kak tengeteng oh nsenamwahu?
8 Irail me men ahneki mouren pwopwoud nsenamwahu kin kasalehiong arail pwoud wahu ni arail kin ‘pohnese ineng mwahu en meteikan, kaidehn arail kante.’ (Pilipai 2:4) Re sohte kin medewehte dahme pahn mwahu ong pein irail pwe met kak wehwehki roporop ong pein irail. Ahpw re kin medemedewe dahme pahn keieu mwahu ong arail pwoud. Ei, re kin mwohneki dahme mwahu ong arail pwoud.
9 Ma pwopwoud kin wahupene, met pahn kin sewese ira en pohnese wekpeseng en ara madamadau. E sohte pwung en kasik aramas riemen en pwungkipene soahng koaros. Dahme ohl pwopwoud men pahn kesempwalki, ele liho sohte pahn kesempwalki. Oh dahme lih pwopwoud men pahn perenki, ele ohlo sohte pahn perenki. Ahpw emenemen ira anahne wauneki pilipil oh madamadau en meteio, ma ara pilipil sohte pahn kauwehla sapwellimen Siohwa kosonned oh kaweid. (1 Piter 2:16; pil kilang Pailimwon 14.) Emenemen ira anahne wauneki meteio ni eh sohte pahn mwamwahliki de wiahki ah mehn kemenkouruhr mwohn aramas de ni ara kin kelehpw.
10 Ei, ara limpoak ong Koht oh ong emenemen, oh pil ara wahupene nanpwungara, iei iren sawas kesempwal riau ong pweidahn pwopwoud ehu. Ia duwen pwopwoud ehu ara kak doadoahngki sawas pwukat nan ekei irair kesempwal en mouren pwopwoud?
ALASANG KRAIS NIN DUWEN TAPWI MEN
11. Ihs me Paipel mahsanih me moangen pwopwoud ehu?
11 Paipel kin padahkihong kitail me ohl wiawihkihda irair kan me pahn kahrehiong ih en wia moangen peneinei mwahu men. Ihme kahrehda Siohwa ketin kupwurki ohl emen en apwalih ahn eh pwoud oh nah seri kan anahn en war oh nanpwungmwahu reh. E pahn anahne wiahda pilipil mwahu me pahrekiong kupwuren Siohwa oh e pahn wia mehn kahlemeng mwahu. “Lih pwopwoud kan, kumwail pein uhpah amwail pwoud kan, duwehte amwail kin uhpah Kaun-o. Pwe ohl pwopwoud ih me moangen eh pwoud, duwehte Krais me tapwin mwomwohdiso, oh pein Krais me Sounkomourpen mwomwohdiso, me iei paliwere.” (Episos 5:22, 23) Ahpw Paipel mahsanih me ohl pwopwoud pil mie tapwi, mie Emen me kaunda ih. Wahnpoaron Pohl ntingihedi: “I men kumwail en dehdehkihla mwahu padahk wet: duwen Krais eh tapwin aramas koaros, duwen ohl pwopwoud eh moangen eh pwoud, oh duwen Koht eh tapwin Krais.” (1 Korint 11:3) Ohl pwopwoud erpit men kin sukuhlki duwen eh pahn wia moangen eh pwoud ni eh kin alasang eh tapwi, Sises Krais.
12. Mehn kahlemeng mwahu dah me Sises kin ketikihda ong uhpah oh wia tapwi?
12 Sises pil mie eh tapwi, iei Siohwa. E kin ketin uhpah Siohwa. Sises mahsanih: “I sohte kin rapahki pein nsenei, ahpw kupwur en ih me ketin kadariedohro.” (Sohn 5:30) Ia uwen kaselel en mehn kahlemeng wet! Sises “me mesenih oh lapalap sang soahng kan koaros me kepikipikda.” (Kolose 1:15) E ketin wiahla Mesaia. E pahn wia Tapwin mwomwohdisohn Kristian me keidi kan oh Nanmwarki en Wehin Koht, me lapalap sang tohnleng kan koaros. (Pilipai 2:9-11; Ipru 1:4) Mendahki e sapwellimanki dehu ileile ehu oh e pahn pil ketin lapalapala, Sises sohte kin ketin lemei, keptakai de kasik laudsang dahme aramas kak wia. Kaidehn ih aramas limeidihd men me ahnsou koaros kin katamankihong sapwellime tohnpadahk ko ren peikiong ih. Sises kin ketin poakohng oh nsenohki aramas akan, ahpw mehlel irail akan me wiakaula. E mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk; kumwail ahpw pahn diar kommoalpen [“mourimwail,” NW] kan. Pwe mehn wisik me I pahn kihong kumwail me mengei, oh audepe kan me marahra.” (Madiu 11:28-30) Kaperen mihmi reh.
13, 14. Ia duwen ohl pwopwoud limpoak men eh pahn wia tapwi men ni eh alasang Sises?
13 E pahn mwahu ohl pwopwoud men en medewe duwen sapwellimen Sises irair mwahu kan ma e men ahneki mouren peneinei nsenamwahu. Ohl pwopwoud mwahu men sohte kin lemei, sohte kin men kaun oh sohte kin doadoahngki eh manaman en tapwi ni ahl sapwung. Ahpw e kin poakohng oh wauneki eh pwoud. Ma Sises ketin “nan kapehd karakarahk,” ohl pwopwoud men sou pil anahne karakarahk pwehki e kin wiahda sapwung oh sohte duwehte Sises? Ni eh wiahda sapwung, e kin men eh pwoudo en wehwehki ih. Ihme kahrehda, ohl pwopwoud aktikitik men kin kasalehda eh sapwung kan mehnda ma e kin apwalki nda “Mahkohng ie, kowe me pwung.” E pahn mengeiong lih pwopwoud men en wauneki eh tapwi ma ohlo kin aktikitik oh sohte kin aklapalap oh keptakai. Lih pwopwoud me kin kasalehda wahu pil pahn pekimahk ma e wiahda sapwung.
14 Koht ketin wiahkihda lih irair mwahu kan me liho kak doadoahngki pwe en sewese mouren pwopwoud ehu en nsenamwahu. Ohl pwopwoud erpit men pahn pohnese duwen met oh sohte pahn irehdi liho en kasalehda irair pwukat. Lih tohto kin ahneki nsenoh laud, irair me anahn en apwalih peneinei ehu oh sewese wiahda nanpwungmwahu. Lih akan kin koahiek en wiahiong ihmw ehu en wia wasahn kousoan kansenamwahu. Lepin Padahk irelaud 31 kawehwehda duwen “lih pwopwoud me keieu koahiek men” me ahneki irair kaselel oh koahiek tohto, oh eh peneinei kin uhdahn paiekihda. Dahme kahrehda? Pwehki eh pwoud “kin likih.”—Lepin Padahk 31:10, 11.
15. Ia duwen ohl pwopwoud men eh kak kasalehiong eh pwoud soangen limpoak oh wahu me Krais kin ketin kasalehda?
15 Nan ekei sahpw, aramas kin nohn kesempwalikihla ahn ohl pwopwoud eh pwuhng, kahrehda re kin wiahki me ma ke peidek reh, ke mwamwahliki. Mwein e kin wiahki eh pwoud duwehte lidu men. Eh doadoahngki ni sapwung eh pwuhng en tapwi kin imwikihla eh kauwehla eh nanpwungmwahu rehn eh pwoud oh pil rehn Koht. (Pil kilang 1 Sohn 4:20, 21.) Ahpw ekei ohl pwopwoud kin soukautih arail pwukoahn tapwi oh mweidohng arail pwoud en kaunda peneinei. Ohl pwopwoud men me kin uhpahiong Krais sohte kin isaneki oh mwamwahliki eh pwoud. Ahpw e kin alasang sapwellimen Sises limpoak en tounmetei oh wia dahme Pohl kaweidki: “Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso.” (Episos 5:25) Sises Krais kin ketin poakohng laud sapwellime kan kahrehda e pwoukinirailla. Ohl pwopwoud mwahu men pahn kin alasang Sises ni eh sohte kin roporop ong pein ih. Ohlo pil kin rapahki kamwahupen eh pwoud, a kaidehn kasik laudsang dahme e kak wia. Ni ohl pwopwoud men eh uhpahiong Krais oh kasalehda limpoak oh wahu me Krais kin ketin kasalehda, met pahn kamwakid eh pwoud en uhpahiong.—Episos 5:28, 29, 33.
AHN LIH PWOPWOUD UHPAH
16. Soangen irair dah me lih pwopwoud men anahne kasalehda rehn eh pwoud?
16 Ehu ahnsou mwurin Adam eh kapikipikda, Siohwa Koht pil ketin mahsanih: “E sohte konehng aramas menet en kelekelehpw. I pahn wiahiong eh werek en wia sawasepe.” (Senesis 2:18) Koht ketin kapikada Ihp en “wia sawasepe,” ahpw kaidehn ira en siaipene. Pwopwoud en dehr duwehte sohp pwoat me mie kepdin riemen me kin siaipene. Ohl pwopwoud anahne wia tapwi me limpoak oh lih pwopwoud anahne kasalehda limpoak, wahu oh uhpah.
17, 18. Ia ekei ahl me lih pwopwoud men pahn kak sewese eh pwoud?
17 Ahpw lih pwopwoud mwahu men sohte kin uhpahte. E kin nantihong sawas oh utung pilipil kan me eh pwoud kin wiahda. Ei, e pahn mengei ong ih ni eh kin pwungki ahn eh pwoud pilipil kan. Ahpw mehnda ma e pil sohte kin pwungki, eh utuht kak sewese ahn eh pwoudo pilipil en pweida.
18 Lih pwopwoud men kak sewese eh pwoudo en wia tapwi mwahu men ni ahl teikan. E kak kasalehda e kalahnganki ahn ohlo kin nantihong tiengla mwowe, a kaidehn en kauwe oh wiahiong en pehm me e sohte kak kaperenda ih. Nan eh wiewia ong eh pwoud, e anahne tamataman me “kadek oh meleilei . . . me kesempwal mehlel mwohn silangin Koht,” kaidehn ongete eh pwoud. (1 Piter 3:3, 4; Kolose 3:12) Ahpw ia duwen ma eh pwoud sohte iang padahk mehlel? Mehnda ma e iang de soh, Paipel kin kangoange lih pwopwoud kan “re en poakohng arail pwoud kan oh neirail seri kan, re en kin kanahieng pein irail pwe re en min, re en wiahla lih wiewia mwahu en nan ihmw oh peikiong arail pwoud kan; pwe emen dehr lahlahwehki mahseno sang rehn Koht.” (Taitus 2:4, 5) Ma soahng kan me pid kadeikpen loalen lih pwopwoud men pwarada, eh pwoud me sohte iang padahk mehlel ele pahn wauneki liho ma e kawehwehda kahrepen eh sohte kak wia met ni “kadek oh wahu”. Ekei ohl pwopwoud me sohte iang padahk mehlel ‘alehkihla pwoson ahn arail pwoud mouren wiewia mwahu. Irail sohte anahne kapahrekiong irail, pwe re pahn pein kilang arail mour mwakelekel oh duwen arail wauneki Koht.’—1 Piter 3:1, 2, 15, 16; 1 Korint 7:13-16.
19. Ia duwen ma ohl pwopwoud men peki eh pwoud en wia mehkot me pahn kauwehla sapwellimen Koht kosonned?
19 Ahpw ia duwen ma ohl pwopwoud men peki rehn eh pwoud en wia mehkot me Koht ketin keinapwihdi? Ma met wiawi, liho anahne tamataman me e pahn kin peikiong Koht mahs. E pahn alasang dahme wahnpoaron ko wia ni ahnsou me kaun akan ndahng irail en kauwehla sapwellimen Koht kosonned. Wiewia 5:29 mahsanih: “Piter oh wahnpoaron teiko ahpw sapeng, ‘Se uhdahn pahn peikiong Koht, a kaidehn aramas.’”
KOASOAKOASOIPENE MWAHU
20. Soangen ahnsou dah me limpoak oh wahu kin kesempwal?
20 Limpoak oh wahu pil kesempwal ong koasoakoasoipene mwahu nan mouren pwopwoud. Ohl pwopwoud limpoak men kin iang eh pwoud koasoiapene ahn eh pwoudo wiewia kan, kahpwal kan oh madamadau duwen soangsoangen ire kan. Liho kin anahne met. Ohl pwopwoud men me kin kihong ahnsou en koasoiong eh pwoud oh uhdahn rong mwahu dahme e kin nda kin kasalehda me e poakohng oh wauneki eh pwoudo. (Seims 1:19) Ekei lih pwopwoud kin kaulim oh kin nda me arail pwoud sohte kin kalapw koasoiong irail. Poakehla. Ei, nan ahnsou kedirepw pwukat, ohl pwopwoud kan ele kin doadoahk awa tohto oh pwehki kahpwal en mwohni me kahrehda ekei lih pwopwoud kan pil anahne doadoahk. Ahpw pwopwoud ehu anahne wiahda ahnsou ira en kin koasoipene. Ma ira sohte wia met, ira kakete sohla ehupene. Ma emenemen ira kin pehm me e anahne werekiong emen tohrohr me pahn poakehla ih, e kak kahrehda kahpwal laud.
21. Ia duwen lokaia me konehng eh kak sawas pwe pwopwoud ehu en nsenamwahu?
21 Mwomwen ahn ohl pwopwoud oh lih pwopwoud kin koasoipene kin kesempwal. “Ngihl kadek rasehng sukehn loangalap-mem oh mwahu ong paliwar.” (Lepin Padahk 16:24) Mehnda ma ahn emen pwoud kin iang padahk mehlel de soh, Paipel kaweidki: “Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.” (Kolose 4:6) Ahn en emen pwoud lokaia kadek, ngihl kadek oh kin poakehla kak wia sawas laud ong emen ni rahn me e ahneki kapwal. “Meid kaperen diar mahsen pwung ni ahnsou me konehng!” (Lepin Padahk 15:23) Ngihl oh lepin lokaia me emen kin pilada en doadoahngki uhdahn kesempwal. Karasepe, ni ahnsou me emen kin lingeringer, ele e pahn ndaiong meteio: “Ritingedi wenihmwen!” Ahpw e sou pahn mwahu ma e doadoahngki lokaia “katapan oh kansenamwahu” oh ngihl meleilei oh kadek ni eh pahn nda, “Ke kak menlau ritingedi wenihmwen?”
22. Soangen madamadau oh mwekid dah me pwopwoud kan anahne pwe ren kin koasoakoasoipene mwahu?
22 Koasoakoasoipene mwahu nan pwopwoud ehu kak pweida ni ara kin koasoi meleilei, kadek, wehwe, nsenoh, maskadek oh ara wiewia kin mwahu. Sang ni ohl pwopwoud oh lih pwopwoud ara kin koasoakoasoipene mwahu, ira koaros pahn saledek en kasalehda ara anahn oh ira kak kansenamwahwih oh sewese emenemen ni ahnsoun kapwunod oh kahpwal. Mahsen en Koht kangoange kitail en “kakehlaka irail kan me nan kapehd tikitik.” (1 Deselonika 5:14) E pahn mie ahnsou me ohl pwopwoudo oh pil eh pwoudo kin nsensuwedla. Ira kak wia soangen koasoi me pahn “kakehlaka” de kansenamwahwih emenemen.—Rom 15:2
23, 24. Ia duwen limpoak oh wahu eh kin sawas ni ahnsou me pwopwoud ehu sohte kin pwungkipene mehkot? Menlau kihda ehu karasaras.
23 Pwopwoud ehu me kin kasalehda limpoak oh wahu sohte pahn wiahki kahpwal laud ehu soahng koaros me ira sohte pwungkipene. Ira pahn nantihong ira en dehr “lemeiong” emenemen. (Kolose 3:19) Ira koaros anahne tamataman me “sapengki ngihl tikitik kin kameleilei lingeringer, ahpw ngihl kehlail kin kamwakidada.” (Lepin Padahk 15:1) Kanahieng ken dehr mwamwahliki de kauwe meteio ni eh kin kasalehda audepen eh mohngiong. Ahpw, e pahn mwahu en wiahki soangen ahnsou wet ahnsoun wehwehkihla eh madamadau. Nantihong kamwahwihala ire kan me kumwa sohte kin pwungkipene pwe kumwa en kin kak wehwepene.
24 Nna tamanda ahnsou me Sara ndaiong eh pwoud Eipraam en kamwahwihala kahpwal ehu ni ahl ehu me sohte pahrekiong ahn Eipraam pepehm. Ahpw, Koht ketin mahsanihong Eipraam: “Kapwaiada mehkoaros me Sara pahn ndawei.” (Senesis 21:9-12) Eipraam kapwaiada oh Koht ketin kapaiada ih. Pil duwehte met, ma lih pwopwoud men pahn ndaiong eh pwoud mehkot me weksang dahme ohlo medewe, e anahne rong. Pil ni ahnsowohte, kaidehn lihohte me pahn koasoakoasoi, e anahne rong dahme eh pwoudo pahn nda. (Lepin Padahk 25:24) Pwe ma emenemen ira kin ahnsou koaros ngihtehtehki wia dahme e mwahuki, met sohte kin kasalehda limpoak oh wahu.
25. Ia duwen koasoakoasoipene mwahu eh kin sewese nsenamwahu en pwopwoud ehu me pid wia nsenen pwopwoud?
25 Koasoakoasoipene mwahu pil kin kesempwal ong ahn pwopwoud ehu kin wia nsenen pwopwoud. Ahn emen eh kin nsenohkihte pein ih oh sohte kak kaunda nsene kak kauwehla ara ehupene me pid wia nsenen pwopwoud. Ara saledek en kasalehda ara madamadau iangahki kanengamah kin kesempwal. Ni ara pahn kin rapahki kamwahupen meteio, wia nsenen pwopwoud sohte pahn wia kahpwal laud ehu. Ong ire wet oh pil ire teikan, emenemen ira en ‘dehr kin ngoangki raparapahkihte pein kamwahupe kan, ahpw emenemen en ngoangki rapahki kamwahupen meteio.’—1 Korint 7:3-5; 10:24.
26. Mendahki pwopwoud koaros kin ahneki ahnsou mwahu oh ahnsou suwed, ia duwen arail kin rong Mahsen en Koht eh kin sewese irail ren diar nsenamwahu?
26 Paipel kin uhdahn kihda kaweid mwahu! Nan pwopwoud koaros, kin mie ahnsou mwahu oh ahnsou suwed. Ahpw ma lih oh ohl pwopwoud pahn idawehn sapwellimen Siohwa madamadau me sansalda nan Paipel oh poahsoanekihda ara nanpwungmwahu kaweid en limpoak oh wahu, ira kak likih me ara mouren pwopwoud pahn werei oh nsenamwahu. Eri, kaidehn irahte me ira pahn kawauwihala, ahpw ira pahn kawauwihala Siohwa Koht me ketin wiahda koasoandi en pwopwoud.
IA DUWEN IRE MEHLEL EN PAIPEL PWUKAT EH KAK SEWESE . . . PWOPWOUD EHU EN WEREI OH NSENAMWAHU?
Kristian mehlel kan kin limpoakpene.—Sohn 13:35.
Kristian kan kin mahkpene nanpwungarail.—Kolose 3:13.
Mie koasoandi en tapwi.—1 Korint 11:3.
E kin kesempwal en kin nda lepin lokaia me pwung ni ahl me konehng.—Lepin Padahk 15:23.
[Kilel nan pali 32]
Limpoakpene oh wahupene kin kahrehiong pwopwoud ehu en nsenamwahu