Dehr Wiahla Lipirap Men!

MIEIER emen me pirapahsang mehkot rehmw?— Ia duwen ahmw pepehm ong met?— Aramaso iei lipirap men oh sohte me kin mwahuki me lipirap. Ia duwen emen eh kin wiahla lipirap men? E ipwikihdi?—

Kitail ahpwtehn sukuhlki me aramas kin ipwidi dipan. Kahrehda kitail koaros soh unsek. Ahpw sohte me kin ipwidi wia lipirap men. Lipirap men kak kohsang peneinei mwahu ehu. Mwein eh pahpa oh nohno oh rie kan kin wia aramas lelepek kei. Ahpw pein en aramaso inangih mwohni oh dahme mwohni kak pwainda me kahrehiong en wiahla lipirap men.

Ihs me ke pahn nda me wia tepin lipirap men?— Kita medewe mahs ihs met. Sounpadahk Lapalapo mwahngih ihs met ni ahnsou me e ketiket nanleng. Lipirap menet iei tohnleng men. Ahpw ia duwen tohnleng menet eh wiahla lipirap men pwehki Koht eh ketin wiahda tohnleng kan koaros unsek?— Eri, kitail sukuhlkier nan irelaud 8 nan pwuhk wet me tohnleng menet men ahnekihda mehkot me kaidehn ah. Ke tamataman dahkot met?—

Mwurin Koht ketin wiahda tepin ohl oh lih, tohnleng menet men ira en kaudokiong ih. Sohte eh pwuhng ong ara kaudok. Koht me sapwellimaniki pwuhng ong ara kaudok. Ahpw tohnleng menet pirapahsang ara kaudok! E wiahla lipirap men ni eh kahrehiong Adam oh Ihp en kaudokiong ih. Ih eri wiahla Sehdan me Tepil.

Dahme kin kahrehiong emen en wiahla lipirap men?— Iei inangih mehkot me kaidehn ah. Ineng wet kak kehlailla oh kahrehiong aramas mwahu kan en pil wia me suwed. Ekei pak, aramas me wiahla lipirap kan sohte kin koluhla pwehn pwurehng wia me mwahu. Emen irail iei emen sapwellimen Sises wahnpoaron ko. Ede Sudas Iskariot.

Sudas wehwehki me e sapwung en pirap pwehki e sukuhlkier Kosonned en Koht sangete ni eh wia kisin pwutak. E pil ese me ehu pako, Koht mahsanihong sapwellime aramas akan sang nanleng: “Kumwail sohte pahn pirap.” (Eksodus 20:15) Ni en Sudas laudla, e tuhwong Sounpadahk Lapalapo oh wiahla sapwellime tohnpadahk. Mwuhr, Sises ketin pilada Sudas en wiahla emen sapwellime wahnpoaron.

Sises oh sapwellime wahnpoaron ko kin seiloakpene. Irail kin mwengepene. Oh neirail mwohni kin kohwong nan dewen mwohni ehu. Sises ketikihong Sudas en apwalih dewen mwohnio. Kaidehn nein Sudas mwohni ko. Ahpw ke ese dahme Sudas wiahda mwuhr?—

Sudas tepidahr ale mwohni sang nan dewen mwohnio ni ahnsou me e sohte konehng en wia. E kin wia met ni ahnsou me aramas sohte kin kilang oh e pil song en rapahki ekei ahl me e pahn kak ale pil ekei mwohni. E tepidahr medemedewe mwohni ahnsou koaros. Kita kak kilang dahme ineng suwed wet kahrehiong Sudas en wia rahn kei mwohn Sounpadahk Lapalapo eh kamakamala.

Mery, rien Lasarus me wia kompoakepahn Sises, ale leh ehu me inenen pweilaud oh keiehki nehn Sises ko. Ahpw Sudas kaulimkihla. Ke ese dahme kahrehda?— E nda me leho konehng en netila oh mwohni ko en sewesehki me semwehmwe kan. Ahpw ni mehlel, e men mwohni ko en kohieng nan dewen mwohnio pwehn kak pirapahla.​—Sohn 12:1-6.

Sises mahsanihong Sudas en dehr kedirepwe Mery pwehki e inenen kadek. Sudas sohte pwungki dahme Sises mahsanihong ih, kahrehda e kohla rehn samworo lapalap oko me wia imwintihti en Sises. Irail men salihedi Sises ahpw re men wia met nipwong pwe aramas de kilang irail.

Sudas ndaiong samworo ko: ‘I pahn ndaiong kumwail ia duwen amwail pahn kak koledi Sises ma kumwail pahn kihong ie mwohni. Ia uwen me kumwail pahn kihong ie?’

Samworo ko sapeng: ‘Se pahn kihong uhk mwohni silper silihsek.’​—Madiu 26:14-16.

Sudas eri ale mwohni ko. Met duwehte eh netikihong irail Sounpadahk Lapalapo! Pwe ihs me kak medewehda wia soangen suwed me duwehte met?— Eri, ih soahng me kin wiawi ma aramas men wiahla lipirap men oh pirap mwohni. E kin poakohng mwohni laudsang eh kin poakohng aramas oh pil Koht.

Mwein ke pahn nda, ‘Sohte mehkot me I poakohng laudsang ei kin poakohng Siohwa Koht.’ E mwahu ahmw ahneki soangen pepehm en. Mwein ih pil duwen en Sudas pepehm ahnsou me Sises ketin pilada ih en wia wahnpoaron men. Mwein irail kan me wiahla lipirap pil kin ahneki soangen pepehmohte. Kita pahn koasoia duwen ekei irail.

Emen irail pwukat iei sapwellimen Koht ladu me adaneki Akan. E kin momour sounpar tohto mwohn Sounpadahk Lapalapo ketin ipwidi. Akan kilangada likou kaselel ehu, lepin kohl ehu oh pil ekei mwohni silper. Kaidehn ah mepwukat. Paipel mahsanih me sapwellimen Siohwa mepwukat pwehki dipwisou pwukat kohsang rehn imwintihti en sapwellimen Koht aramas akan. Ahpw Akan men ahneki dipwisou pwukat kahrehda e pirapahla.​—Sosua 6:19; 7:11, 20-22.

Iet pil ehu karasaras. Mahsie, Siohwa ketin pilada Depit en wia nanmwarki en mehn Israel kan. Ehu rahno, Depit tepida kilang lih kaselel me adaneki Padsipa. E wie kilikilang Padsipa oh medemedewe duwen eh pahn wahla ni imweo oh pwoudikihda. Ahpw liho iei en Uraia pwoud. Eri dahme Depit anahne wia?—

Depit anahne uhdihsang eh kin medewe en pwoudiki Padsipa. Ahpw esohte wia met. Kahrehda Depit wahla ih ni imweo. Ih eri pil koasoanehdi pwe Uraia en kamakamala. Dahme kahrehda Depit wiahki soahng suwed pwukat?— Pwehki e kin wie medemedewehte lih emen me ahn emen tohrohr eh pwoud.​—2 Samuel 11:2-27.

Pwehki Depit koluhla, Siohwa ketin mweidohng ih en momourte. Ahpw mwurin mwo, Depit ahneki kahpwal tohto. Nah pwutak Apsalom uhd men wiliandi Depit oh wia nanmwarki. Eri ni ahnsou me aramas akan kin kohdohng tuhwong Depit, Apsalom kin pwoaleiraildi oh metik irail. Paipel kasalehda me dahme Apsalom wia duwehte pirap. E kahrehiong aramas oko arail men ih me en wiahla arail nanmwarki ah kaidehn Depit.​—2 Sam. 15:1-12.

Mie pak me ke kin uhdahn mwahuki mehkot duwehte Akan, Depit oh Apsalom?— Ma dipwisou ehu me ahn emen tohrohr, eri ke pahn pirapada ma ke ale ni sohte mweimwei. Ke tamataman dahme tepin lipirapo Sehdan mwahuki?— E men aramas en kaudokiong ih ah kaidehn Koht. Eri Sehdan kin pirap ni eh kahrehiong Adam oh Ihp en dukiong ih.

Ma emen ahneki mehkot, eri ih me ahneki pwuhng en pilada ihs me pahn doadoahngki. Karasepe, mwein ke kohla mwadong rehn ekei seri nan imwarail. E konehng ken ale mehkot sang ni imwarail oh wahdo ni imwomwo?— E sohte konehng ma arail pahpa de nohno sohte mweidohng uhk. Ma ke wahla mehkot ni imwomwo ni ahmw sohte pekihda rehrail, eri met pirap.

Dahme kak kahrehiong uhk en men pirap?— Iei ahmw mwahuki mehkot me kaidehn ahmw. Eri mehnda ma meteikan sohte kilang ahmw ale, ihs me kin kilang uhk?— Siohwa Koht. Kitail pil anahne tamataman me Koht ketin kalahdeki pirap. Ihme kahrehda limpoakohng Koht oh mehn mpomw pahn sewese iuk en dehr wiahla lipirap men.