Peidek kan Sang Sounwadawad kan
Pwuhken Rongamwahu siluh kin koasoia duwen en Sises keiekihdi leh pweilaudo. Wahnpoaron tohto me kaulimki met, de keieu Sudas?
Kitail wadek wiewia wet nan pwuhken Rongamwahu kan me Madiu, Mark oh Sohn ntingihdi. E mwomwen me Sudas me tepiada kaulim, oh ekei wahnpoaron kan pwungkin ih. Wiewia wet karasahda kahrepen kitail en kalahnganki me mie neitail pwuhken Rongamwahu pahieu ko. Dahme emenemen wahnpoaron ko ntingihdi me pwung, ahpw kaidehn koaros ntingihdi soangen oaritik kohte. Ni atail kapahrekihpene Rongamwahu ko koaros, kitail pahn wehwehkihla oaritik kan koaros en dahme wiawi ahnsowo.
Madiu 26:6-13 kin kasalehda wasao me wiewia wet wiawi ie—ni imwen Simon me tokutoko, nan Pedani—ahpw e sohte kasalehda eden liho me tepiada wudekihong leh pwohmwahu pohn moangen Sises. Madiu ntingihdi: “Ni tohnpadahk ko ar kilangada met, re ahpw lingeringerkihda” oh kaulimki me leho kak netila oh mwohni ko nehnehong me semwehmwe kan.
Rongamwahu en Mark kin oarepene pali laud en oaritik ko. Ahpw, e kapataiong me liho pwalangpeseng pwoatolo. Pwoatolo audaudki leh pwohmwahu me wiawihsang ni pwilin tuhke me adaneki “nard,” ele e kohsang sapwen India. Nin doken kaulim, Mark ripohtki me “ekei me iang mi wasao ahpw lingeringerkihda,” oh “irail eri lipilipahnede liho.” (Mark 14:3-9) Eri, Rongamwahu riawo kasalehda me wahnpoaron tohto sang emen me iang kaulim. Ahpw, iaduwen e tepiada?
Sohn, me kadehdehki mese dahme wiawi, kapataiong oaritik kesempwal kan. E kasalehda eden liho me iei Mery, rien Marda oh Lasarus. Sohn pil kapataiong oaritik wet, me kitail pahn kilangwohng me e kaunsekihla wiewiao, ahpw kaidehn e uhwong: “E keiehki aluweluwen Sises ko, oh limwiheki pitenmoangeo.” Ni atail kapatahpene wiewia ko koaros, kitail kak kilang me Mery keiehki leh, me Sohn kadehdehda me “leh ehu me wiawihkidahr tuhke me adaneki nard” oh keiehki moangen Sises oh aluweluwen Sises. Sohn kin uhdahn poakohng Sises oh pahn kin lingeringerki ma mehkot suwed wiawihong Sises. Kitail wadek: “Emen sapwellime tohnpadahk ko, Sudas Iskariot—ih me pahn pangala Sises—ahpw nda, ‘Dahme kahrehda leh wet sohte netila ni mwohni silper silipwiki, pwe mwohni wet en kohieng me semwehmwe kan?’”—Sohn 12:2-8.
Ni mehlel, Sudas iei “emen sapwellimen Sises tohnpadahk kan,” ahpw ke kak pehm en Sohn lingeringerki me menet me mih nan irair wet pilipilahnih en pangala Sises. Sounkawehwe Dr. C. Howard Matheny koasoia duwen Sohn 12:4: “Lepin lokaiahn wai ‘being about’ [de: “was about to”] oh lepin lokaia ko ‘to be betraying’ [de, “was about to betray”] koaros kin kasalehda duwen wiewia ehu me kaukaule. Met kasalehda me en Sudas pangala Sises kaidehn mehkot me e ahpwtehn tamanda ahnsowo en wia, ahpw e kin medemedewe oh pilipilahnih met erein rahn tohto.” Sohn kapataiong me Sudas kaulim “kaidehn pwehki eh kin nsenohki me semwehmwe kan, ahpw pwehki lipirap men ih. Ih me kin weuwa neirail edin mwohnio oh kin kihkihsang mwohni.”
Ihme e konehng me lipirapo Sudas me tepiada kaulimo pwehki e pahn pirapala mwohni tohto ma leh pweilaudo pahn netila oh mwohni kan kohieng nan koakon me e kin weuwa. Ni ahnsou me Sudas wiahda kaulimo, ekei wahnpoaron teikan ele mengimengiloalki arail pwungki met me dene e pwung. Ahpw, Sudas me tepin wiahda kaulimo.