Ripoht En Sounkalohk Kan En Wehio
Mouren Peneinei Nsenamwahu kin Kakaranih Meteikan ong Koht
SIOHWA kapaiakihda Sosep erpit oh dehde mwahu. (Wiewia 7:10) Imwilahn met, erpit en Sosep “kin wia mehkot mwahu mwohn mesen Parao oh nah ladu kan koaros.”—Senesis 41:37.
Me pil duwehte rahnwet, Siohwa kin ketikihong sapwellime aramas akan loalokong oh wehwe mwahu sang ni arail kin onopki Paipel. (2 Timoty 3:16, 17) Erpit wet oh wehwe mwahu wet kin kapwarehda wah mwahu kan ni ahr kin kapwaiada kaweid kan me poahsoanda pohn Paipel. Arail tiahk mwahu kin kalap ‘wia mehkot mwahu mwohn mesen irail ko me kin kilang met,’ nin duwen me ekspiriens sang sapwen Zimbabwe kasalehda.
• Mie emen lih me mehn mpe kan iei Sounkadehdehn Siohwa kan. Mendahki lih menet sohte mwahuki Sounkadehde kan, e kin wadekala arail tiahk mwahu, keieu arail mouren peneinei kin nsenamwahu. E kin tehk me ohl pwopwoudo oh lih pwopwoudo uhdahn mwahu nanpwungara oh neira seri kan kin peik. E kin keieu tehk me ohl pwopwoudo kin uhdahn poakohng ah pwoud liho.
Nan ekei tiahk en Aperika, me tohto kin kamehlele me ma ohl emen kin poakohng eh pwoudo, ele liho kin doadoahngki mesehl pwehn “kamandala” ohlo. Ihme, liho tuhwong Sounkadehde lih pwopwoudo oh kalelapak reh: “Ke kak kihdohng ie mesehlo me ke kihong omw pwoudo pwe ahi pwoudo en uhdahn limpoakohng ie duwehte omw pwoudo ah uhdahn limpoakohng uhk?” Sounkadehdeo sapengki: “Ehi, I pahn wahdohng uhk mwurin souwas en lakapw.”
Mandahn rahno, sistero pwurala rehn liho oh wahda ah “mesehlo.” Dahkot met? Met iei Paipel iangahki pwuhken Knowledge That Leads to Everlasting Life. Mwurin ara koasoiapene ire kan sang nan pwuhken Knowledge pahn oaralap me koasoia “Building a Family That Honors God” (“Kauwada Peneinei ehu me kin Kawauwih Koht”), e ndaiong liho: “Met iei ‘mesehlo’ me ahi pwoud oh ngehi kin doadoahngki pwehn ‘kamandala’ emenemen, oh ih kahrepe wet me se kin uhdahn poakohng emenemen.” Ehu onop en Paipel tepiada rehn liho, oh liho kekeirada mwadang lao e kadehdehda ah inou ong Siohwa ni a papidaisla.
• Special Pioneer riemen me ale pwais en iang kisin mwomwohdiso ehu me karanih ni paliepengen palimesehn keilen Zimbabwe oh Mozambique sohte kohla kalohk sang ihmw lel ihmw erein wihk riau. Pwekihda? Pwehki aramas akan kin kohdo rehra pwehn rong dahme re nda. Emen pioneer ko kasalehda iaduwen met pwarada: “Se kin seiloaki mwail duwau pwehn onop Paipel rehn emen me kin perenki rong. E sohte mengei ong kiht en lellahng nan wasao. Se anahne alu nan pwelmatak, oh se anahne kotehla pillap lapake me kin kohda lel pahn tepinweret kat. Met wehwehki me se pahn kihdahng pohn moangat at likou kan oh at suht kan, oh kotehla pillapo, oh pwurehng likouda palio pihlo.
“Mehn mpen aramaso me kin perenki onop kin uhdahn wadekala at ngoang. Nanpwungen irail ko me kin tehk duwen met iei emen kaun en pwihn en lamalam ehu wasao. E ndaiong irail kan me kin idawehn ih: ‘Kumwail sohte men ngoang duwehte ohl pwulopwul riemen ko en Sounkadehdehn Siohwa?’ Mandahn rahno, tohtohn irail kan me kin idawehn kaun menet kohdo ni imwat pwehn rapahkihda kahrepen at ngoangki kalohk. Patohngete met, erein wihk riau mwurin met, aramas tohto kin pwarek kiht me kahrehda sohla at ahnsoun kaunopada kanat mwenge!”
Emen aramas ko me pwarek imwen pioneer ko erein wihk riauwo iei kaun en lamalamo. Medewehla uwen peren en pioneer ko ni ahnsou me kaun menet pwungkihda ren onop Paipel reh!