Irelaud 5
Elder Kan Me Kin Apwalih Sihpw Akan
NI EN Sises ketiket nin sampah, e kasalehda me ih me wia “silepen sihpw mwahuo.” (Sohn 10:11) Ni e mahsanih duwen pokono ah kin ngoangki idawehn ih, “e kin kupwureirailla, pwehki ar pwunod akan oh sohte epwelparail, pwe re rasehng sihpw kei me sohte silepahr.” (Madiu 9:36) Piter oh tohnpadahk teiko kin tehk duwen eh kin nsenoh pwehki limpoak me e sapwellimaniki. Ia uwen Sises ah weksang irail sounapwalih sihpw likamw kan en Israel me kin kesehla neirail sihpw kan oh irail eri mwerpeseng oh duhpekla ni pali ngehn! (Esekiel 34:7, 8) Ni arail pahn kin tehk duwen sapwellimen Sises mehn kahlemeng mwahu kan ni mwomwen eh kin padahk oh kin apwalih sapwellime sihpw kan lau lel ah pil meirongkihla ah mour ohng irail, wahnpoaron ko kin sukuhliki mwomwen arail pahn kin sewese irail kan me kin pwoson en pwurodo rehn Siohwa me wia ‘sileparail oh sounepwelpen ngenarail kan.’—1 Piter 2:25.
Sises doadoahngki sapwellime padahk kan oh mehn kahlemeng kan pwe en kasalehda duwen kesempwalpen pwukoa me e ketikihong irail wahnpoaron ko me iei en apwalih sapwellime sihpw kan. Ehu ahnsou ni en Sises mahmahsen ohng Piter, e ketin kasalehda de ketikihong nan madamadau oh mohngiong en sapwellime wahnpoaron kan ni ahl kehlail ehu duwen kesempwalpen kamwenge oh apwalih mwahu sihpw kan. (Sohn 21:15-17) Piter inenen mwekidkihda laud duwen met oh met pil sansalda mwuhr nan sapwellime mahsen en kaweid kan ong irail sounapwalih en mwomwohdiso kan. Nan keieun sapwellime kisinlikou, e kaweidki sounapwalih kan: “Kumwail en kin wia doadoahk en silepen sihpw me Koht ketikihong kumwail, oh apwalih irail, kaidehk ni mehnseiren ahpw ni kupwur mwahu duwen kupwur en Koht. Kumwail wia amwail doadoahk, kaidehk pwehki amwail pahn ale pweipwei, a pwehki amwail kin uhdahn ngoangki papah. Kumwail dehr kin aksoupeidi ong irail kan me mi pahn epwelpamwail, ahpw kumwail en kin wia kahlemengihpen pwihn sihpw.”—1 Piter 5:1-3.
Sapwellimen Piter mahsen kan pil kin dokedoke irail sounapwalih kan nan mwomwohdiso rahnwet. Ahn sounapwalih kan arail pwukoa kan rahnwet pil duwehte ahn irail akan nan senturi keieu, iei en apwalih irail sapwellimen Koht sihpw kan. Nan sapwellime kisinlikou, Piter kin kasalehda duwen soangen madamadau me konehng irail sounapwalih kan en ahneki ni arail kin wia arail pwukoa. Ni arail pahn kin kahlemengih mehn kahlemeng mwahu kan en Sises, irail pahn kin papah ni kupwur mwahu oh ngoang pwe en wia mehn kahlemeng mwahu ohng irail sihpw kan oh tihengala mwowe nan sapwellimen Siohwa doadoahk.
Kitail kak kalahnganki irail sounapwalih kan me ngehn sarawi kin idihada. Kitail kin ale kapai tohto pwehki arail doadoahk. Karasepe, irail sounapwalih kan kin kihong tohnmwomwohdiso kan soangen mehn kangoang kan en ngehn oh tehk anahn en emenemen nan mwomwohdiso. Ehu ehu wihk, irail kin apwalih mihding en mwomwohdiso kan ni ngoang oh irail tohnmwomwohdiso kan kin kehlailla ni pwoson. (Rom. 12:8) Irail kin nantihong pere sihpw kan sang nan irair keper kan, duwehte aramas suwed kan, oh met kin sewese wahdohng perepatail ni pali ngehn. (Aiseia 32:2; Taitus 1:9-11) Arail mehn kahlemeng mwahu kan oh arail tihengala mwowe nan doadoahk en kalohk kin kangoange kitail en kin kaukaule nantihong nan atail doadoahk en kalohki Rongamwahuo nan ehuehu sounpwong. (Pilipai 3:16, 17; Ipru 13:15-17) Ki “kisakis kan sang rehn ohl” pwukat, Siohwa kin ketikihda mehn kakehl kan ohng tohnmwomwohdiso kan koaros.—Episos 4:8, 11, 12.
KOASOANDI KAN ME IRAIL SOUNAPWALIH KAN ANAHNE KAPWAIADA
Pwe mwomwohdiso en kak ale epwel pwung, irail ohl akan me kin ale pwukoa en apwalih mwomwohdiso kin anahne kapwaiada koasoandi kan me kileldi nan Mahsen en Koht. Ihte ma irail kak kapwaiada mehpwukat, eri kitail kak nda me ngehn sarawi pilirailda. (Wiewia 20:28) Ni mehlel, koasoandi kan me irail sounapwalih pwukat anahne kapwaiada inenen laud pwehki pwukoa kan en tiengki sapwellimen Siohwa kaudok oh wia mehn kahlemeng ohng tohnmwomwodiso me inenen kesempwal. (1 Korint 11:1; Ipru 13:7) Ahpw, koasoandi pwukat sohte nohn apwal me pahn kahrehda ohl Kristian kan me uhdahn poakoang Siohwa oh men Siohwa en doadoahngkin irail sohte kak kapwaiada. Koasondi pwukat kin laud pwehki irail elder kan en kak wia mehn kahlemeng mwahu nan mwomwohdiso. E anahne en sansal ohng koaros me irail sounapwalih kan kin anahne wia aramas kei me kin kapwaiada kaweid en Paipel nan arail mour en ehuehu rahn.
Wahnpoaron Pohl kasalehda nan keieun sapwellime kisinlikou keieu ong Timoty oh pil sapwellime kisinlikou ong Taitus kasalehda duwen koasoandi kan me sounapwalih kan anahne en kapwaiada. Pwuhken 1 Timoty 3:1-7 mahsanih: “Koasoi mehlel pwoat met: ma mehmen kin men wiahla sounapwalih en mwomwohdiso, e kin inengieng doadoahk mwahu. Sounapwalih en mwomwohdiso men uhdahn pahn pwung, e pahn pwoudiki lihtehmen, oh e pahn ese dahme e wiewia; kak kaunda nsene, oh ese koasoandi; e uhdahn pahn kasamwohlong aramas en keiru men nan imwe; e uhdahn pahn kak padahk; e sohte pahn kamam sakau, de lemei, ahpw kadek oh meleilei; e sohte pahn poakohng mwohni. E uhdahn pahn kak apwahpwalih mwahu eh peneinei, oh nah seri kan pahn peikiong ni wahu unsek. Pwe ma aramas emen sohte ese duwen eh pahn apwalih pein eh peneinei, a ia duwen eh pahn kak apwalih mwomwohdisohn Koht? Dehr kasapwilada mehmen me ahpwtehn wiahla Kristian men, pwe e dehr aklapalapala oh riahla duwehte Tepilo. Eri, mehmen me pahn pwaisanki pwais wet e uhdahn pahn ndand mwahu rehn aramas akan me saikinte wiahla Kristian, pwe e de pwupwudiong nan lidip en Tepil oh sarohdi.”
Pohl ntingwohng Taitus mahsanih: “I pwilkinuhkedi nan Krihd pwe ke en kapwungala soahng koaros me anahnepe mie en wiawi, oh ke en idihada ekei me mah kan en mwomwohdiso nan kahnimw kan koaros. Tamataman ei koasoien peneu kan: duwen me mah men eh uhdahn pahn pwung; duwen eh pahn pwoudiki lihtehmen, oh duwen nah seri kan ahr uhdahn pahn wia Kristian kan oh sohte kin tiahk suwed de sapeik. Pwehki sounkaweid en mwomwohdiso menet eh pahn apwahpwalih sapwellimen Koht doadoahk, e uhdahn pahn kin mour mwakelekel. E sohte pahn aklapalap, de pwurien ikem, de kamam sakau, de lemei, de noahrok mwohni. E pahn kin kasamwo aramas koaros, oh pwungki soahng koaros me mwahu. E uhdahn pahn kak kakaun pein ih, pwung, sarawi, oh kanahieng pein ih. E uhdahn pahn kin tengeteng ni mahseno, me likilikpe mie, oh me pil pahrekiong padahk mehlel. Iei duwen met eh pahn kak kakehlakahki meteikan padahk mehlel, oh pil kasalehda sapwung en irail kan me kin uhwong padahk wet.” (Taitus 1:5-9) Sapwellimen Pohl kaweid me pid duwen sounapwalih kan kin kasalehda duwen irair kan me irail anahne pwehn kak wia arail pwukoa kan. Soun nting en Paipel teikan kin kasalehda duwen pil ekei irair en Kristian me irail ohl akan me pilipilda en wia sounapwalih mwomwohdiso anahne en ahneki.—Seims 3:13, 17, 18.
Mendahki koasoandi en Pwuhk Sarawi kan kin mwomwen apwal nin tepio, met sohte wia kahrepe ehu ohl Kristian kan en masak ale doadoahk en sounapwalih pwehki irail pehm me irail sohte kak kapwaiada koasoandi pwukat. Irail sounapwalih pwukat kin kihong tohnmwomwohdiso kan kangoang ni arail pahn kin tihengala mwowe oh kasalehda irair mwahu en Kristian kan. Wahnparon Pohl kasalehda met ni eh kawehwehda iaduwen Koht kin ketikihda “kisakis kan sang rehn ohl akan” pwe “en kaunopadahng sapwellimen Koht aramas akan koaros ong doadoahk en papah me Kristian kan uhdahn pahn wia, pwe en kakairada paliwar en Krais. Eri, kitail koaros pahn ehupene ni minimin en pwoson oh ni marainkihla mehlel Sapwellimen Koht Iehros; kitail koaros pahn wiahla aramas dei mehlel kei, lel ni idin deilahn Krais unsek.” (Episos 4:8, 12, 13) Pwehki Kristian kan koaros anahne nantihong wia uwen arail kak pwe en mahla ni pali ngehn, ihme kahrehda, irail kan me kin apwalih mwomwohdiso nin duwen sounapwalih kan anahne en tihengala mwowe ni arail pil wia met.
Pohl kaweidki Timoty oh Taitus en pilada irail ohl koahiek kan nan mwomwohdiso en wia sounapwalih en mwomwohdiso kan. Irail ohl pwukat sohte pahn wia kisin pwutak pwulopwul kei de irail me ahpwtehn wiahla Kristian, ahpw irail ohl pwukat pahn wia ohl akan me mahla nan arail mour en Kristian, oh irail anahne wehwehki laud Paipel oh arail wehwehki Paipel inenen loal, oh irail kin ahneki limpoak mehlel ohng tohnmwomwohdiso kan koaros. Irail pahn kin wia aramas ekei me kin sohte pweiek en koasoi ma mie mehkot sapwung pwarada oh irail pahn kin kak wia dahme konehng pwe en kapwungala mwekid sapwungo oh pere tohnmwomwohdiso sang aramas me pahn kak kauwehla oh isaneki irail ni ahl sapwung. (Aiseia 32:2) Irail sounapwalih kan pahn wia ohl ekei me irail tohnmwomwohdiso kan koaros kin kilang irail nin duwen ohl kan me mah ni pali ngehn oh irail kin nsenohki mehlel sapwellimen Koht sihpw kan. Arail mour pahn kasalehda met.