Ia Duwe, Sises Ketin Ipwidi nan December?

PAIPEL sohte kin padahkihong kitail iahd me Sises ketin ipwidi. Ahpw e kin kasalehda kahrepe mwahu kan en sewesei kitail en ese me Sises sohte ketin ipwidi nan December.

Tehk duwen iren mesenleng nan December nan kahnimw en Pedleem, wasa me Sises ketin ipwidi ie. Sounpwong en Chislev nan kalendar en mehn Suhs kan (me pahrekiong sounpwong en November lel December) kin wia ahnsoun lemwulemwur oh keteu. Sounpwong en mwurin mwo iei Tebeth (December lel January). Sounpwongo iei ahnsou me keieu lemwulemwur nan ehu pahr oh ekei pak sinoh kin mweremwer wasa ileile kan. Kitail pahn kilang dahme Paipel mahsanih duwen iren mesenleng nan wasao.

Sounnting en Paipel Esra kasalehda me Chislev wia ahnsoun lemwulemwur oh keteu. Mwurin eh kosoaia me pokon en aramas ehu pokonpene nan Serusalem “ni karieisek en rahn en kaduwaun sounpwong [Chislev],” Esra ripohtki: “Rahno lapalahn keteu, oh . . . aramas koaros wie rerrer.” Me pid iren mesenleng nan ahnsowo, aramas pwukat me pokonpene koasoia: “Keteu wet me laud. Se sohte kak kesikesihnen likiet.” (Esra 10:9, 13; Seremaia 36:22) Kahrehda nan December, silepen sihpw akan me kin koukousoan nan Pedleem kin kanahieng pwe pein irail oh pil neirail pelin mahn akan en dehr kin mihmiseli likin ihmw nipwong!

Paipel ripohtki me silepen sihpw kan “wie sinsile nair pelin sihpw kan nipwongo nan sahpwo” limwahn Pedleem. (Luk 2:8-12) Tehk pwe silepen sihpw pwukat wie sinsile neirail pelin sihpw likin ihmw nipwongo. Ia duwe, irail pahn mihmi likin ihmw nipwong nan Pedleem nan soangen ahnsoun lemwulemwur oh keteu nan December? Soh, re sohte pahn wia met. Met kin kasalehda me Sises sohte ketin ipwidi nan December.

Mahsen en Koht kin padahkihong kitail ni sansal iahd me Sises ketin pwoula, ahpw e sohte kin kasalehda oaritik kan me pid iahd me e ketin ipwidi. Met kin katamankin kitail dahme Nanmwarki Solomon mahsanih: “Adamwahu mwahusang lehn wai pweilaud kan; oh rahn me ke mehla mwahusang rahn me ke ipwidi.” (Eklesiasdes 7:1) Ihme kahrehda e sohte kapwuriamwei me Paipel kin kasalehda oaritik kan me pid duwen sapwellimen Sises doadoahk en kalohk oh sapwellime pwoula ahpw e sohte kin kasalehda oaritik kan me pid duwen ahnsou me e ketin ipwidi.