Iren Kataman Ehu ong Pahpa Nohno Kristian kan:
Nin duwen pahpa de nohno men, ke kin men sewese noumw seri kan en poakohngala Siohwa oh inoukihong ih arail mour. Dahme ke kak wia pwehn sewese irail en kaunopada ong papidais? Ni ahnsou dah me irail pahn onopada en wia kahk kesempwal wet?
Sises ketin kehkehlikihong sapwellime tohnpadahk kan: “Padahkihong aramas en wehi koaros pwe ren wiahla nei tohnpadahk, papidaisihirailla.” (Mad. 28:19) Iren Paipel wet kasalehda me mwohn emen eh pahn kak papidaisla, e anahne mahs wiahla tohnpadahk men, emen me sohte ihte wehwehki oh kamehlele padahk en Krais kan ahpw pil kin idawehn ni keneinei. Met iei mehkot me seri kan pil kak kapwaiada.
Wiahda mehn kahlemeng mwahu ong noumw seri kan, oh katengehdiong loalarail sapwellimen Siohwa padahk kan. (Deud. 6:6-9) Met kin pidada en doadoahngki ire kan nan pwuhken Dahme Paipel Kak Padahkihong Kitail? oh “Dadaurete ni Limpoak en Koht” pwehn padahkihong irail tepin padahk mehlel kan en Paipel oh kaunopirailda en medemedewe mwahu kaweid kan oh ire mehlel kan sang nan Paipel. Sewese noumw seri kan ren kak pein kawehwehda dahme re kamehlele ni pein arail lokaia. (1 Pit. 3:15) Loalokong oh kangoang me irail alehdihsang uhk oh sang arail pein onop, kaudok en peneinei, mihting en mwomwohdiso kan, oh werek mwahu pahn sewese irail en kekeirda lao re papidaisla oh doudoulahte. Sewese irail en ahnsou koaros medemedewe ia duwen arail kak karanihala Siohwa.
Lepin Padahk 20:11 mahsanih: “Seri men pil kin kasalehda mwomwe sang ni eh wiewia kan; ke kak ese ma e lelepek oh mwahu.” Ia ekei mwekid kan me pahn kasalehda me seri men, ma pwutak de serepein, e wiahier emen tohnpadahk en Sises Krais oh onopadahngehr papidaisla?
Seri men me kekeirdahn papidaisla anahne kin peikiong eh pahpa nohno. (Wiewia 5:29; Kol. 3:20) Me pid duwen Sises ni ahnsou me e sounpar 12, Paipel mahsanih: “E ahpw kin pousehlahte uhpahiong [eh pahpa nohno].” (Luk 2:51) Mehlel, ke sohte kak kasik me noumw serio pahn unsek. Ahpw mehmen me inengieng papidaisla pahn nantihong idawehn sapwellimen Sises mehn kahlemeng oh wia seri men me kin peikiong eh pahpa nohno.
E pil pahn kasalehda eh men sukuhlki padahk mehlel en Paipel kan. (Luk 2:46) Ia duwe, noumw serio kin men iang towehda mihting kan oh iang pasapeng? (Mel. 122:1) E kin inengieng kaukaule wadek Paipel oh pein wia eh onop?—Mad. 4:4.
Seri men me kekeirdahn papidaisla kin nantihong mwohneki mahs doadoahk en Wehio. (Mad. 6:33) E kin pohnese eh pwukoa en ehukihong meteikan dahme e kamehlele. E kin iang wia soangsoangen wiepen kalohk kan oh sohte kin namenengki en kasalehiong eh sounpadahk kan oh ienge tohnsukuhl kan me ih emen Sounkadehdehn Siohwa. E kin nsenohki mehlel eh pwukoa kan nan Mihting en Atail Mour oh Kalohk.
E pil pahn nantihong kolokolete eh tiahk mwakelekel ni eh kin soikala werek suwed. (Lep. Pad. 13:20; 1 Kor. 15:33) Met pahn sansaldahsang eh pilipil me pid duwen keseng, kasdo, TV, video game kan, oh eh doadoahngki Internet.
Me tohto kin mwekidki nanti laud me arail pahpa nohno kan kin wiahda oh re kin pein kamehlelehla padahk mehlel oh kakehr papidaisla ni arail pwulopwulte. Siohwa en ketin kapaiukada ni omw kin sewese noumw seri kan en alehda kahk kesempwal wet nan arail mour en ahneki nanpwungmwahu rehn Siohwa.
Iren Kataman Ehu ong Sounkalohk Men me Saikinte Papidais:
E wia kapai ehu en iang mwomwohdiso papah Koht nin duwen emen sounkalohk me saikinte papidais. Se men kapingaiuk pwehki omw nanpwungmwahu rehn Siohwa eh kekeirda mwahu. Ke esehla Koht sang ni omw sukuhlki sapwellime Mahsen oh kasaledahr omw pwoson sapwellime inou kan.—Sohn 17:3; Ipru 11:6.
Mwohn omw tepida onop rehn Sounkadehdehn Siohwa kan, ele ke kin iang ehu pelien lamalam tohrohr de ele ke sohte kin iang ehu pelien lamalam. De ke pil kin iang wia soahng kan me sohte pahrekiong kaweid kan en Paipel. Ahpw met ke kasalehdahr omw pwoson sang ni omw koluhlahr, me wehwehki me ke koluhkihla laud mehkan me ke kin wia mahs me sapwung, oh sang ni omw wiliakapwala, me wehwehki ke soikala wiewia sapwung oh koasoanehdi ken wia dahme pwung mwohn silangin Koht.—Wiewia 3:19.
Ni pali teio, ele ke kin ese nting sarawi kan “sang ni omw seri pwelel.” Met kin pereiukasang wiewia kan me sohte konehng Kristian oh dihp laud kan. (2 Tim. 3:15) Ke sukuhlkier en soikala kasongosong kan sang iengomw kan oh pil kasongosong teikan en wiahda me suwed mwohn silangin Siohwa. Ke kasalehdahr omw pwoson sang ni omw kin tengedihongete kaudok mehlel oh ehukihong meteikan dahme ke kamehlele. Ke aleier kaiahn nan doadoahk en kalohk en Kristian. Met ke pein piladahr en papah Siohwa nin duwen emen sounkalohk me saikinte papidais.
Sohte lipilipil ma ke sukuhlki elen Siohwa kan sangete ni omw seri pwelel de ke esehla Siohwa ni omw laudla, mwein ahnsou wet ke kin medemedewehier ken wia kahk riau wet ni omw nanpwungmwahu rehn Siohwa eh kin kekeirda, me iei en wiahda inou oh papidaisla. Ke pahn inoukihong Siohwa omw mour sang ni omw pahn kapakapohng ih oh kasalehiong ih omw pilipil en loalopwoat ong ih kelehpw kohkohlahte. (Mad. 16:24) Pwe en wia kasalepen omw inou, ke pahn papidais nan pihl. (Mad. 28:19, 20) Sang ni omw pahn inoukihong Siohwa omw mour oh papidaisla, ke pahn wiahla emen sounpapah Siohwa Koht me e ketin idihadahr. Ia uwen met eh wia pwais kaselel ehu!
Nin duwen omw onop Paipel eh kasalehda, ele ke pahn lelohng soangsoangen kahpwal kan. Tamataman me mwurinte Sises eh ketin papidaislahr, “sapwellimen Koht manaman kahluwalahng Sises nan sapwtehn pwe Tepil en kasonge ih.” (Mad. 4:1) Mwurin omw papidaisla pwehn wiahla sapwellimen Sises Krais tohnpadahk, ke pahn kasik kasongosong kan. (Sohn 15:20) Kasongosong kan pahn wiawi ni mwohmw kei. Mwein ke pahn lelohng uhwong sang omw peneinei. (Mad. 10:36) Ele iengomw tohnsukuhl kan, iengomw tohndoadoahk kan, oh irail kan me ke kin patehng mahso pahn kapailokeiuk. Ahnsou koaros tamataman sapwellimen Sises mahsen me mi nan Mark 10:29, 30: “I ndaiong kumwail ni mehlel, mehmen me pwilikihdi imwe de rie pwutak kan de serepein kan de ine de seme de nah seri kan de sapwe pwehki ngehi oh rongamwahwo pahn ale pak 100 ni imwe, ni rie pwutak, ni rie serepein, ni ine, ni nah seri kan oh ni sapwe iangahki kalokolok nan ahnsou pwukat, a ni koasoandi en mwehi me kohkohdo, mour soutuk.” Eri pousehlahte doadoahk laud ken karanih Siohwa oh kolokol sapwellime koasoandi pwung kan.
Ni ahnsou me ke men papidaisla, padahkihong soun koasoanehdi pwihn en elder kan. Peidek kan me pahn pwarada mwurin met pahn wia poahsoanpen koasoakoasoipene nanpwungen kowe oh elder kan pwehn kasalehda ma e konehng ken papidaisla. Ke kak tepida pein kousapahlih peidek pwukat oh wiahki kisehn omw koasoandi en onop.
Ni omw pahn kaunopadahng koasoakoasoipene wet, wiahda pein omw ahnsou en wadek oh medemedewe iren Paipel kan me kileldi loale. Ke kak ntingihedi ire kesempwal kan nan pwuhket de nan ehu doaropwe tohrohr. Ke kak doadoahngki ire pwukat oh ke pil kak kilang pwuhket ni ahnsou me ke koasoiong elder kan. Ma ke sohte nohn wehwehki peidek kan, peki sawas rehn me onop Paipel rehmwo de rehn elder kan.
Ni omw pahn koasoiong elder kan, dehr medewe me ke anahne kihong irail pasapeng reirei de me apwal en wehwehki. Omw pasapeng mengei oh mwotomwot ni pein omw lokaia me pahn keieu mwahu. Ong pali laud en peidek ko, e pil pahn mwahu en koasoia iren Paipel ehu de riau me kasalehda kahrepen omw pasapengo.
Ma ke saikinte uhdahn wehwehkihla tepin padahk en Paipel kan, eri, elder kan pahn koasoanehdi pwe ken kak ale sawas lao ke kakehr kasalehda ni pein omw lokaia omw wehwehkihla padahk en Paipel kan oh ke kakehr papidaisla mwuhr.
[Ong elder en mwomwohdiso kan: Kaweid kan ong mwomwen omw pahn koasoiong emen me men papidaisla mi nan pali 54-59.]