Pali 1: Padahk kan en Kristian

Omw onop Paipel rehn Sounkadehdehn Siohwa kan me kahrehiong uhk ken diarada padahk mehlel. Dahme ke sukuhlkier seweseiuk en ahneki nanpwungmwahu rehn Koht oh kihong uhk koapworopwor en mour ni ahnsou kohkohdo oh iangahki kapai kan nan paradais nin sampah pahn kaundahn Wehin Koht. Omw pwoson Mahsen en Koht kin kehlailla, oh ke aleier kapai tohto sang ni omw kin patehng mwomwohdisohn Kristian. Ke kakehr wehwehki duwen Siohwa eh kin ketin apwalih sapwellime aramas akan rahnwet.​—Sek. 8:23.

Nin doken omw kaukaunop en papidais, ke pahn paiekihda kousapahl en tepin padahk kan en Kristian me elder kan en mwomwohdiso pahn wiahiong uhk. (Ipru 6:1-3) Siohwa en ketin pousehlahte kapaiahda omw nanti koaros pwehn esehla ih, oh en ketikihong uhk keting me e ketin inoukihda.​—Sohn 17:3.

1. Dahme kahrehda ke men papidaisla?

2. Ihs Siohwa?

   • “Kumwail eri tamataman oh dehr manokehla; me KAUN-O [“Siohwa,” NW] iei ih Koht en nanleng oh pil sampah. Sohte pil emen tohrohr.”​—Deud. 4:39.

   • “Komwi, me mwarenki Siohwa, komwi kelehpw me Keieu Lapalap pohn sampah koaros.”​—Mel. 83:18, NW.

3. Dahme kahrehda e kesempwal ken doadoahngki mwaren Koht?

   • “Eri, iet duwen amwail pahn kin kapakap: ‘Samat me ketiket nanleng, mwaromwi en sarawihla.’”​—Mad. 6:9.

   • “Pwe koaros me kin likweriong mwaren Siohwa pahn komourla.”​—Rom 10:13.

4. Mehnia lepin lokaia kan me Paipel doadoahngki pwehn kawehwehda duwen Siohwa?

   • “KAUN-O, iei Koht soutuk; iei ih me ketin kapikada sampah pwon.”​—Ais. 40:28.

   • “Samat me ketiket nanleng.”​—Mad. 6:9.

   • “Koht iei limpoak.”​—1 Sohn 4:8.

5. Dahme ke kak patohwanohng Siohwa Koht?

   • “Ke anahne poakohng Siohwa omw Koht ni omw mohngiong unsek oh omw mour unsek oh omw lamalam unsek oh omw kehl unsek.”​—Mark 12:30.

   • “Siohwa omw Koht me ke anahne kaudokiong, oh ih kelehpw me ke anahne papah.”​—Luk 4:8.

6. Dahme kahrehda ke men loalopwoatohng Siohwa?

   • “Samwa, ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.”​—Lep. Pad. 27:11.

7. Ihs me ke kin kapakapohng, oh ke kin kapakap ni mwaren ihs?

   • “I [Sises] ndaiong kumwail ni mehlel, ma kumwail peki rehn Sahmo mehkot, e pahn ketikihong kumwail ni edei.”​—Sohn 16:23.

8. Soahng dah kei me ke kak kapakapki?

   • “Eri, iet duwen amwail pahn kin kapakap: ‘Samat me ketiket nanleng, mwaromwi en sarawihla. Sapwellimomwi Wehi en ketido. Kupwuromwi en kin wiawi nin sampah duwen eh kin wiawi nanleng. Komw ketikihong kiht at tungoal me itar ong rahnwet; oh komw ketin mahkikihong kiht dipat akan duwen at pil kin mahkikihong irail me wia dihp ong kiht. Oh komw dehr ketin mweidohng kiht sen lohdiong nan songosong, ahpw komw ketin doareikitasang me suwedo.’”​—Mad. 6:9-13.

   • “Iet koapworopwor me kitail ahneki reh, pwe sohte lipilipil dahme kitail kin peki nin duwen kupwure, e pahn ketin karonge kitail.”​—1 Sohn 5:14.

9. Dahme kahrehda Siohwa kakete sohte ketin karonge ahn emen kapakap?

   • “Ni amwail pahn likweriong KAUN-O, e sohte pahn ketin sapeng . . . pwehki amwail wiewia kan me suwed.”​—Maika 3:4.

   • “Silangin Siohwa kin mahmahsanih me pwung kan, oh e kin ketin karonge arail kapakap ni ngidingid, ahpw Siohwa kin ketin sohpeisang irail kan me kin wia me suwed.”​—1 Pit. 3:12.

10. Ihs Sises Krais?

    • “Saimon Piter ahpw sapeng patohwan: ‘Komwi me Krais, Sapwellimen Koht ieias.’”​—Mad. 16:16.

11. Dahme kahrehda Sises ketidihdo sampah?

    • “Duwehte Nein-aramas me ketido, kaidehn pwe aramas en papah, ahpw pwe en papah oh toukihda moure nin duwen pweinen pweipwei sapahl ehu ong aramas tohto.”​—Mad. 20:28.

    • “I [Sises] pil anahne lohkihong kahnimw teikan rongamwahu en Wehin Koht, pwehki ih met me I pekederkihdo.”​—Luk 4:43.

12. Ia duwen omw kak kasalehda me ke kalahnganki sapwellimen Sises meirongo?

    • “E pwoukihla aramas koaros pwe irail kan me momour en solahr momourki pein irail, ahpw ren kin momourki ih me pwoukinirailla oh ketin iasadahr.”​—2 Kor. 5:15.

13. Manaman dah me Sises sapwellimanki?

    • “Manaman koaros kohiengieier nanleng oh sampah.”​—Mad. 28:18.

    • “Koht ketin kasapwiladahng ih nan dehu lapalap ehu oh ni kadek ketikihong ih mwar ehu me lapalapasang mwar teikan koaros.”​—Pil. 2:9.

14. Ke kamehlele me Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan iei ‘ladu lelepek oh loalokongo’ me Sises ketin idihada?

    • “Ihs me uhdahn ladu lelepek oh loalokong me eh soumas idihada pohn sounpapah kan pwe en kihong irail kanarail mwenge ni ahnsou me konehng?”​—Mad. 24:45.

15. Sapwellimen Koht manaman (ngehn sarawi) ngehn emen?

    • “Tohnlengo sapeng ih nda: ‘Sapwellimen Koht manaman pahn ti pohmw oh roson en Wasa Lapalahpie pahn kipeiukedi. Ih kahrepe wet me seri me pahn ipwidio pahn sarawi oh mwarenki Sapwellimen Koht.’”​—Luk 1:35.

    • “Kahrehda, mehnda ma kumwail suwed ahpw kumwail kin ese kihong noumwail seri kan kisakis mwahu kan, ia uwen eh pahn laud me Sahm me ketiket nanleng pahn kin ketikihong irail kan me peki reh sapwellime manaman!”​—Luk 11:13.

16. Ia duwen Siohwa eh ketin doadoahngki sapwellime manaman?

    • “Sang ni sapwellimen Siohwa mahsen me nanleng wiawihkihda, Oh sang ni angin doauese me ketipin, maram, oh usu kan pil wiawihkihda.”​—Mel. 33:6, NW.

    • “Ahpw kumwail pahn alehdi manaman ni ahnsou me sapwellimen Koht manaman pahn kohdiong pohmwail, oh kumwail pahn wia ei sounkadehde . . . pil wasa me keieu doh nin sampah.”​—Wiewia 1:8.

    • “Sohte kokohp ehu nan Nting Sarawio kin pwilsang ni madamadau en aramas. Pwe saikinte pak ehu me aramas emen koasoiahda kokohp ehu sang ni pein nsene, ahpw sapwellimen Koht manaman me kin kaweid aramas akan pwe ren koasoia mahsen en Koht.”​—2 Pit. 1:20, 21.

17. Dahkot Wehin Koht?

    • “Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”​—Dan. 2:44.

18. Ia duwen Wehin Koht eh pahn wia kamwahupomw?

    • “E pahn ketin limwihasang pilen masarail kan koaros, oh mehla solahr pahn wiawi, solahr mwahiei, solahr sengiseng oh solahr medek. Mehkan en mahso sohralahr.”​—Kaud. 21:4.

19. Ia duwen omw ese me kapai kan en Wehio pahn kereniong pweida?

    • “Tohnpadahk ko patohla kelehpwla reh oh patohwan: ‘Komw mahsanihong kiht iahd me mepwukat pahn wiawi oh ia pahn kilel en omwi ketier oh imwin koasoandi en mwehi wet?’ Sises ahpw ketin sapeng irail mahsanih: ‘. . . Ehu tohnwehi pahn mahweniong ehu tohnwehi oh ehu wehi pahn mahweniong ehu wehi, oh ehuehu wasa lehk lapalap oh rerrer en sahpw pahn kin wiawi. Oh rongamwahu en Wehio pahn lohkseli wasa koaros me aramas kin mi ie nin sampah pwe en mie kadehde ong tohnwehi koaros, a mwuri, imwio ahpw pahn leledo.’”​—Mad. 24:3, 4, 7, 14.

    • “Ni imwin rahn akan, e pahn mie ahnsou apwal oh keper. Pwe aramas akan pahn kin roporop ong pein irail, poakohng mwohni, aksuwei, pohnmwahso, lahlahwe, sohte pahn kin peikiong pahpa nohno kan, sohte pahn kin kasapahlkalahngan, soaloalopwoat, sempoak, sohte men pwungki meteikan, karaunlikamw, sohte kak kaunda pein irail, lemei, sohte pahn kin poakohng me mwahu, re pahn kin pangala meteikan, keptakai, aklapalap, re pahn kin nsenkihte wia nsenarail oh sohte kin poakohng Koht, re pahn kin mwomwehda aramas me kin poadidiong Koht, ahpw arail mour sohte kin pahrekiong arail kaudok.”​—2 Tim. 3:1-5.

20. Ia duwen omw kak kasalehda me Wehio kin kesempwal ong uhk?

    • “Eri, kumwail pousehlahte rapahki mahs Wehio oh sapwellime pwung.”​—Mad. 6:33.

    • “Sises eri mahsanihong sapwellime tohnpadahk ko: ‘Ma mehmen men idawehniehdo, a en tounmeteikihla pein ih oh kapaikada eh tuhkehn kalokolok oh kin ideidawehn ie.’”​—Mad. 16:24.

21. Ihs Sehdan oh ngehn suwed kan?

    • “Samamwail Tepilo oh kumwail kin men wia ineng en samamwailo. Ih sounkam aramas men ni eh tepida karaunlikamw.”​—Sohn 8:44.

    • “Lapalahn drakono eri lekdekdiong nin sampah, me iei serpent en mahso, me adaneki Tepil oh Sehdan, me kin pitipitih sampah pwon; oh e lekdekdiong nin sampah iangahki nah tohnleng kan.”​—Kaud. 12:9.

22. Dahme Sehdan karaunehki Siohwa oh irail kan me kin kaudokiong?

    • “Liho eri sapengki, ‘Se kak tungoale wahntuhke koaros en mwetuwelet, ihte wahntuhke me mi nanwerengeo me se sohte kak tungoale. Koht ketin keinepwihsang kiht wahntuhke pwoatet se en dehr tungoale de sair, pwe se de mehkihla.’ Sineiko ahpw sapengki liho, ‘Likamw pwoat men; kumwa sohte pahn mehla. Koht mahsanih men pwehki eh mwahngih me ni ahnsowohte me kumwa pahn tungoale wahntuhkehn, kumwa pahn marainla oh duwehla Koht, pwe kumwa pahn esehla dahme mwahu oh dahme suwed.’”​—Sen. 3:2-5.

    • “Sehdan ahpw sapeng, patohwan, ‘Aramas kin mweidala mehkoaros me e ahneki pwe en doarehla pein eh mour.’”​—Sohp 2:4.

23. Ia duwen omw kak kadehdehda me dahme Sehdan nda likamw?

    • “Papah [Koht] ni mohngiong unsek.”​—1 Kron. 28:9.

    • “I pahn keptakaila koasoakoasoia ei mwakelekel lao lel rahn en ei mehla.”​—Sohp 27:5.

24. Dahme kahrehda aramas kin mehla?

    • “Sang rehn aramas tehmen dihp leledohng sampah oh mehla sang ni dihp, ihme kahrehda mehla lelohngehr aramas koaros pwe irail koaros dipadahr.”​—Rom 5:12.

25. Ia irair en me melahr?

    • “Me momour kan ese me re pahn mehla, ahpw me melahr akan sohte ese mehkot.”​—Ekl. 9:5.

26. Koapworopwor dahieu mie ong me melahr akan?

    • “E pahn mie kaiasada ong me pwung kan oh me sapwung kan.”​—Wiewia 24:15.

27. Aramas depe me pahn kohla nanleng pwehn iang Sises ketin kaunda?

    • “Kilang! I ahpw kilangada Sihmpwulo eh ketiket pohn Nahna Saion, oh me iang ih meh 144,000 me mware oh mwaren Semeo ntingdier ni temwarail kan.”​—Kaud. 14:1.