Kaiahn Irail Sang Arail Kisin Seri Pwelel

AHNSOU pwukat sounreperep kan kasalehda me “seri nan kapehd en nohno kan kin mwekidki ngihlen aramas.” Winnipeg Free Press kosoia: “Sounreperep kan en University en North Carolina diarada me mwurin nohno kan kin wadawad ong neirail seri kan nan kapehderail, seri ko me ahpwten ipwidi kin pil mwekidki arail pwurehng wadawad ong irail.” Ni ahnsou me lih liseian kan kin wadawad ngihl laud, met kin kak katengehdi rehn serio tiak mwahu. Pipel mahsanih me Timoty ‘ese pwuhk sarawi sang ah pwelel.’ (2 Timoty 3:​14, 15) E sansal me, ah nohno oh ah nohno kalap kalanganki kesemwpwalpen en kaian ih sang ah pwelel, me wehwehki me re kin wadawad ngihl laud ong ih.

Emen souninting Jim Trelease kosoia me wadawad iei “koaiok en mour ehu me keiou kelail nan atail koasoandi rahnwet.” Esehla lokaia kan oh lepin lokaia kan kin kohsang wadawad ngihl laud.

E wia elen loaloakong en tepiada wadawad ngihl laud ong nomw seri pwelelo ahnsouwohte me ke tepiada lokaia ong. Mendahki ma nomw seri nan kapehdemw de nomw seri me ahpwten ipwidio pahn nin tepio sohte wehweki dahme ke nda, katepen amw wia met pahn mwahu ong ahnsou kohkohdo. Lepin Padahk 22:6 kosoia: “Padahkihong kisin seri men duwen eh pahn momour, eri, e pahn tamatamante erein eh mour.”

Dahme ke kak wadek me kak doadoahk oh mie katepe? Wadek Paipel ni ngihl laud ong nomw serio ehu ehu rahn. Pil wadek pwuhk katapan teikan, duwehte Listening to the Great Teacher, My Book of Bible Stories, The Greatest Man Who Ever Lived, oh ire teikan nan Watchtower oh Awake! makasihn kan.

Mehlel, kihda pein uhk ni ahl wet kin pidada ahnsou laud, ahpw ahnsouwo mie katepe. Met wia ahl sansal ehu pwehn kasalehda me ke nsenohki oh poakohng nomw serio.