“Kumwail En Sarawihla Ni Mehkoaros Me Kumwail Kin Wia”

“Ahpw kumwail en sarawihla ni mehkoaros me kumwial kin wia, duwen Koht me ketin malipeikumwaildo, eh ketin sarawi. Pwe Pwuhk Sarawi mahsanih, “Kumwail uhdahn pahn sarawihla, pwe ngehi, I me sarawi.”​—1 PITER 1:​15, 16.

1. Dahme kahrehda Piter kangoange Kristian akan en sarawihla?

DAHME KAHREHDA wahnpoaron Piter kihda kaweid me ntingihdi powe? Pwehki e kilangada anahn ehu, ong emenemen Kristian kan koaros en perehla ah madamadau kan oh wiewia kan pwen kak sewese irail en pahrekiong sapwellimen Siohwa sarawi. Ihme mwohn e kihda kaweid me ntingihdi powe, e tepikihda mahsen pwukat: “Eri, kumwail kaunopada oh koasoanehdi mwahu amwail lamalam akan . . . eri kumwail dehr mweidohng soangen ineng ko en kaunda amwail mour ahnsou wet.”​—1 Piter 1:​13, 14.

2. Dahme kahrehda atail ineng kan me samin mwohn kitail sukuhliki padahk mehlel?

² Atail ineng kan en mahs me samin. Pwekihda? Pwehki tohto rehtail kin momourki mouren sampah, mwohn kitail alehda padahk mehlel en Kristian. Piter esehla met ahnsou e ntingihdi met: “Pwe ahnsou reirei en amwail mouren mahs, kumwail wiewiahier dahme me rotorot akan kin mwahuki wia. Kumwail wiadahr tiahk suwed kanamenek kei, tiahk en nenek, kamam sakau, kapehd en mwenge, kamwoaronge wasa, oh tiahk en kaudok kasaut ong dikedik en eni kan.” Ni mehlel, Piter sohte koasoi duwen wiewia samin kan me kin wiawi nan atail ahnsou, pwehki mahs sohte kin wiawi.​—1 Peter 4:​3, 4.

3, 4. (a) Iaduwen kitail kak powehdi atail ineng suwed kan? (b) Kristian akan anahne en dehr kasalehda arail pepehm akan? Kawehweh.

³ Komw tehk me ineng pwukat kin pid pali war, oh pepehm akan? Ahnsou kitail kin mweidong ineng pwukat en powehdi kitail, e pahn mengei en atail madamadau kan oh wiewia kan en saminla. Met kin kasansalehda ong kitail anahn ehu en mweidong atail madamadau pwung kan en kahre kitail. Pohl koasoi irair wet ni ahl wet: “Eri, riei ko, pwehki reken sapwellimen Koht kalahngan ong kitail, I wia pekipek ngidingid wet ong kumwail: kumwail mweidala paliwaramwail kan pwe en wiahla mehn meirong momour, me sarawi oh kaperen pahn kupwur en Koht. Met ih soangen kaudok mehlel me kumwail pahn kin wia.​—⁠Rom 12:​1, 2

⁴ En wia meirong mwakelekel ong Koht, kitail anahne doadoahngki atail tenek en madamadau pwung, ahpw en dehr mweidong atail pepehm akan en powehdi kitail. Tohto aramas wia dihp en nenek pwehki irail mweidong ahr pepehm akan en powehdi irail! Ahpw met sohte kin wehwehki me kitail pahn loalehdi atail pepehm akan; pwe iaduwen kitail pahn kak kasansalehda atail peren nan doadoahk en Siohwa? Oh pil, ma kitail men kapwarehda wahn ngehn en Koht, ahpw kaidehn wiewia pali uduk, eri kitail anahne kawiliakapwala loalatail kan en ahneki madamadau en Krais.​—⁠Kalesia 5:​22, 23; Pilipai 2:5.

Mour Sarawi, Pweine Sarawi

5. Dahme kahrehda Piter kin nsenohkin anahnpen sarawihla?

⁵ Dahme kahrehda Piter kin nsenohkin kesempwalpen Kristian akan en sarawihla? Pwehki e inenen pohnese duwen pweine sarawi ong pwainda sapahl aramas peik akan. E ntingihdi: “Pwe kumwail ese soahng dahme kumwail kamaiaukihda sang nan soangen mour soh-katepe me kumwail sohsohki sang rehn samamwail ko; kaidehn kepwe sohr, duwehte silper de kohl; pwe meirong pweilapalap ehu, iei nta kesempwal en Krais, me iei sihmpwul mwakelekel oh sohte samin.” (1 Piter 1:​18, 19) Ei, Utupen sarawi, iei Siohwa Koht, me kadaradohr sapwellime Iehros, “Sarawi Meno,” nin sampah pwen wia tomw me pahn mweidong aramas akan en ahneki nanpwungmwahu rehn Koht.​—Sohn 3:​16; 6:​69; Eksodus 28:36; Madiu 20:28.

6. (a) Dahme kahrehda e sohte mengei ong kitail en tiahk min de sarawi? (b) Dahme pahn kak sewese kitail en kolokolte atail tiahk sarawi?

⁶ Ahpw, kitail anahne pohnese me e sohte mengei en mour sarawi pwehki kitail mih pahnangin Sehdan sampah suwed wet. Sehdan kin wiahda lidip kan ong Kristian mehlel akan, me kin nantiong en memour pahnangin eh koasondi kan. (Episos 6:​12; 1 Timoty 6:​9, 10) Kahpwal akan en doadoahk ong mwohni, uhweng sang peneinei, kapailok sang tohnsukuhl akan, iangahki kahpwal kan sang iangatail kan kahrehda kitail anahne en kehlail ni pali ngehn me kesempwal ong sewese kitail en tengidi ni atail sarawi. Met kin kasansalehda kesempwalpen wia pein atail onop oh kaukaule iang towehda mihding en Kristian akan. Pohl kaweidki Timoty: “Eri, katengeiukediong ni mahsen mehlel kan me I padahkihonguhker, pwe en wiahla mehn kahlemengih ehu ong kowe pwe ke en idawehn. Oh pil katengeiukediong nan pwoson oh limpoak me kitail ahnekipene ni atail miniminiong Krais Sises.” (2 Timoty 1:​13) Kitail kin rong mahsen kan me kin sewese kitail en kehlailda ni pali ngehn nan atail Kingdom Hall kan oh ni pein atail wadek Paipel. Met pahn kak sewese kitail en sarawihla ni atail wiewia kan ehu ehu rahn, oh sohte lipilipil soahngen irair dah kei kitail pahn lelong.

Tiahk Sarawi de Min nan Peneinei

7. Iaudwen irairen sarawi de min pahn doakdoake mouren peneinei?

⁷ Ahnsou Piter koasoi duwen pwuhken Lipai 11:44, e doadoahngki lepin lokaiahn Krihk haʹgi·os, me wehwehki “katohrohr sang dihp oh inoukihda ong Koht, sarawi.” (An Expository Dictionary of New Testament Words, by W. E. Vine) Iaduwen met pahn pidada pein kitail nan atail mour en peneinei en Kristian? Met kin uhdahn wehwehki me atail mour en peneinei pahn poahsonda pohn limpoak, pwe “Koht iei limpoak.” (1 Sohn 4:8) Limpoak en tohnmetei iei mehkot me kin kamwahuiala irair kan nanpwungen pwopwoud kan oh nanpwungen pahpa oh nohno kan ong neirail seri kan.​—1 Korint 13:​4-8; Episos 5:​28, 29, 33; 6:4; Kolose 3:​18, 21.

8, 9. (a) Soahngen irair dah kei kin tepikihda nan peneinei en Kristian akan? (b) Kaweid mwahu dah me Paipel kin kihda me pid irair wet?

⁸ Ele mwein kitail pahn lemehda en kasansalehda soangen limpoak pahn mengei ong peneinei en Kristian akan. Ahpw, limpoak sohte kin mih nan ekei peneinei en Kristian akan. Mwein ekei peneinei kan kin mwomwen kasalehda limpoak nan Kingdom Hall, ahpw ia uwen mengei en arail sarawi de limpoak kin sohlahr ni ahnsou irail kin mih nan pein ihmarail kan. Eri, ele kitail kak manokehla lih pwopwoud kan kin pil wia riatail Kristian sister nan imwatail, oh ohl pwopwoud kan kin pil wia riatail brother (oh ministerial servant de emen elder) me mwomwen ale wahu nan Kingdom Hall. Tohnpeneinei kan kin kadongodongki pein nanpwungarail, oh akamai kan kak tepida. Mour riau ele mwein pahn kak wiawi nan atail mour. Irairo pahn sohlahr ohl oh lih pwopwoud me ahneki nanpwung mwahu, ahpw mwomwen ohl men oh lih men me kin kailokpene. Irail kin manokehla anahnpen irair sarawi nan ihmarail kan. Ele mwein irail tepida wia soangen koasoi duwehte mehn liki kan en sampah wet. Ia uwen mengei lokaia mwahl de lokaia keng kak kohsang ewen aramas!​—Lepin Padahk 12:18; kapahrekiong Wiewia 15:37-​39.

⁹ Ahpw, Pohl kaweidki: “Dehr wia koasoi me pahn kamadakahla emen. [Krihk, loʹgos sa·prosʹ, “lokaia samin,” lokaia me sohte sarawi] Kumwail doadoahngkihte mahsen mwahu, soangen mahsen me kin sewese oh kakairada dahme anahnepe mie, oh kin kamwahuwihala me kin rong kumwail kan.” Oh met kin pidada irail kan me kin rongorong nan ihmw, patehng seri kan.​—⁠Episos 4:29; Seims 3:​8-10.

10. Iaduwen kaweid me pid sarawi pahn kadoadoahkong seri kan?

¹⁰ Kaweid wet me pid sarawi pahn pil kadoadoahkong seri kan nan peneinei en Kristian akan. Inenen mengei ong irail en pwurodo sang sukuhl oh tepida alasang iengarail tohnsukuhl akan me kin sapeik oh sohte kasalehda wahu! Seri kan, dehr en duwehte pwutak kan me kapailoke sapwellimen Siohwa soukohp oh ahr lokaia suwed kan, oh kaulim me duwehte seri kan en nan rahnpwukat. (2 Nanmwarki 2:​23, 24) Amwail lokaia kan en dehr saminkihla lokaia suwed kan de lokaia sohte konehng kan me aramas kin doadoahngki pwehki irail dangahnga de sohte men kasalehda wahu ong doadoahngki lokaia me konehng. Nin duwen Kristian akan, atail lokaia anahne en sarawi, kakehle aramas teikan, kadek, oh “kansenamwahu.” Sang ni atail lokaia kan pahn kasansalehda me kitail weksang aramas teikan.​—Kolose 3:​8-​10; 4:6.

Sarawihla rehn Tohn Peneinei kan me Soh-Pwoson

11. Dahme kahrehda en wiahla aramas sarawi kei sohte kin wehwehki me kitail pahn ahneki lamalam me kitail mwahusang mehteikan.?

¹¹ Ni ahnsou kitail kin nantiong en wia aramas sarawi kei, kitail en dehr mwomwehda me kitail mwahusang meteikan, keieu ni ahnsou kitail kin mih rehn tohnpeneinei kan me soh-pwoson. Atail tiahk kadek en Kristian pahn anahne sewese irail en kilang me kitail wiksang meiteikan ni ahl mwahu ehu, oh kasansalehda sang ni atail tiahk mwahu me kitail kin kasalehda limpoak oh kadek, duwehte me karasaras en Sises me pid Ohlen Samaria.​—Luk 10:30-​37.

12. Iaduwen Kristian ohl de lih pwopwoud kan kak kahrehong arail pwoud soh-pwoson kan en perenki padahk mehlel?

¹² Piter kasansalehda kesempwalpen en ahneki lamalam pwung ong tohn peneinei kan me soh-pwoson ni ahnsou e ntingihdi kisinlikou ong lihpwopwoud en Kristian kan: “Pil duwehte kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.” Lih pwopwoud en Kristian men (de ohl pwopwoud) kak wia padahk mehlel mehkot mwahu ieu ong ohl de lih pwopwoud soh-pwoson, ma e pahn doadoahngki tiahk mwakelekel, oh kasalehda kadek oh wahu. Met wehwehki eh koasondi ong mehkan me pid pali ngehn anahne en tohpahrek, pwen dehr pohnsehse eh pwoud me soh-pwoson.a​—1 Piter 3:​1, 2.

13. Iaduwen elder kan oh ministerial servant kan kak ekei pak en sewese ohl pwopwoud soh-pwoson kan en perenki rong duwen padahk mehlel?

¹³ Elder kan oh ministerial servant kan kak ekei pak kihda sawas sang ni arail pahn pehsepene rehn ohl pwopwoud soh-pwoson. Ni ahl wet, e pahn kilang Sounkadehde kan kaidehn aramas me ehu soahng ahpw irail aramas mwahu kei me ese de perenki wia soahngen irair de wiewia kan tohto likin Paipelte. Emen elder kasalehda me e perenki dahme ohl pwopwoud soh-pwoson men kin perenki iei laid. Met kahrehong ira en pehsepene oh kerenpene. Mwuri, ohl menet me pepdaisla. Ni pil ehu ekspiriens, ohl pwopwoud soh-pwoson men kin perenki apwapwalih mahnpihr (canary). Elder kan sohte uhdi. Emen rehrail nantiong en onopki duwen mahnpihr canary, eri ahnsou e pwurala rehn ohl pwopwoud soh-pwosono e kak koasoiapene rehn ohlo duwen mehkot me e kin perenki koasoi duwen! Eri, en wia aramas sarawi sohte wehwehki me kitail pahn inente de sohte tohpahrek.​—1 Korint 9:​20-​23.

Iaduwen Kitail kak Sarawihla nan Mwomwohdiso?

14. (a) Ia ehu elen Sehdan ong kaluwetala tohnmwomwohdiso kan? (b) Iaduwen kitail kak pelianda lidip en Sehdan?

¹⁴ Sehdan me Tepil iei sounlikamw men, lepin lokaian Krihk ong Tepil, di·aʹbo·los, kin wehwehki “sounkaraun” de “sounlikamw.” E kin perenki doadoahngki likamw nan mwomwohdiso. E kin keieu perenki lipahned. Kitail kin mweidong Sehdan en kahre kitail en wia tiahk samin wet? Iaduwen met kak wiawi? Sang ni atail pahn tepida wia lipaned, de pwurehng koasoi lipaned me kitail ronger sang rehn emen, de rongorongte. Lepin Padahk mahsanih: “Aramas suwed kin wisik lokaia; re kin kahrehda kahpwal oh kauwehla nanpwungen aramas akan.” (Lepin Padahk 16:28) Dahme pahn kak sewese kitail en dehr lipaned oh karaunlikamw? Kitail en tehk ahnsou koaros me atail lokaia kan kin kakehle oh poahsonda pohn limpoak. Ma kitail pahn rapahki ire mwahu kan en riatail brother kan, oh kaidehn rapahki sapwung kan, atail koasoi pahn mwahu oh ngehen. Tamanda, mengei en kaulim. Oh aramas men me kin lipanedki mehteikan ele mwein kin lipanedkin uhk rehn mehteikan!​—1 Timoty 5:​13; Taitus 2:3.

15. Irairen Krais dah kei pahn kak sewese kitail koaros nan mwomwohdiso en sarawi?

¹⁵ En kolokolte sarawi en mwomwohdiso, kitail koaros anahne audaudki kupwur en Krais, oh kitail ese, me sapwellime irair keieu kesempwal iei limpoak. Ihme, Pohl panawih mehn Kolose kan en kasalehda kadek duwehte Krais: “Kumwail sapwellimen Koht aramas; e ketin loalloalei kumwail oh ketin pilkumwailda pwe pwe en sapwellimankinkumwailla. Ihme kahrehda kumwail en limpoak ong me mih nan apwal akan, kadek, mpai oh karakarahk, aktikitik oh kanengamah . . . , mahkpene nanpwungamwail . . . Eri, kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.” Mwuri e mahsanih met: “Popohl en Krais en kin kakaun nan mohngiongimwail kan.” Ni mehlel, kitail kak kolokolte minimin oh sarawi en mwomwohdiso ma kitail pahn kasalehda ngehnen mahk wet.​—Kolose 3:​12-​15.

Atail Sarawi Sansalda Rehn Mehn Mpatail kan?

16. Dahme kahrehda kitail anahne en pereperen wia atail kaudok sarawi?

¹⁶ Iaduwen mehn mpatail kan? Ia arail madamadau ong kitail? Kitail kin kasalehda me kitail perenki padahk mehlel, de mwomwen mehkot toutou ong kitail? Ma kitail kin wia aramas sarawi kei duwehte Siohwa me sarawi, eri e pahn sansal sang ni atail lokaia kan oh tiahk. E pahn sansal me atail kaudok sarawi iei kaudok peren ehu. Dahme kahrehda? Pwehki Siohwa atail Koht iei Koht peren, me kupwureki sapwellime sounkaudok kan en pil perenda. Sounmelkahka-o kak koasoi duwen sapwellimen Siohwa aramas en mahs: “Meid pai aramas akan me arail Koht iei Siohwa!” Kitail kin kasansalehda peren wet? Neitail seri kan kin kasansalehda peren wet ni ahnsou re kin mih rehn sapwellimen Siohwa aramas akan nan Kingdom Hall oh nan kapokon kan?​—Melkahka 89:15, 16; 144:15b.

17. Dahme kitail kak wia pwen kasalehda sarawi ni elen toupahrek?

¹⁷ Kitail pil kak kasalehda toupahrek ni atail kaudok sarawi sang atail kasansalehda sawaspene oh kadek rehn mehn mpatail kan. Ekei pak e kesempwal mehnmpatail kan en sawaspene, ele mwein ong kamwakeleda arail kousahpw, de nan ekei wehi kan en kamwahuiala ahl akan. Ni ahl wet, atail sarawi pahn sansalda ni atail pahn apwaliada mwahu atail mwetuwel kan, likin ihmw akan, de nein aramas teikan. Ma kitail kin mweidong kihd en koaskoasok de likin ihmw atail saminla, sidohsa ohla kan mihmih wasa aramas kak kilang, kitail kak nda me kitail kin kasalehda wahu ong mehn mpatail kan?​—Kaudiahl 11:18.

Sarawi nan Wasahn Doadoahk oh Sukuhl

18. (a) Kahpwal dah kei pwarada ong Kristian akan nan rahnpwukat? (b) Iaduwen kitail kak katohrohrsang sampah wet?

¹⁸ Wahnpoaron Pohl ntingwong Kristian akan me mih nan kanihmw samin en Korint: “Nan nei kisinlikou me I kadarowohngkumwailehro, I ndawohng kumwail, kumwail en dehr werekiong aramas tiahk suwed kan. Eri, I sohte koasoia duwen me rotorot akan me tiak suwed, de me noahrok, de me loallap suwed kan, de me kin pwongih dikedik en eni kan; pwe ma kumwail pahn katohrehweisang kumwail aramas pwukat, kumwail uhdahn pahn katohreikumwailweisang sampah wet!” 1 Korint 5:​9, 10) Met iei kahpwal ehu ong Kristian akan, pwe irail anahne rahn koaros mih rehn aramas me kin tiahk suwed. Kasong laud ong atail lelepek, keieu nan sahpw kan me tiahk en aramas kin kangoange de pwungki ohl akan en doake lih akan wasa me sohte konehng, mwersuwed oh pirap de likamw. Edetehn kitail mih rehn aramas suwed wet, kitail sohte kak ekis pwilikihdi atail tiahk mwahu pwen aramas teikan pahn lemehda me kitail duwehte irail. Ahpw, atail tiahk en Kristian kadek me weksang irail pahn anahne sansalong aramas akan me kin pohnese ahr anahn ni pali ngehn oh pil kin rapahki mehkot mwahu.​—⁠Madiu 5:3; 1 Piter 3:​16, 17.

19. (a) Kasongosong dah kei kumwail seri kan kin lelong nan wasahn sukuhl? (b) Sawas dah kei pahpa oh nohno kan kak kihong neirail seri kan pwen kolokolte ahr tiahk sarawi nan sukuhl?

¹⁹ Duwehte neitail seri kan, mie kasongosong tohto irail kin lelong nan sukuhl. Pahpa oh nohno kan, kumwail kin mwemweitla ni sukuhl, wasa me noumw seri kan kin kohla ia? Kumwail ese soahngen irair dah mih nan sukuhlo? Kumwail ahneki nanpwungmwahu rehn sounpadahk kan? Dahme kahrehda peidek pwukat kesempwal? Pwehki nan kanihmw tohto nin sampah wet, sukuhl tohto me direhkihla mwersuwed, wini suwed, oh dihp en nenek. Iaduwen noumw seri kan kak kolokolte ahr lelepek oh tiahk sarawi ma ahr pahpa oh nohno kan sohte kin sewese irail? Ahn Pohl kaweid ong pahpa oh nohno kan me konehng: “Kumwail pahpa oh nohno kan, kumwail dehr kamwakara mwahl noumwail seri kan, pwe re dehr mworusala.” (Kolose 3:​21) Ehu ahl en kamwakara mwahl noumwail seri kan iei ma pahpa oh nohno kan sohte pahn wehwehki kasongosong kan oh kahpwal akan me neirail seri kan kin lelong rahn koaros. Kaunopada ong kasongosong kan nan sukuhl kin tepkihda nan peneinei en Kristian me kehlail ni pali ngehn.​—Deuderonomi 6:​6-9; Lepin Padahk 22:6.

20. Dahme kahrehda en wia aramas sarawi kei kesempwal ong kitail koaros?

²⁰ Ni kaimsekihla, dahme kahrehda sarawi iei ehu irair kesempwal ong kitail koaros? Pwehki e pahn wia mehn perepe ong kitail sang sampah en Sehdan. E pahn wia kapai ehu ni ahnsou wet oh pil ni ahnsou kohkohdo. E pahn sewese kitail en kamehlele mour mehlel nan sampah kapw ehu me aramas pwung kan pahn koasoan ie. E pil sewese kitail en toupahrek, mengei en aramas teikan en koasoiong kitail, Kristian kan me kak pehsepene de kadek​—kaidehn aramas me nohn daulihlahr wia ahr kaudok. Ni lokaia mwotomwot, e kin sewese kitail en duwehte Krais.​—1 Timoty 6:​19.

[Nting tikitik me mi pah]

Komw Tamanda?

◻ Dahme kahrehda Piter lemeda me kesempwal en kaweidki Kristian akan duwen sarawi?

◻ Dahme kahrehda e sohte mengei en momourki mour sarawi ehu?

◻ Dahme pein emen emen kitail koaros kak wia pwen kamwahuiala irairen sarawi nan atail peneinei kan?

◻ Pwen mwomwohdiso en kolokolte ahr sarawi, soahngen tiahk samin dah kei kitail en liksang?

◻ Iaduwen kitail kak kolokolte atail sarawi nan atail wasahn doadoahk oh nan sukuhl?

[Kilel kan nan pali 26]

Nin duwen Sounkadehdehn Siohwa kan, kitail anahne en pereperen ni atail pahn papah Koht oh pil ni wiewia teikan