Ripoht En Sounkalohk En Weio
‘Wenihmw Laud Ehu me Kahlwalahng Doadoahk Laud Ritdahier’ nan Cuba
WAHNPOARON Pohl wia sounkalohk deila men en rongamwahu en Wein Koht. E kin doadoahngki ahnsou mwahu koaros en ehukiong meteikan sapwelimen Sounkapikadao inou en mour soutuk ong tohnsampah peik kan. Ni ahnsou me e pwarek Episos en mahs, Pohl pohnese irair kapw kei me pahn mweidong en sewese aramas tohto. E mahsanih: “I pahn mihmihte wasaht Epsos . . . , pwe I diarada met ahnsou kaselel ehu ong doadoahk laud oh katapan mehlel.”—1 Korint 16:8, 9.
Sounkadehde kan en Siohwa nan Cuba pil diarada arail mih nan irair kapw ehu. Mendahki re saikinte mweimwei en kalohk, Sounkadehde kan ahnsouwet kakehr ehukiong tohn sapwarail arail koapworopwor en Paipel mwohn wei pokon. Nan ahnsou keren kan koperment en Cuba kasalehda arail nsenohki oh mweidong soangsoangen palien lamalam kan en wia arail kaudek ni saledek. President Castro kasalehong wei pokon me Sounkadehde kan en Siohwa wia pwihn en kaudek ehu me koperment en Cuba kin ahnsou wet wia nanpwung mwahuong.
Irair kapw wet ritingada “wenihmw laud ehu me kahlwahlahng doadoahk laud” ong sounkadehde kan. Karaspe ehu, Sounkadehde kan en Siohwa ahpwten ritingada ohpis ehu nan Cuba, me sewese irail en apwalih arail doadoahk en kalohk nan sahpwo. Tohto sang Sounkadehde 65,000 me kin sewese aramas kan en onop oh wehwehkihla Paipel. Re kin doadoahngki pwuhk kan en Paipel, duwehte Watchtower oh Awake! makasihn kan. Mehn Cuba tohto me lamalam pwung kin paikihda arail onopki Paipel rehn Sounkadehde kan en Siohwa.
Sounkadehde kan kin pil kaukaule iang towehda mihding kan ni pwih tikitik kan nan sahpwo. Ekei pak re kin paikihda ahnsou mwahu en wiahda kapokon laud kan nan pwihn kan me kin audahdki aramas 150. Re uhdahn kalanganki mweimwei me re alesang kaun akan en Cuba, me kihong irail ahnsou mwahu en patehng riarail brother oh sister kan en pali ngehn, kokoulki koul en kaping ong Koht, oh kapakap pene.
Nan ahnsou keren kan Kapokon en District me oarelape kosoia “Lahn Koht” wiawi pak 1,000 erein wihkend siluhte. Ehu ripoht kosoia me “soanamwahu, kaian, oh popohl” kin sansal nan kapokon kan koaros. Me lapalap kan kin kapinga Sounkadehde kan pwehki met.
Sampah pwon, Kristian mehlel kan kin nantiong kapwaiada kehkehlik me Koht ketikihong irail en wia en kalohki rongamwahu en Wei. Ni ahnsouohte re kin nantiong kolokol nanpwung meleilei rehn kaundahn koperment kan. (Taitus 3:1) Sounkadehde kan en Siohwa kin idawen kaweid en wahnpoaron Pohl, me intingihdi: “Eri, mwohn mehkoaros I men koangngoangehkin uhk pwe pekipek oh kapakap akan, anahn akan, oh kapingkalangan, en kin wiawihong Koht pwehki aramas akan koaros; pwehki nanmwarki kan oh me lapalap akan koaros, pwe kitail en kak momourki mour meleilei oh popohl ni atail kin poadidiong Koht oh wiewia me mwahu.”—1 Timoty 2:1, 2.