Kisinlikou Sang Governing Body
Dear Brother oh Sister kan:
E kin wia mehkot kaperen en nting ong kumwail! Se men kapinga kumwail pwe kumwail kin kasalehda limpoak oh tounmetei. Ke pahn kilang sang Pwuhken Pahr en 2003 (2003 Yearbook) me soahng tohto me mwahu me wiawi erein pahr en kalohk me ahpwtehn nek. Pil nan pahr wet, kitail kalohk awa lik samwa, oh met kin sewese aramas en karanih Siohwa. E soh wia pwais kaselel ong kitail me kitail kin wia iengen Siohwa tohndoadoahk kan?—1 Kor. 3:9.
Ni atail kin kilangwong doadoahk me mihmi mwotail, kitail kak nantihong kahlemengih ngoang oh pwoson me sapwellimen Koht ladu kan kin kasalehda, me sansalda nan Pwuhk Sarawi. Karasepe ieu, wahnpoaron Pohl men wia uwen me e kak en utungada soahng kan me pid duwen Wehin Koht. Likamwete nan kaimwiseklahn pahro me e pahn mihmi nan Episos, e ntingihdi keieun kisinlikou ong mwomwohdiso en Korint. E ntingihdi duwen dahme e pilahn en wia: “I pahn mihmihte wasaht Episos lel rahnen Pendekos; pwe I diarada met ahnsou kaselel ehu ong doadoahk laud oh katapan mehlel, mehnda ma mie imwintihti tohto.”—1 Korint 16:8, 9.
Ni mehlel, Pohl pilahn en seiloaklahng Macedonia oh Korint. Ahpw, pwehki e diarada me doadoahk me katapan mihmi nan Episos, e pilada en mihmihte nan Episos. Pohl eri kawekila eh koasoandi; e diarada me irair mwahu mie ong utungada Wehin Koht wasao—Episos—kahrehda e kawekila eh koasoandi pwehki met. Mie doadoahk me katapan oh anahn wasao, oh Pohl men isaneki ahnsou mwahuwo en sewese anahn wet oh wia kupwuren Koht.
Pil duwehte kumwail brother oh sister kan tohto, kumwail diarada me mie doadoahk kan me kumwail kak wia pwehn kalaudehla amwail papah Siohwa ni ahl tohto. Nan pahr en kalohk me ahpwtehn nek, kumwail meh 798,938 (average) kak iang doadoahk en pioneer. Pil ekei kumwail seiloaklahng sahpw doh kan pwehn kak kalohk nin duwen misineri kan. Kumwail kin ngoangki kalohki Rongamwahu en Wehin Koht oh sewese tohnmwomwohdiso en kekeirada ni pali ngehn. Pil ekei kumwail sukuhliki lokaia kapw ehu pwe kumwail en kak sewese aramas akan me kin mihmi nan ahmw wasa ahpw me kin doadoahngki lokaia weksang pali laud en aramas nan ahmw wasa. Pil ekei kumwail koasoanehdi amwail koasoandi kan pwehn kalohk wasa kan me sounkalohk kan sohte kin kalapw kohla de pil kalohk wasa kan me anahn. Pil ekei kumwail diarada me kumwail kak kalaudehla amwail ahnsoun kalohk nan sukuhl, nan amwail wasahn doadoahk, nan wasa teikan me kumwail kak kalohk, oh pil ni amwail doadoahngki telephone. Ekspiriens kan sang wasa koaros nin sampah kin kasalehda me sapwellimen Koht aramas akan, me pwulopwul oh mah, kin wia uwen arail kak en diarada ahl kan en kalohki padahk mehlel ong aramas wasa koaros.
Menlau tamataman me Siohwa kin mwahngih dahme ke kin wia oh e kin kalahnganki doadoahk laud oh nanti kan me ke kin wia ong Ih. Pwuhk Sarawi mahsanih: “Koht me uhdahn pwung; e sohte pahn ketin meliehla amwail wiewia kan de amwail limpoak me ke kin kasalehong mware.” (Ipru 6:10, NW) Ken nantihong tehk kanahieng duwen ahnsou kan me ke kak utungada kaudok min. Ekei kumwail kak kalaudehla ahmw ahnsou nan kalohk. Kitail koaros pil kak nantihong kamwahuwihala atail koahiek nan kalohk.
Kitail wehwehki me ahnsou me kitail pahn kalohk, ekei aramas pahn uhwong kitail. Ken tamataman me mwurin Pohl mahsanih me e diarada met ahnsou kaselel ehu ong doadoahk laud oh katapan mehlel, e ntingihdi: “Mie imwintihti tohto.” Ong Pohl, ekei irail mehn Suhs oh pil ekei irail mehn liki kin uhwong ih, ekei irail uhwong ih ni sansal, ekei me sohte sansal.—Wiewia 19:24-28; 20:18, 19.
Kitail kin lelohng soangen irairohte rahnwet. Ni atail kin kerenlahng kaimwiseklahn koasoandi suwed wet, kitail kak kasikasik me uhwong pahn kehlailla. Sehdan kin “inenen lingeringer kowahlap,” oh lingeringer me Sehdan kin ahneki kin keieu kohwong irail me kin papah Koht. (Kaudiahl 12:12) Kitail en dehr manokehla me Sehdan iei “kaunen sampah wet.” Sises padahkiong sapwellime tohnpadahk kan: “Ma kumwail kisehn sampah wet, eri, sampah wet pahn poakohng kumwail duwehte eh kin poakohng nah kan. A I pilkumwailda sang nin sampah; eri, kaidehn kumwail kisehn sampah. Iei kahrepen en sampah eh kin kailongkin kumwail.”—Sohn 14:30; 15:19.
Kitail sohte men mweidohng emen en kaluwetala atail pwoson Koht de kahrehong kitail en solahr nohn ngoangki kalohk. Kitail ese me mie irail me pahn nantihong uhwong kitail. Ahpw, mendahki met, kitail pahn nantihong kalohki Rongamwahu en Wehin Koht, oh kitail kak kamehlele me Sises pahn kemehla Sehdan oh nah kan nan sapwellimen Siohwa ahnsou konehng. Irail me kin uhwong sohte kak kauhdi Pohl oh kahrehong ih en nennenla; oh pil irail me kin uhwong sohte kak kauhdi sapwellimen Siohwa ladu kan rahnwet de kahrehong irail en nennenla. Mendahki Sehdan inenen lingeringer oh iangahki kailok me kin kohsang sampah, sapwellimen Siohwa ngehn sarawi kin wie doadoahk rehn sapwellimen Siohwa aramas akan. E kin wahdo peren laud en ese me irail me kin kalohki Rongamwahu kekeirada oh lelehr meh sounkalohk 6,304,645!
Se kin kapakapki me kumwail pahn nantihong isaneki amwail ahnsou mwahu kan pwehn utungada sapwellimen Siohwa Wehio me inenen kaselel. Ken tamataman me se inenen nsenohki emenemen kumwail ni limpoak ni aht kin “ieiang kumwail” ni atail papah Siohwa, Koht me Keieu Ileile Pohnangin Lahng oh Sampah.—Sepanaia 3:9.
Riomw kan,
Governing Body en Sounkadehdehn Siohwa kan