Ngoangki Kalohki Rongamwahu
1 “I kin anahne mehlel I en pwarowohng rehmwail . . . I pil inengieng lohki Rongamwahu ong kumwail.” Ih me wahnpoaron Pohl koasoia ni tepin nah kisinlikou ong brother kan me mihmi nan Rom. Dahme kahrehda Pohl ngoangki pwarowohng irail? E mahsanih: “Pwe I en kak kihong kumwail kapai ehu ong pali ngehn mehn kakehlakai kumwail . . . Pwe I sohte kin namenengkin Rongamwahuo; pwe ih manaman en Koht me kin komourala koaros me kin pwoson.”—Rom 1:11-16.
2 Pohl pil kasalehda soangen ngoangohte ni e koasoiong ohl mah kan en mwomwohdisohn Episos. E katamankin irail: “Sang ni tepin rahn me I pwarodohng kumwail nan wehin Eisia . . . , I sohte kin ekihsang kumwail mehkot . . . oh sang panawih kumwail nan wasahn kapokon kan oh sang ihmw lel ihmw. I kadehde ong koaros, mehn Suhs oh pil mehn Krihk kan.” (Acts 20:18-21, New World Translation) Wasa koaros me kilelediong Pohl en kalohk ie, e kin kalohki rongamwahu en komour oh sewese aramas en wiahla tohn Wehin Koht. Kitail en kahlemengih ngoang me Pohl kasalehda!
3 Mwein kitail kak pein kalelepek rehtail: ‘I kin kasalehda ngoang duwehte wahnpoaron Pohl ni ahi kin kalohki rongamwahu nan pein ahi wasa? I kin kilangwohng doadoahk en kalohk duwehte doadoahk kapwang ehu, de I kin ngoangki kalohk ong aramas koaros? I kin kapakapki pein ahi irair kan? I kin song wia soangsoangen kalohk koaros, duwehte sang ihmw lel ihmw, oh nanial, oh nan wasahn pisnis, oh doadoahngki telephone, oh pil kalohk ni ahnsou soh lipilipil?’
4 Ngoangki Kalohk Nan May: Sounpwong en May pahn wia ahnsou mwahu en kalaudehla atail kalohk. Ni ahnsouwet, pwehki awahn auxiliary pioneer kan me anahne wiawihda malaulaula, sounkalohk tohto kak auxiliary pioneer. Mwein ke kak koasoanehdi ahmw irair kan pwehn auxiliary pioneer nan May. De mwein ke kak iang doadoahk en regular pioneer pwehki awa kan me regular pioneer anahne wiahda pil malaulaula. Ma komwi emen sounkalohk, ke kak kalaudehla ahmw awa nan kalohk nan sounpwong en May oh kak iang irail kan me pioneer? Met pahn kaperenda mohngiong en Siohwa!
5 Sounkalohk kan anahne, duwehte Pohl, kasalehda arail ngoang ni arail pahn wia uwen me re kak en kalaudehla arail awahn kalohk oh nantiong en kalohk ong aramas koaruhsie. Ma kitail wia uwen me kitail kak nan doadoahk en kalohk, e pahn kihong kitail peren mehlel. Pohl ahneki peren wet ni eh kin iang kalohk. Kitail en kahlemengih Pohl.—Rom 11:13; 1 Kor. 4:16.