Kalohk Ong Aramas Koaruhsie
1 Sises, nin duwen “sounkaweid oh kaun men,” sewese oh kaiahne sapwellime tohnpadahk kan en kaunopada ong doadoahk en kalohk laud me mihmi mwohrail. (Aiseia 55:4; Luk 10:1-12; Wiewia 1:8) Wahnpoaron Piter kawehwehda duwen pwukoa me Sises ketikihong irail ni e mahsanih: “E ketin mahsanihong kiht se en kalohkseli Rongamwahu ong aramas koaros oh kadehde me iei ih me Koht ketin idihadahr pwe en wia sounkopwung en me momour oh me melahr akan.” (Wiewia 10:42, New World Translation) Iaduwen kitail kak kalohk ong aramas koaros me kitail tuhwong?
2 Kitail kak sukuhliki soahng tohto sang atail tehk kanahieng mehn kahlemeng en wahnpoaron Pohl ni ah kin kalohk. Ni ahnsou me e tuhwong ohl mah kan sang mwomwohdiso en Episos, e katamankin irail: “Kumwail ese me I sohte kin ekihsang kumwail mehkot me I dehdehki me pahn sewesei kumwail ni ei padahk oh panawih kumwail nan wasahn kapokon kan ohn sang ihmw lel ihmw kan. Ahpw I wia uwen ahi kak koaros en kalohk oh kadehde soahng koaros me I ese ong mehn Suhs oh mehn Krihk kan duwen koluhla oh weksang diparail kan, oh wekidekiong Koht oh pil pwoson mwaren Kaun Sises.” Edetehn pein Pohl kin lelohng kasongosong kan, e nantihong en kalohk ong aramas koaruhsie. E sohte itarki en padahkiong aramas ihte tepin padahk kan, ahpw e men padahkiong irail “kaweid koaros en Koht.” Pwehn wia met, e wia uwen me e kak en padahkiong irail soahng koaros me e ese oh tohnmeteiki ah kehl oh ahnsou en wia met. E pil kapataiong mahsanih: “I sohte katapaniki ahi mour; ihte I men kapwaiada pwaisei doadoahk me Kaun Sises ketikihong ie, me iei I en kalohkseli Rongamwahu duwen kalahngan en Koht ong aramas koaruhsie.”—Wiewia 20:20, 21, 24, 27.
3 Iaduwen kitail kak kahlemengih mehn kahlemeng mwahu en Pohl rahnwet? (1 Kor. 11:1) Ma kitail pahn nantihong rapahki irail aramas akan oh peneinei kan me perenki rong, mendahki pein kitail kin lelohng kasongosong oh kahpwal kan, eri kitail en wia uwen atail kak en kalohki Rongamwahu ong aramas koaros sang wehi koaros oh lokaia koaros, oh nantihong sewese aramas akan me perenki rong. (Madiu 10:12, 13) Met wehwehki me atail ahnsou, nanti, oh limpoak ong aramas akan me anahn.
4 Ke Kak Iang Doadoahk en Auxiliary Pioneer? March oh April kak wia ahnsou mwahu kan ong uhk en kalohk ong aramas koaruhsie ni ahmw pahn iang doadoahk en Auxiliary Pioneer. Nan pahr me ahpwtehn nek, e wia kangoang laud en kilang me sounkalohk tohto me iang doadoahk en Auxiliary Pioneer!
5 Emen sister me mahki sounpahr 80 oh ahneki soumwahu tohto mwekidki kangoang me kohsang sapwellimen Siohwa pwihn sansal. E ntingihdi: “Kangoang wet kamwekid ie en medemedewe laud duwen ineng me mihmi nan mohngiongi wereila, kahrehda I men pwurehng iang doadoahk en Auxiliary Pioneer pil ehu pak nan ahi mour.” E pilada me e pahn pwurehng Auxiliary Pioneer nan March. E koasoia: “Dahme I tepin wia: mwohndi oh medemedewe ma uhdahn I kak Auxiliary Pioneer nan March. Mwurin mwo, I koasoiong nei serepeino pwehki I anahne ah sawas pwe ien kak pweida. I pwuriamweikihla ah ndaiong ie me e pil men iang doadoahk en Auxiliary Pioneer nan March.” Nan sounpwongo, sister maho kalohk awa 52. “Pak tohto I kapakap ong Siohwa oh peki sawas reh en pwurehng ketikihong ie kehl ni ahnsou me I pehm me ahi kehl solahr mie. Ni imwin sounpwongo, I inenen peren oh nsenamwahu, oh I kalahngankihong Siohwa sapwellime sawas laud me E ketikihong ie pak tohto. I men pil ehu iang doadoahk en Auxiliary Pioneer ehu rahn.” Ni ahnsou me sounkalohk teikan kin rong duwen peren me e ahneki pwehki e nantihong Auxiliary Pioneer mendahki ah soumwahu, met pahn kak pil kangoange meteikan en iang doadoahk en Auxiliary Pioneer mendahki arail soumwahu kan.
6 Emen brother me ah kaun en doadoahk padahkiong ih me ah pwukoa nan ah wasahn doadoahk solahr anahn, eri brothero medemedewe me e pahn doadoahngki ah ahnsou mwahu en iang doadoahk en Auxiliary Pioneer. Erein sounpwongo me e Auxiliary Pioneer, e pehm me ah ngoangki doadoahk en kalohk laudla, oh ni imwin sounpwongo, e tepida Paipel Study kapw. Ni e kin medemedewe duwen sounpwongo me e Auxiliary Pioneer, e koasoia: “I ale kapai tohto nan sounpwong wet!” E inenen peren pwehki e alehdi sapwellimen Siohwa kaweid oh sawas! Ei, Siohwa kapaiada brothero pwehki e nanti laud nan kalohk, oh Siohwa pahn pil kapaiukada me ke pahn wia uwen me ke kak nan kalohk.—Malakai 3:10.
7 Ong sounkalohk tohto, Auxiliary Pioneer kin wia doadoahk apwal. Ahpw, brother oh sister tohto iang doadoahk en Auxiliary Pioneer mendahki pwukoa en doadoahk en mwohni oh pwukoa en peneinei iangahki kahpwal akan en pein arail mour. Mehlel, kalohk ong aramas koaruhsie kin kakete wehwehki me kitail anahne tohnmeteiki atail ahnsou oh kehl kan, ahpw kapai kan me kitail pahn alehdi kin tohto.—Lepin Padahk 10:22.
8 March oh April kin wia sounpwong kan me mwahu en Auxiliary Pioneer. Nan March, mie Rahn Kaunop me limau oh Rahn Sarawi me limau. Ma irail me kin doadoahk en mwohni full-time men iang doadoahk en Auxiliary Pioneer, irail kak kalohk Rahn Kaunop kan oh Rahn Sarawi kan iangahki ni soutik kan. Oh pil, ke kak kalohk rahn en kommoal kan (holiday kan) nan sounpwong en April. Ekei pahn kak kommoal sang sukuhl oh doadoahk, oh met pahn sewese irail en lel arail mehn akadei en kalohk awa 50. Ma ke men koasoanehdi ahmw koasoandi en kalohk awa 50 nan March de April, ke kak doadoahngki koasoandi ehu me kileledi ni pali 4 pwehn koasoanehdi ahmw awa kan? Koasoiong ahmw peneinei oh sounkalohk teikan duwen ahmw koasoandi en Auxiliary Pioneer; oh met pahn kakete kangoange irail en pil iang uhk nan kalohk. Ma ke sohte kak Auxiliary Pioneer, wiahda ahmw mehn akadei ong sounpwong en March oh April, oh iang irail kan me pioneer. Wiahda ahmw koasoandi met pwehn kalaudehla ahmw kalohk nan sounpwong en March oh April.
9 Kasalehda Ahmw Kalahnganki Kataman: Nan pahr koaros, sounkalohk tohto kin kalahnganki Kataman, kahrehda irail kin mwekidki met oh ‘isaneki ahnsou mwahu’ en iang doadoahk en Auxiliary Pioneer nan sounpwong kan ni ahnsoun Kataman (March, April, May). (Episos 5:15, 16) Nan pahr me ahpwtehn nek, nan United States, irail sounkalohk 126,378 iang doadoahk en Auxiliary Pioneer nan March oh irail sounkalohk 51,217 iang doadoahk en Auxiliary Pioneer nan April. Met wehwehki me average en irail me Auxiliary Pioneer nan sounpwong riau pwukat iei sounkalohk 88,797. Irail me Auxiliary Pioneer nan sounpwong riau pwuko kin tohto sang irail me kin Auxiliary Pioneer nan sounpwong teikan me average iei 21,505. Sounpwong kan en March, April, oh May kin wia ahnsou mwahu en kasalehda atail kalahnganki meirong tomw en Krais ni atail pahn kalaudehla atail ahnsou nan kalohk.
10 Ni April 16 kerendohr, doudouloale duwen wehwehn Kataman ong uhk. Medemedewe laud duwen dahme wiawi mwohn Krais pwoula oh dahme e kin medemedewe oh nsenohki. Oh pil, doudouloale duwen peren me Sises kasikasik oh iaduwen peren wet sewese ih en kanengamahiong kalokolok me e lelohng. Medemedewe duwen sapwellime pwukoa en Kaun en mwomwohdiso, oh e kin apwalih doadoahk en kalohk oh katohnpadahkih aramas akan. (1 Kor. 11:3; Ipru 12:2; Kaudiahl 14:14-16) Ke kak kasalehda ahmw kalahnganki dahme Krais wia ni ahmw pahn wia uwen me ke kak nan doadoahk en kalohk.
11 Kangoange Meteikan en Kalohk ong Aramas Koaruhsie: Ni elder kan oh ministerial servant kan pahn iang doadoahk en Auxiliary Pioneer, irail kak kangoange meteikan nan mwomwohdiso. Ni ahnsou me irail pahn iang sounkalohk teikan nan kalohk oh wia “shepherding call kan” ong irail, elder kan oh ministerial servant kan kak sewese meteikan en kalaudehla oh koahiekla nan kalohk. Kitail koaros kak koasoanehdi oh kapakapki me kitail kak kalaudehla atail ahnsoun kalohk nan sounpwong en March oh April, oh met pahn kakehlailihala atail miniminpene oh nantihong kalohk ong aramas koaruhsie.
12 Mehlel, elder kan koaros oh ministerial servant kan koaros pahn utungada koasoandi en mwomwohdiso ong kalaudehla ahnsoun kalohk nan sounpwong en March oh April, ahpw mehlel, Sounapwalih en Kalohk pahn keieu nsenohki koasoanehdi kalohk nan sounpwong pwukat. E pahn koasoanehdi wasa kan me tuhpenehn kalohk pahn wiawi ie, rahn akan, oh kuloak kan me pahn mwahu ong pali laud en sounkalohk kan en iang kalohk oh e pahn koasoanehdi me brother kan pahn kalap pakairki soahng pwukat. E pahn pil koasoanehdi tuhpenehn kalohk ni menseng, mwurin souwas oh ni soutik pwe koaros nan mwomwohdiso kak kalap iang kalohk. E pahn koasoanehdi kalohk nan wasahn pisnis, kalohk nanial kan, kalohk ihmw lel ihmw, pwurehng pwurala rehn aramas me perenki rong, oh pil kalohk ni atail doadoahngki telephone. Oh pil, e pahn koasoanehdi pwehn mie itar pwuhk kan, makisihn kan oh wasahn kalohk kan ong sounkalohk koaros nan sounpwong en March, April oh May.
13 Kitail pahn kihla pwuhken Knowledge nan sounpwong en March, oh atail mehn akadei iei tepida onop en Paipel rehn aramas akan. Padahk mwahu kan ong kihla pwuhken Knowledge mihmi nan Atail Doadoahk Ong Wehio en January 2002 (insert). Kitail pahn kihla Watchtower oh Awake! makisihn kan nan April. Song en doadoahngki padahk kan me mihmi pahn sawaspen oaralap me koasoia “Dahme Kitail Kak Koasoia Duwen Makisihn kan.” E pahn mwahu ma sounkalohk koaros pahn koasoanehdi arail ahnsou pwehn kaunopada mwahu ong kalohk ong aramas koaruhsie.
14 Kitail inenen pai pwehki kitail kin doadoahk pahnangin kaweid en Tapwin Mwomwohdiso, Sises Krais, oh kitail ahneki pwais kaselel en ehukihong meteikan Rongamwahuwo! Ni en sounpwong en March oh April kohkohdo, kitail en wia uwen me atail kak en sewese aramas akan ni pali ngehn ni atail peikiong sapwellimen Krais kehkehlik en kalohk ong aramas koaruhsie.
[Kaokon nan Pali 4]
Koasoandi kan me Ke Kak Doadoahngki Pwehn Auxiliary Pioneer nan March oh April 2003
Rahn Awa kan
Ni Ehd 1 2 — — 2 —
Ni Are 1 — 3 — — —
Ni Esil 1 2 — 5 — —
Ni Epeng 1 — 3 — — —
Ni Alim 1 2 — — — —
Rahn Kaunop 5 4 3 5 6 7
Rahn Sarawi 2 2 3 2 2 3
March 56 56 54 55 50 50
April 50 50 51 53 — —
Ke kak doadoahk koasoandi ehu sang koasoandi pwukat?