Kalohkiseli nan Wasa Koaros Wiewia Kapwuriamwei kan en Siohwa
1. Dahme kin kamwekid kitail en kalohkiseli nan wasa koaros wiewia kapwuriamwei kan en Siohwa?
1 “Komwi me lapalahpie oh roson, manaman, lingan, oh wahu. Sapwellimomwi mehkoaros me mi pahnlahng oh nin sampah.” (1 Kronikel 29:11) Iaduwen atail limpoak oh kalahngan ong Siohwa kin kamwekid kitail? E kin kamwekid kitail en ‘kalohkiseli wiewia kapwuriamwei kan en nin limen Koht, me ketin malipeikitaildo sang nan rotorot ong nan sapwellime marain lingaling.’ (1 Piter 2:9) Kitail sohte kak uhdihsang en padahkiong meteikan duwen atail Koht lapalap! Kitail pahn ahneki ahnsou kaselel kan en kalohki sapwellimen Siohwa wiewia kapwuriamwei kan nan erein sounpwong kan en March, April, oh May.
2. Doadoahk tohrohr dahieu pahn wiawi pwehn pakairki Kataman, oh ihs me pahn mwein ele iang?
2 Doadoahk Tohrohr en Pakairki Kataman: Ni Ehd, April 2, kitail pahn kasansalehda sapwellimen Siohwa wiewia kapwuriamwei kan ni atail pahn katamanki Sak en Soutik en Kauno. Luhk tohrohr ehu ong wiewia kesempwal wet pahn kihseli nin sampah pwon sang March 12 lel April 2. Kangoang kin kohwong koaros en wia uwen ahr kak en iang doadoahk wet. Met pahn wia ahnsou mwahu ong me kapw kan en tepida kalohki rongamwahuo ma re kakehr. Ma mie ahmw Paipel study kan de noumw seri kan me kakehr, tiengla mwowe pwehn koasoikihong elder kan.
3. Dahme kitail mwein ele pahn nda pwehn luhke aramas akan ong Katamano?
3 Mwomwen doadoahk tohrohr wet pahn duwehte doadoahk me wiawi me pid “Komourala Kerendohr!” Kapokon en District. Mwomwohdiso kan pahn ale uwen itar en doaropwe en luhk kan pwe emen emen sounkalohk en kak ale doaropwe 50 oh emen emen pioneer kak ale doaropwe 150. Kolokol ahmw padahk ni mwotomwot, mwein ke kak nda: “Iet noumw doaropwe en luhk ong wiewia kesempwal ehu me kin wiawi sounpahr koaros. Se pahn perenki kasamwo komwi. Oaritik kan me kileldi nan doaropwe en luhk wet.” Mehlel, ma tohnihmwo mie eh peidek kan, doadoahngki ahnsou en sapeng peidek pwukat. Mwein ire kan me mih nan pali 127 en pwuhken Loalokong pahn wia sawas ong kawehwe duwen kesempwalpen Katamano. Ni imwin wihk kan, kitail pahn kihla makasihn kapw kan oh pil doaropwe tohrohr en luhk wet. Kolokol rekord mwahu en aramas akan me perenki rong, oh koasoanehdi en pwurehng pwurala rehrail.
4. Iaduwen kitail pahn kihseli doaropwe tohrohr en luhk ong Kataman?
4 Nan wasa koaros me kitail kak, kitail anahne kihong emen emen tohnihmw doaropwe tohrohr en luhk wet. Kahrehda kilelehdi ihmw akan me sohte towe, oh koasoanehdi en pwurehng pwurala ni ehu ahnsou tohrohr. Mwomwohdiso kan me naineki diren luhwen doaropwehn luhk kan mwein ele kak kihdi doaropwe pwukat ni ihmw kan me sohte towe erein kaimwiseklahn wihk mwohn Katamano, ahpw kaidehn mwohn met. Tehk mwahu me ahmw return visit kan, Paipel study kan, peneinei, iengomw tohndoadoahk kan, mehn mpomw kan, oh meteikan me ke kin ese pil pahn ale ehu doaropwe.
5. Dahme kahrehda kitail anahne tepida ahnsou wet en wiahda atail pilahn kan en iang auxiliary pioneer?
5 Auxiliary Pioneer: Ke kak kalaudehla ahmw kin kalohkiseli sapwellimen Siohwa wiewia kapwuriamwei kan ni ahmw pahn iang auxiliary pioneer erein March, April, oh May? Pwehn wia met, ke pahn anahne wiahda ekei wekidekla kan nan ahmw koasoandi en ehu ehu rahn. (Episos 5:15-17) Ke kak kamehlele me en nantiong kalaudehla ahmw papah Siohwa pahn wahdo peren oh sapwellimen Siohwa kapai kan. (Lepin Padahk 10:22) Pwehki ahnsoun Kataman kerendohr, met iei ahnsou mwahu en tepida wiahda pilahn kan.—Lepin Padahk 21:5.
6. Dahme kitail kak sukuhliki sang ekspiriens en emen sister mah me sounpahr 90 me iang auxiliary pioneer nan pahr me ahpwtehn neko?
6 Emen sister me sounpahr 90 perenki iang pwais en auxiliary pioneer nan pahr me ahpwtehn neko. E nda: “Mendahki I kin uhdahn perenki doadoahk nan mwetuwel oh men tepida padokedi, I diarada ahi anahn en koasoanehdi dahme I kin kesempwalki. Pwehki ahi men mwohnki ire kan me pid Wehio mahs, I pilada en wia auxiliary pioneer nan March.” E ale kapai kan ong ah nanti? E nda, “I pehm laud sang mahs me ngehi kisehn mwomwohdiso, oh met kahrehong ie en karanih Siohwa.” Ke kak kasawih dahme ke kin kesempwalki oh wiahda wekidekla kan duwehte ahn sistero ma mie anahnepe?
7. E kin apwal en papah nin duwen auxiliary pioneer men?
7 En lel awa kei me auxiliary pioneer kan anahne wiahda mwein sohte pahn nohk apwal duwehte ke kin medewe. Kapakap oh medemedewe duwen ahmw wiewia kan nan ehu ehu rahn, wiahda koasoandi ehu, oh kilelehdi nan noumw kalendar ong ahmw wiewia kan en pali ngehn. Kowe me keieu ese ahmw irair kan. Ma ke sohte ahneki roson mwahu oh sohte nohk kehlail ni paliwar, mwein ke kak iang kalohk awa riau de siluh nan ehu ehu rahn. Ma ke kin doadoahk de sukuhl rahn koaros, mwein ke pahn kak wia auxiliary pioneer sang ni ahmw pahn iang kalohk ni soutik kan de ni imwin wihk kan.
8. Dahme kahrehong ehu pwopwoud en kak wia auxiliary pioneer?
8 Me tohto kin kakehr iang auxiliary pioneer nin duwen peneinei ehu. Nan pahr me nekier kan, ehu pwopwoud kin pweiek sang en iang pwehki re pehm me ara irair sohte kak mweidong ren wia auxiliary pioneer. Dahme re wiahda duwen met? “Se kapakap ong Siohwa pwe en sewese kiht pwehn wia dahme se kin men ehupene en wia ahnsou reirei.” Ki koasoandi mwahu re kakehr lel ara mehn akadei. Ira kapatahiong: “Met uhdahn mwahu. Se perenki kapai tohto. Se men kangoange en song en wia. Ma kiht wiahier, mwein ele ke pil pahn kak wia.”
9. Dahme kumwail pahn mwein ele wia nan amwail onop en peneinei me pahn wiawi ni ahnsou keren pwehn kaunopada ong sounpwong kohkohdo kan ong doadoahk tohrohr wet?
9 Kumwail sou koasoanehdi ahnsou nan amwail onop en peneinei me pahn wiawi ni ahnsou keren pwehn medemedewe iaduwen koaros kak kalaudehla arail doadoahk en kalohk erein nan sounpwong kohkohdo kan? Mendahki ma ahmw peneinei pwon sohte kak wia auxiliary pioneer, mwein emen tohnpeneinei kak wia ki sawas oh utuht sang rehn tohnpeneinei teikan. Ma sohte kak, mwein ahmw peneinei kak wiahda mehn akadei en kapataiong awa kan ong kalohk erein nan sounpwong tohrohr pwukat en doadoahk wet.
10. Dahme kahrehda kitail anahne koasoiong meteikan duwen atail ineng en iang auxiliary pioneer erein ahnsoun Kataman wet?
10 Sawaspene: Ngoang kin kamwekid meteikan. Koasoia duwen ahmw ineng en wia auxiliary pioneer. Met pahn mwein kangoange meteikan en pil iang. Kapataiong met, irail kan me iangehr doadoahk en pioneer mahs mwein pahn kak kihong iuk sawas kan me pahn sewese iuk en koasoanehdi ahmw wiewia kan oh koasoandi kan pwehn lel ahmw mehn akadei. (Lepin Padahk 15:22) Ma ke kak iang auxiliary pioneer, ke sou pahn luhke emen sounkalohk, mwein emen me mih nan irair me duwehte ahmw, en iang iuk nan doadoahk kaperen wet?
11. Iaduwen elder kan kak wiahda ngoang ong auxiliary pioneer nan sounpwong kohkohdo kan?
11 Elder tohto wiahda koasoandi anahn akan pwehn iang ahl tohrohr wet en kalohk. (Ipru 13:7) Met kin uhdahn wia mehn kangoang ong mwomwohdiso! Elder kan pil kin wiahda ngoang sang ni arail koasoi ong meteikan. Mwein ekei lokaia kadek en mehn kangoang de ekei sawas mwahu kan pahn wia dahme uhdahn anahn pwehn kamwekid ekei en wia auxiliary pioneer. Sounapwalih en kalohk (service overseer) pahn kak koasoanehdi ekei mihding en tuhpenehn kalohk kan likin mihding kan me koasoandier pwe koaros en kak iang kalohk en pwihn, iangahki soangen ahnsou duwehte mwurin doadoahk de sukuhl. Pakair anahne kaukaule wiawi duwen soangen koasoandi pwukat. E pil pahn tehk me koaros pahn ahneki wasahn kalohk kan oh pwuhk kan me itar.
12. Dahme ke kak mwein wia ma ke sohte kak iang auxiliary pioneer?
12 Mendahki ma ahmw irair kin irehdi iuk sang en iang auxiliary pioneer, ke kak kangoange meteikan me pahn iang, oh ke kak kapakapki irail. (Lepin Padahk 25:11; Kolose 4:12) Mwein ke pahn kak wiahda koasoandi kan en iang irail nan kalohk ni ehu rahn me ke sohte kin kalapw iang nan wihko de iang kalohk ni ahnsou reirei sang ke kin kalapw wia.
13. Soangen mehn akadei dahieu me Guam Branch wiahda, oh iaduwen amwail mwomwohdiso pahn kak wia sawas pwehn lel mehn akadei wet?
13 Mehn Akadei en Auxiliary Pioneer 225 nan April: Me keieu tohtohlahn auxiliary pioneer kan sang mahs leledo met ohng Guam Branch iei 211, me wiawi nan March, 2004. Kahrehda mehn akadei me konehng ong April wet iei auxiliary pioneer 225. Kitail kak lel met ma emen sang sounkalohk limen nan ehu ehu mwomwohdiso pahn iang doadoahk en auxiliary pioneer. Mehlel, ekei mwomwohdiso kan pahn kak naineki sounkalohk tohtohsang me arail irair kak mweidong irail en iang auxiliary pioneer. Soangen mehn akadei wet en mwomwohdiso pahn kamengei ong pali laud en mwomwohdiso kan en kak lel. Medewehla duwen peren me met pahn wiahda nan ahmw mwomwohdiso oh kamwahu me pahn wiaiong doadoahk en kalohk nan amwail wasahn kalohk!
14. Dahme kahrehda April pahn wia sounpwong mwahu ong auxiliary pioneer?
14 Dahme kahrehda April pahn wia sounpwong mwahu ong auxiliary pioneer? Kataman pahn wiawi ni tepin sounpwong wet, me pahn kihong kitail ahnsou mwahu tohto en pwurehng pwurala rehn irail kan me iang towehda. Kitail pahn kihla makasihn kan, ki mehn akadei en kihla pwuhken Loalokong ong return visit kan oh tepida Paipel study kan. Kahrehda, en iang auxiliary pioneer nan April pahn kihong kitail ahnsou mwahu tohto ong tepida Paipel study kan. Kapataiong met, mie Rahn Sarawi limau oh pil holiday nan April, kahrehda e pahn mengei ong irail kan me kin doadoahk rahn koaros oh pil irail kan me kin iang sukuhl rahn koaros.
15. Dahme kahrehda kitail ahneki pepehm en karuwaru nin duwen ahnsoun Kataman kerendohr?
15 Ehu ehu ahnsoun Kataman me wiawi kin kahrehong kitail en kerenlang imwin koasoandi wet. Luhwen ahnsou ong koasoiong meteikan duwen atail Koht lapalap kin mwotomwotala. (1 Korint 7:29) Ahnsoun Kataman wet pahn nekier, ahnsou kesempwal kan me e kihong kitail en kapinga Samatail nanleng pahn sohrala kohkohlahte. Kitail men kaunopada ni ahnsou wet en wia uwen me atail kak erein March, April, oh May en kalohkiseli nan wasa koaros wiewia kapwuriamwei kan en Siohwa!
[Kilel nan Pali 4]
Kitail kak naineki Auxiliary Pioneer kan 225 nan April?
[Kilel nan Pali 4]
◼ Kasawih dahme ke kin kesempwalki
◼ Koasoipene duwen mehn akadei kan nin duwen peneinei ehu
◼ Koasoi ong meteikan duwen ahmw koasoandi kan