Kitail Pahn Pwurehng Wia Met? Pahngoak Ehu en Auxiliary Pioneer
1 Dahme kitail pahn pil pwurehng wia? Kitail pahn auxiliary pioneer erein sounpwong kan mwohn oh mwurin Katamano? Kisin doarepwe (insert) en neitail doarepweo Atail Doadoahk Ong Wehio en March 1997 kin audaudki oarelap wet: “Anahne—Auxiliary Pioneer 100,000.” Se koapworopworki me kumwail pahn kesemwpwalki pahngoak wet. Ni ahnsou me ripoht en kalohk en sounpwong en March 1997 kapatapatpene, se perenkihda en ese me aramas 116,335 me wia doadoahk en auxiliary pioneer! Ma se pahn kapataiong nempeo nempehn regular pioneer kan me mihmi ni uwen meh 70,472 oh nempehn special pioneer 181 me kalohk nan sounpwongo, se diarada me kereniong persent 20 en sounkalohk koaros kin iang doadoahk en pioneer. Kitail pil pahn pwurehng wia met ni Kataman en pahret?
2 Se men kapinga irail ko koaros me nannantiong en kalaudehla arail doadoahk en kalohk pahr samwalahro. E sansal me, kumwail koaros kin mwekidki amwail limpoak soh roporop ong Siohwa Koht oh ong mehn mpemwail kan. (Luk 10:27; 2 Piter 1:5-8) Sounkalohk kan nan soangsoangen irair tohto nan mour kin rapahkihda ahnsoun ren auxiliary pioneer. Nan ehu mwomwohdiso, sounkalohk 51 kin wiahkintehieu pioneer nan sounpwong tehieu, iangahki pali moaron en elder kan, oh iangahki sister men me naineki kisin serepein kis me mahki sounpwong 15, oh pil ianghki emen sister me uhdisang ah doadoahk en mwohni oh diarada ehu doadoahk en lepen ahnsou pwehn kak pioneer, oh pil ianghki emen sister mah me saikinte pioneer mahso. Sounapwali en circuit ntingihdi: “Nannanti laud nan doadoahk en kalohk kin wiawi. . ..Met sohte kin ihte wia lipwalipw mwahu ong wasahn kalohk kan ahpw tohnmwomwohdiso kin inenin perenki met. Brother kan oh sister kan kin perenki esehla emen emen oh kilang imwila mwahu kan nan arail kalohk.”
3 Me pwulopwul kan pil iangete wadawadohng doadoahk en kalohk me wiawi pahr samwalahro. Emen sounkalohk me saikinte papidais me mahki sounpar 13 kin kasikasik ahnsouwo me e pahn kasalehda ah inou ong Siohwa. Mwurin ah papidaisla nan February, e mwadangete kapedelong nah kisinlikoun auxiliary pioneer nan March. E ntingihdi: “Eksperiens tohto kan me se kin paikihda sohte pahn kak wiawi ma kumwail sohte wiahda luk limpoak en pioneer. I kalahngankiong Siohwa ahi iang kisehn irail meh 100,000 me kapwaiada pahngoako.” E koasoanediehr ah mehn akedei en pwurehng pioneer.
4 Ele komw iang kisehn meh 256 ko sang nan Micronesia me iang doadoahk en auxiliary pioneer nan March en pahr samwalahro. Komw pahn pwurehng auxiliary pioneer nan pahret? Ma pahr samwalahro komw sohte kak pioneer, komw kak iang nan pahret?
5 Kalohk nan April oh May: Nan pahret, Katamano pahn wiawi Rahn Kaunop, April 11, me karehda sounpwong en April kin wia sounpwong kaselel en kalaudehla doadoahk en kalohk. (2 Kor. 5:14, 15) Erein keioun rahn 11 ko en sounpwongo, se pahn nannanti en lukehdo uwen me tohto me kin perenki padahk mehlel en iang towehda Katamano.
6 Pwehki nan sounpwong en May mie Rahn Kaunop oh Rahn Sarawi limau, sounkalohk kan me kin iang sukuhl de doadoahk en mwohni kaukaule pahn diarada me e mengei en auxiliary pioneer nan sounpwongo. Ni omw pahn koasoanehdi pwe ken wiahda awahn kalohk eisek nan ehu ehu Rahn Kaunop oh Rahn Sarawi limau ko, komw pahn anahne koasoanehdi pwe ken pil wiahda awa eisek likin met nan sounpwongo pwehn kapataiong awa ko pwehn lel awa 60.—1 Kor. 14:40.
7 Erein sounpwong en May oh June, pwuhk kan me kitail pahn kihong aramas iei The Watchtower oh Awake! Met pahn kangoange pali moaron en kitail en engiwohng en iang pioneer. Dahme karehda se indahki met? E kin mengei en kihla makasihn kan oh pil kaperen en padahngki nan kalohk. Re kak kadoadoahk nan wiepen kalohk koaros—nan doadoahk en kalohk sang ihmw lel ihmw oh kalohk sang sidowa kolahng ehu sidowa, iangahki kihong aramas kan pohn ahl akan, nan wasahn peidi en sidosa kan, oh nan wasaht mwemweit kan oh ni wasa soh lipilipil kan. Ma kitail kin tamanda iaduwen atail mour kin wekila pwehki makasihn kesemwpwal pwukat, se pahn mwekidki en iang kihpeseng uwen tohto me kak nan sounpwong en May oh June.
8 Ni omw kaunopada ong doadoahk en kihseli makasihn, komw pahn paiekihda omw kousapahlih artikel pwukat: “The Watchtower oh Awake!—Timely Journals of Truth” (January 1, 1994, English Watchtower), “Doadoahngki Mwahu Neitail Makasihn kan” (September 1995 Atail Doadoahk Ong Wehio), oh “Kaunopada Pein Omw Padahk En Kihla Makasihn” (November 1996 Atail Doadoahk Ong Wehio).
9 Elder Kan Tiengla Mwowe: Pwehn sewesehda sounkalohk tohto kan me pioneer pahr samwalahro, elder kan nan ehu mwomwohdiso kin koasoanehdi ehu Rahn Kaunop en sounpwongo en wia rahn tohrohr en doadoahk en kalohk. Koasoandi kan kin wiawihda pwehn tuhpene ni soangsoangen ahnsou kan erein rahno, pwe koaros nan mwomwohdiso en kak ahneki ahnsou mwahu en iang kalohk nan soangsoangen wiepen kalohk kan. Soahngen kalohk pwukat iei kalohk wasahn pisnes kan, oh kalohk pohn ahl akan, oh kalohk sang ihmw lel ihmw, oh pwurehng pwurela rehn irail kan me perenki rong, oh iangahki nting kisinlikou, oh pil kalohk doadoahngki telepohn. Mwekid en sounkalohk kan me inenin kaselel, pwehki sounkalohk 117 me iang kalohk erein rahno. Kaperen en Rahn Kaunopo pil lelahng Rahn Sarawi, pwehki me iang towehda mihding en Kapahrek ong Wehi Pokon oh onop en Watchtower kereniong daulih uwen me kin towehda.
10 Sounapwali kalohk pahn anahne wiahda koasoandi kan ong wasahn kalohk kan me kalohk sohte kin kalap wiawi ie. E pil pahn tehk aramas kan me sohte kin mih nan imwerail ahnsou me kitail kin kalohk arail wasa (not-at-homes) oh pil tehk kalohk pohn ahl akan oh kalohk nan sidowa kan. E pil pahn kasalehda duwen kesemwpwalpen kalohk ni soutuk kan, oh e pil anahne oatehdo uwen makasihn me pahn itar ong doadoahk en kalohk lap me pahn wiawi nan May oh June.
11 Sounkalohk Tohto Kak Warohng Iang: Tepin lokaia kan nan doarepwehn pekipek en auxiliary pioneer kin kosoia: “Pwehki ahi limpoak ong Siohwa oh ahi ineng en sewese meteikan en sukuhlki duwen ih oh sapwellime kupwur limpoak kan, I men kalaudehla ahi iang kalohk ni ahi pahn auxiliary pioneer.” Tepin me kitail inoukihda iei atail limpoak ong Siohwa oh atail men sewese meteikan ni pali ngehn. (1 Tim. 4:8, 10) Ni kitail koaros kin tehk atail irair kan, ekei kitail me saikinte pioneer mahso kak auxiliary pioneer pahr wet nan April de May?
12 Me tohto nan mwomwohdiso ele pahn kasawihada me re pil kak pioneer ni ahnsou me re kilang meteikan auxiliary pioneer me mih nan soahngen irairohte me re mih loale. Seri en sukuhl kan, me mah kan, oh irail kan me doadoahk en mwohni kaukaule, iangahki elder kan oh ministerial servant kan, oh meteikan kin pweida mwahu ni arail auxiliary pioneer. Dahme karehda komw sohte pioneerki?
13 Sises padahkihong sapwellime tohnpadahk kan: “Ahi iohk me kadek oh ahi wisik me marahra.” (Madiu 11:30) Met iei oarelap en artikel kangoang ehu nan Watchtower en August 15, 1995 ni lokaiahn English. E kosoia duwen emen sister me ahneki doadoahk en mwohni kaukaule ehu me kin pil karehda kapwunod. Sister menet kin medemedewe me e sohte kak auxiliary pioneer? Soh. Ni mehlel, e kin kak auxiliary pioneer sounpwong koaros. Dahme karehda? Pwehki e pepehm me pioneer kin uhdahn sewese ih en kolokolte ah touparehk. Sewese aramas kan ni arail sukuhlki padahk mehlel en Paipel oh kilang arail wekidala arail mour pwe Koht en kupwure irail kin wia utupen peren keieu laud nan ah mour soupisek.—Lepin Padahk 10:22.
14 Kapai kan me emen paikihda me kohsang tohnmetei kan oh wekidekla kan me e anahne wiahda pwehn kak pioneer kin inenin laud. Emen sister ntingihdi dahme wiawihong ih ni ah pioneer: “E sewese ie en dehr nohn medemedewe pein ngehi ahpw en medemedewe en sewese meteikan. . . . I luke meteikan me kak pioneer en wia met.”
15 Anahne Koasoandi [Schedule] Mwahu: Patohngete neitail doarepwehn Atail Doadoahk Ong Wehio en sounpwonget se pil kapataiong kamwomwedahn koasoandi [schedule] en auxiliary pioneer. Ele ehu koasoandi pwukat kin kak doadoahk ong omw irair. Ni omw kousapalih koasoandi pwukat, medemedewe dahme ke kin uhdahn wia nan ehu ehu sounpwong. Doadoahk dahkei ni imwomw me ke kak wiahda mwohn omw pahn pioneer de ke kak awih mahs wia lau mwurin omw pioneer? Ke kak katikiala ahnsoun mwadong, mwemweit, de pil soahngen mehn kaperen teikan? Dehr wia omw pilahn oh medemedewehte awa 60 ko me anahn, ahpw pilahnida omw koasoandi (schedule) ong awa depe me ke kak wiahda ehu ehu rahn de nan wihk ehu. Awahte 2 rahn ehu de awahte 15 wihk ehu me anahn pwehn kak auxiliary pioneer. Kilang kamwomwadahn koasoandi kan, oh doadoahngki pensel, kilang iaduwen omw kak doadoahngki koasoandi pwukat en wiahda pein omw koasoandi me pahn mwahu ong uhk oh omw peneinei.
16 Lepin Padahk 21:5 kamehleliong kitail: “Wiahda omw koasoandi ni keneinei, ke ahpw pahn ahneki dipwisou tohto.” Lepin Padahk 16:3 kangoangehkin kitail: “Peki rehn Kauno (Siohwa) en ketin kupwuramwahwihala omw koasoandi kan, ke ahpw pahn pweida ni mehkoaros me ke koasoanehdi.” Ehi, ni atail kin kapataiong Siohwa nan atail koasoandi kan oh kehlail likih ih en sewese kitail en pweida mwahu, kitail kak ahneki lamalam pwung ong atail pilahn en auxiliary pioneer. Ele mwurin atail kilang duwen pweida mwahu en atail schedule en auxiliary pioneer me kitail wiahki sounpwong ehu de riau, kitail kak ntingihdi ehu kilel en wad nan koakono nan doarepwehn pekipek en auxiliary pioneer me kosoia: “Ntingihdi ehu kilel en wad wasaht ma komw men pouselahte auxiliary pioneer lau lel ehu pakair en mwuhr.”
17 Sises kohpada: “Mehmen me pwoson ie pahn wia doadoahk kan me I kin wia. Ei, e pahn wia me lapasang.” (Sohn 14:12) Ih at kapai kaperen en iei en papah Koht nin duwen ienge tohndoadoahk ni ahnsou me kokohp wet kin pweida. Met iei ahnsoun kalohki rongamwahuwo ni idipek me pahn laud sang mahso, oh en rapahkihda ahnsou mwahu en wia doadoahk wet. (1 Kor. 3:9; Kol. 4:5) Kalap iang doadoahk en auxiliary pioneer iei ehu ahl kaselel en wia atail pwais nin duwen sounkalohk en Wehio. Se kin awiawih oh kasikasik en kilang ni karasaras ia uwen laud koul en kaping me auxiliary pioneer kan pahn wia nan sounpwong kan mwohn oh mwurin Kataman. (Mel. 27:6) Ni at kin lemeleme pweida me wiawiher pahr samwalahro, se medemedewe, ‘Kitail pahn pwurehng wia met?’ Se koapworopworki me se pahn!
[Koakon nan pali 3]
Komw Kak Auxiliary Pioneer?
“Mendahki ia omw irair, ma komw papidaisehr, oh kin tiahk mwahu, oh kak wiahda awa 60 nan doadoahk en kalohk nan ehu sounpwong oh kamehlele me komw kak auxiliary pioneerki sounpwong ehu de riau, elder kan en mwomwohdiso pahn perenki tehk nohmw doarepwehn pekipek ong kapai en doadoahk sarawi wet.”—Organized to Accomplish Our Ministry, pali 114.