Ahnsoun Kataman—Ahnsoun Kalaudehla Atail Ahnsoun Kalohk
1. Iaduwen “rahn en pokonpene oh wia kaudok ong Siohwa” kin kamwekid mehn Israel kan me kin lemmwiki Koht?
1 Mehn Israel en kawao kin kasarawi “rahn en pokonpene oh wia kaudok ong Siohwa” oh Siohwa koasoanehdi kasarawi pwukat erein pahr koaros. (Lipai 23:2) Irail kin koasoanehdi arail ahnsou en medemedewe laud duwen soahng mwahu kan me Siohwa ketin wia oh met kahrehong irail en ahneki peren laud oh kamwekid irail en ngoangki kaudok mehlel.—2 Kronikel 30:21–31:2.
2, 3. Dahme kahrehda e konehng en kalaudehla atail ahnsoun kalohk ahnsoun Kataman (sounpwong kan mwohn oh mwurin Kataman—duwehte March, April oh May), oh mehnia rahn me kitail pahn kasarawi Katamanpen Kamatalahn Krais?
2 Nan atail ahnsou, atail wiewia doadoahk en kalohk kin laudla ni ahnsoun Kataman—sounpwong kan mwohn oh mwurin Kataman: March, April oh May. E kin wia ahnsou mwahu en doudouloale duwen kisakis kaselel me Siohwa ketikihong kitail—sapwellime Iehros. (Sohn 3:16; 1 Pit. 1:18, 19) Ni atail kin doudouloale duwen limpoak me Koht oh sapwellime Ohl kasalehda, met kin kamwekid kitail en kapinga Siohwa oh wia uwen atail kak koaros pwehn kapwaiada kupwuren Koht.—2 Kor. 5:14, 15.
3 Saken Soutik en Kauno pahn wiawi Ni Epeng, March 24, nan pahret, mwurin ketipin kihrlahr. Iaduwen kitail kak kalaudehla atail kalohk nan sounpwong en March, April, oh May?
4, 5. (a) Dahme kin sewese ekei sounkalohk kan en kalohk ong aramas tohto? (b) Soangen koasoandi en kalohk dahieu me ke diarada me kin pweida mwahu nan pein ahmw wasa?
4 Nantihong Kalohk ong Aramas Tohto: E pahn mwahu ma ke kak rapahki ahl akan en sewese iuk en kalohk ong aramas tohto. Ke kak koasoanehdi en iang kalohk ihmw-lel-ihmw ni ahnsou me aramas tohto kin mihmi nan imwarail, duwehte mwurin souwas de ni soutik? Ma ekei tohn ahmw Pwuhk Study men kalohk mwohn Pwuhk Study, Sounapwalih en Pwuhk Study kak koasoanehdi mihding en kalohk me mwotomwot oh kalohk wasakis me karanih wasahn Pwuhk Study.
5 Pil ehu ahl en nantihong kalohk ong aramas tohto iei en kalohk nan wasahn wehi pokon. Emen sister nan Japan men iang doadoahk en Auxiliary Pioneer mendahki e kin doadoahk full-time. Emen elder ndaiong ih me ehu ehu rahn, mwohn e pahn kohla doadoahk, e kak kalohk nanial karanih train station. Mwurin eh powehdi ah namenek oh pil kapailok sang ekei aramas me kin awih train, e kin kaukaule wahla makisihn kapw kan ong aramas 40 samwa, iangahki aramas me awih train, irail me kin doadoahk nan train station, oh aramas me kin ahneki sidohwa kan limwahn train station. Sistero kin kihla makisihn 235 (average) nan sounpwong koaros. Pwehki e kin ehukihong aramas akan iren Paipel kan minit kei rahn koaros, e tepida onop Paipel rehn aramas wenemen.
6. Iaduwen irail me pwulopwul kak kalaudehla arail ahnsoun kalohk?
6 Doadoahngki Ahmw Ahnsou Mwahu Koaros en Kalohk: Nan pahr koaros, mie ahnsou me tohnsukuhl kan kin kommoal sang sukuhl oh met kin wia ahnsou mwahu ong sounkalohk kan en iang doadoahk en Auxiliary Pioneer. Oh pil, irail me Kristian pwulopwul kan kak kalaudehla arail ansoun kalohk ni arail nantihong kalohk nan sukuhl. Ke pahn kakete pwuriamweikihla me ekei iengomw tohnsukuhl kan pahn kak wia peidek ong uhk duwen dahme ke kamehlele. Dahme ke soh isaneki ahmw ahnsou mwahu en kalohk ong meteikan ahnsou me sounpadahk oh tohnsukuhl kan pahn koasoakoasoia oaralap ehu de ahnsou me ke anahne ntingihdi noumw doaropwe duwen oaralap ehu? Pil ekei Sounkadehde kan kin kalohk ni arail kin doadoahngki video kan me Society kin wiahda. Pil ekei riatail kan tepida onop Paipel rehn iengerail tohnsukuhl kan oh sewese irail en kekeirada oh inoukihong Siohwa arail mour oh papidaisla. Mepwukat kin wia ahl mwahu kan en “kapinga mwaren Siohwa.”—Mel. 148:12, 13.
7. (a) Iaduwen emen brother doadoahngki ah ahnsou mwahu koaros pwehn kalohk ong meteikan? (b) Mie ahmw ekspiriens me kasalehda me ke kin doadoahngki ahmw ahnsou mwahu koaros ong kalohk duwehte brother menet?
7 Nan ahmw koasoandi en ehuehu rahn, rapahki ahl akan en koasoiong aramas akan duwen soahng kaselel kan me atail Koht wiahda oh sapwellime inou kaselel kan. Emen brother kin dake train rahn koaros kin kalohk ong irail akan me kin pil dake trainohte ni ahnsou kan me e kak. Karasepe, ni ah awih traino, e kin kalohk ong mwahnakapw men rahn koaros minit limau. Imwilahn met: mwahnakapwo oh pil emen mwahnakapw me kin iang ih pwungkihda me ira men onop Paipel. Brothero kin onop rehra ni ahnsou me traino kin wie tangatang. Ekis mwuri, lih mah men pil rongorong arail koasoakoasoipene duwen Paipel oh idek rehn brothero ma e kak pil onop Paipel reh. Met, liho pil kin onop ahnsou me e kin iang dake traino. Pwehki brothero isaneki ah ahnsou mwahu koaros, e kin onop rehn aramas ehk ni ahnsou me e kin dake traino.
8. Dahme wiepen kalohk dahieu me irail me mahlahr oh soumwahu kan kak wia pwehn kalaudehla arail ahnsoun kalohk?
8 Ahpw, iaduwen ma ke sohte kak kalohk ahnsou koaros me ke mwahuki pwehki ke wie mahmahlahr de ke kin soumwahu? Mwein mie ahl kan me ke kak kalaudehla ahmw ahnsoun kalohk oh kapinga Siohwa. Mie pak me ke kalohk doadoahngki telephone? Ma ke sehse kalohk doadoahngki telephone, ke kak idek rehn brothero me kin wia Sounapwalih en ahmw Pwuhk Study. E kak koasoanehdi rehn irail sounkalohk kan me kin kalohk doadoahngki telephone ma re kak sewese iuk. Ma ke pahn iang irail, ke kak sukuhliki sang irail oh re kak sewese iuk en pweida mwahu ni ahmw kalohk doadoahngki telephone. Kaweid mwahu ong iaduwen emen kak kalohk doadoahngki telephone nan Atail Doadoahk Ong Wehio en February 2001, pali 5-6.
9. Iaduwen kitail kak sewese irail me kitail kin onop Paipel rehrail en kak tepida iang kalohk?
9 Ni ahnsou me irail me kapw kan pahn iang towehda Katamano, met pahn kak kamwekid irail en kalaudehla arail kapinga Siohwa. Ke kak sewese irail en powehdi arail masak wia doadoahk en kalohk ni ahmw pahn koasoia ekspiriens mwahu kan nan kalohk oh ni ahmw pahn kaiahne irail en kawehwe padahk kan en Paipel oh kasalehda duwen arail pwoson. (1 Pit. 3:15) Ma emen me ke onop Paipel reh kin kasalehda me e men iang kalohki Rongamwahu, ke kak ndaiong Presiding Overseer duwen met. E pahn koasoanehdi en tuhwong ahmw Paipel Study pwehn kak tehk ma e pahn kak iang kalohk. Ia uwen met kin kaperenda mohngiong en Siohwa ni e kin mahsanih irail me kapw kan utungada sapwellime kaunda!—Lepin Padahk 27:11.
10. (a) Iaduwen koasoandi mwahu kak sewese kitail en Auxiliary Pioneer? (b) Ke iang doadoahk en Auxiliary Pioneer pahr me ahpwtehn nek nan sounpwong mwohn oh mwurin Kataman? Ma iei, iaduwen ke koasoanehdi ahmw koasoandi kan?
10 Ke Kak Iang Doadoahk en Auxiliary Pioneer? Irail me iang doadoahk en Auxiliary Pioneer anahne nantihong kalohk awa 50. (Madiu 5:37) Met wehwehki me ke anahne kalohk awa 12 samwa erein wihk koaros. Ke lemeleme ke kak doadoahngki koasoandi en Auxiliary Pioneer kan me kileledi ni pali 5? Ma soh, ke kak koasoanehdi koasoandi ehu me pahn sewese iuk en Auxiliary Pioneer nan March, April, de May? Peki rehn Siohwa en sewese iuk en kalaudehla ahmw ahnsoun kalohk.—Lepin Padahk 16:3.
11. Iaduwen elder kan oh ministerial servant kan kak sewese irail me iang doadoahk en Auxiliary Pioneer?
11 Elder kan oh Ministerial Servant kan pahn sewese iuk en nantihong kalaudehla ahmw kapinga Siohwa erein sounpwong en March, April oh May en pahret. Mwein ekei rehrail pahn pil iang doadoahk en Auxiliary Pioneer nan sounpwong pwukat. Elder kan pahn koasoanehdi pwe pahn mie pil ekei tuhpene ong kalohk, duwehte mwurin souwas, ni soutik kan oh imwin wihk kan. Mwohn elder kan pahn koasoanehdi iawasa oh iahd tuhpene en kalohk kan pahn wiawi oh pil ihs me kak kihpeseng pwihn en kalohk kan, re pahn koasoiong irail me pahn iang Auxiliary Pioneer nan sounpwong en March, April oh May. Elder kan pahn nantihong koasoanehdi tuhpene pwukat pwe sounkalohk teikan kak iang uhk kalohk ni rahn oh ahnsou kan me ke pahn kalohk. Ni ahl wet, koasoandi kan en kalohk pahn kak pweida mwahu.—Lepin Padahk 20:18.
12. Dahme kin kamwekid kitail en kapinga Siohwa ahnsou koaros?
12 Wia Uwen Me Ke Kak: Ma ke sohte kak iang doadoahk en Auxiliary Pioneer pwehki irair kan nan ahmw mour sohte mweidohng uhk ahnsou wet, tamataman me Siohwa kin kalahnganki ahmw nannanti oh tounmetei kan me ke kin wia ‘uwen me ke kakohng, kaidehn me ke sohte kakohng.’ (2 Kor. 8:12, NW) Kitail ahneki kahrepe mwahu tohto en kalahnganki Siohwa. Depit ntingihdi met ni e kin medemedewe kahrepe mwahu pwukat: “I pahn patohwan kapingkalahngan ong Siohwa ahnsou koaros; I sohte pahn tokedihsang ei kapikapinga.” (Mel. 34:1, NW) Kitail en wia uwen atail kak koaros en ahneki soangen madamadau duwehte Depit nan sounpwong en March, April oh May en pahret.
[Kilel nan Pali 3]
Iaduwen Ahmw Kak Kalaudehla Ahmw Ahnsoun Kalohk?
◼ Kalohk ni ahnsou kan me aramas tohto kin mih nan imwarail
◼ Kalohk nan wasahn wehi pokon
◼ Kalohk nan wasahn doadoahk de sukuhl
◼ Kalohk doadoahngki telephone
◼ Iang doadoahk en Auxiliary Pioneer