“Kalohkiseli Rongamwahu”
1. Ia ekei rongamwahu kan me kitail kak ehukihong meteikan?
1 Nan sampah ehu me sohte diren rongamwahu, kitail ahneki kapai en kin “kalohkiseli Rongamwahu duwen kalahngan en Koht.” (Wiewia 20:24) Met kin pidada atail kin padahkihong aramas akan me kereniongehr lel imwilahn “imwin rahn akan” oh sapwellimen Siohwa sampah kapw me pwung me pahn uhd tepida oh “soahng mering kan [pahn] sohralahr.” (2 Tim. 3:1-5; Kaud. 21:4) Ni ahnsowo e pahn sohla soumwahu. (Ais. 33:24) Irail me melahr kan pahn pidohieisang nan arail sousou kan oh pahn pwurehng tuhwong arail peneinei oh kompoakparail kan. (Sohn 5:28, 29) Sampah pwon pahn wiahla paradais kaselel ehu. (Ais. 65:21-23) Met iei ekeite karasepen rongamwahu me kitail kak ehukihong meteikan!
2. Dahme kahrehda ni rahn akan me kereniong Kataman me wia ahnsou mwahu en kalohki rongamwahwo?
2 Sounpwong en March, April oh May pahn wia ahnsou mwahu en kalohki rongamwahwo. Nan sounpwong pwukat, iren mesen lahng oh reireilahn marain en ehuehu rahn nan wasa tohto nan sampah kin sewese me tohto en kak kalaudehla arail awa nan wasahn kalohk. Patehng met, kasarawi me keieun kesempwal nan pahro, me iei Katamano, pahn pil wiawi ni Rahn Kaunop en March 22 mwurin kihrlahn ketipin. Met iei ahnsou mwahu en kaunopada kitail en kalaudehla atail iang wia doadoahk wet.
3. Dahme pahn sewese kitail en kak kalaudehla atail doadoahk en kalohk nin duwen peneinei ehu?
3 Auxiliary Pioneer: Ke kak wiahda ahmw koasoandi en kak iang auxiliary pioneer ni sounpwong ehu de riau, de sounpwong pwukat koaros? Ke sou song kasalehda met ni amwail onop en peneinei? Ma kumwail pahn sawaspene koasoanehdi mwahu, emen de tohtohsang emen nan amwail peneinei kak iang auxiliary pioneer. (Lep. Pad 15:22) Kapakapki met oh kilang iaduwen Siohwa pahn kapaia ahmw nanti. (Lep. Pad. 16:3) Mehnda ma pil sohte emen nan ahmw peneinei kak iang auxiliary pioneer, koaros tohnpeneinei kak song en wiahda mehn akadei en iang pioneer teikan nan kalohk oh kalaudehla amwail awahn kalohk kan.
4. Iaduwen atail kak koasoanehdi kitail en iang auxiliary pioneer ma kitail kin doadoahk awa 80 nan wihk riau koaros?
4 Itar ma ke pil doadoahk awa 80 wihk nan riau koaros, ke kak wiahda koasoandi mwahu pwe ken kak iang auxiliary pioneer. Mwein ke kak doadoahngki ekis ahmw ahnsou ni ahmw kommoal en mwenge pwe ken kak kalohk. De ke kak ale ehu pein ahmw wasahn kalohk me karanih imwomw de ahmw wasahn doadoahk pwe ken kak kalohk awa ehu de tohtohsang mwowe de mwurin ahmw doadoahk. Ke kak pil wiahda ahnsou mwahu ni ahmw pahn uhdihsang mehkan me sohte nohn kesempwal nan sounpwong ehu oh pil kalohk rahn pwon ni imwin wihk kan. Ekei kin isaneki ahnsoun kommoal en doadoahk kan pwe en kak iang kalohk.
5. Iaduwen ke kak sewese irail me mah de sohlahr kehlail kan en kak iang auxiliary pioneer?
5 Ma kowe emen me mah de sohte nohn kehlail, ele ke kak auxiliary pioneer ni ahmw pahn kin wiahda awa keite nan ehuehu rahn. Peki rehn Siohwa en ketikihong uhk “manaman lapalap.” (2 Kor. 4:7) Emen sister me mahki sounpar 106 kin wia doadoahk en auxiliary pioneer! Pwehki sawas me kin kohsang rehn eh peneinei en Kristian akan oh meteikan nan mwomwohdiso, lih mah menet kin kak iang kalohk sang ihmw lel ihmw, pwurala rehn irail kan me men rong, wia onop en Paipel kan oh pil iang soangen doadoahk teikan en kalohk. E pil sewese aramas ehk en tepida onop Paipel. E koasoia: “Ni ei kin medewehla duwen soangen kapai kaselel kan me I kin alehdi sang ei kin wia auxiliary pioneer men, ei mohngiong kin direkihla limpoak oh kalahngan ong Siohwa, sapwellime Ohlo oh pil Sapwellime pwihn limpoak. I uhdahn men nda ‘kalahngan, Siohwa!’”
6. Iaduwen irail tohnsukuhl pwulopwul kan me papidaislahr kak iang auxiliary pioneer?
6 Ma kowe pwulopwul emen me papidaislahr, ke pil kak iang wia emen auxiliary pioneer. Duwehte irail me kin wia doadoahk awa 80 nan wihk riau koaros, ele ke kak doadoahngki imwin wihk kan en wia ahnsoun ahmw kalohk. Mwehin ke kak pil iang kalohk awa ehu de tohtohsang mwurin sukuhl kan. Mie rahn en holiday kan nan sukuhl me ke kak doadoahngki en iang kalohk? Ma ke men iang auxiliary pioneer, lokaiahng ahmw pahpa oh nohno duwen met.
7. Dahme elder kan kak wia pwehn kak kangoange tohnmwomwohdiso kan ni erein sounpwong tohrohr pwukat?
7 Kalaudehla Ahmw Ngoang: Elder kan kak kangoange tohn mwomwohdiso sang ni arail mehn kahlemeng mwahu kan. (1 Pit. 5:2, 3) Irail ele kak koasoanehdi en katohtohihala ahnsou en tuhpene en kalohk kan ong irail kan me pahn iang kalohk ni sohrahn, mwurin sukuhl oh mwurin doadoahk. Sounapwalih en kalohk anahne en koasoanehdi emen me koahiek en kak kihpeseng kalohk oh irail pil anahne en tehk ma e itar wasahn kalohk oh makisihn oh pwuhk teikan ni erein sounpwong tohrohr pwukat.
8. Dahme kitail sukuhlikihsang dahme ehu mwomwohdiso wia?
8 Nan ehu mwomwohdiso, elder ko tepida kangoange tohnmwomwohdiso en iang auxiliary pioneer sounpwong kei mwohn eh lel sounpwong en katamano. Irail kin pakairkiong mwomwohdiso ehuehu wihk meh depe iang doadoahk en auxiliary pioneer. Met kin kamehlelehiong irail me kin men kalaudehla arail iang wia doadoahk en kalohk me e pahn tohto iengerail. Pil koasoandi tohrohr en tuhpene en kalohk ni sohrahn oh ni soutik kak pil wiawihda. Imwilahn met, irail sounkalohk 53, kereniong elep en tohnmwomwohdiso pwon, me iang wia doadoahk en auxiliary pioneer nan April.
9. Dahme kahrehda rahn kan mwowe oh mwurin ahnsoun katamano me wia ahnsou keieu mwahu ong irail me konehng wiahla sounkalohk en tepida iang kalohki rongamwahwo?
9 Sewese Meteikan Kalohk: Ni ahnsou me emen me kapw de pwulopwul ahpwtehn wiahla emen sounkalohk, me mah oh koahiek en kalohk kan kak luke irail en iang irail kalohk. Met kak wiawi ni rahn kan mwowe oh mwurin ahnsoun Katamano, pwe tohto tohnmwomwohdiso kan kin song en kalaudehla arail ahnsoun kalohk. Mie emen me ke kin onop Paipel reh me kin kapwungala eh mour pwe en pwungiong koasoandi en Siohwa? Mie emen noumw seri me kin kekeirda laud ahpw saikinte wiahla emen sounkalohk? Ma irail kin kasalehda me irail men wiahla sounkalohk me saikinte papidais oh ke pehm me irail konehng ale pwukoa wet, eri tuhkihong emen elder ko met. Presiding overseer pahn koasoanehdi elder riemen en tuhwong uhk oh noumw seri de meno me ke kin onop reh.
10. Dahme elder kan kak en wia pwe en sewese irail me wereila sohte iang kalohk?
10 Sounpwong kan me kohkohdo pil wia ahnsou mwahu ong irail me wereila sohte iang kalohk en pwurehng tepida iang arail doadoahk en mwomwohdiso. Sounapwalih en Pwuhk Study en Mwomwohdiso kan oh elder teikan anahne en nsenohki mwemweitla rehn irail pwukat oh luke irail en iang irail kalohk. Ma irail sohla iang kalohk ni ahnsou reirei, eri elder riemen anahne tuhwong mahs ih oh diarada ma irail konehng pwurehng tepida kalohk.—km 11/00 p. 3.
11. Dahme keieun kasalehda “sapwellimen Koht kalahngan”?
11 Kaunopada ong Katamano: Tomwo me keieun kasalehda duwen “kalahngan en Koht.” (Wiewia 20:24) Aramas rar kei me kin kalahnganki met pahn pokonpene Rahn Kaunop, March 22, mwurin kihrlahn ketipin, oh iang kasarawih matalahn Krais. Kitail en luke oh sewese irail me kapehd mehlel kan koaros en iang towehda koasoandi kesempwal wet oh kadehde sapwellimen Siohwa kalahngan ong aramas akan.
12. Ihs me kitail kak luke ong Katamano?
12 Ntingihdi ihs me ke mwahuki luke. Mwein uhdahn ke pahn kilelehdi ahmw peneinei kan, mehn mpomw kan, irail me ke ese nan ahmw wasahn sukuhl de doadoahk kan, irail kan me ke kin onop Paipel rehrail mahs oh pil met, de pil irail kan koaros me ke kin kalapw mwemweitla reh. Ma ekei me ke luke ahneki peidek kan me pid duwen Katamano, ke pahn diarada me e kin sawas ma ke pahn doadoahngki pali 127, parakrap 18 en pwuhken Loalokong. Met kakete pil sewese iuk en tepida onop Paipel rehn aramaso, pwehki e pahn kihong uhk ahnsou mwahu en kasalehiong ih pwuhk me kitail kin doadoahngki ong onop Paipel.
13. Iaduwen Siohwa kin kapaiada sounkalohk riemen me kin song en luke meteikan en iang towehda Katamano?
13 Emen sister kilelehdi eh peneinei 48 me e pahn luke. Ahnsou me e kin luke emen ah e kin ntingihdi rahn me e luke irail. Ia uwen eh peren ni ahnsou me meh 26 me e luke iang towehda Katamano! Emen brother me ahneki sidohwa ehu luke emen tohndoadoahk me mahs wia padre men. Ohlo iang towehda Katamano oh mwuri nda: “Nan awa ehu I koledi laud duwen Paipel laudsang erein sounpar 30 me I kesehla suksukuhliki duwen Paipel nan Catholic.” Mwurin Katamano, e tepida onopki pwuhken Bible Teach.
14. Doadoahk tohrohr dah me pahn tepida nan March 1?
14 Doadoahk Tohrohr: Tepida Rahn Kaunop, March 1, lao lel March 22, luhk tohrohr pahn kohwohng wehi pokon en iang towehda Katamano. Koaros pahn iang wia doadoahk kesempwal wet. E mwahu en pein kihong tohnihmwo doaropwe en luhko sang ahmw pahn kihdi ni arail wenihmw kan. Ahpw, ma ahmw wasahn kalohk me inenen laud, eri mwein elder kan kak koasoanehdi en kihdihte doaropwe kan ni wenihmw kan en ihmw me sohte towe kan. Kitail pahn pil kihla makasihn kan ni imwin wihk kan.
15. Iaduwen atail kak kihla doaropwe en luhko?
15 Pwehki sohte atail ahnsou laud en wia luhk wet, keieu mwahu ma kitail pahn wia padahk mwotomwot. En kadek oh nsenoh. Ele ke kak nda: “Se men tehk mwahu me kowe, ahmw peneinei oh kompoakepahmw kan iang ale luhk en towehda koasoandi kesempwal ehu me pahn wiawi ni March 22. Iet noumw doaropwe en luhk. Nan doaropwe e kawehwehda duwen oaritik kan en luhk wet.” Tohnihmwo ele pahn idek peidek kan. De mwein e pahn ale luhko oh nda me e pahn iang towehda. Kilelehdi ihs me men iang oh pil ehu pwurala tuhwong ih.
16. Dahme wiawi me kasalehda duwen kesempwalpen doadoahk tohrohr en luke aramas kan nan wasahn kalohk ong Katamano?
16 Nan pahr nekiero, emen sounpei diarada doaropwe en luhk wet ni eh wenihmwo. E medewehda en iang towehda ahpw e anahne mahs ale mweimwei sang rehn eh kaunen sounpeio. Ni ahnsou me e kasalehiong kaunen sounpeio doaropwe en luhko, kaunen sounpeio nennenla oh nda me eh pahpa oh nohno iang wia Sounkadehde kei oh mahs e kin iang towehda mihding kan. Kaunen sounpeio sohte ihte kihong ih mweimwei en iang towehda Katamano ahpw pein ih pil iang towehda.
17. Iaduwen atail pahn kasalehda me kitail sohte kin mwamwahleki katepen sapwellimen Siohwa kalahngan?
17 Kasalehda Kalahnganki: Ni atail kerenlahngehr Kataman en pahr 2008, emenemen kitail en kin doudouloale duwen kalahngan en Siohwa ong kitail. Wahnpoaron Pohl ntingihdi: “Se peki ni ngidingid rehmwail pwe kumwail en dehr kin mwamwahliki sapwellime kalahngan me kumwail aleier.” (2 Kor. 6:1) Iaduwen atail kak kasalehda me kitail sohte mwamwahleki katepen sapwellimen Koht kalahngan? Pohl ntingihdi: “Eri, se kin kasalehda ni mehkoaros me se kin wia, me kiht ladun Koht kei.” (2 Kor. 6:4) Ihme, kitail en kin kasalehda atail kalahnganki sapwellimen Siohwa kisakis sang ni atail tiahk mwahu kan oh ni atail kin ngoangki kalohki rongamwahwo. Ni ahnsoun Katamano, e wia ahnsou mwahu ehu en kalaudehla atail doadoahk en kalohki duwen rongamwahwo.
[Kilel nan Pali 3]
Ihs me Kak Iang Wia Doadoahk en Auxiliary Pioneer?
◼ Peneinei kan
◼ Irail me kin doadoahk awa 80 nan wihk riau koaros
◼ Irail me mah oh luwetalahr ni paliwar kan
◼ Irail me kin iang sukuhl
[Kilel nan Pali 4]
Ni Ahnsou me Kitail Kin Kihla Luhk ong Katamano:
◼ Lokaia ni mwotomwot oh ngoang
◼ Kilelehdi ihs me kin kasalehda me e mwahuki oh pwurala reh
◼ Kihla makasihn kan ni imwin wihk kan