Kalaudehla Doadoahk en Kalohk ni Ahnsoun Kataman!
1. Dahme kahrehda kitail anahne medewe kalaudehla atail kalohk nan March, April oh May?
1 Ke kak kalaudehla omw doadoahk en kalohk nan sounpwong en March, April oh May? Iren mesenleng en wasa tohto pahn mwahu. Ekei sounkalohk kin kommoal sang doadoahk de sukuhl oh re kak doadoahngki ahnsou wet ong kalohk. Tepisang April 2, kitail pahn iang wia doadoahk tohrohr ehu en luke irail kan me men iang kitail towehda Kataman me pahn wiawi April 17. Mwurin mwo, kitail pahn nantihong sewese irail me iang towehda Katamano oh luke irail en iang towehda padahk tohrohr me pahn wiawi nan wihk me pahn tepida April 25. Ni mehlel, mie kahrepe tohto kitail en medewe kalaudehla atail kalohk nan March, April oh May.
2. Ia ehu ahl keieu mwahu en kalaudehla atail kalohk?
2 Sawaspen Pioneer: Ehu ahl keieu mwahu en kalaudehla kalohk iei iang wia sawaspen pioneer. Pwehki kitail koaros kin kedirepw, kitail anahne mwadang wiahda atail koasoandi ni keneinei oh wekidekla kan me konehng. (Lep. Pad. 21:5) Mwein ke kak kasaula koasoandi kan me sohte nohn kesempwal. (Pil. 1:9-11) Dahme ke sou ehukihong meteikan nan mwomwohdiso omw men iang pioneer oh tehk ma re sou pahn men iang uhk pioneer?
3. Ia duwen peneinei kan ar kak koasoanehdi en kalaudehla arail iang kalohk?
3 Nan amwail Kaudok en Peneinei nan wihk kohkohdo, e pahn mwahu kumwail en koasoiapene amwail mehn akadei kan nin duwen ehu peneinei. (Lep. Pad. 15:22) Ma tohnpeneinei pwon pahn sawaspene, mwein ekei nan peneinei kak wia sawaspen pioneer sounpwong ehu de tohtohsang. Ia duwen ma met sohte kak wiawi? Peneineio pil kak koasoanehdi en kalaudehla arail kalohk sang ni arail pahn iang kalohk nin soutik kan de kalaudehla ahnsoun kalohk nan imwin wihk kan.
4. Kapai dah kan kitail pahn alehdi sang atail kalaudehla atail kalohk erein sounpwong kan en Katamano?
4 Siohwa kin ketin tamataman soahng koaros me kitail kin wia pwehn papah ih oh e kin ketin kalahnganki atail tounmetei kan. (Ipru 6:10) Peren kin kohsang atail kihong Siohwa oh meteikan atail ahnsou. (1 Kron. 29:9; Wiewia 20:35) Ke kak kalaudehla omw kalohk erein ahnsoun Kataman wet oh paiekihda kapai kan me kohsang doadoahk wet?