Ke Pahn Iang Sawaspen Pioneer?
1. Dahme kahrehda ahnsoun Kataman iei ahnsou mwahu en kalaudehla atail kalohk?
1 Ahnsoun Kataman kin wia ahnsou mwahu en kalaudehla atail kalohk. Iei ahnsou me kitail kin medemedewe duwen sapwellimen Siohwa limpoak laud ni eh ketikihda sapwellime Ohlo nin duwen meirong ehu. (Sohn 3:16) Kitail kin uhdahn kalahnganki dahme Siohwa ketikihda, oh met kin kalaudehla atail ineng en padahkihong meteikan duwen Siohwa oh dahme e kin ketin wia ong tohnsampah. (Ais. 12:4, 5; Luk 6:45) E pil wia ahnsou ehu me kitail kin perenki iang luhk tohrohr en luke irail me kitail ese oh aramas akan nan atail wasahn kalohk ren iang kitail towehda Katamano. Mwuri kitail kin kakairada ahn me towehda ko arail men esehla padahk mehlel. Ia duwe, ke pahn kalaudehla omw kalohk ni omw pahn iang wia sawaspen pioneer erein March, April, de May?
2. Dahme kahrehda March iei sounpwong me keieu mwahu en iang sawaspen pioneer?
2 Wiahki March Sounpwong Kesempwal Ehu: Sounpwong en March pahn wia ahnsou mwahu en wia sawaspen pioneer. Irail me pahn iang kak pilada ma re pahn wiahda awa 30 de awa 50. Ma sounapwalih me kin seiloak pahn mwemweitido nan March, sawaspen pioneer kan kak iang pwon mihting me e kin wia ong pioneer oh pioneer tohrohr kan. Katamano pahn wiawi Niare, March 26, 2013 oh doadoahk en kihseli luhk pahn kareireila sang sounpar kan mwowe pwe e pahn tepida March 1. Patehng met, mie rahn kaunop oh rahn sarawi limau nan March. Ke sou medewe mwahu ma ke pahn kak iang wiahki March sounpwong kesempwal ehu nan pahr wet?
3. Ia duwen atail kak koasoanehdi en kalaudehla atail kalohk?
3 Koasoanehdi Met: Met iei ahnsou en tehk omw koasoandi kan oh kilang wekidekla dah kan ke anahne wia pwehn iang pioneer. E pahn kesempwal ong tohnpeneinei en sawaspene, eri erein amwail Kaudok en Peneinei, koasoiapene amwail mehn akadei kan oh wiahda amwail koasoandi nin duwen peneinei ehu. (Lep. Pad. 15:22) Ma ke sohte kak iang wia sawaspen pioneer, ke dehr nsensuwed. Ke pahn kak wekidala omw koasoandi pwehn kareireila omw ahnsoun kalohk ni rahn kan me ke kin kalohk? Ke pahn kak kapatahiong pil ehu rahn en kalohk erein wihk kan?
4. Kapai dah kan kohsang atail kalaudehla atail kalohk erein March, April oh May?
4 Ni atail kalaudehla atail doadoahk erein March, April oh May, kitail pahn kalaudehla atail peren me kin kohsang papah Siohwa oh sewese meteikan. (Sohn 4:34; Wiewia 20:35) Ahpw dahme keieu kesempwal iei atail nantihong wiahda tounmetei kan me pahn kaperenda Siohwa.—Lep. Pad. 27:11.