Wia Ahnsoun Kataman me Pahn Kohdo en Kaperen!

1. Ia ehu ahl en kalaudehla omw peren erein sounpwong kan mwohn lel mwurin Katamano?

¹ Ke men kalaudehla omw peren erein March, April oh May? Ehu ahl en wia met iei en kalaudehla omw doadoahk en kalohk. Ma kak, iang wia sawaspen pioneer. Ia duwen met pahn kalaudehla omw peren?

2. Ia duwen atail kalaudehla atail doadoahk en kalohk kin kalaudehla atail peren?

² Kalaudehla Omw Peren: Siohwa ketin kapikada kitail pwe kitail en ale peren oh nsenamwahu sang ni atail kin kaudokiong ih oh kapwaiada ineng me kitail ipwikihdi, iei en ahneki nanpwungmwahu reh. (Mad. 5:3) E pil ketin kapikada kitail en kin ale peren sang atail kin kihkihwei ong meteikan. (Wiewia 20:35) Doadoahk en kalohk kin kahrehiong kitail en kapwaiada soahng riau pwukat—en kaudokiong Koht oh en sewese aramas. E mehlelete me atail kalaudehla atail iang kalohk kin pil kalaudehla atail peren. Pil patehng met, atail kalaudehla atail kalohk kin pil kalaudehla atail koahiek. Ni atail kin kalaudehla atail koahiek, met kin kalaudehla atail kin koapworopworki me kitail kak koahiek. Oh atail saloh kin tikitikla. E pahn tohtohla atail ahnsou mwahu en kalohk oh pil tapiada onop en Paipel kan rehn aramas. Soahng pwukat koaros kin kahrehda doadoahk en kalohk en kaperen.

3. Dahme kahrehda March oh April wia ahnsou keieu mwahu en wia sawaspen pioneer men?

³ March oh April kin wia sounpwong kei me keieu mwahu en iang wia sawaspen pioneer. Met pwehki kitail kak pilada ma kitail pahn iang wia awa 30 de awa 50. Oh pil, tepisang Rahn Kaunop, March 22 lao lel rahnen Katamano, Niehd April 14, kitail pahn wia luhk tohrohr pwehn luke aramas ong Katamano. Mwomwohdiso kan pahn pereperen ni me tohto pahn “miniminpene” ni arail song kanekehla uwen arail kak wasahn kalohk erein ahnsou me mie.—Sep. 3:9, NW.

4. Ma kitail men iang wia sawaspen pioneer, dahme kitail anahne wia?

⁴ Kaunopada Ahnsouwet: Ma ke saikinte wia met, kihong ahnsoun tehk omw koasoandi kan oh kilang ma ke anahne wiahda wekidekla kan pwe ken kak kalaudehla omw iang doadoahk en kalohk erein sounpwong ehu de tohtohsang. Kapakapki ire wet. (Seims 1:5) Koasoiaiong omw peneinei oh meteikan nan mwomwohdiso duwen met. (Lep. Pad. 15:22) Ke ele pahn diar me mendahki soumwahu de omw kin kedirepw pwehki doadoahk en mwohni, ke pil kak ahneki peren me kin kohsang omw iang wia sawaspen pioneer.

5. Ia pahn imwilahn atail kalaudehla atail doadoahk en kalohk nan ahnsoun Kataman wet me pahn kohdo?

⁵ Siohwa kupwurki sapwellime ladu kan en peren. (Mel. 32:11) Ni atail kin wia uwen atail kak en kalaudehla atail doadoahk en kalohk nan ahnsoun Kataman, kaidehn ihte e pahn kalaudehla atail peren ahpw e pahn pil kaperenda Samatail nanleng.—Lep. Pad. 23:24; 27:11.