Kaukaule Lohkiseli Duwen Sapwellimen Siohwa Wiewia Kapwuriamwei kan
1. Ia ekei sapwellimen Siohwa wiewia kapwuriamwei kan me ke kin keieu kalahnganki?
1 Sohte me kak pahrekiong atail Koht lapalap, Siohwa! Depit ntingihdi: “Maing Kaun, at Koht, ia uwen tohtohn soahng kapwuriamwei kan me komw ketin wiahiong kiht; sohte emen mie me duwehte komwi!” (Melkahka 40:5) Sapwellimen Siohwa doadoahk kapwuriamwei kan kin pid kapikapikda kan nan audepen lahng oh sampah, Wehin Mesaia, oh limpoak-kadek ong sapwellime aramas akan, oh doadoahk en kalohk me kin wiawi nin sampah pwon. (Melkahka 17:7, 8; 139:14; Dan. 2:44; Madiu 24:14) Limpoak ong Siohwa oh kalahnganki dahme E ketin wiahiong kitail kin kamwekid kitail en padahkiong aramas teikan duwen Ih. (Melkahka 145:5-7) Erein sounpwong en March, April, oh May, kitail pahn ahneki ahnsou laud en padahkiong aramas teikan duwen sapwellimen Koht wiewia kan.
2. Kapai dah kan kitail kin alehdi sang atail doadoahk en Auxiliary Pioneer?
2 Nin Duwen Auxiliary Pioneer Men: Ni erein sounpwong siluh en doadoahk tohrohr me kitail pahn wia, ke kak koasoanehdi ahmw ahnsou en iang doadoahk en kalohk awa 50 nan March de April de May de sounpwong siluh koaros? E pahn katapan laud ong uhk ahmw iang doadoahk tohrohr wet, mendahki ke anahne pwurehng koasonehdi omw koasoandi kan. (Episos 5:16) Aramas tohto kin diarada me doadoahk en Auxiliary Pioneer kin sewese irail en koahiekla ni arail wia doadoahk en kalohk. Re sohte kin salohda oh irail kin ahneki ahnsou laud en doadoahngki neirail Pwuhk Sarawi. Pwehki irail kin iang doadoahk en kalohk ahnsou koaros, met kin sewese irail en pwurala rehn aramas akan me kin perenki rong, oh mendahki ekei sounkalohk kan me saikinte onop Pwuhk Sarawi rehn emen, ni ahnsou me irail kin iang doadoahk en Auxiliary Pioneer, re kin tepida onop en Paipel kapw kan. Pwehki doadoahk en Auxiliary Pioneer kin pid atail kin sewese aramas teikan, doadoahk wet kin wiahla doadoahk kaperen ong kitail.—Wiewia 20:35.
3. Iaduwen ekei sounkalohk kan kin kak iang doadoahk en Auxiliary Pioneer edetehn irail kin lelong kahpwal akan?
3 Menlau dehr mwadang nda me ke sohte kak iang doadoahk wet pwehki ahmw irair en mour inenen apwal. Sounpar samwalahro, emen elder me naineki seri riemen oh kin doadoahk full-time—e iang doadoahk en Auxiliary Pioneer. Iaduwen brother menet me kin kedirepw kin kak iang doadoahk en Auxiliary Pioneer? Pwehki e kin doadoahk Ni Ehd lel Ni Alim, e kin pilahn en wia awa tohto ni imwin wihk kan, oh e kin tepida wia kalohk nanial Rahn Kaunop kan, kuloak 7:00 ni menseng. Ekei sounkalohk teikan nan ah mwomwohdiso me pil iang doadoahk en Auxiliary Pioneer mendahki irail ahneki pwukoa en peneinei, irail kin sawaspene oh kangoange emenemen irail Auxiliary Pioneer kan. Nan ehu mwomwohdiso, emen sister me sounpar 99 alehdi luhk ehu sang rehn nah serepein pwen iang ih auxiliary pioneer nan sounpwong en May, kahrehda sister mah menet pil pilahnehda en Auxiliary Pioneer. Sounkalohk teikan nan ah mwomwohdiso pil sewese sister mah menet me mih nan wheelchair en kohla ihmw lel ihmw oh pil onop Paipel rehn aramas akan ni arail kin sewese ih oh wurahdeki were wheelchair. E kin pil doadoahngki telephone pwen kalohk ong aramas teikan, kalohk nanial kan, oh ntingihdi kisinlikou kan. E kin kamehlele me e kak wia doadoahk pwukat, kaidehn pwehki pein ah kehl, ahpw pwehki sapwellimen Siohwa sawas.—Aiseia 40:29-31.
4. Irair dah kei kitail kak medemedewe ni ahnsou me kitail kin wiahda atail koasoandi en Auxiliary Pioneer?
4 Ke kak song en ntingihdi koasoandi ehu me pahn mwahu ong uhk. Koasoandi kan me kileledi nan doaropwe wet (pali 5) pahn kak sewese kitail. Ke kin doadoahk full-time de ke kin iang sukuhl? Ele mwein koasoandi en kalohk me pahn keieu mwahu ong uhk: iei en kalohk ni imwin wihk kan. Ma ke kin kalap soumwahu de ke sohte kak kalohk awa tohto nan ehu rahn, ele mwein koasondi ehu me pahn mwahu ong uhk: iei soangen koasoandi me ke pahn kalohk aua malaulau ehu ehu rahn. Koasoiaiong sounkalohk teikan duwen ahmw ineng en men iang doadoahk en Auxiliary Pioneer. Mwein irail pil pahn wiahda arail mehn akadei en iang doadoahk wet.
5. Mehnia mehn akadei kan me irail pwulopwul kan kak wia ong ni sounpwong en March, April, oh May?
5 Dahme Irail me Pwulopwul Kak Wia Pwehn Iang Auxiliary Pioneer: Siohwa kin kupwurperenkihda me pwulopwul kan me kin padahkiong aramas teikan duwen sapwellime wiewia kapwuriamwei kan. (Melkahka 71:17; Madiu 21:16) Ma ke pwulopwul oh papidaislahr, mwein ke kak iang Auxiliary Pioneer nan sounpwong ehu me mie rahn akan me ke kak kommoal sang sukuhl. Ma ke sohte kak iang doadoahk en Auxiliary Pioneer, ke kak wiahda mehn akadei kan en kalaudehla ahmw awa en kalohk kan oh pil kamwahuwihala ahmw doadoahk en kalohk nan sounpwong pwukat? Ma ke kin iang ahmw pahpa oh nohno nan doadoahk en kalohk ahpw ke saikinte wiahla sounkalohk men me papidaislahr, eri met kin wia ahnsou mwahu en song ma ke kak wiahla sounkalohk men me saikinte papidais. Ke sohte anahne ahneki pepehm me ke anahne sapeng peidek en Pwuhk Sarawi kan koaros de ke pil sohte anahne ese Pwuhk Sarawi duwehte aramas laud kan me papidaislahr. Ahpw, ke kin wehwehki padahk kesempwal kan en Pwuhk Sarawi? Ke kin kapwaiada koasondi en tiahk mwakelekel en Pwuhk Sarawi? Ke men aramas teikan en ese me ke wia emen Sounkadehdehn Siohwa? Ma iei, eri, ke kak koasoiong ahmw pahpa oh nohno duwen met. Ira kak koasoanehdi ken iang ira tuhwong elder kan pwen kilang ma ke kin kapwaiada koasondi kan mwohn ke kak iang wiahla sounkalohk me saikinte papidais.—Kilang pwuhken Our Ministry, pali 98-99.
6. Iaduwen kitail kak sewese aramas me kin onop Paipel rehtail en wiahla sounkalohk kan en Rongamwahu?
6 Sewese Aramas Teikan en Kalohk: Irail aramas akan me onop Paipel rehtail oh kin kekeirada mwahu ni pali ngehn mwein kakong iang wiahla sounkalohk kan ni erein sounpwong kei en doadoahk tohrohr wet. Ma mie emen me kin onop Paipel rehmw oh wia kekeirada mwahu, ke kak rapahki sawas sang rehn Sounapwalih en ahmw Pwuhk Study de Sounapwalih en Kalohk. Emen rehra kak iang uhk ni ahnsou me ke pahn onop Paipel rehn aramaso pwe e kak kilang uwen laud e kin kekeirada ni pali ngehn. Ma aramaso me ke onop Paipel reh kak wiahla emen sounkalohk oh e pil men wiahla sounkalohk emen, Presiding Overseer kak koasonehdi elder riemen en tuhwong kowe oh aramaso me ke kin onop Paipel reh. (Kilang The Watchtower (lokaian wai) en November 15, 1988, pali 17.) Ni ahnsou me aramaso me ke kin onop Paipel reh ale mweimwei sang elder kan en wiahla sounkalohk men, ke pahn kak mwadang tepida kaiahne ih nan doadoahk en kalohk.
7. Sawas dah kei pahn kak kohwong sounkalohk kan me solahr kin kaukaule iang kalohk oh ekei wereilahr solahr kin iang kalohk?
7 Sounapwalih en Pwuhk Study kan anahne sewese emen me solahr iang kalohk oh iangahki irail akan me kin kalohk ekeite sounpwong kan. Luhke irail en iang uhk nan doadoahk en kalohk. Ma wereila re solahr iang kalohk, e pahn mwahu elder riemen en koasoiong irail pwen tehk ma konehng irail en pwurehng iang kalohk. (Kilang Atail Doadoahk Ong Wehio en November 2000, Koakon en Peidek.) Ngoang en tohnmwomwohdio kan ni erein sounpwong pwukat me doadoahk tohrohr ieu pahn wiawi, mwein pahn kak kamwekidada irail en pwurehng koasoanehdi nan arail mour en kaukaule iang doadoahk en kalohk wet.
8, 9. Dahme irail elder kan kak wia pwen kalaudehla ngoang en sounkalohk kan ong doadoahk tohrohr wet?
8 Kaunopada Pwehn Kalaudehla Ahmw Ahnsoun Wia Doadoahk en Kalohk Ahnsouwet: Elder kan pahn kak tepida ahnsouwet en sewese tohnmwomwohdiso en kalaudehla arail ineng en iang doadoahk en Auxiliary Pioneer. Kumwail elder kan kak kangoange irail sang ahmw koasoi kangoang kan oh pil ahmw mehn kahlemeng mwahu kan. (1 Piter 5:3) Nan ahmw mwomwohdiso, sounkalohk depe me iang doadoahk en Auxiliary Pioneer me keieu tohto? E kak tohtohla sang pahr teio? Sounapwalih en Pwuhk Study kan oh arail sounsawas kan anahne rapahki ahl akan en kangoange koaros nan arail Pwuhk Study en kalaudehla arail aua en kalohk kan. Sounapwalih en Kalohk mwein kak koasoanehdi pil ekei ahnsoun mihding en kalohk kan. Padahkiong tohnmwomwohdiso kan mwowe duwen koasoandi en tuhpene ong kalohk kapw kan. Tehk mwahu pwe sounkalohk koahiek kan en kihpeseng pwihn en kalohk kan oh mihding en kalohk kan pahn tepida oh imwisekla ni kuloak me kilelehong. (Kilang Atail Doadoahk Ong Wehio en September 2001, Koakon en Peidek.) Sounapwalih en Kalohk anahne tehk mwahu pwe sounkalohk kan pahn mie itar arail wasahn kalohk kan, makisihn kan oh pil pwuhk kan.
9 Pahr samwalahro, pwihn en elder kan nan ehu mwomwohdiso kin ngoangki tepida mwadang en kangoange sounkalohk kan en iang doadoahk en Auxiliary Pioneer, oh tohto nanpwungarail kapedelong neirail doaropwe en Auxiliary Pioneer. Irail koasonehdi pil ekei mihding en kalohk kan—ehu mihding tepida kuloak 5:30 ni sohrahn ong kalohk en nanial kan, oh pil ehu mihding tepida kuloak 3:00 mwurin souwas ong irail tohnsukuhl akan, oh kasiluhn mihding en kalohk kin tepida kuloak 6:00 ni soutik ong tohndoadoahk kan. Likin mihding pwukat, mie mihding en kalohk silu me kin wiawi Rahn Kaunop kan. Tohnmwomwohdiso wet mwekidkihda koasoandi wet pwe sounkalohk 66 iang doadoahk en Auxiliary Pioneer nan sounpwong en April!
10. Iaduwen peneinei kan kak kaunopada en kalaudehla arail awa en kalohk kan?
10 Ni ahnsou me ke pahn wia onop en peneinei, dahme ke soh pahn koasoanehdi amwail ahnsou en wiahda mehn akadei mwahu kan ong ni sounpwong pwukat? Ma tohnpeneinei pahn sawaspene oh wiahda pilahn mwahu, ekei de mwein koaros nan peneinei pahn kak iang doadoahk en Auxiliary Pioneer. Ma met sohte kak pweida, eri wiahda mehn akadei kan en ekis kalaudehla amwail ahnsou kalohk de iang kalohk ni ahnsou kan me kumwail sohte kin kalapw iang. Ahmw peneinei en kapakapki duwen amwail mehn akadei kan. Ke kak likih me Siohwa pahn kapaiada ahmw wiewia kan.—1 Sohn 3:22.
11. (a) Wiewia kapwuriamwei dah kei me meirong en Krais ketikihda? (b) Kuloak depe oh iawasa Kataman wet pahn wiawi nan pein ahmw wasa?
11 Sapwellimen Koht Wiewia me Keieu Kaselel: Kilelepen sapwellimen Siohwa limpoak iei kisakis en sapwellime Ohl me tomwki dipatail kan. (1 Sohn 4:9, 10) Meirong tomw kin wiahda koasondi pwung ehu ong doarehla aramas akan sang dihp oh mehla. (Rom 3:23, 24) Ntahn Sises kin kamanahla inou kapwo, oh met kin mweidong aramas soh unsek akan en wiahla sapwellimen Koht me pilipil kan oh irail kin alehdi koapworopwor en wiahla kaun akan nan Wehin nanleng. (Ser. 31:31-34; Mark 14:24) Ahpw keieu kesempwal, Sises kin ni unsek peikiong Koht oh met kin kasarawihla mwaren Siohwa. (Deuderonomi 32:4; Lepin Padahk 27:11) Ni Rahn Sarawi, April 4, mwurin kihrlahn ketipin, Katamanpen Kamatalahn Krais pahn wiawi nin sampah pwon.
12. Iaduwen aramas akan me kin perenki rong kak paiekihda sang ahr kin iang towehda Sak en Soutik en Kauno?
12 Sak en Soutik en Kauno kin kalinganahda sapwellimen Siohwa wiewia kapwuriamwei kan. Kahpahreko kin kalaudehla atail kalahngan ong dahme Siohwa ketin wia pwen ketikihda tomwo. Aramas kapw akan me iang towehda mihding wet pahn kak kilang pil sapwellimen Koht wiewia kapwuriamwei teikan. Irail pahn kak kilang me Siohwa ketin padahkiong sapwellime aramas akan en kasalehda limpoak oh miniminpene. (Episos 4:16, 22-24; Seims 3:17, 18) Kitail men luhke aramas tohto pwe mihding kesempwal wet pahn kakete kamwekid madamadau en aramas akan.—2 Korint 5:14, 15.
13, 14. Ihs me kitail anahne luhke ong Katamano, oh iaduwen kitail kak wia met?
13 Luhke Aramas Teikan en Iang Towehda: Mwadang tepida ntingihdi eden aramas akan me ke pilahn en luhke. Ke anahne pil ntingihdi eden tohnpeneinei kan me saikinte iang padahk mehlel, mehn mpatail kan, iengatail tohndoadoahk kan de tohnsukuhl akan, aramas me ke kin onop Paipel rehrail iangahki aramas akan me ke solahr onop rehrail, oh aramas koaros me ke kin pwurehng pwurala reh (ahmw return visit kan koaros). Sounapwalih en Pwuhk Study anahne en pil ntingihdi eden sounkalohk kan me sohlahr kin iang kalohk ni neirail doaropwe.
14 Mwohn kitail pahn kihseli neitail doaropwe en luhk kan ong Katamano, e pahn mwahu en type de ntingihdi mwahu ahnsou oh wasa me Kataman pahn wiawi nan pein ahmw wasa. De mwein ke men doadoahngki luhk me ntingihdi ni tihnsou en Watchtower en March 15, 2004 de Awake! en March 22, 2004. Ni ahnsou me April 4 kerendohr, pwurehng tuhwong de doadoahngki telephone pwehn pwurehng koasoiong aramas akan me ke luhke pwe irail en kak tamataman rahn en Katamano.
15. Iaduwen kitail kak kasalehda kadek ong irail akan ni pwong en Katamano?
15 Rahn en Katamano: Nantihong en mwadang lel wasahn Katamano. Kasalehda ahmw limpoak oh kadek ni ahmw kin kasamwo aramas kapw kan. (Rom 12:13) Ke ahneki pwukoa tohrohr ong aramas akan me ke luhke. Kasamwo irail, oh kahre irail en tuhwong tohnmwomwohdiso teikan. Mwein ke kak sewese irail en rapahki deuerail me karanih deuomw. Oh ma aramas akan sohte kolokol Paipel de pwuhk en koul, ke kak mweidong irail en iang uhk doadoahngki noumw Pwuhk Sarawi de pwuhk en koul, de ke kak koasonehdi emen en apwalih irail. Mwurin Katamano, mihmi rehn aramas kapw pwukat pwen kak sapengki arail peidek kan. Ma ekei aramas me tepin iang towehda mihding kan, idek ma irail men kalaudehla ahr sukuhliki duwen Mahsen en Koht oh sapwellime kupwur kan. Ke kak idek rehrail ma ke kak onop Paipel rehrail.
16. Dahme pahn kak wiawi pwen sewese aramas akan me iang towehda Katamano en kekeirada ni pali ngehn?
16 Kaukaule Sewese Aramas akan Me Iang Towehda Katamano: E sansal me aramas akan me iang towehda Katamano pahn anahne sawas wihk kan mwurin Katamano. Met pil kin pid duwen irail aramas akan me kin kaukaule iang towehda mihding kan mahs, ahpw ni ahnsouwet irail kin iang mihding en mwomwohdiso kan ekeite ahnsou. Elder kan pahn tehk mwahu pwe aramas pwukat pahn ale sawas, oh irail pahn song en wehwehki ia kahrepe re solahr kekeirada ni pali ngehn. Sewese irail en wehwehki me imwin mehkoaros kerendohr. (1 Piter 4:7) Sewese aramas koaros en kilang kapai kan me pahn kohwong emen ma e pahn peikiong kaweid wet en Pwuhk Sarawi, pwen kaukaule kapokonpene rehn sapwellimen Koht aramas akan.—Ipru 10:24, 25.
17. Dahme kahrehda kitail anahne kaukaule kalohkiseli sapwellimen Siohwa wiewia kapwuriamwei kan?
17 Kitail sohte kak wehwehki ni unsek sapwellimen Siohwa wiewia kapwuriamwei kan mendahki ma kitail pahn mour kohkohlahte. (Sohp 42:2, 3; Eklesiasdes 3:11) Ihme kahrehda, atail kaping kan ong Koht sohte pahn kak uhdi. Nan Kataman wet, kitail pahn kak kasalehda atail kalahngan ong sapwellimen Siohwa wiewia kapwuriamwei kan ni atail pahn nantiong en kalaudehla atail awa en kalohk kan.
[Kakon nan pali 5]
Ke Kak Iang Auxiliary Pioneer Ni Ahmw Pahn Doadoahngki Ehu Koasoandi Sang Koasoandi Pwukat?
March Su M* Tu* W* Th F Sa Month Total
Ehu Ehu Rahn 2 1 1 1 1 1 5 51
Rahn Riau 0 5 0 5 0 0 0 50
Imwin Wihk kan 5 0 0 0 0 0 8 52
Imwin Wihk kan oh Rahn Riau
Sang Ni Ehd lel Ni Elem 2 0 0 2 0 2 6 50
April Su M Tu W Th* F* Sa Month Total
Ehu Ehu Rahn 2 1 1 1 1 1 5 50
Rahn Riau 0 0 0 0 5 5 0 50
Imwin Wihk kan 5 0 0 0 0 0 8 52
Imwin Wihk kan oh Rahn Riau
Sang Ni Ehd lel Ni Elem 2 0 0 2 0 2 6 50
May Su* M* Tu W Th F Sa* Month Total
Ehu Ehu Rahn 2 1 1 1 1 1 4 51
Rahn Riau 0 5 0 0 0 0 5 50
Imwin Wihk kan 3 0 0 0 0 0 7 50
Imwin Wihk kan oh Rahn Riau
Sang Ni Ehd lel Ni Elem 2 0 0 2 0 2 5 51
Rahn Limau Nan Sounpwongo