“Kalohki Sapwellimen Koht Mahsen Unsek”
1 Ni ahnsou me ke kin ale mehkot mwahu, ke soh kin kasalehda ahmw kalahngan sang ahmw lokaia oh ahmw wiewia kan? Uhdahn! Menlau tehk kanahieng iaduwen Pohl mwekidki limpoak oh kadek me Siohwa kin kasalehong aramas: Pohl eri mahsanih: “Eri, kitail kapingkalahngankihong Koht sapwellime kisakis me soh pweipwei”! Dahme kin wia kisehn “kisakis me soh pweipwei” wet? “Sapwellimen Koht kalahngan oh kadek” me E kin kasalehong kitail kin kisehn kisakis wet, oh E kadarodo sapwellime Ohl pwehn tomwki dipatail kan oh met wia kasalepen sapwellime limpoak oh kadek ong kitail aramas.—2 Kor. 9:14, 15, New World Translation; Sohn 3:16.
2 Ke lemeleme me sapwellimen Pohl mahsen pwukat kin wia ihte lokaia kan me sohte katapan ong ih? Uhdahn soh! Ni ahl tohto, Pohl kin kasalehda eh kalahngan laud. E kin inenen nsenohki pali ngehn en rie Kristian kan oh e men wia uwen me e kak pwehn sewese irail en ale kamwahuparail sang sapwellimen Koht limpoak oh kadek. Pohl mahsanih duwen irail oko: “Pwehki at poakohng kumwail, se onopadahr se en kihong kumwail, kaidehn Ronamwahuohte me sang rehn Koht, ahpw pil pein at mour. Pwe kumwail wialahr kompoakepaht mehlel!” (1 Deselonika 2:8) Likin dahme Pohl kin wia pwehn sewese irail me wia kisehn mwomwohdiso pwehn ale komourparail, e pil kin nantihong kalohk ni eimah, seiloak mwail kid kid kei nan sahpw oh nansed pwehn rapahki “irail kan me konehng en ale mour soutuk.” (Wiewia 13:48, NW) Sapwellimen Pohl kalahnganki dahme Siohwa wia ong ih kin kamwekid ih en “kalohki Sapwellimen Koht Mahsen unsek.”—Kolose 1:25.
3 Atail kalahnganki soahng koaros me Siohwa wia ong kitail soh kin kamwekid kitail en sewese irail kan me anahne sawas nan atail mwomwohdiso? (Kal. 6:10) Oh e soh pil kin kamwekid kitail en wia uwen me kitail kak nan doadoahk en kalohki Rongamwahu en Wehio nan atail wasahn kalohk pwon?—Madiu 24:14.
4 Ahnsou Mwahu Pwehn Kasalehda Atail Kalahngan: Ehu ehu sounpahr, ahnsoun Katamanpen Kamatalahn Krais, kitail ahneki ahnsou mwahu pwehn kasalehda atail kalahnganki dahme Siohwa oh Sises wia ong kitail. Katamano sohte kin wia kataman en wiewia sohte katepe de mihding mwahl ehu. Sises mahsanih: “Kumwail wia met ong ni katamanpei.” (Luk 22:19) Katamanpen Kamatalahn Krais kin wia ahnsou ehu me kin kahrehong kitail en medemedewe soangen aramas dah Sises. E kin wia ahnsou me kitail pahn pohnese me e momour rahnwet, oh kin wiewia sapwellime doadoahk en nanmwarki nanleng, ni e aleier manaman me Siohwa ketikihong ih pwe e lelepek lao lel e pwoula oh meirongki sapwellime mour. Ni atail iang towehda Katamanpen Kamatalahn Krais, e kin kihong kitail ahnsou mwahu en kasalehda me kitail uhpahiong sapwellime kaunda oh e kin kaweid irair kan oh wiewia kan en mwomwohdiso en Kristian. (Kolose 1:17-20) E pahn konehng me sapwellimen Koht aramas akan koaros pahn iang towehda Katamanpen Kamatalahn Krais. Pahr wet, Kataman pahn wiawi mwurin kihrlahn ketipin Ni Epeng, March 28, 2002.
5 Pwehki koaros nantihong luhke oh sewese aramas en iang towehda Kataman en pahr me ahpwtehn nek, Guam Branch perenki ripohtki me kekeirada kapw wiawi oh aramas 6,041 iang towehda Kataman en pahr me ahpwtehn nek. Aramas depe me pahn iang towehda Kataman en pahr wet? Ma kitail “nannanti oh doadoahk laud,” kitail kak sewese aramas tohto en iang towehda Katamano.—1 Tim. 4:10.
6 Likin atail iang towehda Katamanpen Kamatalahn Krais, mwein kitail kak pil kalaudehla atail ahnsoun kalohk. Brother oh sister tohto pil pahn kak Auxiliary Pioneer nan sounpwong kan en March, April oh May koaros. . . de sounpwong ehu de riau sang sounpwong siluhwo. Ke kak koasoanehdi ahmw koasoandi kan pwehn Auxiliary Pioneer nan pahr wet? Ma kitail pahn Auxiliary Pioneer, e pahn wia ahl mwahu en kasalehda atail kalahnganki sapwellimen Koht kisakis limpoak me E wia ni E kadarodo sapwellime Ohl pwehn matkinkitailla. Ke kak kamehlele me Siohwa pahn kapaiada ahmw doadoahk, nin duwen ekspiriens pwukat kin kasalehda.
7 Emen sister me kin doadoahk en mwohni (full-time) ntingihdi duwen ah ekpiriens ni e iang doadoahk en Auxiliary Pioneer nan March 2001: “Atail Doadoahk Ong Wehio en February 2001 kangoange koaros me kak koasoanehdi irair kan nan arail mour en Auxiliary Pioneer sounpwong me Kataman pahn wiawi de sounpwong mwohn oh mwurin Katamano. Pwehki sounpwong en March mie Rahn Kaunop limau, met mwahu ong ahi koasoandi. Eri, I kapedolong nei doaropwe en Auxiliary Pioneer.” Nin tepio, e wiahda ah mehn akadei en tepida onop Paipel. E pweida? Ei, e tepida onop en Paipel nan kalimeisek riau en awa en kalohk nan sounpwongo! Ia ah pepehm duwen dahme wiawi nan sounpwongo? “Kitail kak ahneki kapai kaselel tohto ma kitail nantihong sewese meteikan.”
8 Kamwahu dah kan re kak ale ma tohnpeneinei koaros kin Auxiliary Pioneer oh sawaspene kalohk? Ehu peneinei en pahmen wia met nan April 2001 oh re diarada me e wia sounpwong ehu me re pahn perenki tamataman. Nohno en peneineio koasoia: “Kiht koaros ahneki lamalam en pweida mwahu ehu ehu rahn pwehki se miniminpene oh sawaspene nan doadoahk en kalohk! Se kin perenki kohpene duwehte ahnsoun mwengehn soutik oh koasoia duwen dahme wiawi nan kalohk.” Emen pwutak en peneineio koasoia: “I perenki iang pahpa nan kalohk erein wihko, pwehki I ese me pahpa kin doadoahk en mwohni ni wihk teiko.” Pahpa en peneineio koasoia: “Nin duwen tapwin peneinei, I kin inenen peren ni ahi kin medemedewe me kiht koaros wia miniminpene nan doadoahk en kalohk oh doadoahk wet kin keieu kesempwal nan atail ahnsou.” Tohn ahmw peneinei koaros kak iang doadoahk en Auxiliary Pioneer nan ehu sounpwong? Dahme kumwail koaros soh mwohndipene oh koasoiapene duwen ire wet oh kilang ma kumwail koaros kak Auxiliary Pioneer nan March, April de May?
9 Kitail Kak Wia Uwen Me Kitail Kak Nan March 2002? Nan Atail Doadoahk Ong Wehio en March 2000, oaralap en insert en sounpwongo wia peidek wet: “Kitail Kak Wia Uwen Me Kitail Kak Nan April 2000?” Iaduwen sounkalohk kan mwekidki kangoang wet? Nan Micronesia, kekeirada kapw wiawi pwe sounkalohk tohto iang doadoahk en Auxiliary Pioneer sounpwongo. Ke tamataman peren me kumwail koaros nan ahmw mwomwohdiso ahneki ni ahnsou me sounkalohk koaros nan ahmw mwomwohdiso kalaudehla arail ahnsoun kalohk nan sounpwong en April 2000? Kitail kak wia nan sounpwong en March 2002 duwehte dahme kitail wia nan March 2000? Ma kitail nannanti, kitail kak wia uwen me kitail kak nan March 2002. Dahme kahrehda March kin wia sounpwong mwahu en Auxiliary Pioneer?
10 Mie kahrepe riau me March kin wia sounpwong me pahn tohrohr. Keieu, Katamano pahn wiawi ni imwin March, kahrehda met pahn kihong kitail ahnsou mwahu (pali laud en sounpwong en March) en luhke aramas pwehn iang towehda Kataman. Kahrepe keriau: March 2002 mie Rahn Kaunop limau oh Rahn Sarawi limau, met pahn sewese Auxiliary Pioneer kan me kin doadoahk en mwohni de iang sukuhl en wiahda arail awahn kalohk. Dahme ke soh mwohndi ahnsou wet oh koasoanehdi koasoandi ehu me mwahu ong uhk ni ahmw doadoahngki kalender ni pali 6? Mwein e pahn mengei en iang Auxiliary Pioneer—mengei sang dahme ke lemeleme nin tepio. Karasepe ehu, ma ke koasoanehdi pwehn kalohk awa 8 Rahn Kaunop koaros oh pil Rahn Sarawi koaros, me wehwehki me ihte awa 10 luhwe me ke pahn anahne koasoanehdi ong kalohk pwehn lel awa 50.
11 Dahme elder kan kak wia pwehn sewese koaros nan mwomwohdiso en “kalohki Sapwellimen Koht Mahsen unsek”? Elder kan kak kangoang sounkalohk kan sang arail padahk kan oh pil arail pein koasoi ong sounkalohk kan. Irail brother kan me kin wia Pwuhk Study en Mwomwohdiso oh iangahki irail brother kan me kin sewese brother pwukat kak koasoi ong emen emen nan arail Pwuhk Study oh kihda arail sawas. Ma re kihda kangoang kadek kan, mehnda ma ekeite lokaia kan, oh iangahki kihda iren sawas kan me sounkalohk kan kak doadoahngki nan arail mour—mwein ihte mepwukat me anahn pwehn kangoange sounkalohk kan en Auxiliary Pioneer. (Lepin Padahk 25:11) Sounkalohk tohto pahn kilang me: ma re pahn ekis kawekila arail koasoandi kan, re kak iang pwais kaselel en Auxiliary Pioneer. Nan ekei mwomwohdiso kan, pali laud en elder kan oh ministerial servant kan (de koaros) iangahki arail pwoud kan kin wia mehn kahlemeng mwahu en Auxiliary Pioneer ahnsoun Kataman (March, April, May). Met kin wia mehn kangoang laud ong sounkalohk tohto en pil iang irail. Pwehki soumwahu kan de irair teikan, ekei sounkalohk kan sohte kak Auxiliary Pioneer, ahpw re kak kasalehda arail kalahngan ni arail pahn wia uwen me re kak nan kalohk oh iang sounkalohk teikan nan kalohk.
12 Ma elder kan kin koasoanehdi mwahu koasoandi kan nan sounpwong en March, April oh May, doadoahk en kalohk pahn pweida mwahu. E pahn mwahu ma re pahn koasoanehdi mihding ong tuhpene ong kalohk erein wihk ni soangen kuloak me mwahu ong sounkalohk kan. Ma kak, Sounapwalih en Kalohk pahn koasoanehdi ekei brother koahiek kan me pahn wia mihding pwukat. Brother pwukat anahne kaunopada mwahu pwe mihding pwukat sohte pahn reirei sang minit 10 lel 15, oh soahng pwukat pahn wiawi erein minit 10 lel 15: koasoanehdi pwihn en kalohk, koasoanehdi wasahn kalohk oh kapakap. (Menlau kilang Atail Doadoahk Ong Wehio en September 2001, Kopwahn Peidek.) Elder kan pahn kawehwe ong tohnmwomwohdiso oh pil langada doaropwe ehu me kasalehda kuloak depe mihding ong tuhpene ong kalohk pahn wiawi.
13 E pahn kesempwal me wasahn kalohk me itar pahn kohwong sounkalohk kan. Sounapwalih en Kalohk pahn tuhwong brother me kin koasoanehdi wasahn kalohk pwehn kak kalohk nan wasahn kalohk kan me re sohte kin kalap wia. Brother kan pahn kasalehda kesempwalpen kalohk ni ihmw kan me sohte towe, kalohk nanial kan oh kalohk ni sidohwa kan oh pil kalohk ni soutik kan. Ma konehng, ekei sounkalohk kan kak wia kalohk ni arail doadoahngki telephone.
14 Sewese Irail en Pwurehng Iang Kalohk: Mie ekei nan ahmw mwomwohdiso me solahr kin iang kalohki Rongamwahu? Irail pwukat kin kisehnte mwomwohdiso eri re anahne sawas. (Mel. 119:176) Pwehki imwin koasoandi suwed wet kerendohr oh koasoandi kapw kereniongehr pahn pweida nan sampah, kitail ahneki kahrepe mwahu en nantihong sewese irail kan me solahr kin iang kalohk. (Rom 13:11, 12) Ehu ehu pahr, aramas kid kid kei nan sampah kin mwekidki sawas me kohwong irail oh re pwurehng iang kalohk. Dahme kitail kak wia pwehn kahrehong irail en poakohng Siohwa oh likih Ih duwehte re wia ni arail tepin iang padahk mehlel—Ipru 3:12-14.
15 Elder kan pahn koasoiapene iaduwen re kak sewese irail kan me solahr iang kalohk erein pahr akan me ahpwtehn nek. (Madiu 18:12-14) Secretary en mwomwohdiso kak tehk doaropwe kan me adaneki “Publisher Record” ong arail mwomwohdiso oh ntingihdi ihs me solahr kin iang kalohk. Mwurin mwo, elder kan kak nantihong tuhwong aramas pwukat oh sewese irail en pwurehng iang kalohk. Emen elder mwein pahn kohla rehn emen sounkalohk pwe e kin ese ih sang mahs oh re kin kompoakepahnki emen emen oh e pahn kohla reh pwehn sewese ih en pwurehng iang kalohk, de elder kan pahn pekihda rehn sounkalohk teikan en iang sewese aramaso. Mwein elder kan kak pekihda rehn brother de sister me onop rehn aramaso en sewese oh kangoange ih en pwurehng iang kalohk oh e pahn perenki sawas ni anahn wet. Se koapworopworki me aramas tohto me solahr iang kalohk pahn mwekidki sawas pwukat oh pwurehng iang kalohk. Ma re kak pwurehng iang kalohk, e pahn mwahu en sewese irail en pwurehng iang kalohk nan sounpwong en March, April de May!—Menlau kilang Atail Doadoahk Ong Wehio en November 2000, Kopwahn Peidek duwen ire kesempwal kan.
16 Mie Ekei me Pil Kak Kalohk? Siohwa kin ketin kapaiada sapwellime aramas ni E kin ketin “wisikdohng Tehnpas Sarawio dipwisou kesempwal akan sang wehi koaros.” (Akkai 2:7) Ehu ehu pahr irail me kid kid kei tepida iang kalohk nin duwen sounkalohk kan me saikinte papidais. Ihs irail? Nein Sounkadehdehn Siohwa kan—neirail seri kan iangahki irail me kin onop Paipel rehn Sounkadehdehn Siohwa kan oh kekeirada mwahu. Iaduwen kitail pahn ese ma re kak wiahla sounkalohk kan en Rongamwahu?
17 Nein Sounkadehdehn Siohwa kan Seri kan: Seri tohto kin iang arail pahpa oh nohno kan sang ihmw lel ihmw sounpahr tohto, mendahki re saikinte wiahla sounkalohk kan me saikinte papidais. Mwein March pahn wia ahnsou mwahu en sewese irail en tepida iang kalohk. Iaduwen ke pahn ese ma noumw seri kakehr iang kalohk? Pwuhk me oaralap koasoia Organized to Accomplish Our Ministry ni pali 100 koasoia: “Ni ahnsou me seri men kin wia mehn kahlemeng mwahu nin duwen ah tiahk oh wiewia kan oh ahnsou me pein ih kak kasalehda duwen eh pwoson oh kak koasoi ong meteikan duwen Rongamwahu en Wehin Koht, oh mohngiongi pahn kamwekid ih en wia met, e kakehr iang kalohk.” Ma ke lemeleme noumw seri kakehr iang kalohk, ke kak koasoi ong emen elder me kisehn Congregation Service Committee.
18 Irail me Onop Paipel me Kakehr Iang Kalohk: Mwurin emen me onop Paipel sukuhliki loalokong pwung sang Pwuhk Sarawi oh tepidahr iang towehda mihding kan koaros oh wia met erein sounpwong kei, mwein e men wiahla sounkalohk en Wehio. Me ke kin onop rehn aramaso, ke kak medemedewe peidek pwukat: E kin wia kekeirada mwahu nin duwen eh sounpahr oh koahiek? E tepidahr kalohk ong aramas akan me e kin ese oh kin kasalehong irail dahme e kin kamehlele? E kin “pwuhriong nan likoun mour kapw en aramas kapw”? (Kolose 3:10) E kakehr wiahla sounkalohk me saikinte papidais nin duwen dahme pwuhken Our Ministry kasalehda nan pali 97-99? Ma iei, ke kak tuhwong elder kan me wia Congregation Service Committee pwe ren koasoanehdi elder riemen en tuhwong kowe oh aramaso me ke kin onop reh. Ma e kakehr iang kalohk, elder riemen pahn kehsehkin aramaso me e kak tepida iang kalohk.
19 Ke Kak Kalaudehla Ahmw Ahnsoun Kalohk Nan April oh May? April oh May pil kin wia sounpwong tohrohr kan me kitail kak kalaudehla atail ahnsoun kalohk. Sounkalohk tohto me Auxiliary Pioneer nan March mwein kak pil Auxiliary Pioneer nan April oh May. Nan April oh May, kitail kak kihla Watchtower oh Awake! makisihn kan nan kalohk. Aramas akan me kin wadek makisihn pwukat kin ale kamwahu tohto sang dahme re sukuhliki nan makisihn pwukat! Makisihn pwukat kin wia sawas laud nan kekeirada kaselel kan me wiawi nan sampah pwon. Ihme kahrehda, kitail pahn nantihong kihla makisihn tohto erein sounpwong en April oh May. E pahn mwahu en koasoanehdi met pwehn kalaudehla ahmw ahnsoun kalohk nan April oh May.
20 Pwehki kitail men kalaudehla atail ahnsoun kalohk nan sounpwong kohkohdo kan, ke lemeleme ke anahne kalaudehla makisihn kan me ke kin oaht sang mwomwohdiso? Erein pahr en kalohk pwon, kitail kin kihla The Watchtower oh Awake! Rahn Kaunop koaros pwehki ih rahno me Society koasoanehdi ong kihla makisihn. Ahpw, pwehki sounkalohk tohto pahn Auxiliary Pioneer nan sounpwong kohkohdo kan oh kitail pahn kihla makisihn kan erein April oh May, mwein sounkalohk tohto men kalaudehla arail oaht ong makisihn kan en kihla sang nan mwomwohdiso. Ma ke men wia met, menlau mwadang kehsehkin brother me kin wia makisihn kan nan mwomwohdiso me ke men kalaudehla ahmw oaht. E pil pahn mwahu ma brother me kin wia pwuhk kan pahn tehk ma mie itar tract kan me oaralap koasoia Would You Like to Know More About the Bible? nan Kingdom Hall pwe sounkalohk koaros en kak doadoahngki.
21 Sounkalohk tohto kin kalahnganki iren sawas kan me re kin diar nan Atail Doadoahk Ong Wehio pahnangin sawaspen oaralap me koasoia “Dahme Kitail Kak Koasoia Duwen Makisihn kan.” Ke kin doadoahngki padahk kan me ntingdi wasao ong kihla makisihn kan? Dahme kumwail soh doadoahngki ekis ahnsou nan amwail onop en peneinei ong praktis padahk pwukat?
22 Doadoahngki Ahmw Ahnsou Ni Ahl me Keieu Mwahu Nan March, April oh May: Duwehte wahnpoaron Pohl, kitail men kasalehong Siohwa uwen me kitail kalahnganki “sapwellime kisakis me sohte pweipwei” ni atail pahn wia uwen me kitail kak en iang wiewia ngenin kan me brother kan koasoanehdi ong sounpwong en March, April oh May. Iet ekei wiewia kesempwal kan me kitail en iang: (1) iang towehda wiewia me keieu kesempwal nan pahr koaros, iei Katamanpen Kamatalahn Krais me pahn wiawi Ni Epeng, March 28, 2002; (2) sewese irail me solahr iang kalohk en pwurehng ahneki “[arail] limpoak en mahso” (Kaudiahl 2:4; Rom 12:11); (3) sewese neitail seri kan oh aramas me kin onop Paipel rehtail en wiahla sounkalohk kan me saikinte papidais; oh (4) wia uwen me kitail kak en kalaudehla atail ahnsoun kalohk, oh pil Auxiliary Pioneer nan March oh pil sounpwong kan mwurin March.—2 Tim. 4:5.
23 Se kapakapki me kitail koaros pahn wia uwen me kitail kak en kalohki Rongamwahu en Wehin Koht nan March, April oh May, oh met pahn kalaudehla atail kalahnganki soahng koaros me Siohwa ketin wia ong kitail.
[Kaokon nan Pali 6]
See a publication