Mehn Akadei Katapan Ehu ong Pahr en Kalohk Kapw
1. Soangen mehn akadei dahieu kitail men wiahda ong pahr en kalohk kapw?
1 Kitail anahne wiahda mehn akadei kan ma kitail men kekeirda ni pali ngehn. Soangen mehn akadei dah kan ke wiahdahr ong pahr en kalohk kapw? Ehu mehn akadei kaselel iei en wia auxiliary pioneer erein sounpwong ehu de tohtohsang. Pwehki ke anahne wiahda koasoandi mwahu pwehn wia doadoahk kaperen wet, met iei ahnsou mwahu en tepida wiahda koasoandio. Dahme kahrehda kitail men wiahki doadoahk en auxiliary pioneer mehn akadei ehu?
2. Dahme kahrehda kitail men wiahki doadoahk en auxiliary pioneer mehn akadei ehu?
2 Kahrepe kan en Wia Auxiliary Pioneer: En wia auxiliary pioneer kak kahrehiong kitail en “kekeirda” en kaperenda Samatail nanleng sang ni atail kin kalaudehla ahnsoun kalohk. (1 Deselonika 4:1) Ni ahnsou me kitail kin medemedewe duwen soahng koaros me Siohwa ketin wiahdahr ong kitail, mohngiongitail kin kamwakid kitail en padahkiong meteikan duwen ih. (Melkahka 34:1, 2) Siohwa ketin mahsanih oh kalahnganki tounmetei kan me kitail pahn wiahda pwehn kalaudehla atail kalohk. (Ipru 6:10) Atail kin ese me kitail kin kaperenda Siohwa sang ni atail doadoahk laud kak kin kihong kitail peren laud.—1 Kronikel 29:9.
3, 4. Iaduwen kitail kak paiekihda doadoahk en auxiliary pioneer?
3 Pali laud en ahnsou, ma kitail pahn kalapw wia mehkot, e pahn mengei oh kaperen ong kitail en wia. En doadoahngki ahnsou laud ong kalohk pahn sewese kitail en mengeiong koasoi nan doadoahk en kalohk en ihmw lel ihmw. Ke pahn koahiekla en tepida koasoi oh doadoahngki Paipel. Ma ke pahn koasoiong meteikan duwen dahme ke kamehlele, ahmw pwoson pahn kehlailla. Me tohto me sohte kin ahneki ehu Paipel study mahs kin kak tepida ehu study ni ahnsou me re iang doadoahk en auxiliary pioneer.
4 Mwein doadoahk en auxiliary pioneer pil pahn wia mehn kangoang me kitail anahne pwehn pwurehng kakehlailih atail ngoang. Emen brother me kin wia regular pioneer mahs diarada me e kin doadoahngki ahnsou nohk laud ong ah doadoahk, oh e koasoanehdi en wia auxiliary pioneer erein sounpwong ehu. E koasoia: “I pwuriamweikihla me sounpwongo kakehlailih ai pali ngehn! I koasoanehdi en pousehla wia auxiliary pioneer, oh met mweidohng ie en pwurehng wiahla regular pioneer men.”
5. Iaduwen kitail kak powehdi atail pepehm en soh itar?
5 Powehdi Mehn Kerompwa kan: Ekei kin pweiek sang en iang auxiliary pioneer pwehki re lemeleme irail sounkalohk soakoahiek kan. Ma ihme kahrehda ke lemeleme ke sohte kak wia auxiliary pioneer, Siohwa kak sewese uhk duwehte e ketin sewese Seremaia. (Seremaia 1:6-10) Mendahki Moses kin “soakoahiek en pato, oh [lowe] me toutou,” Siohwa ketin doadoahngki ih en kapwaiada Kupwure. (Eksodus 4:10-12) Ma ke pehm me ke sohte itar, peki rehn Siohwa eimah.
6. Iaduwen emen kak wia auxiliary pioneer mendahki mie eh kahpwal en paliwar de eh soupisek?
6 Ke kin pweiek sang iang auxiliary pioneer pwehki kahpwal en paliweromw de ke soupisek? Ma ke soumwahu, ke kak wiahda koasoandi me mwahu ong uhk oh mwein met pahn sewese uhk en kak wia auxiliary pioneer. Ma ke soupisek, mwein ke kan kihsang wiewia kan me sohte nohn kesempwal sang ahmw koasoandi pwehn wia wiewia pwukat nan ehu sounpwong tohrohr. Ekei me kin wia doadoahk en full-time kakehr koasoanehdi en wia auxiliary pioneer sang ni arail kommoal sang arail doadoahk rahn ehu de riau.—Kolose 4:5.
7. Dahme kahrehda e pahn mwahu en kapakap duwen auxiliary pioneer?
7 Iaduwen Ke Pahn Wia: Kapakapki duwen ahmw ineng en wia auxiliary pioneer. Peki rehn Siohwa en kapaiada ahmw nantihong kalaudehla ahmw kalohk. (Rom 12:11, 12) E kak sewese uhk en wiahda pilipil mwahu kan me pid en wiahda ahmw koasoandi. (Seims 1:5) Ma sohte itar ahmw ineng en wia auxiliary pioneer, peki rehn Siohwa sawas pwe ken diarada peren nan doadoahk en kalohk.—Luk 10:1, 17.
8. Iaduwen en doadoahngki Lepin Padahk 15:22 pahn kak sewese uhk en wia auxiliary pioneer?
8 Koasoipene nan peneinei duwen mehn akadei en wia auxiliary pioneer. (Lepin Padahk 15:22) Mwein emen nan peneinei kak wia auxiliary pioneer oh tohnpeneinei teikan kak sewese ih. Koasoiong meteikan nan mwomwohdiso duwen ahmw ineng en wia pioneer, keieu ong irail akan me kak wehwehki ahmw irair kan. Met pahn kalaudehla ahmw ngoangki wia auxiliary pioneer.
9. Mehnia sounpwong kan me pahn mwahu ong uhk en wia auxiliary pioneer?
9 Ni ahmw tehk ahmw koasoandi en kalohk ong pahr en kalohk kapw, iahd me ke lemeleme ke kak wia auxiliary pioneer? Ma ke kin doadoahk full-time de ke kin iang sukuhl, mwein ke men wia auxiliary pioneer nan sounpwong kan me mie kommoal de mie Rahn Kaunop limau de Rahn Sarawi limau. Karasepe, nan September, December, March, oh August, mie imwin wihk limau. Nan sounpwong en May mie Rahn Kaunop limau, oh nan June mie Rahn Sarawi limau. Ma mie ahmw kahpwal en paliwar, medemedewe duwen sounpwong kan me pahn mwahu ong uhk. Mwein ke pil pahn medemedewe duwen en iang doadoahk en pioneer nan ehu sounpwong me sounapwalih en circuit pahn mwemweitih ahmw mwomwohdiso. Erein ah mwemweit, ke pahn ahneki pwais en iang elep en mihding me pahn wiawi ong regular pioneer kan. Pwehki Kataman pahn wiawi ni March 22 nan pahr me pahn kohdo, March, April, oh May pahn wia ahnsou mwahu ong doadoahk en auxiliary pioneer. Mwurin ke pilada ehu sounpwong de sounpwong kan me ke men wia auxiliary pioneer, tepida wiahda koasoandi me pahn kak mweidohng uhk en lel awa me ke anahne wiahda.
10. Dahme ke kak wia ma ke sohte kak wia auxiliary pioneer?
10 Mendahki ma ke lemeleme ke sohte pahn kak wia auxiliary pioneer erein pahr en kalohk kapw, ke kak kolokol ngenen pioneer. Pousehlahte en wia uwen me ke kak nan doadoahk en kalohk, oh kamehlele me Siohwa kin ketin kupwurperenki ahmw kin kihong ih uwen me ke kak. (Kalesia 6:4) Ahneki lamalam pwung, oh kangoange meteikan me kak wia auxiliary pioneer. Mwein ke kak kawekila ahmw koasoandi pwe en iang doadoahk en kalohk ni ehu rahn nan wihk rehn irail akan me wia pioneer.
11. Dahme kahrehda kitail kin ahneki pepehm en karuwaru?
11 Sapwellimen Siohwa aramas akan kin ahneki pepehm en karuwaru. Mie doadoahk me anahne wiawi—kalohki rongamwahu. Mour en aramas akan kin pidada, oh atail ahnsou mwotomwotlahr. (1 Korint 7:29-31) Limpoak ong Koht oh mehn mpatail kan pahn kamwakid kitail en wia uwen me kitail kak nan doadoahk en kalohk. Ma kitail pahn nanti oh wiahda koasoandi mwahu, mwein kitail pahn kak wia auxiliary pioneer nan ehu sounpwong nan pahr en kalohk kapw—oh met uhdahn pahn wia mehn akadei katapan ehu!