Prokram Kapw en Kapokon en Circuit

Siohwa ketin warohng ale lingan. Iaduwen kitail kin kalinganahda Siohwa? Dahme kin kerempwa ekei en kalinganahda Siohwa? Soangen kapai dah kan irail akan me kin kalinganahda Koht kin ale ni ahnsou wet? Prokram en kapokon en circuit ong pahr en kalohk en 2008 pahn kihda pasapengpen peidek pwukat. Oaralap en kapokon wet mahsanih “Wia Mehkoaros ong ni Kalinganpen Koht.” (1 Korint 10:31) Medewehla dahme kitail pahn sukuhliki sang kaweid en pali ngehn tohto me pahn wiawi nan erein rahn riau.

Sounapwalih en district pahn koasoia duwen oaralap pwukat “Dahme Kahrehda Kitail en Kalinganahda Koht?” oh “Wia Mehn Kahlemeng Mwahu sang ni Kapwaiada Sapwellimen Koht Koasoandi kan.” E pahn wia kapahrek ong wehipokon, “Ihs Aramas akan me Kin Kalinganahda Koht?,” oh kaimwiseklahn padahk, “Miniminpene oh Kalinganahda Koht nan Sampah Pwon.” E pil pahn wia Theocratic Ministry Sukuhl. Sounapwalih en circuit pahn koasoia duwen oaralap pwukat “Ahneki Peren en Kasalehda Sapwellimen Koht Lingan,” “Tehk Duwen Anahn akan en Circuit,” oh “En ‘Poadidi Teng nan Padahk Mehlel,’” me poahsoankihda 2 Piter 1:12. Kapatahiong ire pwukat, kitail pil pahn sukuhliki iaduwen “Doadoahk en Pioneer kin kalinganahda Koht.” Mie symposium riau oh keieun symposium me oaralape mahsanih “Kalinganahda Koht ni Soahng Koaros nan Atail Mour” pahn kasawih mouren mahsen kan me dierek nan 1 Korint 10:31. Pil ehu symposium oaralape mahsanih “Wia Doadoahk Sarawi Pwehn Kapinga Siohwa” pahn koasoia duwen soangsoangen ahl kan me pid atail kaudok. E pahn mie kousapahl en Kahn Iroir oh koasoipene en iren rahn ni Rahn Sarawi. E pahn mie ahnsoun Papidais.

Pali laud en aramas akan sohte men pohnese Koht. Me tohto kin medemedewehte duwen ahn aramas pilahn kan oh sohte kin medemedewe duwen sapwellimen Siohwa lingan. (Sohn 5:44) Ahpw kitail kin kamehlele kesempwalpen atail kin doadoahngki ahnsou en medemedewe iaduwen kitail en “Wia Mehkoaros ong ni Kalinganpen Koht.” Koasoanehdi en iang towehda oh paiekihda prokram pwon en kapokon wet.