Mihting Tohrohr Ehu me Pahn Sewese Kitail en Pere Atail Nanpwungmwahu Rehn Koht
1. Ia ehu sawas me Siohwa kin ketikihda pwehn sewese kitail en kapwaiada atail pwukoa en kalohki rongamwahu?
1 Siohwa kin ketikihda padahk kan, mehn kasukuhl kan, oh kangoang kan me kitail anahne pwehn kapwaiada doadoahk me e ketikihong kitail en kalohki rongamwahu. (Mad. 24:14; 2 Tim. 4:17) Atail mihting tohrohr iei ehu ahl me kitail kin alehdi soangen sawas pwukat. Oaralap en prokram kapw ong pahr en kalohk 2010 iei “Pere Omw Nanpwungmwahu Rehn Koht,” me poahsoankihda Rom 8:5 oh Sud 17-19. Mihting tohrohr wet pahn tepida nan wihk en August 31, 2009.
2. (a) Ia duwen atail kak paiekihda prokram en mihting tohrohr wet? (b) Ia duwen mihting tohrohr kan en mahs ar kin sewese iuk nan doadoahk en kalohk?
2 Ia Duwen Atail Kak Paiekihda: Prokram wet pahn kihda kaweid duwen soahng kan me kak kihsang atail ahnsou oh kahrehiong kitail en sohla wia dahme uhdahn kesempwal. Kitail pil pahn sukuhlki ia duwen atail kak pelianda madamadau me kin pwungki soahng kan me sohte konehng, oh dahme kin pidada en ahneki nanpwungmwahu rehn Koht. Mie padahk kan me pahn kasalehda ia duwen emenemen kitail oh ehuehu peneinei kak kakehlailihala atail nanpwungmwahu rehn Koht ni ahnsou me kitail kin lelohng kapwunod kan oh kasongosong laud kan. Prokram wet pahn sewese kitail en pere atail mohngiong, en wia Kristian lelepek oh kehlail kan, oh tamataman kapai kaselel kan me pahn kohwong irail kan me kin pere arail nanpwungmwahu rehn Koht.
3. Iahd amwail mihting tohrohr wet pahn wiawi? Dahme ke anahne wia?
3 Ni ahnsou me ke eseier iahd oh ia wasa mihting tohrohr wet pahn wiawi nan omw wasa, eri ke kak koasoanehdi pwe ken kak iang towehda oh paiekihda padahk kan koaros. Tamataman me Siohwa kin ketin kapaiada irail kan me kin wiahda koasoandi mwahu kan.—Lep. Pad. 21:5.
4. Dahme kitail pahn kak ale nan atail mihting tohrohr me pahn wiawi?
4 Siohwa me ketikihda kisakis kaselel wet. Prokram me ladu lelepek oh loalokong kaunopadahr pahn sewese iuk en kapwaiada omw pwukoa en sounkalohk men. Kitail kin kalahngankihong Siohwa pwehki sapwellime koasoandi kan koaros kin sewese kitail en “kolokol tengeteng koapworopwor me kitail kin kadehdehda.”—Ipru 10:23-25; Seims 1:17.