Pere Omw Lamalam
1. Ia oaralap en mihting tohrohr en rahn riau ong pahr 2013, oh dahme kahrehda oaralap wet wiawihda?
1 Sises ketin kaweidki sapwellime tohnpadahk kan ren poakohng Siohwa sang ni mohngiong unsek, mour unsek, oh lamalam koaros unsek. (Mad. 22:37, 38) Mihting tohrohr kan en pahr wet wiawihda pwehn sewese kakehlaka loalatail. Oaralap en atail mihting tohrohr (district convention) iei ‘Kanahieng Omw Madamadau!’ Oaralap en Mihting tohrohr en rahn ehu ong pahr en kalohk 2013 iei “Pere Kadeikpen Loalomw.” Mihting tohrohr en rahn riau kan me pahn tepida sounpwong kohkohdo pahn kasalehda oaralap “Pere Omw Lamalam,” me poahsoanda sang Madiu 22:37. Mihting tohrohr wet wiawihda pwehn sewese emenemen kitail en kasawih atail lamalam oh kamwahwihala pwe Siohwa en ketin kupwurperenki.
2. Peidek dah kan me kitail pahn rapahki pasapengpe nan mihting tohrohr wet?
2 Dahme Pahn Kohda: Ni atail rongorong padahk kan en mihting tohrohr en rahn riau, kitail en rapahkihda pasapengpen peidek pwukat me kasalehda ire kesempwal kan:
• Ia duwen atail kak soikala alehda ‘lamalam en aramas’?
• Ia duwen atail kak kihsang dahme karotongehla me sohte pwoson kan?
• Soangen madamadau dah me kitail en men ahneki?
• Soangen kamwahu dah kan me doudouloale ni pwung kin kihda?
• Ia duwen atail kak mweidohng Siohwa en ketin kamwahwihala atail lamalam?
• Ia duwen ohl pwopwoud kan, lih pwopwoud kan, pahpa oh nohno kan, oh seri kan arail kak sawas pwe peneinei en peren?
• Ia duwen atail kak kaunopada ong rahn en Siohwa?
• Ia wehwehn atail en kaunopada atail madamadau ong dahme pahn wiawi?
• Soangen kamwahu dah me kohwong irail me kin doadoahngki dahme re sukuhlki?
3. Dahme kahrehda e kesempwal kitail en iang rahn en mihting tohrohr ko pwon, rong kanahieng oh doadoahngki dahme kitail sukuhlki?
3 Sehdan kin men pelianda atail madamadau oh raparapahki ahl akan en kauwehla. (2 Kor. 11:3) Ihme kahrehda kitail en pere oh kaunda atail lamalam kan. Kitail anahne pousehlahte kasalehda kupwuren Krais oh pelianda soahng kan nan sampah wet me kak kauwehla. (1 Kor. 2:16) Eri, wiahda koasoandi kan en iang rahn en mihting tohrohr en rahn riau pwon. Rong kanahieng. Atail doadoahngki ire kan me kohda pahn sewese kitail en kaunopada atail lamalam kan pwe kitail en ngoangki doadoahk en Wehio.—1 Pit. 1:13.