Pere Kadeikpen Loalomw
1. Ia oaralap en mihting tohrohr en rahn ehu en pahr 2013, oh dahme kahrehda oaralap wet wiawihda?
1 Ehuehu rahn kitail kin kilikilang irair kan me kak kauwehla kadeikpen loalatail. Ihme kahrehda “Pere Kadeikpen Loalomw” wia oaralap en Mihting Tohrohr en Rahn Ehu en pahr 2013 me tepida sang September 1, 2012. (1 Tim. 1:19) Oaralap wet wiawihda pwehn sewese emenemen kitail en tehk kanahieng ia duwen atail kin doadoahngki kisakis kaselel wet sang Sounkapikpatail.
2. Peidek kesempwal dahkei pahn pasapengla erein mihting tohrohr wet?
2 Rapahki Ire Pwukat: Mihting tohrohr wet pahn sapengala peidek kesempwal isuh me pid kadeikpen loalen emen:
• Dahme kin keper ong kadeikpen loalatail?
• Ia duwen atail kak kaiahnehda kadeikpen loalatail?
• Ia duwen atail kak liksang pwukoahki mehlahn aramas akan?
• Ia duwen atail medemedewe oh mwekidki kaweid kan en Paipel eh kin kasalehda duwen kitail?
• Dahme kitail en wia pwe kitail en dehr kauwehla meteikan me pid soahng kan me emenemen en doadoahngki kadeikpen loale pwehn wiahda pilipil kan?
• Me pwulopwul kan, ia duwen amwail kak kolokol amwail lelepek ni amwail pahn lelohng kasongosong kan?
• Kapai dah kan kin kohwong irail me kin idawehn kadeikpen loalarail me kaiahnda?
3. Ia duwen atail kak paiekihda mihting tohrohr wet?
3 Sang sapwellimen Siohwa sawas, kitail kak pelianda en Sehdan eh kin nantihong kauwehla kadeikpen loalatail. Sang sapwellime Mahsen oh pwihn, Samatail nanleng kin ketin mahsanihong kitail: “Iet ahlo, kumwail idawehn.” (Ais. 30:21) Mihting tohrohr wet iei ehu ahl me Siohwa ketikihda soangen kaweid wet. Eri wiahda koasoandi kan pwe ken kak rong padahk kan koaros en mihting tohrohr wet. Rong kanahieng oh medemedewe ia duwen omw pahn doadoahngki ong pein kowe ire ko. Koasoiapene ire ko nin duwen peneinei ehu. Atail doadoahngki ire kan me kitail alehdi pahn kakehlaka kitail en doulahte kolokol ‘kapehditail kan en kin mwakelekel,’ de kadeikpen loalatail en kin mwahu. E pahn pil sewese kitail en dehr mweidohng me kaperen kan en ahn Sehdan sampah en kasonge kitail en wia mehkot me pahn kauwehla atail nanpwungmwahu rehn Siohwa.—1 Pit. 3:16.