Rong Ngihl me Kohsang nan Loalomw

“Mehn liki kan sohte iang ahneki Kosonnedo [en Koht]; eri soh, ni ar kin kapwaiada audepen Kosonnedo sang ni pein nsenarail.”​—ROM 2:14.

1, 2. (a) Iaduwen me tohto ar sewese meteikan pwehki arail nsenohkin irail? (b) Ia ekei men karasepe kan me dierek nan Paipel?

MEDEK laud ehu lelong mwahnakapw emen me sounpar rieisek ih eri pwupwudi nan wasa me train kan kin tangatang ie. Mie emen ohl me kilangada oh mwadangete kadarala pehn nah serepeino oh lusdihla. E waikasang pwutako nan wasahn tangatang en traino oh perehla lao traino uhdi. Ekei me iang kilang dahme wiawi pahn nda me ohlo uhdahn eimah, ahpw ohlo nda: “Ke anahne wia dahme pwung. I wia met sang ni kadek. Kaidehn pwe en ndandla de aramas en kapinga ie.”

² Mwein ke ese emen me tounmeteikihla eh mour pwehn sewese meteikan. Me tohto kasalehda met nan Mahwen Keriau en Sampah sang ni arail ekihla tohnsahpw teikan. Pil tamanda dahme wiawi ni ahnsou me wahnpoaron Pohl oh irail meh 275 ko me wararail sohp seradahng pohn takai kan nan Malda limwahn Sisili. Tohn wasao kohdohn sewese mehn liki pwukat oh re me “inenen kadek.” (Wiewia 27:27–28:2) A iaduwen kisin serepein en Israelo, e sou kasalehda kadek ni eh nsenohki mehlel mour en emen mehn Siria ko me selidi mendahki eh mour sohte mi nan irair keper? (2 Nan. 5:1-4) Oh pil song medewehla karasaras en ohlen Sameria kadeko. Samworo men oh mehn Lipai men koaros keididihla nanialohte oh douluhllahsang kisehrail mehn Suhso me kereniong mehla pohn ahlo, ahpw iet emen ohlen Sameria me uhd kohla oh sewesehda ohlo. Karasaras wet kin kamwakid aramas tohto erein sounpar epwiki kei mendahki re kohsang soangsoangen mour kei.​—Luk 10:29-37.

3, 4. Iaduwen pepehm kehlail wet en men sewese meteikan kin pid padahk me aramas kohsang mahn?

³ Mehlel, kitail mihmi nan ahnsou “apwal ekei,” me tohto kin “lemei” oh “kailongki me mwahu.” (2 Tim. 3:1-3) Mendahki met, kitail sou kin kilang wiewia mwahu tohto, me ele pein kitail kin paiekihda? Soangen pepehm wet en men sewese meteikan, mehnda ma e tounmetei laud, met kin wiawi pak tohto kahrehong ekei aramas nda me pepehm wet wia “ahnepen aramas men.”

⁴ Soangen pepehm wet en men sewese meteikan sohte lipilipil ia uwen laud en sawas me ke pahn wia, kin sansalda sang soangen aramas koaros oh tiahk koaros oh met kin uhwongada padahk me aramas kohsang mahn. Francis S. Collins, emen toahkte me samanih oaritik kan en wiawihdahn paliwar en aramas nda: “Pepehm de ineng wet en men sewese meteikan kin uhwongada mehlel padahk me aramas kohsang rehn mahn akan. . . . E sohte kak pein wiawi.” E pil pousehlahte nda: “Ekei aramas pil kin tounmeteikihla pein irail pwehn sewese meteikan mendahki re sehse ihs irail. . . . Met pil kin wia mehn kadehde me padahk me aramas kohsang rehn mahn sohte pwung.”

“Ngilen Kadeikpen Loalatail”

5. Dahme pil kin pak tohto sansalda rehn aramas kan?

⁵ Toahkteohte me adaneki Collins pil kosoaia ehu ire me pid pepehm kehlail wet en men sewese meteikan: “Ngilen kadeikpen loalatail kin padahkiong kitail en sewese meteikan mehnda ma kitail sohte pahn ale pweinen atail sawaso.”a Ahn toahkte menet koasoia duwen “kadeikpen loalatail” kin katamankin kitail dahme wahnpoaron Pohl kasalehda: “Mehn liki kan sohte iang ahneki Kosonnedo; eri soh, ni ar kin kapwaiada audepen Kosonnedo sang ni pein nsenarail, met wehwehki me re kasalehdahr me re ese dahme re uhdahn pahn wia de sohte wia, mehnda ma re sohte iang ahneki Kosonned en Moseso. Arail wiewia kan kin kasalehda me audepen Kosonnedo ntingdier nan mohngiongirail. Kadeikpen loalarail kin kasalehda duwen mehlel en met, pwehki ekei ahnsou arail madamadau kin kedipairailda oh ekei ahnsou e kin doareirailla.”​—Rom 2:14, 15.

6. Dahme kahrehda aramas koaros pwukoahki arail mour mwohn silangin atail Sounkapikadao?

⁶ Nan nah kisinlikou ong mehn Rom akan, Pohl kasalehda me aramas akan pwukoahki arail mour ong Koht oh met wia mehn kadehde me mie Koht oh e kin ketin kasalehda sapwellime irair kan. Met kin sansalda “sang ni ahnsou me Koht kapikada sampah.” (Rom 1:18-20; Mel. 19:1-4) Mehlel, aramas tohto kin pohnsehsehla Sounkapikparail oh uhd momourki elen mour suwed ehu. Ahpw kupwuren Koht iei aramas koaros en pohnese sapwellime pwung oh koluhkihla diparail akan. (Rom 1:22–2:6) Pwehki Koht ketikihong mehn Suhs akan sapwellime kosonned kan ni eh ketin doadoahngki Moses—sohte kahrepen arail pahn nda me re sehse ih. Pil irail akan me sohte iang naineki ‘sapwellimen Koht mahsen’ anahne en pohnese me mie Koht.​—Rom 2:8-13; 3:2.

7, 8. Ia uwen laud pepehm ong dahme pwung kin sansalda, oh dahme met kin kasalehda?

⁷ Kahrepe keieu konehng kitail koaros en pohnese Koht oh peikiong iei pwehki atail kehl en ese dahme mwahu oh dahme sapwung. Atail pepehm en ese dahme mwahu oh sapwung iei kasalepen me mie kadeikpen loalatail. Song medewehla met: Mie kisin seri kei me awiawih nan lain pwehn iang likahs. A emen rehn seri ko kohla mwowe oh kotehla irail kan me awiawih. Irail me tohto eri nda ‘E sohte mwahu!’ Nna met pein idek rehmw, ‘Dahme kahrehda lel kisin seri kan pil kin mwadangete kehn de ese me dahme serio wia sohte pwung?’ Met kin kasalehda me irail pil ahneki pepehm wet en ese dahme mwahu oh dahme sapwung. Pohl ntingihdi: “Mehn liki kan sohte iang ahneki Kosonnedo; eri soh, ni ar kin kapwaiada audepen Kosonnedo sang ni pein nsenarail.” Met wehwehki me aramas kin doadoahngki kehl en nan loalarail pwehn mwekid pahrekiong dahme kitail kin wadek nan sapwellimen Koht kosonned kan.

⁸ Pepehm de irair wet kin sansalda nan sahpw tohto. Emen sounpadahk sang Cambridge kasawihda me mie soangen pepehm de irair ehute me mih rehn aramas koaros sohte lipilipil ma re kohsang nan Papilon, Isip, oh Krihk de mehn Australia de pil mehn America ahpw “koaros kin ahneki pepehm en sapwungki uhwong kan, mwersuwed kan, likamw oh pil ni ahnsowohte koaros kin pwungki me mwahu en kasalehda kadek ong me mah, me pwulopwul oh pil irail me luwet akan.” Pil toahkte me adaneki Collins ntingihdi: “Pepehm en ese dahme pwung oh dahme sapwung kin sansalda rehn aramas koaros.” Met sou kin kataman kin uhk Rom 2:14?

Kadeikpen Loalomw —Iaduwen E Kin Doadoahk?

9. Dahkot kadeikpen loalatail, oh iaduwen e kak sewese kitail mwohn atail wia mehkot?

⁹ Paipel kin kasalehda me kadeikpen loalatail iei mehkot me mih rehtail me kin kasawih atail wiewia kan. E rasehng ngihl ehu sang nan loalatail me kin ndaiong kitail dahme pwung oh dahme sapwung. Pohl koasoia duwen ngihl wet: “Ngehn sarawi kin kakaun kapehdiet.” (Rom 9:1) Karasepe, ngihl wet kin kak padahkihong uhk mwowe ni ahmw pahn medemedewe ma e konehng ke en wia mehkot me pahn pid ahmw wiewia mwahu kan. Kadeikpen loalatail kin kak sewese iuk en koasoanehdi wiewia ehu mwowe oh kasalehda ia pahn ahmw pepehm ma ke wiahda met.

10. Kadeikpen loalatail kin kalapw pwarada ni soangen ahnsou dah?

¹⁰ Pali laud en ahnsou, kadeikpen loalatail kin doadoahk mwurin ahmw wiahda mehkot. Ni ahnsou me e kin rukuruk sang Nanmwarki Sohl, Depit ahneki ahnsou mwahu en wia mehkot sohte mwahu ong sapwellimen Koht nanmwarki pilipilda menet, oh e wia dahme suwed. Mwurin mwo, “nan kapehd en Depit ahpw soansuwedkihda.” (1 Sam. 24:1-5; Mel. 32:3, 5) Lepin lokaia wet “kadeikpen loalatail” sohte doadoahk nan ire pwukat; ahpw iei met me Depit pehmada​—mwekid en kadeikpen loale. Kitail koaros iangehr pehm ni ahnsou me mehkot kin kauwe kadeikpen loalatail. Kitail wia mehkot, oh mwuri met kin kapwunode kitail. Ekei irail kan me sohte pwain daksis, kadeikpen loalarail kin kapwunode irail kahrehda mwuhr re pwainla arail pweipwand kan. Ekei wehkada arail dipen kamwahlih arail pwoud akan. (Ipru 13:4) Ahpw, ni emen eh kin mwekid pahrekiong kadeikpen loale, e kak imwikihla nsenamwahu oh popohl.

11. Dahme kahrehda e kakete keper en ihte ‘mweidohng kadeikpen loalomw en kahluwa iuk’? Kihda karasepe.

¹¹ Eri met wehwehki me e itar en ihte ‘mweidohng kadeikpen loalatail en kaweidih kitail’? E mwahu en rong kadeikpen loalatail, ahpw e pil kakete pitihkitaildi. Ei, ngihl me kohsang loalatail kakete pitihkitaildi. Tehk karasepe wet. Paipel padahkihong kitail duwen Stipen, emen tohnpadahk en Krais me “Koht ketin kapaiahda kowahlap, ih me pil diren manaman.” Ekei mehn Suhs akan kesehieila Stipen likin Serusalem oh kate ih lao e mehla. Sohl (me mwuhr wiahla wahnpoaron Pohl) kesikesihnen wasao oh ‘pwungki kamakamalahn’ Stipen. Ong mehn Suhs ko irail lemeleme me e pwung dahme irail wiewia kahrehda e sohte kauwe kadeikpen loalarail. Mwein ele ih pil duwen ahn Sohl madamadau, pwehki mwurin mwo e “nannantihongete eh men kemehla tohnpadahk en Kaun-o.” E sansal me kadeikpen loale sohte kin doadoahk ni pwung.​—Wiewia 6:8; 7:57–8:1; 9:1.

12. Ia ehu ahl me ele kin kamwakid kadeikpen loalatail?

¹² Dahme kakete kamwakid kadeikpen loalen Sohl? Ehu iei mwein irail akan me e kin kalapw werekiong. Tohto rehtail iangehr lokaia nan telephone ong emen me lokaia duwehte ngoaren eh pahpao. Menet ele sohsohki ekis ngoaren eh pahpao, oh met kakete kohsang eh kalapw rongorong mwomwen eh pahpa kin koasoakoasoi me kahrehong ngoare en duwehla. Duwehte met, Sohl mwein ele duwehla ienge mehn Suhs ako me kin kailongki Sises oh uhwong sapwellime padahk kan pwehki e kin kalapw werekiong irail. (Sohn 11:47-50; 18:14; Wiewia 5:27, 28, 33) Ei, iengen Sohl akan ele uhdahn kamwakidada ngilen kadeikpen loale.

13. Iaduwen irair en wasa me emen kin mihmi ie kin kamwakid kadeikpen loale?

¹³ Kadeikpen loalatail kak pil pid soangen irair en wasa de tiahk me kitail mih loale, duwehtehte mwomwen ngoaren emen kin kohsang wasa me e mihmi ie. (Mad. 26:73) Met pil ele wiawiong mehn Asiria kan en mahs. Irail kin ndand nan palien mahwen, oh kilel pohn takai kan kin kasalehda arail kin kaloke aramas akan me kin sensel rehrail. (Nah. 2:11, 12; 3:1) Irail mehn Ninipe kan ni mwehin Sona wadawadki aramas kei me sohte ese “wekpeseng en palimaun en pehrail sang palimeing.” Met wehwehki me irail sohte ese wekpeseng en dahme mwahu oh dahme suwed mwohn silangin Koht. Song medewehla ia uwen irair en wasao kakete kamwakid kadeikpen loalen emen me tikida nan Ninipe! (Sona 3:4, 5; 4:11, NW) Duwehte rahnwet, kadeikpen loalen emen kin pidada laud mwomwen wiewiahn irail akan me kin kapilpene ih.

Kamwahwihala Ngihl me Kohsang Loalomw

14. Iaduwen kadeikpen loalatail kin pidada dahme Senesis 1:27 mahsanih?

¹⁴ Siohwa ketikihong Adam oh Ihp kisakis en ahneki kadeikpen loale, oh kitail sohsohki met sang rehra. Senesis 1:27 padahkihong kitail me aramas wiawihda rasehng Koht. Met sohte wehwehki me kitail ahneki soangen kahlap de paliwar en Koht, pwe ih ngehn ehu ah kitail uduk. Kitail wiawihda rasehng Koht me wehwehki kitail ahneki sapwellime irair akan, iangahki pepehm ong wiewia kan oh kadeikpen loalatail me kin doadoahk. Ire mehlel wet kasalehong kitail me mie ehu ahl me kitail kak kakehlailihala kadeikpen loalatail, pwehn kak doadoahk mwahu. Met iei, en esehla laud duwen Sounkapikadao, oh nantihong en karanihala ih.

15. Ni ahl dahieu me kitail kak paiekihda ma kitail esehla Samatailo?

¹⁵ Paipel kin kasalehda me Siohwa kin ketin wia Samatail koaros ni ahl ehu. (Ais. 64:8) Kristian lelepek kan, mehnda ma arail koapworopwor iei en kohla nanleng de mour pohn paradais sampah, re kak likwerihki Koht Samarail. (Mad. 6:9) Kitail en kakairada ineng en karanihala Samatail oh alehda sapwellime madamadau kan oh koasoandi kan. (Seims 4:8) Tohto me sohte kin men wia met. Irail duwehte mehn Suhs kan me Sises mahsanihong: “Kumwail sohte mwahn rong kapitie, oh sohte mwahn kilang silangi, oh sapwellime mahsen kan sohte kin ketiket loalamwail.” (Sohn 5:37, 38) Kitail sohte uhdahn rong kapitiehn Koht, ahpw kitail kak ahneki sapwellime mahsen nan loalatail oh duwehla ih oh ahneki sapwellime pepehm kan.

16. Dahme koasoipen Sosep kin kasalehong kitail duwen kaiahnehda oh kapwaiada kadeikpen loalatail?

¹⁶ Poadopoad en Sosep ni ahnsou me eh mihmi nan imwen Podipar kasalehda met. Ahn Podipar pwoud song en wendi rehn Sosep. Mendahki e momour ni ahnsou ehu me Paipel saikinte ntingdi oh Kosonned Eisek pil saikinte wiawihda, Sosep mwadangete nda: “Ia duwen ei pahn wiahda soangen sapwung laud wet, oh dipikihda mwohn Koht?” (Sen. 39:9) E sohte nda met ihte pwehn kaperenda eh peneinei, irail mihmi dohsang wasa me eh mihmi ie. E uhdahn men kaperenda Koht. Sosep wehwehki sapwellimen Koht koasoandi en pwopwoud​—emen ohl ong emen lih, ira riemeno pahn “wiahla ehu.” Oh mwein ele e rong duwen ahn Apimelek a pepehm ahnsou me eh esehda me Repeka pwopwoud​—en ale ahn emen eh pwoud pahn sapwung, oh wahdo suwed ong nah aramas akan. Oh, Siohwa ketin kapaiada mwekid wet, ni eh kasalehda sapwellime pepehm me pid duwen kamwahl. Ni en Sosep ese duwen soahng pwukat koaros e kakehlailihala kadeikpen loale, kamwakid ih en dehr pwupwudiong dipen nenek.​—Sen. 2:24; 12:17-19; 20:1-18; 26:7-14.

17. Me pid duwen atail pahn duwehla Samatail, dahme kahrehda atail ahnsou mwahu sang ni mwehin Sosep?

¹⁷ Ei, kitail mihmi nan ahnsou ehu me mwahu sang mahs. Kitail naineki Paipel unsek me kitail pil sukuhliki en esehla madamadau en Samatail oh sapwellime pepehm kan, iangahki dahme e kin ketin kupwurki oh dahme e sohte kin kupwurki. Uwen laud en ahmw tehk kanaiehng iren Paipel kan, pahn kahrehong uhk en karanihala Koht oh duwehla ih. Ni atail wia met, kadeikpen loalatail pahn ekis ekis duwehla madamadau en Samatail. E pahn pil kin pahrekiong kupwure kan.​—Ep. 5:1-5.

18. Mendahki dahme wiawi mahs, dahme kitail kak wia pwehn kamwahwihala atail likih kadeikpen loalatail?

¹⁸ Iaduwen wasa me kitail mih ie kak kamwakid kadeikpen loalatail? Ele kadeikpen loalatail kin wiawihda sang madamadau oh wiewiahn atail peneinei kan de sangete wasa me kitail tikida ie. Eri, met kakete irehdihsang kadeikpen loalatail doadoahk ni ahl me pwung. Kadeikpen loalatail kin mwomwen koasoi ni mwomwen “ngilen” irail akan me kapilkitailpene. Mehlel kitail sohte kak wekidala dahme wiawi mahs, ahpw, kitail kak koasoanehdi en pilada irail kan me kitail pahn werekiong oh soangen irair dah kan me pahn kahluwa kadeikpen loalatail ni ahl me mwahu. Ehu kahk me kesempwal iei en kaukaule werekiong irail Kristian lelepek kan me kin song en alasang Samatail. Nan mihding en mwomwohdiso kan, werekiong irail mwohn e tepida oh mwurin e nek, kin wia ahnsou mwahu kei. Kitail kak tamanda de kileledi madamadau oh wiewiahn riatail Kristian kan me poahsoankihda Paipel, iangahki arail kin mwadang en rong ngilen kadeikpen loalarail kan me poahsoanda sang mahsen en koht oh sapwellime ahl akan. Ekis ekis, met kak sewese kitail en kapahrekiong kadeikpen loalatail ong mouren kaweid kan en Paipel, pwehn kakerenih kitaillahng Koht. Ni ahnsou me kitail kin kapahrekiong ngihl me kin kohsang nan loalatail ong mahsen kan en Samatail oh mweidohng werek mwahu en riatail Kristian kan nan atail mour, kitail pahn kak likih kadeikpen loalatail kan oh kitail pahn ahnla rong dahme e kin padahkihong kitail.​—Ais. 30:21.

19. Soangen ire dah kei me pid kadeikpen loalatail me konehng kitail en tehkpene?

¹⁹ Ekei kin apwaliki rong kadeikpen loalarail kan. Artikel en mwuhr pahn koasoia duwen ekei irair akan me Kristian akan kin lelong. Ni atail pahn kasawih ire pwukat, kitail kak wehwehkihla mwahu iaduwen kadeikpen loalatail kin doadoahk, dahme kahrehda kadeikpen loalatail kakete wekpeseng, oh iaduwen atail pahn kak kalaudehla atail kin kapwaiada ngilen kadeikpen loalatail kan.​—Ipru 6:11, 12.

[Footnote]

Dahme Ke Sukuhliki?

• Dahme kahrehda pepehm en ese dahme pwung oh sapwung de kadeikpen loalatail, kin sansalda rehn aramas koaros?

• Dahme kahrehda kitail anahne kanahieng en dehr ihte mweidohng kadeikpen loalatail en kahluwa kitail?

• Soangen ahl dah kei kitail kak wia pwehn kamwahwihala ngihl me kohsang nan loalatail?

[Kawehwehpen kilel kan nan ehu ehu pali 21]

Kadeikpen loalen Depit pil kin soansuwedda . . . .

ahpw kaidehn met me wiawihong Sohl sang Tarsus

[Kawehwehpen kilel kan nan ehu ehu pali 24]

Kitail kak kaiahnehda kadeikpen loalatail