Mahsen en Koht Mwahu ong Padahk
1. Ia oaralap en mihting tohrohr en rahn riau ong pahr en kalohk en 2014 oh peidek dahieu me pahn pasapengla nan prokramo?
1 Siohwa iei sounpadahk me keieu mwahu nanleng oh sampah. (Ais. 30:20, 21) Ahpw, ia duwen Siohwa eh kin ketin padahkih kitail? E ketikihda pwuhk ehu me sikla sang pwuhk koaros—iei sapwellime mahsen, Paipel. Ia duwen atail kak paiekihda padahk sang rehn Koht ni paliwar, madamadau, pepehm oh atail nanpwungmwahu reh? Pasapengpen peidek wet pahn sansalda nan atail mihting tohrohr en rahn riau ong pahr en kalohk en 2014. Oaralap en prokramo iei “Mahsen en Koht Mwahu ong Padahk,” me poahsoankihda 2 Timoty 3:16.
2. Pasapengpen peidek dah kan kasalehda ire kesempwal kan?
2 Tehkada Ire Kesempwal Pwukat: Pasapeng kan ong peidek pwukat pahn kasalehda ire kesempwal kan en prokramo:
• Dahme padahk sang rehn Koht kin wiahiong atail mour? (Ais. 48:17, 18)
• Dahme kitail kak koapworopworki ma kitail nantihong wekidala atail irair akan pwe kitail en kak papahki Siohwa pali laud en atail ahnsou? (Mal. 3:10)
• Dahme kitail anahne wia ni atail kin rong “padahk likamw tohrohr akan”? (Ipru 13:9)
• Ia duwen atail kak kahlemengih ‘mwomwen en Sises eh kin ketikihwei sapwellime padahk’? (Mad. 7:28, 29)
• Dahme kahrehda sounpadahk kan nan mwomwohdiso anahne padahki pein irail? (Rom 2:21)
• Dahme sapwellimen Koht Mahsen kin mwahu ong? (2 Tim. 3:16)
• Ia duwen aramas akan ar kin mwekidki itikekdahn wehi kan? (Ak. 2:6, 7)
• Likilik dahieu me Siohwa sapwellimanki ong kitail? (Ep. 5:1)
• Dahme kahrehda kitail anahne doadoahk laud pwe kitail en kak mihmihte nan sapwellimen Siohwa padahk? (Luk 13:24)
3. Dahme kahrehda e kesempwal kitail en iang towehda oh rong kanahieng prokram wet me kaunopadahr ni ahnsou me konehng?
3 Pohl koasoia duwen ahnsou apwal akan me pahn kasalehda imwin rahn akan ni tepin irelaud 3 en 2 Timoty mwohnte eh ntingihedi mahsen kan me oaralap en prokram wet poahsoankihda. E ntingihedi: “Aramas suwed oh me likamw akan pahn nantihweite sang ni me suwed ong ni me suwedsang; re pahn pitipitihete meteikan, oh pein irail pahn pitida.” (2 Tim. 3:13) Ia uwen eh kesempwal kitail en rong oh kapwaiada padahk mehlel kan sang rehn Koht pwe emen dehr pitihkitaildi! Ihme kahrehda kitail en koasoanehdi iang towehda mihting tohrohr en rahn riau wet oh rong kanahieng prokram me kaunopadahr ni ahnsou me konehng.