‘Kupwuren Koht en Kin Wiawi’
1. Ia oaralap en prokram en mihting tohrohr en rahn ehu en pahr en kalohk 2012? Dahme kahrehda e konehng kitail en tehk duwen oaralap wet?
1 Kitail kapikipikda pwehki kupwuren Siohwa. (Kaud. 4:11) Ihme kahrehda, e pahn apwal en kapwaiada kahrepen atail miehki ma kitail sohte sukuhlki oh kapwaiada kupwuren Koht. Met sohte mengei pwehki kitail kin anahne peiong atail men “kapwaiadahte mehkot me paliwaratail de pein atail lamalam pahn kin nsenki” de en wia “dahme me rotorot akan kin mwahuki wia.” (Ep. 2:3; 1 Pit. 4:3; 2 Pit. 2:10) Ma sohte sawas sang rehn Koht, Tepilo pahn kakete ‘parokkitaildi oh idingohng kitail en peikiong ih.’ (2 Tim. 2:26) Prokram en mihting tohrohr en rahn ehu ong pahr en kalohk 2012, pahn sewese emenemen kitail en kapwaiada kesiluh en pekipek me Sises ketin padahkihong kitail en kapakapki. (Mad. 6:9, 10) Oaralap en mihting tohrohr wet iei “Kupwuromwi en Kin Wiawi.”
2. Soangen peidek dah kan me pahn pasapengla nan prokramo?
2 Peidek kan me Pahn Pasapengla: Ni omw pahn rongorong prokram wet, tehk pasapengpen peidek pwukat: Soahng kesempwal dah kan me kitail pil anahne wia likin rongorongete Mahsen en Koht? Ia duwen atail kak pousehlahte esehla ia kupwuren Koht ong kitail? Dahme kahrehda kitail anahne perenki sewese soangsoangen aramas akan? Ia duwen atail kak diar mour ehu me mie katepe? Me pwulopwul kan, dahme kumwail anahne kasalehiong Siohwa? Soangen keting dah kan me kitail kin ale pwehki atail kin wiewia kupwuren Koht? Dahme kahrehda e wia mehkot karuwaru kitail en kakehlaka oh kangoange meteikan?
3. Ia duwen atail kak paiekihda laud audepen mihting tohrohr en rahn ehu wet?
3 Nantihong ken iang towehda oh rong kanahieng audepen prokramo. Emen wiliepen Pedel de emen sounapwalih me kin seiloak pahn iang padahk. Ke kak koasoiong ih oh eh pwoud, ma e pwopwoud, mwohn de mwurin prokramo. Ni omw pahn pwurala ni imwomwo, ke dehr manokehla dahme ke rong ahpw kousapahlih rehn omw peneinei oh koasoia ia duwen amwail kak kalaudehla amwail en mour pahrekiong kupwuren Koht.—Seims 1:25.
4. Dahme kahrehda e kesempwal kitail en mwohneki wia kupwuren Koht?
4 Ahnsou keren, irail kan me kin wiewia pein arail ineng oh sohte men uhpa kupwuren Siohwa pahn kasohrala. (1 Sohn 2:17) Ihme kahrehda, kitail kin kalahnganki ong Siohwa pwehki e ketin kaunopada ire pwukat ni ahnsou me konehng pwehn sewese kitail en mwohneki wia kupwure!