Rong oh Esehla
1. Dahme kahrehda kitail anahne nanti pwe kitail en rong oh esehla ni mihting tohrohro?
1 Ahnsou keren mihting tohrohr en pahr 2013 pahn tepida. Doadoahk laud wiawi pwehn kaunopada prokram me pahn kasalehda anahn en riatail kan nan sampah pwon rahn pwukat. Ke koasoanedier en iang towehda koaros mihting tohrohr en rahn riauo? Kak mie mehn kerompwa tohto nan mihting tohrohr laud kan, kahrehda kitail anahne doadoahk laud pwehn rong kanahieng padahk kan. Pwehki ahnsoun padahk kan eh kin reireisang mihting en mwomwohdiso, kitail anahne nannanti rong kanahieng. Patehng met, seiloak oh soahng teikan kak kahrehda kitail en pwang. Dahme pahn sewese kitail en pepehd pwe kitail en kak rong oh esehla?—Deud. 31:12.
2. Ia duwen atail pahn kaunopada atail mohngiong ong prokram en mihting tohrohro?
2 Mwohn Mihting Tohrohro Eh Tepida: Neitail Web site, www.jw.org, kihda prokram en mihting tohrohr, iangahki oaralap en padahk koaros oh ehu de riau iren Paipel kesempwal akan nan ehuehu padahk. Ma kitail kak doadoahngki Internet, atail pahn kilangla met mwowe pahn sewese kitail en ‘kaunopada atail mohngiong’ ong dahme pahn kohda. (Esra 7:10, NW) Ni ahnsoun amwail Kaudok en Peneinei ni soutik, kumwail kak koasoiapene prokram en mihting tohrohro pwe koaros tohnpeneinei en kak kasikasik mihting tohrohro?
3. Dahme pahn sewese kitail en rong kanahieng?
3 Erein Prokramo: Ma kak, e mwahu en kohla imwen kainen mwohn prokram pahn tepida. Kakunla noumw cell phone pwe ken dehr kedirepwki emen eh pahn eker de teksi uhk de ke men teksi meteikan erein prokramo. Ma ke sohte men kakunla noumw cell phone, wia met ni ahl ehu me sohte pahn kerompwa meteikan ma mie me eker uhk. Ma ke pahn doadoahngki tablet erein prokramo, wia met ni ahl ehu me sohte pahn kerompwa meteikan. Dehr kangkang de niminim mehkot erein prokramo. (Ekl. 3:1) Kilangwohngete me wia padahk. Ni ahnsou me iren Paipel pahn wadawad, iang wadek sang noumw Paipel. Ntingihdi ire kesempwal kan.
4. Ia duwen pahpa oh nohno ara kak sewese neira seri kan ren rong oh esehla?
4 Kitail pil men neitail seri kan ren rong oh esehla. Lepin Padahk 29:15 mahsanih: “Ma seri men pahn mweimweiong pein nsene, e pahn kanamenekihala ine.” Kahrehda, e mwahu kisin peneinei en mwohdpene pwe pahpa oh nohno en kak tehk neira seri kan pwe ren rong kanahieng audepen prokramo ahpw kaidehn koasoakoasoi, teks seli, de alialuhseli. Mehnda ma re nohn pwulopwul en wehwehki padahk koaros, seri kan kak kaiahn en pepehd oh mwomwohd sohte katairong.
5. Ia kamwahupen en kousapahlih padahk kan, oh ia duwen atail pahn wia met?
5 Mwurin Prokram en Ehuehu Rahn: Dehr pepehd werei. Mwadang meirla pwe ken kommoaldi mwahu. Kousapahlih dahme ke rongehr pahn seweseiuk ken tamataman. Kahrehda, e pahn mwahu en doadoahngki minit kei pwehn koasoiapene padahk kan nan peneinei ehuehu soutik. Ma ke pahn iang kompoakepahmw kan kohla wasahn mwenge, ke sou wahda doaropwe me ke ntingihediong ire kesempwal kan oh ehukihong irail ehu de riau ire me ke keieu perenki? Ni amwail pwurala ni imwamwailo mwurin mihting tohrohr, kumwail kak doadoahngki ekis ahnsou ong Kaudok en Peneinei ni soutik pwehn koasoiapene ia duwen amwail pahn kak doadoahngki ire kan nin duwen peneinei ehu. Ke pil kak koasoanehdi ahnsou ehuehu wihk pwehn kousapahlih ekei ire kan sang soahng kapw kan.
6. E itar en iang towehdahte mihting tohrohr? Menlau kawehwehda.
6 Kamadipw ehu sohte pahn katepe ma aramas sohte mwenge. Kitail kak ndahki soahngohte duwen kamadipw me pid padahk kan sang Paipel me kin kohda ni mihting tohrohr. Kitail pahn uhdahn paiekihda ehuehu padahk en mihting tohrohr ni atail kin rong kanahieng oh kapwaiada dahme kitail sukuhlki.