Ahnsou Kaperen Ehu me Siohwa Kin Ketin Kamwenge Kitail
1. Iaduwen Siohwa kin ketin sewese sapwellime ladu kan en ahneki ar nanpwungmwahu reh?
1 Siohwa kin kasalehda limpoak ni eh kin ketin sewese sapwellime ladu kan en ahneki ar nanpwungmwahu reh. Mendahki sampah wet kin mi nan irair en duhpek en ale padahk mehlel sang rehn Koht, kitail kin ale padahk mehlel ahnsou koaros. (Ais. 65:13) Ehu ahl me Siohwa kin ketin kamwenge kitail iei sang Kapokon en District kan nan ehuehu pahr. Ke kin kaunopada pwe ken iang towehda padahk kan koaros nan Kapokon en District me oaralap mahsanih “Mweidohng Ngehn Sarawi en Kahluwa Mour”? Koasoandi ieu me Siohwa pahn ketin kamwenge kitail wiawihdahr.
2. Dahme kitail anahne wia pwehn kaunopadahng kapokon?
2 Koasoanehdi Mwowe: “Wiahda omw koasoandi ni keneinei, ke ahpw pahn ahneki dipwisou tohto.” (Lep. Pad. 21:5) Eri, pwehn koasoanehdi mwahu pwe ken iang towehda koasoandi koaros en kapokon, ke dehr pwand en koasoiong ahmw kaunen doadoahk. Ma ke pahn ahnane wasahn pweidi, ke koasoanedier soahng pwukat? Ke pahn pil men en koasoanehdi mwengehn souwas pwe ken kak iang riomw kan mwenge ni wasahn kapokon. Wiahda koasoandi pwehn mwadang lel wasahn kapokon ehuehu rahn pwe ken kak diarada nan dewomw oh iang tepikihda koul oh kapakap.
3. Soangen likou dah me konehng kitail en likawih?
3 Kitail pahn men tehk kanahieng pwe likou me kitail pahn likawih en kin konehng oh soandi mwahu. (1 Tim. 2:9, 10) Kapokon en District kin wia ahnsou mwahu en kalohk ong meteikan nan atail wasahn kousoan. Ni atail pahn kin kapwatada ni ahl me kasalehda wahu oh doadoahngki neitail badge ni wasahn kapokon, e kin sansal atail weksang mehn liki oh kin sansal mwahu mwohn meteikan.
4. Dahme pahn sewese kitail oh atail peneinei kan en uhdahn paiekihda prokramo?
4 Rong Kanaiehng: Kitail sohte men luhs sang mehkot ni ahnsoun kamadipw wet! (Lep. Pad. 22:17, 18) En iang wadek iren Paipel kan oh ntingihdi ire kesempwal kan pahn sewese atail madamadau en rong kanaiehng prokramo oh dehr mweidohng soahng kan en kerempwa kitail. Eri ni soutik, kitail kak doadoahngki ire kesempwal kan me kitail ntingdi sang prokram oh ehukihong meteikan. Nan sounpar kei me keren, e dierekda me mie ekei me pwulopwul kan me kin mwohdpene nan ahnsoun kapokon oh koasoakoasoipene ni ahnsou me prokram tepidahr de irail kin ntingpene doadoahngki cell phone kan. Ma mie neitail seri kan, iangahki me pwulopwul, e pahn konehng kitail en mwohdpene oh rongorong prokramo nin duwen peneinei ehu ah kaidehn kitail en mweidohng neitail me pwulopwul kan en mwomwohdseli rehn me pwulopwul teikan.
5. Iaduwen atail kak kalaudehla atail perenki kapokono?
5 Perenki Werekpene: E kin inenen kaperen en mwengepene rehn kompoakpatail kan. (Lep. Pad. 15:17) Duwehte met, atail perenki audepen kapokon ehu kin laud mehlel ni atail kin ehuiong riatail Kristian kan. Eri, ni ahnsou me prokram sohte wiawi, ia uwen kaperen en tiengla mwowe oh tuhwong meteikan oh werekiong irail! (Mel. 133:1) Ni ahnsou me chairmano kin lokaia kadek oh luke kitail en mwohndi mwohn koul pahn tepida, kitail ahnane uhdi atail koasoakoasoi oh mwohndi pwe prokramo en kak tepida.
6. Kasalehda duwen pein ahmw ekspiriens me pid iaduwen kitail kak kalohk ong meteikan me mih nan kahnimw me kapokono kin wiawi ie.
6 Onopadahng Kalohk Ahnsou Koaros: Kapokon kin wia ahnsou mwahu en kalohk. Tohto irail tohn kapokon kan me kin kohla nan wasahn mwenge kan mwurin prokram kin tuhwong tohndoadoahk kan me kin men idek duwen oaralap en kapokon me ntinting pohn neirail badge en kapokon. Met kin wia ahnsou mwahu en koasoiong irail oh ehukihong irail padahk mehlel. Ekei me wia peidek kan ale luhk en iang towehda kapokon oh irail eri iang kohla.
7. Dahme kahrehda kitail en iang towehda kapokon en district me pahn wiawi?
7 Awa kid kei kin anahn pwehn kaunopadahn prokramo, koasoanehdi wasahn kapokon, koasoanehdi wasahn apwalih kapokon, oh kaunopada padahk kan. Soangen doadoahk limpoak pwukat koaros me kohwong kaunopadahn kamadipw wet kin kasalehda sapwellimen Siohwa epwel keneinei me kin kohwong sapwellime aramas akan. Eri, kitail koaros en iang towehda oh paiekihda uwen atail kak! Ni atail wia met, kitail pahn weksang aramas en sampah wet oh kin ‘kokoulki atail peren.’—Ais. 65:14.
[Kaokon nan Pali 4]
Mehn Kataman kan ong Kapokon
◼ Kuloak en Prokram: Wenihmw kan pahn ritida kuloak 8:00 ni menseng. Ni ahnsou me keseng pahn tepida, kitail koaros en mwomwohndien nan dewetail kan pwe prokram en kak tepida ni ahl me kasalehda wahu.
◼ Koasoanehdi nan Dewetail: Ke kak koasoanehdi wasahn mwohndi kan ongete irail kan me iang uhk nan weromw sidohsa de irail kan me kin kousoan rehmw.
◼ Meirong kan: Kitail kak kasalehda atail kalahnganki koasoandi en kapokon akan sang ni atail pahn kin kihda atail sawas en mwohni ong doadoahk en kasukuhl en Paipel me kin wiawi nan sampah pwon. Ma ke pahn ntingihdi check, ke kak ntingihdi “Watch Tower” nan lain me ntingdi “Pay to the order of.”
◼ Mwengehn Souwas: Menlau wahdo kanamwail mwengehn souwas nan wasahn kapokon oh ieremen kohkohsang wasahn kapokon pwehn ale kanamwail mwenge. Ke kak wahdo kisin cooler (mehn wisik mwenge) nan wasahn kapokon ma e pahn kak mihmi pahn ahmw sehr. Doupen mwenge de pihl kilahs oh sakau en wai sohte mweimwei nan Kingdom Hall.
◼ Aksident oh Irair Karuwaru: Ma aramas emen pahn soumwahuda de ma mie irair karuwaru ehu me pahn pwarada nan wasahn kapokon, menlau tuhwong attendant me keieu karanih iuk me kak mwadang kehsehkin uhk wasahn wini (First Aid) nan wasahn kapokon pwe aramas me samanih wini en kak tehk irair en aramaso oh sewese ih.