Ke Kaunopadahr en Iang Kamadipw?
1. Ia duwen kitail kin kaunopada ong kamadipw?
1 Kamadipw ehu anahne doadoahk laud. Soangen mwenge tohto anahne en kaunopada oh wiawihda pwe koaros en paiekihda. Koasoandi mwahu anahne wiawi ong nehnehpeseng en mwenge. Patehng met, wasa me aramas pahn mwengepene anahne kaunopada mwahu. Irail me pahn towehda pil anahne kaunopada mwahu ma irail pahn kohsang wasa doh. Mendahki me doadoahk laud anahne wiawi, met katapan pwehki kitail kak iang kompoakpatail oh atail peneinei paiekihda mwenge mwahu kan. Sounkadehdehn Siohwa kan nan sampah pwon pahn kereniong iang ehu kamadipw, iei mihting tohrohr ehu me oaralap mahsanih “Kumwail Mwasamwasahn!” Doadoahk laud tepidahr wiawi pwehn kaunopada prokram oh pil soahng teikan me anahn. Luhk kohwong kitail koaros en iang towehda. Pwe kitail en kak iang towehda oh paiekihda, kitail pil anahne kaunopada mwahu pein kitail.—Lep. Pad. 21:5.
2. Dahme ke anahne wia pwehn iang towehda rahn pwon?
2 En Uhdahn Paiekihda: Ke kaunopadahr mwahu pwehn iang karonge padahk kan koaros nan kamadipw wet? Ma anahne, koasoiong omw kaunen doadoahk me ke pahn iang rong padahk kan rahn pwon. Ke kaunopadahr pwe ken kak lella wasao ni rahno? Elder kan anahne tehk mwahu pwehn mie sawas kan ong me mah kan oh irail me kohwahki soumwahu oh pil meteikan me anahne sawas.—Ser. 23:4; Kal. 6:10.
3. Dahme kahrehda kitail en dehr iang kapokon laud kan ma kitail sohte ale luhk?
3 Nan ekei sahpw kan, mie kapokon laud kan me luhk pahn kohwong brother kan nan sahpw teikan. Tamatamante me mie mwomwohdiso kan oh irail kan me kohsang sahpw teikan me ale luhk en iang kapokon pwukat. Pwehn wiahda koasoandi pwukat, ohpis en Sounkadehdehn Siohwa kan kapatahdaier aramas depe me pahn ale luhk pwehki uwen tohtohn aramas me kak iang towehda oh uwen tohtohn hotel kan me mie. Kahpwal laud pahn wiawi ma sounkalohk kan me sohte ale luhk pahn iang towehda.
4. Soangen mehn kataman dah kei pahn sewese kitail en kaunopada pein kitail ong prokram?
4 Kaunopada pwe ken mwadang lella wasahn mihting mwohn prokram pahn tepida. Doadoahngki minit kei mwohn prokram pahn tepida pwehn tehk padahk kan me pahn wiawi. Met pahn sewese iuk en kaunopada omw mohngiong ong padahk kan. Ni en chairmano pahn pakairki ahnsoun keseng, mwohndi oh rongorong oh onopada pwe ken iang tepin koul oh kapakap.
5. Ia duwen atail peneinei kak paiekihda padahk kan?
5 Ma peneinei ehu pahn mwohndipene, pahpa oh nohno kan pahn kak tehk mwahu ma neirail seri kan kin rong kanahieng padahk kan. (Deud. 31:12) Ni ahnsou me brother me wia padahk pahn doadoahngki iren Paipel kan, koaros anahne kilang nan neirail Pwuhk Sarawi. En ntingihdi ire kesempwal kan kak sewese iuk en karonge mwahu padahk kan. Mwuhr dahme ke ntingihdi pahn sewese iuk en tamanda ire kesempwal kan. Powehdi omw ineng en koasoi oh uhda alialuhseli erein padahk. Ma mie noumw cell phone, kakunla pwehn dehr kauwehla omw rongorong oh pil en meteikan ar rongorong padahk kan. Mwurin padahk kan, ke sou pahn koasoiaiong meteikan dahme ke perenki?
6. Dahme kitail anahne medewe duwen atail likou me kitail pahn likawih?
6 Likou: E kesempwal en tamanda me Siohwa ketin padahkihong mehn Israel kan en wiahda pengkir ni pwungipen arail likou kan oh kihong kisin sahl poh mei. (Nemp. 15:37-41) Met kin wia mehn kataman ehu me irail aramas tohrohr kei me kin kaudokiong Siohwa. Rahnwet, atail likou mwahu me kitail kin doadoahngki ni ahnsoun mihting tohrohr wet pahn kasalehda me kitail weksang aramas en sampah suwed wet. E pahn wia mehn kadehde mwahu ong irail kan me pahn ele kilang kitail ni atail pahn kohla ni wasahn mwenge kan mwurin prokram en rahno. Kahrehda ke anahne medewe mwahu dahme ke pahn likawih.
7. Ia duwen kitail kak kalohk ong meteikan ni rahnen atail mihting tohrohr?
7 Wia Kalohk: Ma ke pahn ekis kaunopada, ke pahn kak kalohk ong aramas akan ni rahnen atail mihting tohrohr. Emen brother oh eh pwoud kohla ni ehu wasahn mwenge mwurin prokram oh kasalehda nah badge ong emen tohndoadoahk oh idek reh: “Ke kilang aramas tohto me doadoahngki badge wet?” Tohndoadoahko eri sapeng me e kilang irail oh e pil medemedewe dahme re wiewia. Met imwikihla ara koasoipene oh brothero kak luke ih en iang towehda mihting tohrohro.
8. Ia duwen kitail kak kasalehda atail kalahngan ong Siohwa me ketin luke kitail?
8 Mendahki riatail kan pahn wia padahk kan oh kamwomwada kan, samatail nanleng Siohwa me kin ketikihda ni limpoak kamadipw kan nan ehuehu pahr. (Ais. 65:13, 14) Kitail kin kasalehda atail kalahngan ong ih me kin luke kitail sang ni atail kin iang rong padahk kan koaros me pahn wiawi. Ke kaunopadahngehr en wia met?