Idawehn Krais ni Atail Kasalehda Wahu
1. Iaduwen oaralap en kapokon en pahr wet kin pil pidete en kasalehda wahu?
1 Paipel kawehwehda duwen Kaun Lapalap, Siohwa, ah kin ketin kapwatkihda lingan. (Melkahka 104:1) Sises kin ahnsou koaros koasoi oh mwekid ni ahl ehu me kin kawauwih Seme oh koasoandi en Semeo. (Sohn 17:4) Emenemen kitail pahn ahneki ahnsou mwahu en kahlemengih Sises oh wahdo lingan ong Siohwa erein Kapokon en District me oaralape “Idawehn Krais!” me pahn kohdo.
2. Iaduwen atail kin kaunopada en pwarodo ni ehu ehu prokram kin kawauwih Siohwa?
2 Kaudok ni Wahu: Kitail kak kawauwih Siohwa sang atail pahn koasoanehdi en iang towehda kamadipw en pali ngehn me e kaunopadahr ong kitail. Ke koasoiongehr ahmw kaun en doadoahk oh koasoanehdi omw irair kan pwehn iang towehda ehu ehu prokram en kapokon? Ke koasoanehdier en kohla mwadang pwehn kilangada wasahn mwomwohd oh iang tepin koul oh kapakap? Ke koasoanedier omw mwengehn souwas pwe ken kak iang riomw kan mwengehte wasahn kapokon? Ni tepin ehu ehu prokram, ahnsou me chairman ni kadek luhke kitail en mwohndi mwohnte koul tepida, kitail anahne mwadang kauhdi atail koasoakoasoiapene oh mwohndi pwe prokram en tepida.
3. Iaduwen rong kanahieng prokramo kin kihong wahu en atail kaudok?
3 Rong kanahieng prokramo pil kin kawauwih Samatail nanleng. Mwurin emen ohl ah tehk ehu kapokon en district, e ntingihdi me soun kilikilang kan pahn perenkihda “kahlemeng mwahu en irail akan me iang towe, ni arail kin idawehn dahme padahk kan kin koasoia ni wahu meleilei.” Ohl menet pil koasoia duwen kapwuriamwei en “uwen tohtohn seri . . . , koaros nennenla mwahu de kin kedirepwki tetehk iren Pwuhk Sarawi kan.” Ni ahnsou me prokramo tepidahr, kaidehn ahnsoun koasoakoasoi mwahl, ntinglahng emen ni doadoahngki cellphone, mwengemwenge, de alialuhseli mwahl. Me pwulopwul kan anahne mwohndi rehn arail pahpa oh nohno kan pwe ren kak sewese irail en paiekihda prokramo. (Deuderonomi 31:12; Lepin Padahk 29:15) Soangen ngoang pwukat kin kasalehda me ke wauneki meteikan oh pil kalahnganki mwengehn ngehn kesempwal kan me kin kohda.
4. Dahme kahrehda kitail anahne kasalehda wahu ni mwomwatail ni ahnsoun kapokon?
4 Ni Mwohmw mwahu: Me tohto kin kasalehda arail kalahnganki mehn kataman kan en padahk me wiawi nan kapokon en district en pahr nekiero “Kasalehda Wahu en Kristian Ahnsou Koaros,” me kasansalehda me sapwellimen Koht sounpapah kan anahne wia uwen me re kak en kasalehda wahu en Kristian ni arail likou oh mwomwarail. Pahr wet kitail anahne pwurehng tehk ire wet ni keneinei. Mwomwatail kin kasalehda atail pepehm ong Siohwa oh ong kapai en wia sapwellime Sounkadehde kan. Kitail anahne ahnsou koaros likouda nin duwen me “poadidi kan.”—1 Timoty 2:9, 10.
5. Iaduwen kitail kak tetehk mwomwatail en kin kasalehda wahu erein ahnsou en kommoal nan wasa me kapokono wiawi?
5 Kitail en kasalehda wahu ongete ahnsou me kitail iang towehda prokramo? Tamataman me tohto pahn kilang kitail doadoahngki neitail badge en kapokon kan. Mwomwatail anahne kasaleikitailda sang wehi pokon. Ihme kahrehda, mendahte ma ni ahnsou en kommoal, kitail anahne likouda ni mwomwen sounkalohk kan me kohpene ong ni kahrepe en towehda kapokon en Kristian oh sohte anahne likawih soangen likou kan me duwehte rausis dengkiri, lepin rausis, de T-shirts. Ia uwen kadehde me e pahn wia ong wasahn kousoano! Siohwa kin ketin kupwurperenki ni ahnsou me mwomwatail kin kasalehda atail pwukoa en sounkalohk kan.
6. Ia kamwahu kan me kin pweida mwahu ni atail pahn kasalehda wahu en Kristian?
6 Imwila Pweida Mwahu kan: En kasalehda wahu en Kristian ni atail kapokon kan kin kihda ahnsou mwahu en kalohk ahnsou soh lipilipil oh kihong irail akan me kin kilang kitail en ahneki lamalam pwung duwen kitail. Ni imwilahn ehu kapokon, emen ohl kilelehdi: “Se saikinte kilang soangen aramas me wiewia mwahu duwehte met. Amwail wiewia kan, ihme Koht kupwurki kitail en wia.” En kasalehda wahu kin wia kasalepen limpoak ong emenemen oh kalinganahda Siohwa. (1 Piter 2:12) E kin kasalehda atail lemmwiki ih oh kalahnganki kapai en ale kasukuhl sang Samatail. (Ipru 12:28) Kitail en ngoangki kasalehda wahu ni atail pahn kasik kapokon en pahr wet me oaralape “Idawehn Krais!”
[Kawehwehpen kilel kan nan ehu ehu pali 5]
Mehn Kataman kan ong Kapokon
◼ Koledi Wasahn Mwohndi: En koledi wasahn mwohndi kan ongete irail akan me iang uhk, de me kin koukousoan rehmw.
◼ Mwengehn Souwas: Menlau wahdo mwengehn souwas a kaidehn ken kohkohsang wasahn kapokon pwe ken ale konoumw mwenge ni ahnsoun kommoal en souwas.
◼ Meirong kan: Mwohni laud me kin doadoahk pwehn koasoanehdi kapokon en district. Kitail kak kasalehda atail kalahngan sang atail toukihda atail sawas kan.