Kapokon en District me Oaralap Koasoia “Peikiong Koht”
1 Atail Kapokon en District me kin wiawi nan pahr koaros kin kihong kitail ahnsou mwahu kan en kapinga Siohwa. Atail pepehm kan me duwehte en Depit, ni e koulki: “I pahn kapingkalahngan ong komwi nan mwomwohdiso; I pahn kapinga komwi nanpwungen tohnmwomwohdiso kan koaros.” (Melkahka 35:18, NW) Ni ahnsou me Kapokon en District me oaralap koasoia “Peikiong Koht” pahn wiawi, iaduwen kitail kak kasalehda me kitail men miniminkihpene atail kapinga Siohwa?
2 Likou oh Kapwat: Kitail en ahneki lamalam aktikitik ni atail pahn doadoahngki likou oh kapwat me pahn kasalehda wahu oh kapinga Siohwa. (1 Tim. 2:9) Pwuhken Benefit From Theocratic Ministry School, pali 132, kin koasoia: “Ma aramas emen kin ahneki lamalam aktikitik, e pahn nantihong wia soahng kan me sohte pahn kansensuwedihala meteikan oh e sohte pahn kala oh perenki kasalehda paliwere.” Nan ekei sahpw, aramas kin kalap doadoahngki likou kan me sohte konehng Kristian. Ahpw, Siohwa kin kesempwaliki oh kalahnganki dahme kitail kin wia pwehn kasalehda atail wauneki Ih ni ahnsou me kitail kin wia pilipil mwahu kan me pid duwen atail likou oh kapwat. (Wiewia 15:14) Kahrehda, ni atail kin pokonpene mwohn Siohwa, kitail en doadoahngki likou oh kapwat me pahn kasalehda me kitail men wauneki Ih me Keieu Lapalap nanleng oh sampah.—1 Kronikel 29:11.
3 Wauneki Sapwellimen Siohwa Tehpel en Mwengehn Ngehn: Kaun Lapalap en lahng oh sampah kaunopada tehpel en mwengehn ngehn ong kitail. (Aiseia 25:6; 1 Kor. 10:21) Ma kitail kesempwaliki deuetail ni sapwellimen Siohwa tehpel, kitail pahn nantihong rong padahk kan koaros me pahn wiawi ni Kapokono. Kumwail koasoanehdier wasa kan me kumwail pahn mih ie, mehn peidaid, oh pekihda ahnsoun kommoal sang ahmw doadoahk en mwohni? Kumwail koasoanehdier ahnsou itar ong kaunopada oh seiloaklahng wasahn kapokon pwehn kak lel wasahn kapokon mwadang pwehn kak rapahki deuemwail, koasoiong brother oh sister teikan, oh iang irail kapinga Siohwa ki koul oh kapakap?—Melkahka 147:1.
4 Wauneki sapwellimen Siohwa tehpel pahn kamwekid kitail en rong kanahieng prokram en kapokon oh dehr koasoakoasoi mwahl ong irail me mwohd limwatail, mwengemwenge, de aluseli mwahl likin Kingdom Hall. Siohwa kin ketin doadoahngki pwihnen “ladu lelepek oh loalokong” en ketikihda mwengehn ngehn me kitail anahne ahnsou wet. (Madiu 24:45) E kesempwal kitail en rong padahk kan koaros nan kapokon wet. E pahn mwahu ma pahpa oh nohno kan pahn mwohndi rehn neirail seri kan oh sewese irail pwe irail en pil paiekihda prokram kesempwal wet.—Deuderonomi 31:12.
5 Kitail kasikasik ahnsou mwahu wet pwehn kapinga Siohwa “nanpwungen tohnmwomwohdiso kan.” (Melkahka 26:12) Kitail en miniminpene ni atail kapinga Siohwa ni Kapokon en District me oaralap koasoia “Peikiong Siohwa.”