Kitail en Likih Siohwa
1 Aiseia mahsanih: “Siohwa iei Koht en kadeik. Meid pai irail kan me kin likih Ih.” (Aiseia 30:18b, NW) Mie ire tohto nan Paipel me kin kasalehda ahnsou kan me Koht kadeikada oh kasohrala sapwellime imwintihti kan oh kapitala sapwellime ladu lelepek kan. Mehn kasukuhl dah kan me ire pwukat kin kasukuhliki irail sapwellimen Siohwa ladu kan rahnwet? Dahme kitail kak wia pwehn kaunopada ong “Rahn Lapalap oh Kamasepwehk en Siohwa”? (Soel 2:31, 32) Atail Kapokon en District me pahn wiawi nan pahret me oaralap koasoia “Kamourala Kerendohr!” pahn kamwekid kitail en medemedewe peidek pwukat oh kasawih pein kitail. E pahn sewese kitail en likih Siohwa.
2 Ke wiahdahr koasoandi kan pwe ken kak paiekihda kapokon wet? Karasepe, ke tuhwongehr ahmw kaun en doadoahk pwe ken peki reh ken kak kommoal rahn en kapokono? Ke dehr soukautih met. Kapakapki irair wet. Mwuri, wia ahmw pekipek. (Nehmaia 2:4, 5) Oh pil, kitail en dehr soukautih en wiahda atail koasoandi ong sidohsa, wasahn pweidi de pil anahn teikan. Atail wiahda soangen koasoandi pwukat pahn kasalehda atail kalahnganki laud sapwellimen Siohwa tehpel en mwengehn ngehn. Elder kan anahne tehk oh sewese irail akan me anahne wiahda koasoandi kan ong kapokono, mehlel irail me mah kan nan mwomwohdiso.—Kalesia 6:10.
3 Tiahk Mwahu Kin Kawauwih Koht: Ni atail kin pokonpene ni uwen tohto ieu ni kapokon kan, atail tiahk mwahu kin wia mehn kalohk mwahu nan atail wasa. Dahme kitail anahne wia? Ni atail kin kohla nan hotel, wasahn mwenge kan, oh wasahn pisnis kan, atail ehuiong aramas akan me mihmi nan soangen wasa pwukat pahn perenki atail kasalehda irair en Kristian kan, duwehte kanengamah, karakarahk, pwand en mwakar oh toupahrek. (Kalesia 5:22, 23; Pilipai 4:5) Seri kan en kin ahnsou koaros iang me mah kan. (Lepin Padahk 29:15) Arail wiewia mwahu kan en wahdo kaping ong Siohwa oh kaperenda sapwellime mohngiong!—Lepin Padahk 27:11.
4 Likou oh Kapwat me Konehng Kristian: Emenemen kitail kak iang kihda mehn kahlemeng mwahu ni kapokono sang ni atail pahn kaleke pwe atail likou oh kapwat en dehr alasang sidail en sampah me daulihla oh sohte konehng Kristian. Nin duwen sapwellimen Koht ladu kan, kitail pahn keieu nsenohki kawauwih mwaren Siohwa, kaidehn pein nsenatail de nsenamwahu. Kaun en peneinei kan ahneki pwukoa en nsenohki en tohn arail peneinei kan arail likou oh kapwat en kin konehng oh kasalehda wahu ahnsou koaros.—1 Timoty 2:9.
5 E pil kesempwal kitail en doadoahngki likou oh kapwat me konehng Kristian ni atail kin mwemweit ni hotel kan, sidohwa kan oh wasahn mwenge kan. E wia mehkot konehng en likawihte atail likou en kapokono kohla mwenge mwurin kapokono. Ni atail pahn doadoahngki neitail doaropwe me kin pakairki oaralap en kapokono ni ahnsou me kitail kohseli, e pahn kihong kitail atail ahnsou mwahu en kalohk.—2 Korint 6:3, 4.
6 Aiseia kohpada: “Siohwa ketin kaunopada en kupwurmwahuwih kumwail oh kupwurmahk ong kumwail.” (Aiseia 30:18a, NW) Atail kin kalahnganki sapwellimen Siohwa kadek oh mahk kin kamwekid kitail en kawauwih Ih sang ni atail wiewia kan, atail likou oh kapwat kan ni atail kin pokonpene ni atail kapokon kan. Atail Kapokon en District me oaralap koasoia “Kamourala Kerendohr!” en wahdo lingan oh kaping ong atail Koht, Siohwa, oh sewese kitail en likih Ih!
[Peidek en Onop]
1. Ia oaralap en atail Kapokon en District, oh dahme kahrehda e pwungiong atail ahnsou?
2. Iaduwen atail kak kasalehda atail kalahnganki atail Kapokon en District?
3. Iaduwen atail wiewia kan kak wahdo kaping ong Siohwa?
4. Iaduwen atail kak kawauwih Siohwa ki atail likou oh kapwat?
5. Dahme kahrehda e konehng kitail en doadoahngki likou oh kapwat me konehng Kristian pil ni ahnsou kan me kitail kin mwemweitseli?
6. Iaduwen atail kak iang wia pwe soandi mwahu oh peren en mie nan atail kapokon? (Kilang “Mehn Kataman en Kapokon kan.”)
[Kaokon nan Pali 5]
Mehn Kataman en Kapokon kan
◼ Rapahki dewomw oh mwohndi mwohn prokram en kapokon e pahn tepida pwehn kak soandi mwahu.
◼ Menlau wahdo mwengehn souwas ong wasahn kapokono pwehn dehr anahne kohla likin wasahn kapokono ni kommoal en souwas.
◼ Sent laud kin doadoahk pwehn kaunopada ong kapokon. Kitail kak kasalehda atail kalahnganki met ni atail pahn kihda atail sawas.
◼ Dehr mweidohng cell phone kan de pager kan en kauwehla ahn aramas arail rongorong prokram en kapokon.